《《陳夫人》日譯台e5台灣小說 第一部》 |
 |
 |
|
 轉寄 |
《陳夫人》第一部 第三章（更新版）
作者 庄司總一 著 楊東傑 指導 林俊育 台譯 2017.04.02
新婚ê玫瑰棉被排除一切世間ê煩惱，一年時間kah-ná眠夢過去。陳家年輕夫婦ê新居也已經完工，tī本來凹形建物ê一pêng，接續落去增建二樓ê西洋式樓á厝，內底特別為安子設計一間八塊tha-tha-mih大ê日本式房間，漆過油漆ê檳榔樹床柱kah樟樹目紋ê棚架，kā tsit間tha-tha-mih房間加添異國風味；樓á厝內底當然mā有便所kah舖地磚ê siau-uah (shower)浴間，iáu有西洋式ê客廳kah冊房，koh有葛籐棚ê樓台，以及ē-tàng仰望南國星辰ê厝頂庭園等等。舊厝是一棟續接起做伙ê kui簇厝，它ê棟樑彎曲，牆圍á生青苔；tsit棟竹林包圍ê純中國式khiā家，kah增建ê現代樓á厝比較起來，形成一種無調和ê對比。Tùi舊厝內傳來古典哀怨旋律ê絃á聲，另外新厝tsit pêng有聽見貝多芬á是蕭邦雄壯華麗ê現代音樂。這對陳家ê人來講，感覺真無爽快。In對清文beh起新厝有讓一步，m̄-koh反對伊起樓á厝。幾代落來，陳家lóng無分厝，家族漸漸增加，也增建真tsē新厝，形成一個大家族，總是，所有ê厝頂lóng bē-sái比廳堂ê厝頂khah koân；這m̄-nā是嚴格ê規矩，mā是一般ê常識慣例。總是，清文ê樓á厝看會tio̍h廳堂ê厝頂，久長歷史所傳承落來ê秩序kah調和，beh tùi tsit間新派建築ê一角崩落去à；老一輩ê人lóng怨嘆吐氣。Koh來，清文mā對家族無衛生ê習慣á是不良風俗，發言糾正；親像bē-sái phùi痰tī地面，bē-sái用手挖鼻孔，洗尿桶ê水bē-sái潑tī庭園等等。總是，對in來講，感覺tsit款ê責備真好笑，因為in認為in所做ê一屑á都無lah-sap，也無m̄好；若是講無清氣、pháiⁿ習慣，只不過是比較性 ê問題niā-niā。日本人tī厝角囤積屎尿ê習慣，西洋人看起來是絕對無衛生。總是，西洋人相tsim，嘴唇可能有結核菌，咱看起來mā是真無衛生。Koh再講，無食無煮過ê物件ê台灣人，看日本人食sa-si-mih mā感覺會起雞母皮。所以，若kā衛生習慣kah單純ê風俗習慣當做文明ê標準，未免是有khah幼稚ê想法；這只不過是文明人對無清氣kah pháiⁿ風俗ê反感khah強niā-niā。
Án-ne講起來，清文驚hiah-ê tāi-tsì，kah-ná teh證明伊是一個文明人。伊討厭台灣文化ê劣勢，suah bē記得去kā它愛護，kan-taⁿ tāi先感覺輕視。伊kan-taⁿ嘴講tio̍h改善陳家ê生活環境，卻驚手bak垃圾，suah無beh下動去做。伊掛文明誇耀ê手套，目頭結結，kan-taⁿ beh póe塵埃。其實伊無kā厝裡ê人看在眼內，kan-taⁿ急beh提高in夫婦兩人ê生活水準。另外一方面，伊mā kan-taⁿ關心kā家己推出，踏入去社會ê tāi-tsì；tī政府機關ê聚會場合，清文常常高談闊論，mā tiāⁿ-tiāⁿ tī公會堂講演。清新ê思想、豐富ê學識，加上正確ê日語發音kah充滿熱情ê聲量，ē-tàng充分迷惑聽眾；市民早to̍h開始注意清文tsit-ê傑出英才。
雖然是án-ne，清文內心iáu是心內不安。高等官ê任命一直延遲無下落，hō͘ 伊真著急，煩惱是m̄是伊家己ê價值無受肯定，á是這是出tī民族偏見。
