《《陳夫人》日譯台e5台灣小說 第一部》

 | | | 轉寄

《陳夫人》第一部 第四章（更新版）

作者 庄司總一　著 楊東傑 指導 林俊育 台譯 2017.04.09

Hit暗，因為清文beh去赴宴會，所以無tī厝裡食暗頓。伊無lim酒，所以真畏參加宴會。因為年輕koh tú出社會，無酒氣tsiū無興趣聽hiah ê戇話；聽tio̍h別人講好淫ê話，á是看tio̍h in戲弄藝妓ê款式，伊lóng感覺真無爽快。若kā日常生活中綑縛人ê道德規律ê外衫thǹg掉，人就kah-ná脫出理智ê貝殼，成做顯出軟siô-siô koh khiap-sì本能ê軟體動物；in可能認為án-ne是極其自然ê tāi-tsì。有人時常teh講：「人生難得糊塗一時。」總是，beh糊塗比beh聰明khah容易，退步比進步khah簡單。In認為in án-ne ê生活方式是自然ê，m̄-koh，自然ê無一定to̍h比無自然ê khah好。Tùi受清教徒教養ê清文看起來，人生ê意義m̄是在tī啥物是自然，應該是啥物是siōng好。因為án-ne，伊tī辦公廳無啥物人緣。「Ueh！清文卿來ā！」In互相án-ne teh kā伊恥笑，掠清文ê清氣相(siùⁿ)當做笑話。清文並m̄是bē曉社交，mā m̄是無幽默感，m̄-koh，伊ê社會性kah幽默感lóng是透過一種清教徒主義ê面紗來看，所以kah世俗人，尤其是kah hiah-ê當時殖民地散慢koh粗魯ê官員格格不入。Tī宴會等ê場合，清文ê自我清高特別影目，hō͘ in對清文感覺礙gio̍h；清文本身mā tiāⁿ-tiāⁿ對hiah-ê應該對殖民地政治負大責任ê官員起受氣。
「Tú-tsiah ê柚á hō͘ 我。因為我無lim酒，宴會中腹肚iau kah beh死。」

清文beh出門ê時án-ne講，kā tú-tsiah安子peh好ê柚á塞入去嘴裡。安子mā kah伊tàu陣teh食柚á，講：
「Ah！真好食！我真ài食柚á，m̄-koh，我感覺今á日ê特別好食。」
「因為已經真熟à，koh是tú-tsiah挽落來ê。」清文kah-ná無啥物tāi-tsì ê款，án-ne回答。M̄-koh，ia̍h m̄是第一pái食ê普通水果，tsit-má卻講特別感覺好食，清文感覺怪怪，就目tsiu 大大蕊kā in bó͘ tsîn，忽然想起tú-tsiah瑞文kah安子ná準耍(sńg)kah真心適ê鏡頭。 安子完全無想tio̍h hit件事，只是感覺淺桃色ê柚á肉tī齒齦中哺(pō͘ )起來，氣味實在有夠好。因為她ê舌感覺tsit種柑橘類ê滋味特別好食，tsiah hō͘ 她確定家己已經有娠loh。
「今á日看你歡喜kah án-ne，kám有啥物好事？」
「Ngh，大概是有娠ā，tsit幾工to̍h想beh kā你講，m̄-koh，無真確實以前講出來khah無好，tsit-má真正....。」
「原來柚á好食ê謎就是án-ne oh！」

清文連對家己猜疑感覺見笑ê時間都無，心內馬上充滿驚喜koh快樂。 「聖Ga-bu-li-el（譯註：英語Gabrial：報馬利亞基督懷孕ê天使) suah尾就來報喜loh！」清文ê歡喜帶有相當ê安心；正式ê結婚手續iáu未完成以前若生kiáⁿ，當然是煩惱ê tāi-tsì。總是，tsit-má手續已經好勢à，兩人lóng想beh有kiáⁿ兒，m̄-koh一直無受胎ê款式。兩人實際上ê夫婦生活已經有五年久à，安子嫁來陳家mā已經三年久，m̄-koh一直無胎，厝裡ê人謠傳講她是bē生kiáⁿ；她家己本身mā煩惱可能是án-ne。清文歡歡喜喜去赴宴會，安子心情mā比平常khah愉快，kā今á日tú做好ê台灣衫the̍h來試穿看māi。伊thiau工無hō͘ 清文知，暗中所做ê台灣衫，ing暗是頭一pái穿tī身軀頂。

