《《陳夫人》日譯台e5台灣小說 第二部》 |
 |
 |
|
 轉寄 |
《陳夫人》第二部 親子 第二十八章（更新版）
作者 庄司總一著 賴永祥指導 林俊育台譯 2017.05.14
陳家kā阿媽祝壽已經過了，秋天mā jú來jú深。Tùi tsit時到明年三四月，天kah人kah-ná lóng bē記得雨ê款，空氣真ta燥；台灣南部ê ta燥季節一直teh持續。Tùi春天到熱天，因為充足ê雨水，樹根吸收真飽ê水分，充滿活命ê綠色顯然koh khah旺盛。
總是，只有二十歲ê阿明，卻kah-ná葉á落了ê樹木，失去氣力。伊m̄-nā無親像大鵬鳥án-ne tī南方teh飛，顛倒tī陳清公司ê農場，由in老母照顧，tī hia teh靜養。清文in知影阿明有強度ê神經衰弱，所以暫時hō͘ 伊休學，thang hō͘ 伊ē-tàng充分修養身心。
Tī農場修養了後，阿明ê心情加鎮定真tsē，消瘦ê身軀mā有看tio̍h小khóa生肉。本來jû-tsháng-tsháng ê頭毛mā剪kah真整齊，lán-si剃ê嘴鬚tsit-má已經剃kah清氣清氣，回復原來ê面貌，看起來有teh漸漸回復健康ê款。伊kah老母兩人靜靜過日子，幫助伊kā沉默ê心情轉變做平和。 春鸞有奴隸一般ê個性，in kiáⁿ本來無kā她掠做一回事，並且憐憫她，m̄-koh，kah她親近了後，伊iáu是有感覺tio̍h老母ê溫暖。
阿明暫時被禁止讀冊，只有kah老母講話，所以兩人談起tsē-tsē tāi-tsì。伊甚至連對清文都m̄-bat提起ê民族問題mā the̍h出來kah老母談論，講kah熱phut-phut ê時，to̍h講出He-ge-l（譯註：Georg Wilhelm Friedrits Hegel，1770~1831，德國哲學家）哲學，mā講tio̍h Heh-seh（譯註：Hermann Hesse，1877-1962，德國作家）á是Tho-mà-suh Mán（Paul Thomas Maⁿ，1875~1955，德國小說家）ê作品，hō͘ m̄-bat tsiah-ê tāi-tsì ê老母聽kah霧sà-sà。Tsit時，阿明tsiah發覺家己ê頭腦真正有一點á ku怪，致使hō͘ 人看做是teh起siáu，這是理所當然ê；伊忽然感覺真pháiⁿ勢。老母mā bē免會認為阿明ê腦筋有一點á失常，她無法度理解in kiáⁿ對叔伯小妹ê hit份熱情。自古以來，近親結婚to̍h被嚴格禁止，經過幾千年ê習慣，差不多已經成做生理上ê排斥；準講是對近親有淡薄á ê情意，á是有愛戀ê感情，he是無法度實現ê，甚至會hông認為是hàm古ê tāi-tsì。總是，in kiáⁿ是新時代ê人，m̄-nā知影三等親以上ê婚姻tī法律上tsiah是自由ê，而且有意識tio̍h「新皮囊tio̍h貯新酒」ê道理。另外一方面，對阿明來講，老母憐憫疼惜丈夫ê細姨是hàm古ê tāi-tsì。春鸞常常對伊講起久長倒tī離tsit-ê農場八公里ê山坪ê阿陣，她hit種心情to̍h kah-ná teh對待家己ê小妹。春鸞若講tio̍h她kah瑞文tī天phú光ê時埋葬阿陣ê經驗，她ê目kho͘ lóng是有目屎含leh。
「Án-ne，你並無愛阿爸。阿母家己可能認為家己有teh愛阿爸，其實並無愛伊。」
阿明總是án-ne講。伊認為愛情既然已經脫線à，夫妻之愛kám iáu有法度畫出完全ê圓形？He是無可能ê。In老母只不過是用無意識ê虛偽來lám-tiâu家己無知ê幸福niā-niā；á是講，她明明知影，mā是用忍耐ê心teh過kah-ná附屬品ê卑屈生活？總是，春鸞ê心卻兩項lóng m̄是。