陳家ê人對長男夫婦ê現代化新厝感覺真無爽，另外一方面mā是感覺好奇來看待in。無探查別人，尤其是女性ê房間，是台灣人ê好習慣，所以雖然大家心存好奇，mā bē入去in ê厝內底。總是，in ê gín-á lóng天真無邪，想beh入去to̍h入去。安子會hō͘ in糖á餅kah tshit-thô物，所以kah in變真熟似；in ê老母tī外面大聲huah，gín-á mā無想beh tńg去。其中有幾個已經讀公學校(譯註：日本時代ê小學)，會曉日語，真ài聽日本ê童話故事。來過清文新厝ê大人，kan-taⁿ小弟景文kah瑞文，in兩人常常來借用hú-loh桶洗身軀。後來老父阿山mā發見浸hú-loh桶ê爽快，就常常來洗浴。因為安子對阿山有好感，所以比對別人khah親切teh kā伊款待；她kā伊沖kha脊phiaⁿ，koh hō͘ 伊穿家己縫製ê浴衣。阿山kah平常時仝款，露出溫純ê笑容講：「好，多謝，多謝！」伊非常歡喜。有時浸hú-loh桶起來，tī樓台ê椅á坐teh歇睏，安子就開電風hō͘ 伊吹，koh phâng冷飲hō͘ 伊lim。
樓台ê頭前有一個整齊ê小庭園，無松kah梅，m̄-koh，有多樣色彩葉á巴豆、千歲蘭、榕樹、印度樹木、仙丹花、台灣蓮花、白奶藤等等，koh有將近一丈koân ê仙人掌當teh開白色ê花。Tsit-ê庭園ê內角續接陳家自早to̍h有ê廣闊後埕，園內ê南國樹木蒼翠茂盛，不斷傳來細隻鳥á可憐ê叫聲。Koh khah內面ê圍牆邊á有竹林，成群結隊ê暗光鳥飛來飛去，ná親像竹á頂teh落雪。
「阿爸，你身上ê傷痕是án怎來ê？」
有一pái，安子下決心án-ne kā伊問。阿山ê肩胛到kha脊phiaⁿ有一條斬tio̍h ê大傷痕，浸hú-loh桶ê時，安子看tio̍h lóng會驚一tiô，想講到底he是án怎來ê。
「He是我ê武勇故事。」
阿山就慢慢á講起hit-ê傷痕ê由來。伊ê日本話ná親像gín-á無完整ê講話，聽起來真食力，m̄-koh，意思大概是án-ne：
四十年前有一暗，陳家受一團土匪包圍。Hit時，阿山tī老父ê房間裡，趕緊gia̍h掛tī壁頂ê槍，beh衝出去外口。老父忽然tùi內面kā門鎖起來，倉倉pōng-pōng阻擋in kiáⁿ。阿山hit當時二十二、三歲，tú娶bó͘，血氣當旺。
老父ê房間外傳出tsa-bó͘人「哀哀叫」ê悲慘聲；縛腳ê tsa-bó͘人tī tsit款危急ê時刻，koh khah陷落tī無法度抵抗ê狀態。阿山急beh救出新婚ê bó͘，m̄-koh，無膽ê老父哀求伊mài出去，kā伊ê手ńg giú tiâu-.teh m̄放。
過一時á，動亂靜落來，賊á搶奪物件了後已經退去ê款。阿山槍(tshiuⁿ) gia̍h-.teh衝入去家己ê房間，一個賊á手gia̍h大刀khiā tī眠床邊。In bó͘ 失神倒tī眠床頂，阿山掠準她已經被thâi死à，因為她橫身倒leh。Tsit時，賊黨已經撤退，事不延遲，tsit-ê掠賊ê好機會to̍h tī面前，若去hō͘ 伊走去就真可惜，伊就四界tshōe賊。阿山tùi賊á ê背後，出力kā槍tsa̍k去，真可惜hit-ê賊á已經有注意tio̍h，身軀閃開，槍尖kan-taⁿ tùi賊á ê kueh-lang-kha穿過。賊á反tńg用青龍刀大力斬tio̍h阿山ê肩胛頭。