安子去照三面鏡看家己ê姿態，kah她ing暗愉快ê氣氛真sù配，家己就微微á笑起來。Hit領衫ê布料是叫做「紡綢」ê羽二重(譯註：ha-bu-ta-e=はぶたえ)，純白ê底印花樣，有清新ê氣味，m̄-koh裁剪了siuⁿ過合身，雖然身材看起來真苗條，m̄-koh無親像和服hiah-ni̍h寬爽ê感覺。Koân kah tú-tio̍h下頦(hâi) ê頷(ām)領，hō͘ 頷頸(kún)看起來真細，m̄-koh siuⁿ過人工化，hō͘ 人感覺怪怪，致使全體ê體型看起來無合(ha̍h)；若koh詳細看，裙下腳ê鞋á kah-ná有siuⁿ大ê款。其實鞋á ê寸尺是9.7吋，絕對m̄是大腳，m̄-koh，目tsiu ê習慣真驚人，台灣衫iáu是khah適合拳頭母大ê縛腳鞋；安子án-ne想。

清文一向無參加二次會，hit暗koh特別提早tńg來厝裡。
「Ah！真罕得看你穿支那服。」
「怎樣，kám無合身？」
「真合身，tang時買ê？」
「最近量身定做ê，今á日tsiah做好ê，想beh hō͘ 你tio̍h驚一下....；
這是我偷偷á去做ê，因為是第一pái穿，感覺無啥習慣。M̄-koh，支那服都bē bái neh。」
「Ngh，bē bái。」

清文kah-ná感覺無重要án-ne講，無koh kā她o-ló。安子原本想講beh hō͘ in翁tio̍h驚一下，期待清文會koh khah來歡喜她。她用渴望ê眼神看清文，想bē到伊suah無啥反應，所以hō͘ 她真意外koh感覺失望。
「你kah-ná無kah意支那服neh。」
「並m̄是無kah意....，m̄-koh，洋裝khah好lah！你ná會無ài穿洋裝leh？」
「我感覺pháiⁿ勢pháiⁿ勢。」
「有啥物thang好pháiⁿ勢ê？」

清文感覺不服，án-ne講。清文買hō͘ 她齊全ê名牌洋裝、春天外套、帽á kah鞋á等等，m̄-koh，安子lóng無beh穿出門。Hit當時，因為iáu未流行洋裝，安子保守，所以m̄敢穿。

「辦公廳同事ê bó͘ mā有人穿洋裝，街面也漸漸有看人teh穿洋裝ā，無啥物thang好pháiⁿ勢ê lah。見笑ê觀念是封建ê產物，以後ê社會，婦女得tio̍h解放à，ē-tàng大pān進出社會，婦女tī社會ê地位當然mā會提高。你mā是矯風會ê會員，koh是教會婦女會ê幹事，koh khah應該勇敢起來活動tsiah好ā。Tī社交界成做一個名女人，mā m̄是pháiⁿ tāi-tsì ā。」
「我tsit-má已經真正受扶tháⁿ à。去到教會，大家lóng稱呼我陳夫人，陳夫人ê人氣siuⁿ好，mā是會hō͘ 我傷腦筋neh。」
「Kám án-ne？ Á無我下pái來去你所屬ê教會看māi leh。」清文屬tī英國長老教會，這是台灣歷史siōng早koh是教勢siōng大ê基督教教派，信徒差不多lóng是台灣本島人。清文因為tsēng細漢就tī hia受教育ê關係，所以tsit-má mā lóng去hit間教會禮拜。安子是屬tī日本基督教會，夫婦去無仝間教會禮拜。

