《《陳夫人》日譯台e5台灣小說 第二部》 |
 |
 |
|
 轉寄 |
《陳夫人》第二部 親子 第十三章
作者 庄司總一著 賴永祥指導 林俊育台譯 2017.01.29
阿明想講害ā, 腹肚痛koh tiāⁿ-tiāⁿ走便所。
Kám會tī庄腳感染tio̍h病？Kám有可能？拜託m̄是án-ne。 阿明一直ǹg望mài變嚴重，m̄-koh, 無久to̍h發燒，漏屎jú來jú厲害，伊ê病已經掩khàm bē-tiâu。
「你tī庄腳kám有食tio̍h啥物無清氣ê物件？所以，若早知to̍h勸你mài去，就無tāi-tsì。」
老母春鸞並m̄是teh質問，是因為她生本to̍h溫和慈祥，所以她擔心tsiah án-ne講。阿明一聽，發燒ê頭殼koh khah懊惱，kah-ná對待tsa-bó͘-kán-á án-ne大聲講：
「Kám講我去庄腳食tio̍h蛇？Mài管我！過一時á to̍h會好去，免叫醫生。」
總是bē-tàng無管，病jú來jú嚴重。老父瑞文終於去請醫生。診斷ê結果tsiah知，阿明感染tio̍h a-me-bah赤痢（譯註：華語譯做「阿米巴痢疾」）。
M̄-koh, 對醫生á是雙親ê質問，阿明lóng講去庄腳農場kan-taⁿ食帶去ê便當，無食其它ê物件。伊認為一定是前幾工tī街路買枝á冰，食了引起ê。阿明無ài hō͘ 人知真正ê原因，伊tī農場有lim井水ê事實，一定tio̍h隱瞞到底。
Hit工tī樹á腳食中晝小khóa歇睏了後，清文kah安子因為beh辦tāi-tsì去事務所，阿明kah清子就tī農場四界se̍h。In帶來ê水罐已經無水à, 阿明嘴真乾。貫穿鳳梨園ê一條九尺闊ê路邊有一口井，兩三個農場工人tī hia teh自由自在limhit口井ê水，聽講井水有用漂白粉消毒過。Hit時，in bē記得清文有提醒in m̄-thang lim無hiâⁿ過ê生水。阿明lim井水來解嘴乾，hit時，清子mā toè伊lim。
因為無聊ê顧面子，阿明食hit-ê無ài食ê鹹三文魚卵，若無伊bē hiah嘴乾，致使lim無保險ê生水。阿明咒詛hit-ê烏tò͘紅、真鹹koh黏黏糊糊ê日本食物。M̄-koh想起hit-ê快樂ê一工，伊一點á都無後悔去農場。因此，伊無beh hō͘ 雙親á是陳家ê人知影伊tī農場感染tio̍h a-me-bah赤痢。清文講：「Koh無jōa久to̍h ē-sái來tsia tòa暝。」安子回答講：「來tsia度周末，實在真好。M̄-nā是咱家己，若ē-tàng全家來tsia tshit-thô，會gōa-ni̍h-á快樂leh！」阿明無bē記得tsiah-ê話，想tio̍h阿伯kah阿姆tsit種美麗ê希望kah理想，若因為伊ê無注意去染tio̍h病，致使in ê希望kah理想bē-tàng實現，阿明ê心肝真艱苦，實在忍受bē-tiâu。
所以，伊希望家己ê病無嚴重，ē-tàng緊緊來醫好。 In老父入來，嘴teh pok薰、悠哉悠哉ê款式，tī伊因為發燒致使濕tâm ê目tsiu前出現。阿明掠準老父大概老父iáu未發覺伊ê病因，就安心落來。
「Án怎？kám會真艱苦？」
M̄是煩惱á是同情心，瑞文用存心不良ê眼神，直接看對倒tī病床ê kiáⁿ。 「我一世人bē koh ài食枝á冰。」
後悔含恨ê阿明用小khóa tshuah ê聲講，為tio̍h beh逃避老父ê目神，隨時koh péng-pêng睏落去。伊無注意tio̍h老父kā因為péng-pêng歪tshuah ê冰袋tshiâu hō͘ 它正ê時面帶笑容。
「M̄-koh m̄是大tāi-tsì, 無久to̍h會好。注射了後會khah khùiⁿ活。」
「Án-ne 真好。」
瑞文m̄是teh苦笑，mā m̄是teh憐憫笑，m̄知什麼原因到taⁿ阿明iáu teh隱瞞事實。
「M̄-koh, 若食枝á冰to̍h會中毒，這是tio̍h禁止ê社會問題。」
「M̄是大家lóng án-ne, 是我運氣bái lah。」
「你kám m̄是有去hit-ê厝？....」
「有去阿伯ê厝....」
冰袋koh再歪tshuah去，阿明kā它tshiâu正。
「Oh, 阿爸，清子kám mā感染tio̍h？」
「大概kah你仝款ê症頭。」