Hō͘ 賊á走去tsit件tāi-tsì，阿山ê威武故事ê光彩有小khóa減少。總是，hit當時家族內無一人像伊hiah勇敢。這雖然mā是因為年輕血氣旺ê關係，m̄-koh，伊本來就是khah笨tshiâng，對事務無容易搖動ê人。普通tsit種得意ê古早事，會hō͘ 人感覺情節真緊張，所以講起來自然會加油添醋；將近半世紀前發生ê tāi-tsì tsit-má講起來，事實ê頂面koh加上一kóa幻想，suah jú講jú膨風，suah kā家己當做英雄。M̄-koh，阿山大人時時笑容滿面，ná準普通故事慢慢á teh講。
「以前不管tó一個國家，kah tsit-má無仝，社會真亂；hit時，阿母一定大tio̍h驚，佳哉你有脫險。Tsit-má ē-tàng安樂過日子，lóng是hit當時阿爸你ê勇敢表現。」
「她m̄是阿嬌，hit-ê老母已經過往à。」
「Ah！Tsit-má你講ê是....？」
安子無了解，所以án-ne問。她想講hit時伊ê新bó͘ kah tsit-má ê老bó͘ 阿嬌有可能是無仝人。總是，阿山tèⁿ m̄知，無koh講起。
「以前真tsē土匪、賊偷，tsit-má khah安全，真好。日本政治，真好，真好。」
Tsit句話絕對m̄是扶tháⁿ ê話，tī伊六十年ê生涯中，siōng大ê tāi-tsì to̍h是政治變化。Tsit-ê政治變化，就是台灣hō͘ 日本統治，無論如何是歡喜ê tāi-tsì。阿山到壯年為止hit段清國統治ê時代是啥物款？Kah伊tú-tsiah講ê仝款—兇徒匪賊橫行，無法度高枕無憂。尤其是資產家，in性命財產無保障，加上官衙ê刻薄剝削，致使有雙重ê痛苦。Hit時，街路iáu狹kheh koh lâ-sâm，惡疫不斷。長男清文ê頂面本來iáu有兩個tsa-po͘-.ê，in to̍h是有一年流行寒熱病ê時過身去ê。Kah過去生活困難ê時代比較起來，現今ē-sái講是超過安全ê安全。阿山身軀洗了，theⁿ-tī樓台ê籐椅á頂，深深感受tio̍h太平ê氣氛，目tsiu kheh-kheh kah-ná teh眠夢。長男清文娶日本bó͘ tńg來ê時，阿山心內一時無爽快，m̄-koh，清文tsit-má堂堂做官，新婦koh性情溫柔，而且因為án-ne，koh享受tio̍h一生lóng m̄-bat經驗過ê浸hú-loh桶ê快樂，加上súi koh年輕ê新婦親切招待，就án-ne，伊to̍h m̄-bat koh加講話。總講一句，阿山tsit-ê人bē-sái講是用頭腦接受文明開化ê恩惠，伊kan-taⁿ ē-sái講是用皮膚感覺ê快樂主義者。
M̄-koh有一工，安子teh kā阿山沖kha脊phiaⁿ ê時，ta-ke阿嬌tsông來到tè，大聲嚷。阿山倉倉pōng-pōng，身軀bē赴拭ta就穿衫褲，想beh講幾句話來安慰in bó͘，m̄-koh，阿嬌ê激動teh bē-tiâu。她一手thuh柺á，一手由tsa-bó͘-kán-á kā她tshah-.leh，用嘴來補她身軀ê無自由；阿嬌一支嘴tshiah-pê-pê，非常厲害。安子hit-tsūn bat幾句簡單ê台灣話，m̄-koh，ta-ke氣phut-phut，講話koh緊，安子聽無她teh講啥物。
厝裡ê人聽tio̍h阿嬌大聲keh-keh叫，tùi ta̍k-ê房間出來，khiā tī新厝ê窗á腳。阿嬌行出hú-loh間，向kui大陣ê家族，發表街頭演說講：「大家聽我講，hit-ê日本新婦摸阮翁ê身軀，koh是tī人teh看ê面前bē見bē笑án-ne做。我活六十gōa歲à，iáu m̄-bat受過tsit款ê侮辱。Hit-ê tsa-bó͘人面皮有夠厚，是敢kah ta-kuaⁿ行姦淫ê妓女，是一個淫婦lah。」安子若是聽有tsiah-ê話，一定會暈倒。