《《陳夫人》日譯台e5台灣小說 第二部》 |
 |
 |
|
 轉寄 |
《陳夫人》第二部 親子 第三十章（更新版）
作者 庄司總一著 賴永祥指導 林俊育台譯 2017.05.28
安子來到農場ê時，阿明kah春鸞lóng出去，無tī別莊內；真久了後，只有春鸞一個人tńg來。
「Ah，阿明kám無kah你做伙？」
「我帶鮮（tsheⁿ）花去阿陣ê墓燒香，阿明留落來顧厝。伊一定是去外口散步。」 春鸞並無擔心，m̄-koh，安子有一點á bē放心。
「伊ê精神án怎？」
「託你ê福，元氣有回復，只是感覺有小khóa無聊ê款。」
「是ho͘ⁿh。我有問過醫生，伊講teh beh ē-sái閱讀冊à，所以我今á日有帶雜誌來。」
「真pháiⁿ勢，你對待阮lóng hiah-ni̍h親切。」
「免客氣，無啥物lah。」
Tsit兩個老母因為家己ê gín-á，隨人teh操心。
「阿明tsit-ê gín-á ê頭腦有一點á怪怪，完全sêng讀冊人。昨hng伊kā深奧ê漢詩讀hō͘ 我聽，m̄-koh，我啥物都m̄-bat。而且伊koh講，ē-tàng像án-ne眺望天空á是山川，伊to̍h心滿意足，無koh有啥物慾望ā。所以，伊早to̍h真kah意tsit-ê農場；來到tsia以後，伊ê面色變好，頭腦清楚，精神mā回復à。伊講伊beh koh再tńg去學校，伊會用功讀冊。真正ê，這一切lóng是你ê安排kah照顧所致蔭ê。」
春鸞因為in kiáⁿ對清子有不純ê感情感覺真見笑。雖然是án-ne，安子從來mā m̄-bat露出無歡喜ê面色；她án-ne kā in同情，hō͘ 春鸞感覺實在對不住。Á安子leh？因為春鸞lóng m̄知造成阿明hiah-ni̍h沉默ê原因是啥物，所以安子看tio̍h春鸞對大嫂真細膩koh感激，suah hō͘ 安子非常艱苦心；若是她無藏hiah-ê phue，mā bē致使阿明到tsiah-ni̍h絕望，koh tī眾人面前見笑。安子想tio̍h án-ne，to̍h起艱苦心。
安子為啥物會án-ne做neh？安子無beh hō͘ tsa-bó͘-kiáⁿ看tio̍h hiah-ê phue，這m̄-nā是單純出tī母愛ê心；tsit-má她ê後悔kah懊惱有增加，無減少。想起來，阿明kah清子ê tāi-tsì，tī tsit-ê農場tú創立hit當時，to̍h已經tī安子ê心種落不安ê種籽。因為in平平姓陳，koh是叔伯兄妹，ná ē-sái結婚leh？Hit種嚴格ê禁忌，安子相信in是無可能結婚ê。總是，tī現今舊家族制度ê傳統kah習慣當teh崩盤ê大過渡時期，本來完全預測bē到ê tāi-tsì，mā是有可能會發生。近來ê新聞常常看tio̍h固有ê秩序kah新式戀愛相剋所發生ê悲劇。而且，tsit兩人ê個性確實是絕配；阿明是一個ài夢想koh多愁善感ê青年，伊溫和koh純真ê心，ē-sái講是in老父瑞文ê遺傳，m̄-koh，伊對事物有koh khah深入koh認真ê思考；這並m̄是因為父kiáⁿ ê教育程度無仝，卻是因為阿明ê性格bē親像in老父hiah-ni̍h tshìn-tshái koh反覆無常。清文mā kah意阿明，而且阿明自細漢to̍h接近安子，伊無kah一pái hō͘ 她無歡喜過。清子to̍h kah伊是完全無仝型ê人；她冷靜koh理智kah有mê-mê角角ê行為，tùi邊á看起來有一點á無可愛；實際上mā hō͘ 人感覺她ê脾氣真gāi-gio̍h，koh有一點á驕傲。Tsit種兩人性格完全倒páiⁿ ê婚姻，有人認為顛倒bē bái。M̄-nā án-ne，in兩人自細漢to̍h kah-ná兄妹á，感情真好；bat tāi-tsì以後，清子就開始逃避伊，koh thiau故意kā伊刁難，看起來kah-ná是teh討厭伊koh beh kah伊疏遠ê款，其實he是本能性tùi愛來引起ê倒反行為；其實，in一定ē-tàng和睦做伙。