清文聽tio̍h in bó͘ tī教會真有人氣，感覺真得意歡喜；安子án-ne講，其實並無誇耀ê心。

當時，歐洲大戰後ê景氣好，社會一直繁榮起來，精神上也有產生一種好景氣。因為hiông狂o-ló kah追求新ê物件，致使lóng無teh顧舊物件ê價值。因為是tī tsit款ê時代，所以kah台灣人結婚ê陳安子，就被稱讚，成做行tī時代尖端ê婦人，lóng無受tio̍h輕視侮辱ê眼光。尤其安子是百萬富翁ê夫人，koh khah hō͘ 人扶tháⁿ。安子熱心去教會，這當然是因為她敬虔ê精神；m̄-koh因為社會上對她ê稱讚hō͘ 她心情爽快，這mā是人之常情。

總是，tsit款ê世俗、自滿、無純，án-ne kám好？安子忽然開始反省。基督教ê教訓中，無比謙卑koh khah重要ê。針對tsit點，安子bē-tàng無想講家己是信徒suah無注意tio̍h。當時，教會ê人也lóng是家己ê tāi-tsì放下leh，kan-taⁿ teh祈禱「拯救世界上可憐ê人，祝福全人類。」tsit款連上主聽tio̍h mā會苦笑ê祈求。眾婦女，無論是無信ê，á是當時一般ê婦女知識分子，lóng kah-ná tùi舊思想ê暗時向新時代ê早起時覺醒，提倡自由、和平、婦女參政權、男女平等，氣勢高揚。

清文mā是hit時代ê典型人物之一，所以伊mā希望家己ê bó͘ ē-tàng成做一個有新思想ê現代女性。安子真知影清文ê想法，tsit-má卻bē記得清文ài伊穿洋裝；想beh hō͘ in翁看她穿支那服來hō͘ 伊歡喜，suah顛倒hō͘ 伊輕視kah失望。安子對家己無智慧ê戇直kah倉pōng ê想法，感覺真無路用、真可憐。M̄-koh，若為tio̍h beh tòe會tio̍h時代來趕流行，她寧可入鄉隨俗，khah ài融入身邊ê環境來生活。

清文kā西裝thǹg落來，換穿上等布做ê日本和服teh beh歇睏ê時，景文來tshōe伊，講beh參詳tāi-tsì。清文ê面露出「又koh來ā！」ê無歡喜表情，不得已tshōa小弟入去西洋式ê房間。

最近景文常常來，差不多每隔一暗來一pái，koh是坐真久，hō͘ 兄嫂夫婦感覺真困擾。
「阿兄，今年咱tau ê甘蔗收成真無好，害蟲ê損失以外，koh hō͘ 風吹倒。製糖公司雖然每年hō͘ 咱改良ê蔗種，m̄-koh，這iáu m̄是真正定案ê種，而且最近tsit幾年，製糖公司漸漸收購農民ê土地，變做公司ê自作蔗園，kám m̄是？土地被收購ê佃農，不得不tio̍h做安定ê日工。所以咱ê田地最近因為腳手不足，真害。製糖業án-ne變做半官方ê經營，種甘蔗已經無利純ā，不如種稻á khah有利。」