阿嬌吐出tsiah-ê垃圾pháiⁿ話了後，箭頭轉向in翁阿山講：「Hit-ê ta-kuaⁿ kám有像ta-kuaⁿ款？ 老khok-khok也無啥物氣力，koh是一個老不修，tio̍h kā伊khah嚴厲管轄tsiah tio̍h。總是，tsit-ê老不修kah hit-ê tsa-bó͘人kô͘-kô͘纏lah！我本來to̍h大反對娶日本新婦入門，m̄-koh，阿山lám-nōa koh無志氣，結果發生tsit款tāi-tsì。聽起來kah-ná野狗ê交合，真m̄是款，竟然堂堂娶入門，欺騙大家來辦婚宴，kám m̄是一個厚面皮ê大騙子？Lín想看māi，tsit款人kám-ē-sái做陳家ê後嗣？咱若忍耐落去，in to̍h會koh khah得意，kā咱看做ná狗á貓á，看咱bē起；hō͘ in án-ne無法無天，hō͘ 咱動肝火，hō͘ 咱咬牙切齒。Ueh！Lín大家感覺án怎？Kám bē受氣？」
Ta-ke阿嬌ê嘴kah-ná受氣ê噴火口，她激動ê情緒無thang tháu，人ta燥kah用龍眼樹ê柺á kòng地板。她一時想bē出好辦法，就kā tsa-bó͘-kán-á beh kā她扶ê手pue̍h開，用家己ê tò手揮舞。M̄-koh，無人kā她扶ê身軀搖hián，有向前倒落去ê危險。
阿嬌ê抗訴引起各方面ê回應，觀眾ta̍k-ê lóng是感情性 ê厚話ê女性，所以忽然間引起喧嚷ê旋渦。安子m̄知beh án怎tsiah好，á當事人老父阿山m̄知逃去tó位？伊無在場，無人ē-tàng同情她，來為她辯護。尤其是次男景文ê bó͘玉簾一直teh附和阿嬌ê話，呼應阿嬌ê講法，氣勢真iāⁿ。玉簾面形長，頭毛烏sìm-sìm，目tsiu kah-ná龍眼籽，烏koh大蕊，hō͘ 人妖豔ê感覺；她濃妝koh美麗ê穿插，掛金銀、翡翠ê裝飾品，tī女性家族中算是真影目。安子想講tsit-ê人是無法度幫她ê忙，她就四界tshōe看有人thang來救她脫離困境。Tsit時，她發見三男ê bó͘春鸞khiā tī人影後，就行óa去想beh請她助一臂之力。春鸞感覺同情，kā她看一下，就隨時目tsiu 看下腳。春鸞淺烏色ê圓面，厚眼皮內面ê目tsiu仁無真清亮，鼻孔、嘴唇lóng無啥物特徵，kah in阿嫂玉簾比起來，顛倒有khah淺白ê面色。她做人謹慎，khah無嘴尾，日本話相當gâu講。安子就拜託她來做翻譯，beh知影ta-ke講啥物，為啥物受氣，家己若做m̄-tio̍h就需要賠罪。總是，春鸞無beh答應，無意無意，藏入去人影內面。Tī tsit種四面楚歌ê狀況下，忽然出現一個救星，就是春鸞ê翁瑞文。安子iáu未kā tāi-tsì講suah，瑞文就勇敢行去老母ê面前，開始替阿嫂辯解。伊當然無法度hō͘ 阿嬌理解鎮靜落來。另外一方面，聚集óa來ê女性家族中間，插嘴ê kah罵聲四界發出，瑞文只好也tio̍h向in解說。伊講kah面紅耳赤，揮手頓腳，目屎mā流落來。
安子知影koh拖落去mā無法度解決問題，就走離開hit-ê所在。她se̍h過家己ê小庭園á ê角邊，行出去廣闊ê後庭園，ná來ná躊躇ê腳步，tī樹木中間se̍h來se̍h去。
「阿嫂ah！」安子無gōa久to̍h聽tio̍h有人teh叫，ua̍t頭看，原來是為tio̍h她拚命辯解kah面青sún-sún ê瑞文teh行óa來。 瑞文ê目tsiu 內iáu有興奮kah受氣ê火氣，伊安慰安子講：「阿嫂，請 原諒，大家lóng真過份，請mài掛意。」
「無要緊！實在真pháiⁿ勢，suah hō͘ 你變做受人怨慼(tshè)。」