「我bē了解你所講ê話。為啥物你tio̍h kā tāi-tsì想kah hiah-ni̍h複雜neh？我kah意lín阿爸，mā kah意阿陣，án-ne bē bái ā。阿陣mā是咱厝裡ê人，你tio̍h去她ê墓致意tsiah tio̍h ā；厝裡ê人tio̍h互相和好tsiah好ā。」
阿明tùi老母ê身上看tio̍h她對舊傳統順從ê款式。她絕對bē tī思想上傷腦筋，mā bē偏激；她ê價值觀若beh講是tùi人ê個性來ê，不如講是tùi家庭，á是社會tsit-ê複合體。若kah老母比較起來，伊ê價值觀根本to̍h是西歐ê自我中心ê疼，伊對事物lóng是用個人單數來算。像老母tsit種東洋泛神式ê疼，阿明並m̄是m̄知，m̄-koh，tī伊改變以前ê態度來接近老母以後，伊發見她hit種自然koh包容無限ê疼，hō͘ 伊感覺真困惑，而且感覺家己所相信ê至koân ê疼，未免有khah粗野，致使伊就怨嘆家己kah老母bē比得，suah感覺幻滅。
Tsit一工是春鸞陪阿明來農場靜養以來，第一pái去阿陣ê墓。 春鸞苦勸阿明做伙去，m̄-koh，阿明無論如何都無想beh去。總是，伊家己一個人留落來，忽然感覺寂寞，所以伊就揹hip相機出門。
伊經過溫室邊á，內面無人ê款。Kā阿媽祝壽hit暝，游德仁受tio̍h景文hit款ê khau洗，老實ê伊mā忍受bē-tiâu；雖然清文有kā伊慰留，iáu是無效，伊已經突然離職去à。根據阿伯所講，伊離開陳清公司以後決心beh去南洋。游德仁留落來伊幻滅ê痕跡；溫室內ê植物照常puh芽，一片綠色滿滿。阿明去探視溫室內面，忽然感覺有一kóa嫉妒。平常時看起來老實ê人卻相當有魄力kah決斷力，顛倒是家己認為真有豪氣ê家己，suah tī tsia無tāi-tsì閒閒。伊想beh休學，去馬來西亞ê Jio-ho-l州ê橡樹園工作，這並m̄是無根據ê想法，m̄-koh，tsit-má suah hông看做是戇人teh講siáu話。伊ê夢早to̍h褪色去à，這真是無可奈何ê tāi-tsì。
以後會án怎leh？回復健康了後，我beh koh再tńg去學校，然後去讀大學。畢業了後，我會成做一個手摸人體á是機械ê人。少年ê時雖然有相對應ê熱情kah批判精神，無gōa久to̍h會建立平凡ê家庭，有小khóa ê錢財，然後過一個無夢想、無冒險koh無味無素ê生活。這是kah tsit-ê島上大多數ê少年人所行ê路仝款，我kám無法度行另外一條無仝款ê路？
阿明行出農場，沿河堤無目的teh行；伊kah-ná想講只要teh行，to̍h ē-tàng發現清楚ê生活方法。平凡mā無要緊，m̄-koh，無法度忍受ê是我hit-ê pháiⁿ看ê青春姿態，眾人會kā我當做話題來恥笑；老父瑞文to̍h是án-ne teh kā我恥笑，連清子都用阮老父來kah我比並。總是，koh khah無法度寬容ê是：我家己實際上是一個值得人恥笑ê人。若是親像老父瑞文án-ne，只是一時ê to̍h起來，隨時又koh hua去，án-ne免講mā是會hông恥笑，甚至連家己都不得不會笑家己neh。究竟kám是án-ne？Kám有tsit種ê情形？