像tsit款農民問題kah社會政策ê話題，清文iáu ē-tàng忍受，而且mā有熱情來講出意見。M̄-koh，景文講tio̍h tsiah-ê問題ê時，lóng無關心tio̍h思想，伊ê頭殼底只有收益kah利純ê得失而已。講tio̍h種稻á、鹽田、甘蔗園ê時，景文lóng一錢一厘詳細計算，翻閱賬簿，tia̍k算盤，針對經營法kah增加收益ê方法，真lô-lí-lô-so來徵求阿兄ê意見。 清文非常煩kah無法度；浪費伊暗時ê寶貴時間，感覺實在真可惜。為tio̍h beh充實旺盛ê求知慾，伊真想beh趕緊kiu去冊房，á是想beh有夫妻快樂ê時間，m̄-koh卻hō͘ 小弟ta̍p-ta̍p滴滴ê參詳kah討厭ê家計問題來剝奪伊ê時間，最後伊就明顯露出無歡喜ê面色，開始煩起來。總是，伊是長男，本來家己to̍h有義務直接擔當家族ê財政經濟，所以景文來參詳，清文若無好好á kā伊聽，難免會hō͘ 人笑講無負責任。總是清文經常受tsiah-ê雜事困擾，無法度有時間來充實家己，伊漸漸開始掛意tsit點。 偏偏tsit暗小弟來參詳ê，是有關分(pun)財產ê重大問題。
「Án-ne，tsiah-ê話kám kan-taⁿ是老母一人ê嘴講出來ê ？」清文tī小弟ê談話中途án-ne插嘴問。
「M̄是，厝裡ê人lóng有tsit款ê意向，是in向老母透露tsit-ê意思，所以顯然全家傾向tsit-ê氣勢。」
「總講to̍h是全家ê人對我不服，所以....。」
「M̄是án-ne lah！阿兄，這是因為....。」

景文結目搖頭，露出無hit款tāi-tsì ê表情。Hit-ê表情表示卑屈，也無不自然ê所在，也m̄是真激動，kah-ná無要無緊ê自然感覺。清文阿兄hō͘ 家族ê人起反感、討厭，甚至ē-sái講是khioh恨ê事實，伊家己本身lóng無去注意tio̍h；假m̄知假kah真自然，若m̄是有手腕ê商人á是老練ê政治家，to̍h看bē出伊腹內ê感覺。
「總講一句，老父照我看是無beh做tāi-tsì ê人，無法度整合全家ê意見。老父本身mā想講阿兄tńg來了後就beh緊退休，beh退休當然to̍h會有繼承ê問題，kui氣tshân-tshân來分財產，這是大家ê意見。實際上，咱陳家三代同堂，tsit-má家族siuⁿ過大，叔伯兄弟一直增加，萬事複雜，oh得處理。阿兄，kám m̄是án-ne leh？」
「Ngh，tsit點我mā明白，尤其是對管理厝裡萬事ê你來講，koh khah會感覺tio̍h繁雜ê苦楚。」

清文不禁對景文有所同情kah理解，所以án-ne講。雖然兄弟兩人互相性格無仝，tùi出世到生長過程來講，伊知koh khah án怎努力，互相之間ê親密mā是有一定ê限度。Taⁿ對方有表示相當ê尊敬，親身來參詳，清文也bē-tàng無kā伊回應；固執ê清文mā有手足親情tsit款軟心ê一面。
「Taⁿ時代改變à，社會已經比咱所想像ê koh khah進展，世界先進國家ê家族制度mā已經崩盤，咱台灣無gōa久也會進入tsit種時代。無no͘h，tsit-má已經來臨loh，你看，像ing暗你to̍h來tshōe我參詳。景文，以大家族做誇耀ê時代，可能會tī咱tsit-ê時代來落幕ā。」
「完全正確，尤其是阿兄服務tī kah家業無仝方面ê官界，koh khah是án-ne。若執守舊習慣，你tio̍h ài無閒厝裡ê雜事，會影響你升官ê前途，這可能是我khah家婆替你擔心ê。」

清文tú好teh想仝款ê tāi-tsì，所以對ing暗景文所提出ê意見想beh馬上表示贊同。總是，伊ê自尊心hō͘ 伊無露骨表現出來。伊對小弟不知足ê商人本性，內心看bē起伊，teh kā伊恥笑，m̄-koh，想tio̍h家己貪婪tī做官ê成功，tsiah加減有小khóa lún伊。清文一方面想講固執tī社會名譽是一種邪慾tsiah來kā伊反駁，另外tio̍h控制家己熱情ê基督徒，tio̍h用冷靜謙卑ê精神，mā是lún伊ê原因。
「M̄-koh，kám-tio̍h hiah緊急？咱tio̍h招親族同齊來參詳，我mā tio̍h koh再考慮一下。總講一句，這m̄是ē-tàng tshìn-tshái決定ê重大問題ā。」

