《《陳夫人》日譯台e5台灣小說 第二部》

 | | | 轉寄

《陳夫人》第二部 親子 第二十九章（更新版）

作者 庄司總一著 賴永祥指導 林俊育台譯 2017.05.21

Hit工，安子為tio̍h beh看阿明ê情況，下晡就去農場；清文因為tio̍h出席事業上ê重要會議，所以只有清子一個人留tī厝裡。老母有招她做伙去農場，m̄-koh，清子因為驚kah阿明見面ê痛苦，所以無做伙去。其實她一直有teh想beh去，m̄-koh，因為無歡喜老母ê指點，她有小khóa thiau故意beh對老母使gāi-gio̍h。老母tiāⁿ-tiāⁿ teh試探她ê心意，問她對阿明ê想法。她真肯定回答講kah意ê時，老母to̍h隨時露出無歡喜ê面，koh心內不安講：
「阿明是你ê叔伯兄哥，血緣真接近。」
「Ai-ah，是án怎bē-sái kah意伊？我是獨生女，無阿兄mā無小弟，我真無伴neh。」

清子thiau工kik「gín-á人m̄-bat tāi-tsì」，假做m̄知半項，in老母to̍h安心笑出來。

清子對老母ê過頭操煩kah彎彎曲曲ê講法，mā有不滿。安子雖然了解清子ê「早熟」，mā有讀真tsē文藝ê冊，有相當ê理解力，m̄-koh，iáu未十七歲，tī人生來講，她iáu是未成熟ê時期，根本都無去想到。Tsit點笑笑leh to̍h準suah，m̄-koh，對清子ê無關心家己ê大事，做老母ê會無歡喜。清子家己絕對m̄是隨便消費熱情kah感情ê tsa-bó͘ gín-á，是一個規規矩矩思考問題來行動ê人；她mā無真kah意家己ê理智性格，kan-taⁿ無滿意寂寞ê情景。所以做老母ê安子會急kah bē放心。老父kā無應該藏起來ê phue收藏起來，koh kik m̄知ê態度to̍h是對家己無信心ê極端ê例之一。清子有teh懷疑：是m̄是有可能是父母兩人狼狽為奸án-ne teh設計？ 她坐tī厝裡走廊ê藤椅，teh讀陶淵明ê詩。她讀ê女子學校無teh教漢文，m̄-koh，因為她tī台灣家庭teh生長，所以對陶淵明漢文詩ê正確意思雖然bē真明白，她iáu是感覺會讀出它ê含意。
歸去來兮。田園將蕪胡不歸。

阿明ài誦讀tsit首《歸去來兮》。伊tsit-má真正tńg來à，he m̄是馬來西亞ê Jio-ho-l州橡樹園，mā m̄是陳清公司ê農場，卻是倒tńg來伊家己荒蕪（hong-bû）ê心靈田園。
覺今是而昨非。

清子m̄-bat有過hiah-ni̍h憐惜阿明，她ǹg望伊ē-tàng明白以前ê m̄-tio̍h。她m̄知伊疼她hiah-ni̍h深；當她知影ê時，非常感動。清子想tio̍h若伊是少年維特，她家己to̍h是夏綠蒂。她感覺有一種無仝款ê心情，m̄-koh，清子想：疼無一定tio̍h要求回報，kám m̄是？疼無具體ê形式，kám有可能？阿明一再強調：我無想beh kah你結婚；m̄-koh，若無形式ê時，伊ê心kám koh會有súi koh崇高ê疼？He真明顯是tio̍h kā人提升到神ê層次tsiah有可能。伊應該會覺悟，了解tsit種kā人性估計siuⁿ koân ê想法是錯誤ê。

清子m̄知影阿明tsit-má ê心境如何？伊實在真可憐，kah-ná一隻觸角(tshio̍k-kak)斷去koh翼lak去ê蝶á。Tsit隻蝶á迷路飛入來厝內，牠想beh採花瓶ê花粉是m̄-tio̍h ê，牠應該趕緊飛出去窗á外，飛到牠應該去ê所在。M̄-koh，牠kám tshōe會tio̍h phah開ê窗á？若tshōe無，頭殼會去lòng tio̍h玻璃窗，可憐ê蝶á就會lak落來土腳，tú親像維特用手槍自殺án-ne....。