「這無啥物，我為tio̍h你啥物tāi-tsì lóng願意做，我非常同情你受委屈ê立場，非常....非常。」
「M̄是án-ne lah！是我khah han-bān，ta̍k項lóng無了解，等khah了解咱ê習慣kah話語了後，我想大家to̍h會khah接納我，因為我tsit-má啥物lóng m̄-bat。」
「Tio̍h lah！阿嫂，今á日ê攪擾mā是習慣無仝來引起ê。Tī台灣男女ê tāi-tsì真費氣，男女七歲起就bē-sái坐做伙。Hit款思想到taⁿ iáu有，所以tsa-po͘人bē-sái隨便入去tsa-bó͘人ê房間，連老父mā bē-tàng入去tsa-bó͘-kiáⁿ ê房間。因為án-ne，你kā老父洗身軀tsit件事mā….。」
「Oh！是án-ne oh！我實在m̄知，我想講he是好tāi-tsì。Tī日本內地，kā tsa-po͘人沖kha脊phiaⁿ，無人會責備，何況是對老大人。」
「M̄-koh，引起hiah-ni̍h大ê攪擾ê原因m̄是kan-taⁿ tsit件事，其實阿嫂受大家怨慼....m̄是，受人怨慼ê是清文大兄。Lóng是阿兄m̄好，伊展威風，固執koh壓霸，所以大家對伊無好感。實在講起來，伊有khah超過lah！」
瑞文kah其他家族ê人仝款，對清文不滿，就án-ne怨言to̍h開始。安子恬恬無講話，她真了解in翁做人siuⁿ過份，清文án-ne做kám好？她開始煩惱起來，m̄-koh，真明顯ê責備聽了siuⁿ-tsē，mā會感覺無爽快，她就想beh替清文辯護。
「因為伊長期間tī日本內地生活，suah bē記得家己出世生長ê家鄉ê風俗習慣。伊ê做法過份是事實，m̄-koh，伊無感覺家己輕視家族ê人koh展威風。夾tī新舊社會ê中間，感覺真pháiⁿ適應，koh硬beh設法突破，我想伊是án-ne ê情境lah，一屑á惡意都無。伊真條直koh m̄知妥協ê方法，所以會hō͘ 人誤解。」
「條直kah bē曉妥協？我想m̄是án-ne，是因為伊激骨lah！阿兄講起來mā是無幸福。」
「你講伊是無幸福ê人？」
安子驚一tiô。清文是擁有百萬財富ê家族ê大kiáⁿ，就是一般所講ê含(kâm)銀匙出世。伊koh有優秀ê頭腦，tī hit當時ē-tàng去難得ê日本內地留學，koh得tio̍h最高學府ê畢業證書。伊lóng無欠半項，想beh ài啥物lóng得會tio̍h。伊tú-tio̍h siuⁿ好ê境遇，suah kā伊sēng了過頭，tsiah hō͘ 伊有個性強ê原因；這是安子ê想法。
「因為娶我，就受無必要ê勞苦，我感覺真遺憾....。」
「M̄是án-ne！阿兄m̄是kan-taⁿ hit-ê tāi-tsì，iáu有其他ê問題，伊kah老母ê關係....。」
「Kah老母ê關係....？」
「阿嫂kám無注意tio̍h in中間無好勢？」
「Eh，比bē和koh khah嚴重；kah-ná外人，一屑á親情都無。」
「是ah！阿嫂kám m̄知？阿兄kám lóng無kā你講？」 瑞文露出真無了解ê面容，續落去用憤慨ê口氣講。：