阿明失去自信，koh khah感覺失望，m̄-koh，伊隨時koh奪回自信，koh再驕傲起來，不知不覺大步向前行，uat過無koân ê山坪，來到虎頭埤。虎頭埤是早前為tio̍h灌溉農田所做ê蓄水池，tsit-má mā iáu是teh利用做灌溉ê美麗ê湖。湖ê周圍無到八公里，有khah細ê遺憾，m̄-koh，以綿延ê虎頭山做背景，湖水常常lóng是碧藍，四kho͘ 圍有茂盛ê相思樹遮蓋，黃昏ê時有白鴒鷥kui陣。Tùi台南經過新營到tsia無gōa遠，koh有bá-suh（巴士）teh走，m̄-koh，城市ê人真少來tsia，因為tsia無娛樂設備，kan-taⁿ有三台teh出租ê小船浮tī岸邊而已。總是，佳哉tsia iáu未被商業化，算是bē bái。阿明bat幾pái來tsia sńg，其中一pái是kah清子做伙來。今á日算是今年第一pái伊ê腳步往tsit-ê方向行。
阿明看tio̍h虎頭埤ê碧藍水色，心內teh講：Ah，真好！伊kah-ná得救ê款，suh一口氣。Tsit-ê小湖每pái lóng不可思議ē-tàng hō͘ 伊ê心鎮靜落來，所以伊早to̍h真kah意tsit-ê所在。因為熱天真熱，真tsē人ài就近去安平á是喜樹ê海水浴場。阿明mā有幾pái機會去過海邊，m̄-koh，伊lóng感覺海無適合伊ê肌膚。這m̄是因為伊無啥會曉泅水，是因為海闊bóng-bóng，koh大kah oh得把握，suah會hō͘ 伊ê夢想á是思念分散開去。而且海無停teh搖動，掠準已經穩重深沉ā，又koh輕輕á跳動起來；掠準已經平靜ā，又koh馬上起狂。海是面色變化真緊ê感情家，hō͘ 人感覺無法度輕鬆融入。M̄-koh，湖ē-tàng深深kā人抱攬；準講湖四kho͘ 圍ê樹木hō͘ 暴風雨掃kah東倒西歪，湖照常會kā它tshiō影，tī湖中顯出in ê倒影。坐tī細隻船頂面，天空無限，ē-tàng感受tio̍h家己集中注意力teh ǹg湖心前進，就thang掠tiâu家己ê救生圈，án-ne，準講是強風掃來，只要kā細隻船掠tiâu，就絕對bē被吞滅去。Tsit-ê雖然細卻有真大包容力ê碧藍ê湖，ná親像teh接納山榕á是相思樹án-ne，仝款teh接納阿明，每pái lóng hō͘ 伊感覺心神安定。
M̄-koh，連hit工tsit種虎頭埤ê湖都hō͘ tsit-ê少年人ê心肝小khóa phi̍h-pho̍k-tsháiⁿ。
....Ē-sái恬恬mài出聲ê tsit-ê tsa-po͘ gín-á卻一直phah家己ê胸坎á，khiú-tiâu家己ê手，烏白講hiah-ê討厭ê話....。家己m̄-bat有過hiah-ni̍h kô-kô纏ê tāi-tsì，白鴒鷥m̄-bat有過hiah-ni̍h 倉倉pōng-pōng teh飛，hō͘ 風吹ê樹木kah水中ê茭白筍m̄-bat受過hiah大ê滾絞。真傷腦筋，你到底是tùi tó位帶來tsit-ê暴風？....一時tshèng-koân ê自我意識，kám無法度hō͘ 它降低落來？無法度來到親像老母春鸞ê屈低所在。若是án-ne，ná會無beh hō͘ 我回復到早前ê所在？Kám m̄是tùi無限koân ê天頂來到我細細ê胸坎á？....我lak落去妓女ê胸坎á，無限墮落落去，殘殘想beh傷害家己，是為tio̍h啥物？到tsia來，你kám有想beh kā自我意識降落來到地上？Kan-taⁿ做hiah-ê無聊ê tāi-tsì，你想beh掠青鳥，只不過是kui面鳥á屎；你想beh挽青花，只不過是滿手全傷！....若是有收tio̍h回phue，to̍h bē陷落絕望。Mài講白賊，準講有回phue，he一定是無好ê回phue，你mā是仝款ê結局。