無需要加講，簡單ê一句話to̍h劇烈鑿tio̍h阿明ê心。帶來pháiⁿ消息ê老父瑞文，kah-ná是惡魔來臨，瞬間tī紅kì-kì ê目tsiu前出現。伊已經無話thang講à, 只有吐氣niā-niā。
「Ueh, 阿明，你ná會編一套白賊話來欺騙lín父母？你真戇呆。Kám tio̍h需要講白賊來hō͘ 家己陷落無聊ê痛苦？」
阿明haiⁿ-haiⁿ-tshan。心內重複「無聊ê痛苦？」hit句話，m̄-koh, 伊已經無氣力thang來反駁。
「你想看māi leh, 你去農場lim lah-sap ê古井水—koh隱瞞講白賊，你ê病m̄是破病niā-niā, 若有三長兩短—責任kám m̄是lóng tī阮做父母ê身上？Kám講你kah意lín阿伯kah伊ê厝suah無計代價來án-ne做？你tī lín阿伯ê厝內，連kha-na-li-ah（譯註：華語譯做「金絲雀」）ê屎都感覺是芳ê。Án-ne無打緊，你對家己親生ê父母pháiⁿ款待，這是甚麼法理？」
瑞文知影tio̍h利用tsit-ê機會來好好á教示kiáⁿ兒，對破病中ê阿明有khah過頭kā伊修理。
「你ná會kan-taⁿ感覺阿伯ê厝tsiah是好？」
「阿爸m̄是仝款？」
「你講啥物？」
「阿爸少年ê時tsūn，你kah意hit pêng ê阿姆。」
若m̄是破病發燒，阿明bē講tsit種話。
阿明ê痛苦有雙重。連家己ê叔伯小妹mā可憐感染仝款ê病，她ê病痛可能比伊家己khah嚴重。阿明想tio̍h這lóng是tùi伊來造成ê, tsit-ê自責擒tiâu伊ê心肝頭。腸á kah-ná受割斷hiah痛苦，kui身軀kah-ná火teh to̍h hiah燒。這是家己ê苦難á是清子ê劫數？兩個lām-lām做伙，伊suah分bē清楚。因為病痛kah hiah厲害，阿明想講家己會就án-ne死去，清子mā會就án-ne死去。阿明因為發燒suah tuh眠睏去，一定是做一個惡夢。夢醒ê時，感覺家己iáu活teh, koh奇怪想講清子kám mā活teh。伊teh想像少女teh睏ê面，suah想起蒼白ê死人面。M̄-koh m̄是每pái lóng是惡夢，有時夢見tī hip熱ê春宵，看tio̍h大廳新增ê新娘燈，伊beh去迎接坐美麗花轎ê新娘。伊ê心肝pho̍k-pho̍k跳，就án-ne hō͘ 炮á聲吵醒。
家己beh迎接ê新娘是啥人？....Kám會是清子？阿明teh回想伊ê眠夢，身軀phi̍h-phi̍h-tshuah, m̄-koh總是比夢見死khah歡喜。清子感染tio̍h a-me-bah赤痢tsit-má án怎？一定是真艱苦，情形演變kah án怎？等等不斷teh煩惱。阿明想tio̍h兩個做伙teh艱苦，心內感覺奇妙ê滿足。
兩三日了後，阿伯kah阿姆來探訪，聽過清子ê病mā大概真樂觀，阿明煩惱ê艱苦心tsiah得tio̍h tháu放。
過無jōa久，阿姆the̍h花來探訪。
「Ah, 阿姆，he花....」
阿明不知不覺tī病床頂án-ne講，體溫真無簡單tsiah退燒，tsit-má感覺koh tshèng koân起來。
「雖然m̄是真súi ê花，我叫tsa-bó͘-kán-á去賣，她買tsit束花tńg來。若是ba-lah（譯註：華語譯做「薔薇」to̍h會khah好。）
安子真自然kā hit束花khǹg tī阿明ê讀冊桌á頂面。因為疑惑kah見笑，阿明無發覺家己脆弱ê感情kah-ná波浪起起落落。
Hit-ê花ê名叫做圓á花，淡淡紫紅色ê頭殼形，hō͘ 人想起kah-ná圓á，所以án-ne號名。圓á象徵家庭圓滿，因此習慣上，圓á花成做婚禮裝飾ê花。
安子kám會知影tsit-ê風俗習慣tsiah帶來？He是無可能，因為她看起來m̄知tsit-ê緣故。M̄-koh, 安子嫁來陳家已經二十年ā, 台灣ê風俗習慣知影真清楚tsiah tio̍h。Tùi tsit點來講，她應該比新世代ê阿明koh khah台灣化。若是án-ne, 阿姆知影hit-ê花kah結婚有關係tsiah帶來，hit中間可能有啥物意函tī-.teh....。