「真奇怪ê人！若是我對家己siōng愛ê bó͘，啥物tāi-tsì lóng會講，好事pháiⁿ事，尤其是艱苦心ê tāi-tsì，koh khah需要吐出來tháu氣，祈求得tio̍h安慰tsiah tio̍h ā！清文大兄做bē到，可見伊ê自尊心真強，koh真固執。阿嫂mā是真可憐ā！」真可憐lah！參雜台灣話腔ê tsit句話，聽起來tī語感上增加微妙ê哀愁感覺。老父阿山無熱心koh靠bē住ê情份是另外一回事，陳家全家kah-ná lóng是她ê敵人，kan-taⁿ三男瑞文對她有同情kah理解；雖然是不可思議，m̄-koh，安子感覺無論tī啥物所在，神lóng有為伊安排一兩個友善ê人，hō͘ 她感覺有óa靠。起初，安子感覺瑞文是一個討厭ê青年，頭毛抹油，麻紗ê外衫漂出phang水味，皮膚滑溜有一點á蒼白，五官頭面是三兄弟中間siōng秀氣ê。起初，感覺瑞文討厭討厭，tsit時感受tio̍h伊ê親切，suah感覺伊變成一個天真無邪ê貴公子氣質，看起來iáu真gín-á款，hō͘ 人m̄敢相信伊已經是一個有bó͘-kiáⁿ ê人。
瑞文一時順勢無注意講出來，kā連丈夫都對她隱瞞ê tāi-tsì講出嘴，多管人ê閒á事，m̄知有適當á無，家己suah起躊躇。伊感覺mài講出來hō͘ 它自然過去khah好，就對阿嫂講：「你有想beh食柚á無？若想beh食，我peh起lih樹á頂挽。」無意識中，兩人ê腳移動幾步，行到果樹中ê一欉柚á樹腳。Tùi青綠色ê枝葉中間，安子看tio̍h果實kah-ná裝飾垂落來，豐碩ê柚á tī金色ê秋陽中發光閃sih。安子仰望，胸坎á自然展開，柑橘類特有ê苦味kah酸味參雜ê氣味，thàng到胸坎內底。
「等一下tsiah peh樹á，請先講你tú-tsiah提起ê tāi-tsì。」安子雖然著急，m̄-koh用鎮靜ê聲請求。想beh知丈夫有啥物重大ê tāi-tsì ê時，卻忽然抱tio̍h tsit種晴朗koh充滿微笑ê態度，安子對家己ê無謹慎自責，所以改變口氣，koh講一pái。
「Neh，你講清文ê不幸是指tó一項tāi-tsì，我lóng m̄-bat聽伊講過。伊lóng m̄-bat對我講起，顯然是重大ê tāi-tsì。你講伊kah老母ê關係是....？」
「清文兄m̄是老母ê親生kiáⁿ。」
聽tio̍h tsit件tú知ê事實，安子就明白最近老父阿山講tio̍h年輕時ê威武故事。Hit當時安子忽然感覺ê疑問，tsit-má tùi瑞文ê話得tio̍h解答。Án-ne ê答案雖然有夠額，m̄-koh，tsit件事實所產生出來有關清文ê境遇，以及以後所發生ê種種tāi-tsì，安子當然mā有想beh詳細知ê好奇心。總是，hiah-ê枝葉問題問丈夫本身mā是ē-sái；安子想講tsit-má急beh tùi第三者來探聽，對丈夫來講是一種侮辱。M̄-koh，瑞文已經講出來à，kah-ná堤防崩一隙（khiah），無辦法thang挽救ah。瑞文知影阿兄清文是tsa-bó͘-kán-á生ê，to̍h是私生子lah！Tsit件tāi-tsì厝裡ê人lóng知，無算是啥物秘密。總是，kan-taⁿ in bó͘ 安子m̄知。Tsit時，老母阿嬌ê pháiⁿ聲sàu態度中，mā有講出tsit-ê侮辱人ê事實。話語bē通ê安子當然無了解，án-ne無知受騙，一般來講伊是幸福ê，瑞文suah反tńg感覺he是悲慘ê tāi-tsì，所以bē禁得憤慨起來。