清文強強壓落家己ê心，無表示tio̍h需要hiah-ni̍h迫切決定，所以hit暗ê參詳就結束。

安子出來奉茶ê時，兩兄弟用台灣話講ê內容她聽無，m̄-koh有感覺tio̍h kah平常時有小khóa無仝ê氣氛；她想講一定有啥物問題。果然tī景文離開了後，清文就kā她講景文ê來意。聽起來確實是重大ê問題，m̄-koh，安子對丈夫hiah-ni̍h有意beh分財產ê心理，真oh得了解。Tī台灣繼承財產，聽講kah日本內地由長男單獨繼承ê無仝，是兄弟全部公平分配ê款式。總是，假使丈夫m̄是有慾望ê人，對tsit件事mā無特別歡喜ê理由。Koh再講，假使各人分財產，m̄-koh iáu-koh kah原來仝款tòa做伙，án-ne，tsit-ê大家族ê複雜問題mā是無法度減少。
「無no͘h，無gōa久就會分厝，因為tsit-má分財產，真緊to̍h會分厝。事實上，景文mā有講，處理大家族ê tāi-tsì是真無容易。照目前ê情形落去，你mā是有真tsē艱苦ê所在，而且我是一個官員，m̄知tang時會職務調動。厝ê tāi-tsì無關係，有關係ê是我ê抱負無法度發揮。像講tú-tsiah景文來tshōe我講話，hō͘ 我非常困擾，suah無法度安心讀冊。」 冊房ê桌頂khǹg一本東京「丸善」冊店寄來ê H.G.Wells著ê「世界文化史大系」原文冊，清文想beh緊掀來讀。
「總是，你做一個長男有義務kah責任，你無法度逃避lah。」
「無no͘h，結局大家káⁿ tio̍h ài分厝。Tsit時分財產，會khah早分厝。事實上，景文mā講過à，beh照顧tsit-ê大家族m̄是hiah-ni̍h容易。到時若an-ne，你to̍h會不時有感覺無路用ê艱苦心。Koh再講，我是政府官員，m̄知tī時會hō͘ 人調職去tó位，就bē-tàng關心家事；若beh關心，就bē-tàng hō͘ 家己生存kah成長。Tsit-má景文不時來講tsiah-ê事，hō͘ 我真頭痛，想beh讀kóa冊mā bē-tàng。」

伊就ná摸冊房桌頂hit本最近東京丸善冊店寄來ê Wells著作ê「世界文化史大系」原文冊，心內真m̄願。安子講：「總是，你有做長男ê義務kah責任，你kám無法度勝任？Koh án怎，mā bē-tàng避免ho͘ⁿh。」
「M̄-tio̍h，tsit點kah日本內地ê習慣無仝。臺灣無親像日本內地ê家族延續hiah-ni̍h明確。實際上，若有能力處理家事ê人to̍h好。」
「若án-ne，tsit-má是景文來做繼承者siōng適任，是m̄是？」
「Ah，講起來是án-ne。M̄-koh，講tio̍h日本內地ê繼承模式，咱tsia咱無適合ê語詞。咱是重視家族khah贏過個人，he大概是支那思想；人聚集做伙ê家族tī人本身ê頂面，成做一個有人格ê組織體。家族ê財產m̄是啥人ê，是屬tī家族本身；án-ne ê想法，講khah白leh，to̍h是家族制度頂面ê共產主義。所以，户主á是家長只是代表家族，無像日本內地是代表khah 狹ê意義niā-niā。」
「真正複雜neh。若án-ne，你kám phah算beh hō͘ 景文繼承？」
「我想若án-ne siōng好，對你來講，mā ē-tàng輕鬆自由，kám m̄好？你想怎樣？」