有啥物意函neh？....Kám有hit款tāi-tsì？若是án-ne, 無lah....。 安子tńg去了後，阿明虛弱ê目tsiu久久sióng hit-ê圓á花。優雅ê花瓣，其實m̄是啥物花，kah它ê花名仝款，一蕊圓圓ê花，hō͘ 阿明ê目tsiu看起來kah-ná紅紫色ê雞心臟。Mā hō͘ 伊感覺kah-ná是teh象徵新娘新郎ê心，天真浪漫，第一pái ê gāi-gio̍h gāi-gio̍h。無lah, he m̄是型ê問題，tī型ê中間koh加上傳統ê意義。阿明一直lóng有teh參加陳家á是親tsiâⁿ ê婚禮，hiah-ê煩雜lô-lí-lô-so ê禮儀hō͘ 人感覺真煩。M̄-koh, tsit-ê圓á花會hō͘ 人懷念，裝飾tī大廳ê角頭á是新娘房ê桌á頂，吐出熱情ê tsit-ê花。
破病ê回復期，對健康ê期待，根據回復ê確實性，會活出比健康koh khah幸福ê活跳跳性命。總是，阿明tsit-ê少年人ê回復期無tsit種明朗ê心境，伊有喜樂kah不安ê參雜，有時感覺tio̍h生死混合ê奇妙心情。伊ê希望無像甘甜koh重味ê奶，kah-ná薄薄ê露水隨時消失去。阿明一pái ê破病，ē-sái講是因為阿姆帶結婚之花來探病，tsiah hō͘ 伊第一pái想像將來beh kah清子結婚。Tsit-ê思想m̄是冷ki-ki ê塑像，因為已經肉體化，致使hō͘ 阿明ê內心產生真正ê苦惱。
過幾工了後，阿明離開病床，伊隨時去阿伯ê厝探訪清子。她無tī-.teh, 她ê病已經完全好，兩三工前to̍h去學校上課。
可能因為懷恨lim古井水ê tāi-tsì。總是，她比伊khah早好，ná會無來kā伊看一pái？阿明小khóa感覺不滿kah幻滅，就行出去外口。 真久無suh-tio̍h室外ê空氣，衰微ê胸坎á勻勻á phok起來。街路ê厝宅kah過路人kah-ná kā伊bē記得，看起來真生疏。四月ê日頭光鑿目感覺會痛....阿明ê病iáu未完全好。
街路ê頭前傳來隊伍ê聲，tùi鬧熱ê炮á聲知影he m̄是出山ê行列。阿明tùi亭á腳ê柱á邊teh看隊伍ê進行。
Tshóa頭ê炮á放kah jú來jú鬧熱，吹班（樂隊）ê鑼鼓聲kah笛á聲ê交響鬧熱滾滾，喜氣洋洋。有幾個𣛮（siāⁿ）hō͘ 人扛teh行，有ê𣛮頂面khǹg鏡台、衫á櫥、衫á褲、鞋、桌á kah椅á, lóng hē tī紅布頂面。新娘坐tī幾個轎中間ê一個，用刺繡ê紅布圍teh, 轎頂koh有裝飾紅球，一下to̍h認會出來。新郎mā坐tī其中一個轎，tòe記新娘kah新郎兩個姓ê提燈kah新娘轎，向前行....。
Hit-ê結婚ê隊伍，阿明起先感覺真苦悶，後來tsiah有一點á喜樂進入伊ê腦海。吹班ê tsa-po͘ 成員以及扛轎á是扛𣛮ê人，看起來lóng是khu-lih（譯註：做粗工ê人，漢字有時寫做「苦力」）ê款式。In穿長度到腳頭u ê褲，露出小腿kah-ná塗漆茶色teh發光，thǹg赤腳踏tī燒燙ê tám-á-ka路面，pa-ta- pa-ta向前行。其中有人甚至因為天氣熱kā衫展（thián）開，á是本來to̍h破真大孔，露出kui身軀汗ê排á骨，hō͘ 人看tio̍h bē爽快。Tsit-ê大好日，ná會無beh穿khah整齊leh？無論坐花轎ê新娘妝kah gōa súi, 迎（ngiâ）親ê隊伍jōa 行伍（hâng-ngó͘），這是美中不足ê遺憾。民族性ê粗野，tùi tsit點顯露kah現現現。
總是，tsit種舊ê結婚式mā漸漸簡單化，最近mā常常看tio̍h新娘新郎ê轎車ê行列。聽講mā有人tī大神宮ê神明前舉行婚禮儀式，台灣人結婚mā有人排設西洋式ê婚宴。阿明想講家己結婚ê時....如果kah清子結婚，會採取hit種方式。Tī神宮結婚ê方式會án怎leh？Kám會是宮主唸祝詞？新郎新娘交杯lim酒？詳細情形lóng m̄知。Koh再講西洋料理ê宴會是án怎？Kám會曉使用刀á tshiám-á？聽講用餐具bē-sái出聲，然後開Siang-phián（譯註：華語譯做「香檳」），pòng-póng....伊tī一本小說中讀tio̍h形容做kah-ná網球ê聲。Iáu有蜜月旅行，火車kā兩人載到真快樂ê所在，當然tio̍h有月娘ê暗時。月娘kah新娘仝款恬靜、溫柔koh清新，月娘是女性。台灣話kā月叫做「月娘」，月光微微á散發清芳（phang），hiah-ni̍h-á súi。Beautiful-beautiful, 月光恬恬á發出聲音、唱歌，配合火車ê車輪聲。月光....月光....moonlight, moonlight, moonlight....