Tsit-má ê家長阿山起初有一個叫做金枝ê正bó͘，夫婦生一女兩男。M̄-koh，有一年流行嚴重ê瘟疫，bó͘ kah兩男hō͘ 病魔奪去性命。Hit時，猛烈ê瘟疫大流行，棺材供不應求ê悲慘情景，家族內mā有其他四人死亡；阿山ê bó͘ kah後嗣一時連續死亡。阿山m̄是為tio̍h tsit種不時ê需要；其實tī tsit-ê慘事發生tsìn前，伊一時疏忽花心，kah一個叫做玉女ê tsa-bó͘-kán-á生kiáⁿ，tsit-ê kiáⁿ就是清文。講是失去後嗣ê不便，其實也是beh安慰創傷ê心靈，阿山就考慮beh kā tsa-bó͘-kán-á生ê kiáⁿ來做伊ê後嗣。台灣人用錢買來ê差用叫做tsa-bó͘-kán-á，hō͘ 人看輕，m̄-koh，hit當時台灣ê繼承制度非常敗壞混亂，細姨生ê á是tsa-bó͘-kán-á生ê，照父母ê旨意kā伊當做正後嗣ê情形mā有。以陳家ê家世，bē-tàng隨便，所以阿山ê希望當然引起反對。總是，阿山無beh放棄清文，伊雖然個性隨和，m̄-koh，伊一生中堅持到底tio̍h照伊ê意見來做ê，只有tsit件事。當時iáu活leh ê阿公kah老父，lóng屈服阿山ê熱情。總是，為tio̍h beh kā hit-ê kiáⁿ當做後嗣，伊就必須kā hit-ê tsa-bó͘-kán-á納入做正bó͘，因此kan-taⁿ手續上辨理結婚。其實，當時阿山是年輕好色，對玉女並無愛情，所以照計畫，結婚了後隨時離婚，hit-ê tsa-bó͘-kán-á就被趕出陳家。另外一方面，tī tsit件tāi-tsì發生tsìn前，阿山已經有一個細姨叫阿嬌。阿嬌美貌，m̄-koh是一個乖癖ê女強人，阿山無想beh kā她升做後siū，m̄-koh，阿嬌逼好性地ê翁，無gōa久就得tio̍h後siū ê地位，koh生景文kah瑞文，以及其他所有出嫁ê tsa-bó͘- kiáⁿ。
因為阿嬌想beh hō͘ 親生kiáⁿ景文做陳家ê後嗣，所以lóng kā清文當做kah-ná眼中釘來kā伊養飼長大，而且清文是一個優秀ê gín-á，後母koh khah嫉妒khioh恨。漢學á ê老師tiāⁿ-tiāⁿ褒獎講：「tsit-ê gín-á是神童！」就是因為伊有聰明ê頭腦，體格koh koân大勇壯。小弟景文mā m̄是thûi-thûi，mā是相當結實，m̄-koh，tī讀冊tsit方面to̍h kah阿兄無tè比，而且體格mā khah細漢，看起來to̍h輸伊真tsē。M̄-koh，伊有親生母做強ê靠山，ta̍k項tāi-tsì lóng m̄認輸，經常kah阿兄相phah。M̄-koh，無論án怎對抗，景文總是hō͘ 結實ê阿兄壓倒tī土腳teh哭，huah救人。見若兄弟相phah ê tāi-tsì，阿嬌lóng kah-ná tú-tio̍h殺人事件teh喧嚷，kā清文掠來用竹棍á phah kha-tshng-phóe。清文無感覺受phah ê痛是一種教訓，顛倒ē-sái講是jú受虐待jú phah小弟，一直到兩人lóng超過十歲，tsiah忽然停戰。Gín-á到tsit-ê年齡，縛腳ê阿嬌想beh掠清文來phah，mā已經m̄是hiah容易ê tāi-tsì à！而且準講掠tio̍h，beh phah tsìn前，家己顛倒會hō͘ 清文sak倒。Koh景文本身有覺悟，tī學問kah體力，伊真oh得kah阿兄對抗，而且清文對使用gín-á性ê暴力來解決問題bē-tàng得tio̍h滿足；伊已經進入複雜人生ê階段。另外一方面，hit當時伊已經開始去教會，成做一個bat tāi-tsì ê少年人。Hit當時，親tsiâⁿ中間有一個阿嬸是基督徒，常常tshōa清文去教會，無gōa久就入教會辦ê小私學á讀冊，tī hia讀台語聖經，學羅馬字(白話字)。除了ē-tàng讀冊，清文也真緊對信仰熱情起來，老師Mak-nè-l（Mcnneil）宣教師特別疼惜清文，無gōa久tsit位外國人就安排伊去日本神戶讀教會學校。因為有tsit-ê契機，伊以後就繼續tī日本內地受教育。