若是阿明mā發生tsit種tāi-tsì....。如果阿明自殺，he會是gōa-ni̍h-á悲慘ê tāi-tsì，m̄-koh，mā是無koh有比這koh khah súi ê tāi-tsì。清子ê心情非常矛盾，她不安kah心肝頭phi̍h-pho̍k-tsháiⁿ。 清子忽然注意tio̍h阿嬸玉簾tùi庭院ê後門出現。 玉簾有tāi-tsì beh來拜託安子，知影她無tī-.leh，露出真失望ê款。她kah-ná有啥物重大ê困難，面色緊張，所以清子問她是發生啥物tāi-tsì？玉簾看起來情緒失控ê款，她kā姪女掠tiâu，綿綿不斷講出她ê tāi-tsì。

慶祝阿媽七十大壽了後ê隔tńg工，玉簾tùi教會tńg來，行入家己房間ê時，看tio̍h長男景仁tī房間khiā-teh等她tńg來；這比阿明憔悴（tsiâu-tsūi）koh穿插lām-sám tī壽宴上出現koh khah hō͘ 她tio̍h驚。景仁是tùi遠遠ê東京tńg來，而且無事先通知；伊到底是tùi tó位入來khiā tī房間ê leh？她驚一tiô，掠準是看tio̍h幽靈leh。景仁並m̄是想beh án-ne突然出現來hō͘ 老母tio̍h驚á是驚喜，伊tsit-má為tio̍h tsa-bó͘ gín-á ê tāi-tsì當teh苦惱，需要一千圓tsiah ē-tàng解決。 為tio̍h tsit件tāi-tsì，伊二個月前to̍h寫phue ǹg父母求助，m̄-koh，老父景文硬m̄答應in kiáⁿ ê要求；老母玉簾是一屑á辦法都無。In kiáⁿ確實是m̄-tio̍h，m̄-koh，老父mā siuⁿ過冷淡、無情。Tsit-má m̄是來講tāi-tsì ê善惡ê時tsūn，現實ê問題是：老父若無beh替伊處理善後，tāi-tsì無論如何都無法度解決。玉簾án-ne極力苦勸in翁，m̄-koh，景文認為一直答應gín-á ê要求，父母會失去尊嚴；而且景文根本都無kā in kiáⁿ會專工tùi東京tńg來ê tāi-tsì khǹg tī心內，伊認為in kiáⁿ一向lóng會kā tāi-tsì pòng大，用án-ne來ǹg父母搾取khah tsē錢銀來開，其實根本都無啥物了不起ê tāi-tsì。M̄-koh，玉簾認為伊tùi hiah遠tńg來，絕對m̄是虛假ê tāi-tsì，一定是真正陷入無法度家己解救ê困境。老母一直感覺in kiáⁿ真可憐，希望馬上hō͘ 伊所需要ê錢，m̄-koh，她雖然是好額人ê正夫人，橐(lak)袋á內卻無幾sián錢。In小弟成做醫生了後，tī街áteh開業，m̄-koh，tī伊學生時代欠學費ê時，景文薄情無kā伊資助半sián錢，tsit-má iáu teh怨恨，所以玉簾無面子thang ǹg伊開嘴；因為自尊心，她mā m̄願ǹg阿媽阿嬌開嘴。結局，她只好kah丈夫參詳，懇求伊處理，結果suah引起父á-kiáⁿ ê冤家。