清文beh徵求她ê同意。清文想講安子當然無異議；伊其實是beh hō͘ 她歡喜，tsiah探看in bó͘ ê面。總是，安子無隨時回答，ná像teh思考，無講話。這hō͘ 清文感覺意外。家族複雜ê情形，koh是tī無仝種族ê家庭，清文想講安子真辛苦，不時teh kā伊同情，分財產了後，加減ē-tàng hō͘ 她得tio̍h解放。M̄-koh，這對她iáu有考慮ê餘地kah無歡喜ê理由，到底是啥物leh？

普通ê女性無兩句話to̍h會贊成，koh會過頭表示明顯ê歡喜，m̄-koh，安子ê情形完全無仝。雖然這是伊家己講出來ê主意，kám會是因為tāi-tsì kah骨肉至親有關係，suah顛倒感覺無歡喜？
「你是án怎leh？你對tsiah-ê話無歡喜，我bē-tàng了解。你有啥物別種想法？」
「M̄是lah！我kan-taⁿ ná親像小khóa感覺咱離開陳家無真好lah！」清文想講安子會隨時歡喜同意伊ê意見，無料想tio̍h安子顛倒會認為無適當，所以hō͘ 伊感覺真失望。安子既然敢接受tsit-ê無平凡ê婚姻，當然是一個充滿勇氣koh活潑ê現代女性；事實上，清文mā希望她是tsit款ê女性。總是，安子卻m̄是án-ne；她謹慎、深思、有忍耐心。M̄-koh，tsiah-ê美德tī tsit-ê時代，清文顛倒感覺是過時、無完美ê物件，hō͘ 伊ê ǹg望落空。最後清文用苦澀ê口氣講：
「Hngh，kám án-ne？你tiāⁿ-tiāⁿ講我離開tsit-ê家庭m̄好，m̄-koh，咱是新時代ê人，hông關tī舊家庭制度ê殼裡，hō͘ 它打倒來食苦，無法度做啥物tāi-tsì。」
「總是，你tī tsit-ê家庭中，照你ê想法自由自在teh做，我無感覺對你ê前途有啥物妨害ā。」
「M̄是lah！我所講ê m̄是tsit種追求名利ê phah算，是koh khah有思想性 ê意義；tī tsit種古老，hō͘ 人bē-tàng喘氣ê環境裡，我感覺會妨害新時代ê思想kah行動。為啥物你會反對我tsit種ê想法？」
「M̄是lah！我絕對無反對你ê想法。總是，m̄知啥物原因，我kan-taⁿ會感覺你....咱離開tsit-ê家庭是無自然ê。人bē-tàng親像鳥á隨意四界飛，就算ē-tàng，he mā是bē-tàng講是正道；我只是執守tsit款消極性 ê想法niā-niā。」
「我實在是無你法。台灣ê家庭制度複雜koh曖昧，koh khah án怎kā你說明，你mā是無法度了解。」
「是lah！我iáu bē-tàng脫出日本家庭ê觀念tsiah án-ne想，而且我iáu有m̄認輸ê心，你beh放棄陳家ê繼承離開tsia，我感覺kah-ná是hō͘ 人趕出去，我無ài án-ne。」
「Hō͘ 人趕出去？你講tsit款奇怪ê話，kah-ná預言家leh！」安子看tio̍h清文憢疑ê面，她suah躊躇，m̄知thang kā伊出世ê秘密講出來無。總是，她順勢講出嘴：
「像lín老母án-ne；hit-ê pháiⁿ命ê老母án-ne。」

清文ê面忽然變蒼白，伊知安子有一工自然會知，伊mā有想講beh tshōe機會來kā她講明，m̄-koh，因為自尊心強，同時伊無ài hō͘ 伊kah安子ê婚姻有任何ê陰影，所以一再拖延到taⁿ。如果一開始to̍h kā她講明，he mā m̄是啥物天大ê tāi-tsì。Tsit-má suah hō͘ in bó͘忽然先提起，清文感覺加倍屈辱。伊無想beh hō͘ 她操心ê好意suah抹消一半去，這hō͘ 清文感覺真無爽快。