「後來ê情形，阿嫂一定真清楚tsiah tio̍h。阿兄去日本內地十幾年，其中真少tńg來厝裡，ē-sái講是算無幾pái。阿兄kah你是án怎熟似ê？是戀愛結婚ho͘ⁿh？真好neh。」
瑞文真欣羨，án-ne講。伊tùi án-ne發覺阿兄ê運命，想起來mā是kah其他ê人仝款，對清文抱tio̍h反感kah欣羨。容貌優秀koh智慧比人khah koân一段；瑞文對日本人時時lóng án-ne teh看待，所以伊想像kah日本婦人結婚是何等ê súi。M̄-koh，嫉妒以外，hit-ê súi ê感覺是脆弱ê，伊若想起來，to̍h隨時有稀微ê感覺，就bē爽快，所以對安子ê同情有參雜討厭。
「Hit-ê叫做玉女ê老母，後來變án怎？」
「Ah！無啥清楚。M̄-koh，kah-ná是去tó位ê田庄做田。我會記得bat見過hit-ê tsa-bó͘人，我五六歲ê時，確實是tī hit pêng！」瑞文kí一phō竹，繼續講：「我有看tio̍h in母kiáⁿ見面，tsit-ê穿kah無啥好看ê tsa-bó͘人the̍h糖á hō͘ 阿兄。她kah-ná是pôaⁿ過牆圍á，偷偷á入來厝宅內ê款。」
「她káⁿ是真艱苦心，不幸ê老母ho͘ⁿh！」
「無no͘h，ná會是án-ne！」瑞文帶真輕視ê口氣講：「橫直是一個無受教育ê下等tsa-bó͘人。Hit款tāi-tsì隨時就bē記得，來kah親生ê kiáⁿ見面，前後mā是kan-taⁿ hit-pái。Hit-ê tsa-bó͘人是老父一時ê好色，到taⁿ iáu時常hō͘ 人當做笑話teh講起。無論án怎講，玉女是一個身軀粗魯，皮膚烏烏ê bái tsa-bó͘ lah！」Tsit種侮辱ê講法，mā是對安子本身ê侮辱。總是，對he感覺bē爽快以外，安子koh khah感覺陷入憂鬱ê氣氛。Tāi-tsì既然是án-ne，安子想講無論koh khah án怎努力，mā無法度kā家己tī陳家ê立場變好。這hō͘ 她忽然感覺無奈，心情開始墜落。 「是án怎leh？失禮lah！阿嫂。我講了siuⁿ過頭，hō͘ 你心情bē爽快。」
安子忽然沉思起來，恬恬無講話，看她ê面teh流目屎ê款，瑞文hō͘ 伊tùi幸福之座小khóa溜落來，雖然有一點á歡喜，m̄-koh，伊原本是出tī一番好意，所以伊心內iáu是感覺有虧欠，就安慰她講：
「請mài掛意，一切tāi-tsì lóng過去à！Tsit-má無tāi-tsì à！清文大兄堂堂是陳家ê後嗣。來，我挽一粒柚á hō͘ 你。」瑞文peh起lih樹á頂，挽一粒手掌大ê黃色球形ê柚á。為tio̍h beh hō͘ 安子歡喜，就用明朗ê聲huah:「我是猴山á，你是毛蟹，我beh tìm落去loh！」瑞文就做出beh出力tàn柚á ê手勢。
「Ah！危險！」安子身軀退後，一粒柚á tú-tú好lak tī她ê胸前，她用雙手kā它接起來。Gia̍h頭一看，瑞文ê腳掛tī樹枝，雙手展開掠tiâu枝椏(ue)，le̍k目眉koh露出牙齒，裝做猴山á ê款式hō͘ 安子看，安子自然笑出聲來。
安子ê笑聲hō͘ 背後一個tsa-po͘人ê大聲笑phah斷去，她tsiah注意tio̍h是翁婿清文下班tńg來，穿官服行óa來。
「你teh tshòng啥？瑞文，你kám是siuⁿ閒teh學猴山á ê款式？」清文ê心情算是bē bái，若無，安子感覺kah-ná hō͘ 伊看tio̍h無妥當ê tāi-tsì，一時心肝tshia̍k一下；peh起lih樹á頂ê瑞文mā m̄敢koh學猴山á ê款式。
白奶藤