你tsit-má知影hit-ê tsa-bó͘ gín-á已經對你有理解，mā有愛你，án-ne kám m̄是to̍h真好à？已經siuⁿ慢ā，家己tsit-má kui身軀污穢；án-ne講起來，自開始to̍h污穢à。你所追求ê只不過是開tī lah-sap池中間ê花，若是你用súi ê信心活落去，結局mā是死。人無死bē-sái得，因為你一直teh思考絕路。一隻尾蝶有法度突破鋼鐵ê壁，你mā有可能。尾蝶突破鋼鐵ê壁，因為死tsiah出來到外面。死m̄是súi ê tāi-tsì，m̄-koh，為tio̍h達到súi ê境界，無死to̍h無法度達成，死to̍h是án-ne。早死早好，kám tio̍h kui面全屎，á是kui手掌腫皰來活落去？Ai-ah，你án怎？你kám茫茫渺渺teh思考？你kan-taⁿ會曉hō͘ 人驚惶。你theⁿ tī船頂，心內teh畫娶bó͘ ê圖。Tī生死ê關頭，你iáu teh點to̍h tsit種慾望，實在是有夠不三不四ê人。所以照tú-tsiah所講ê，你自開始所思考ê若m̄是hiah súi，m̄是hiah高尚....。
總是，今á日ê湖卻bē-tàng hō͘ 伊感覺心神安寧；它露出真嚴肅ê表情，包含真oh抵敵koh不可測度ê無底力量。伊幾nā pái想tio̍h若無離開tsia，就會有危險，m̄-koh，伊kah-ná頷頸被ân-ân掠tiâu，猶原tiàm hia無離開。Tú-tsiah伊to̍h坐起lih浮tī岸邊ê小船；伊有時倒leh，有時peh起來；有時划(kò)船，有時靜靜無tín動，á是用手teh sńg水。伊用相機hip兩三個hit所在ê鏡頭，kah-ná是tsia̍p-tsia̍p teh扶tháⁿ嚴肅ê湖水之靈，來hō͘ 家己ê心沉靜落來。Tsit中間，湖面不知不覺有暗影罩落來。除了tùi湖邊ê相思樹散散飛起來ê白鴒鷥以外，四kho͘ 圍無kah一個人影。湖水變成烏色，無koh有水波，恬tsih-tsih，深kah kah-ná無底leh；湖無koh有啥話語，阿明mā無beh回答。Ná親像恬tsih-tsih ê湖水，阿明ê心mā已經真鎮靜ā。Tsit時，伊ê腦海teh想種種ê tāi-tsì，mā浮起一koá人ê面：父母、兄弟、阿伯、阿姆kah伊ê叔伯小妹。總是，tsiah-ê lóng ná親像tī夢幻中teh飛ê白鴒鷥，bē引起伊ê注意；伊ê心有真奇怪ê冷靜。可能是伊感覺若án-ne繼續冷靜落去，會發生可怕ê危險，所以無意識中，伊就kah-ná teh tàn一粒石頭án-ne，kā hip相機tàn落去水裡。Hip相機tŏm一聲就隨時沉落去，造成一tsūn波紋，散開，然後又koh回復原本平靜ê水面。Hit台hip相機真貴，tī無意識中kā它tàn落去水裡，伊感覺真可惜，m̄-koh，伊一點á都無後悔。因為伊bē曉泅水，如果伊khiā tī船尾，伊會kah hit台hip相機仝款命運，沉落去水底。雖然伊án-ne teh想，m̄-koh身軀並無sih-sih顫。昨日，伊因為siuⁿ過無聊，tī別莊ê二樓練寫字，有寫一句「宇宙何悠悠，人生難期百」；人可能會無懷疑，講這to̍h是伊ê遺書字句。伊án-ne teh想，無感覺奇怪，mā無感覺悲哀。Ai-ah，tsit種深沉koh空虛ê寂靜到底是án怎leh？Tio̍h大聲哭！大聲笑！伊án-ne teh想，koh急beh逃避tsit種被封tiâu ê可怕冷靜。Tsit時，伊發現一個所在有空隙，就往hit-ê方向tsông去。