景文火大，伊從來m̄-bat出手phah人，tsit pái竟然雄kài-kài kā景仁siàn嘴phóe。景仁受phah了後，就離家出走。昨hng玉簾收tio̍h伊ê phue án-ne寫：若無設法hō͘ 對方讓步，一定會有訴訟；in ê律師會來台灣抗爭，到時to̍h m̄是一千圓á是二千圓ē-tàng解決ê，而且對陳家ê名聲mā無好。阿爸凡事lóng算盤tiak kah仁仁仁，對tsit點無可能bē了解。若是阿爸iáu是堅持無beh處理，我mā有決心一世人無beh tńg去厝裡。我知影tsit種不孝ê罪真重，m̄-koh，窮鳥入懷，獵人kám會無beh掠？ 玉簾收tio̍h in kiáⁿ寄來tsit種強迫哀求ê phue，m̄知如何是好？結果她想tio̍h siōng有可能幫助她解決問題ê是安子，所以tsiah來tshōe她。玉簾tsit-má對並無任何幫助ê清子綿綿á講，m̄-koh，安子無tī-.leh，mā是無啥辦法；玉簾三聲無奈，非常失望。
「實在hō͘ 人心不安neh。M̄-koh，阿嬸，tsiah-ê錢一定tshoân會到ê。」
「多謝！Lín老母是一個好人，一定會想辦法幫忙，m̄-koh，她tsit-má人tī農場。」
「Kám hiah-ni̍h急？」
「我tú-tsiah有講，景仁講伊一世人無beh koh tńg來厝裡。伊陷入困境，我感覺伊真正會án-ne做。Beh án怎tsiah好leh？我非常不安....。」
「我了解。阿嬸，你小等leh。」

清子án-ne講了，就行入去內面。 內面沿走廊直角ê uat角，五年前有加起一間西洋式ê房間，當做美術品ê陳列室。室內ê天花板開一個透明窗，四周圍ê壁lóng是玻璃門ê陳列架。In老父tī心情爽快ê時，若無to̍h是心情無爽快ê時，á是非常無閒ê時，á是siuⁿ過清閒ê時，siōng ài去hit間陳列室；hiah-ê古代ê瓷á成做伊ê心靈糧食。清子對古董之類ê無興趣，mā m̄-bat，m̄-koh，若入去內面to̍h會心情bē bái。Hiah-ê花瓶、盤á kah碗，in ê大細、色彩kah光澤lóng無仝款，雖然tshìn-tshái排列，m̄-koh，會散發出全體自然融合ê氣氛。

總是，tsit工ê陳列室卻呈現出一種無融合ê奇怪氣氛；中央ê桌á頂有五六個盒á四散khǹg-.leh，kah-ná目錄ê印刷品頂面有紅筆做記號，另外一張紙頂面有計算價數ê字跡。果然照清子所猜測ê，前幾工以來，老父kah老母恬恬á入去tsit間房間，kah-ná teh處理啥物tāi-tsì，大概是suah尾決心beh出賣tsiah-ê美術品。既然陳清公司ê狀態hiah-ni̍h緊急，ná會無beh hō͘ tsa-bó͘-kiáⁿ知影neh？這是大人ê tāi-tsì，gín-á m̄免知影；這可能是出tī天下父母心，in無願意hō͘ kiáⁿ兒擔心厝裡ê tāi-tsì。M̄-koh，清子想講家己是獨生女，無其他ê兄弟姊妹，厝裡ê困難tio̍h大家來同甘共苦tsiah tio̍h，m̄-koh，in父母卻kik kah ná無tāi-tsì，兩人入來tsit間房間teh秘密安排。清子想tio̍h阿明寄hō͘ 她ê phue被藏起來，她感覺真無趣味；tsit時反抗老父ê心koh khah強烈，她忽然想beh趁tsit-ê機會來報復一下。清子並無經過啥物深思，只不過是出tī gín-á ê好sńg心理，就kā一個古董the̍h出來。

He是一個小khóa帶黃色，看起來kah-ná是象牙製品ê白瓷花瓶，是宋朝ê瓷á，á是啥物稀有ê珍品等等，bat成做in厝裡ê話題。

清子講kā它賣掉來換做現金，m̄-koh，玉簾聽了，心內躊躇。這是清文所珍惜ê古董，若大主大意kā它賣掉，她有所顧慮。Koh再講，玉簾對古董lóng m̄ bat，tsit-ê花瓶看起來一點á都無豪華，bē hō͘ 人有趣味，kám會值得gōa tsē錢？總是，她tsit-má已經火燒到目眉ā，koh因為hit-ê花瓶看起來無啥珍貴，顛倒hō͘ 她感覺khah輕鬆。清子koh講，in老父疼tsa-bó͘-kiáⁿ，不管她做啥物tāi-tsì，老父lóng bē受氣，就kā花瓶hō͘ 她。玉簾phah算beh去查看bāi，看ē-tàng賣gōa tsē錢，所以就kā花瓶收落來。