因為安子感覺in是siuⁿ過理想ê一對，tsa-bó͘-kiáⁿ一定會真幸福，m̄-koh，安子驚in兩人結婚；明明知影in是理想ê一對，m̄-koh，安子ê心胸無夠寬闊kah ē-tàng來接受in兩人結婚；這是出tī她身上所流無法度抗拒ê血統ê命令。若是ē-tàng，她情願清子kah日本內地人結婚，m̄-koh，她知影這ná親像清子kah阿明bē-tàng結婚仝款，是無可能ê。清子必然會án-ne想，因為她若kah台灣人結婚，她身上所流ê有日本人性質ê血to̍h會jú來jú薄，無gōa久to̍h會消失；安子想到tsia to̍h突然感覺寂寞。這m̄-nā bē-tàng對丈夫清文來表明，連家己都無法度坦然對家己展開來看；這是她唯一ê秘密盒á。
安子藏阿明寫hō͘ 清子ê phue，to̍h是出tī tsit點。當她看tio̍h阿明hit種絕望ê表現，安子心底ê一種寂寞悽凊ê情緒，就tùi憐憫阿明ê單純意識，忽然成做bē-tàng原諒ê罪，hō͘ 她koh khah激烈責備家己。
她想tio̍h嫁來陳家已經二十年ā，回顧起來，雖然道路險峻，總是一路行落來à。Tī生活無仝，感情mā無仝ê陳家，她進入其中，盡家己一切ê努力，來求kah陳家ê人做伙生活。總講一句，她感覺已經tī tsia生活二十年後，當她知影iáu有koh khah重要ê tāi-tsì tsìn前，她必須繼續向前行ê時，安子suah感覺gāng去。春鸞啥物tāi-tsì都m̄知，kan-taⁿ一直感謝安子；她感覺家己tio̍h tī春鸞ê面前，tī陳家厝裡ê人面前謝罪。為啥物bē-tàng koh khah坦白表明家己ê意志，koh khah清楚來顯示家己ê決斷neh？為啥物beh企圖tī暗中恬恬á kā tāi-tsì埋葬neh？她家己mā感覺真gāi-gio̍h；這是何等ê偽善kah陰險！ 安子看tio̍h掛tī別莊壁頂ê Ta-bin-tshih（達文西）「最後ê晚餐」仿作油畫，她感覺胸坎á teh痛。耶穌講：「Lín tsiah-ê kah我做伙食ê人中間，有一個會出賣我。」學生一個一個問耶穌：「總m̄是我ho͘ⁿh？」（譯註：馬可福音14：18~19）
安子teh想：我家己to̍h ná親像是出賣耶穌ê猶大。
過一時á，玉簾忽然行入來。
玉簾有話beh kah安子講，所以來tsia。她看tio̍h春鸞在場，無方便講，所以心神不定ê款。M̄-koh，春鸞隨時離開；春鸞m̄是會曉看人ê面色，是因為她擔心阿明iáu未tńg來，beh出去tshōe伊。
玉簾向安子說明tāi-tsì ê經過；如果清子知影開金庫ê方法，the̍h現金hō͘ 她，玉簾當然bē接受，á是她若知影hit-ê瓷á hiah-ni̍h值錢，她mā會拒絕。M̄-koh，她the̍h去到古董店，想bē到隨時to̍h賣八百圓。玉簾tsit時感覺她做m̄-tio̍h tāi-tsì à，心內緊張，而且個性有潔癖ê玉簾mā無法度恬恬，所以緊趕來農場。
「我m̄知tio̍h án怎kā你會失禮tsiah好，景仁ê tāi-tsì hō͘ 我ê頭腦起糊塗ā。」
「無lah，無要緊。M̄-koh，若beh the̍h去賣，其它iáu有真tsē瓷á neh。」
「它ê價值kám是比賣出去ê錢khah koân？」
「Eh，無lah。你講ê hiah-ê錢，你thang隨時the̍h去用。」
安子因為想beh極力掩蓋她ê tio̍h驚，suah顛倒露出她驚kah gāng去ê款。Tī hiah tsē瓷á中，清子偏偏the̍h hit-ê清文siōng珍惜ê精品hō͘ 她；運氣實在有夠bái neh，清文一定會真受氣，真失望。清子平常時lóng真伶俐，卻做出tsit種戇tāi-tsì；安子氣kah真懊惱。
俗語講：禍不單行；尤其是tī陳家，tī仝一個時期有好pháiⁿ事起起落落ê命運。春鸞tshōe無阿明，tńg來別莊；農場ê人講，幾點鐘前有看tio̍h阿明tī溫室前行來行去，了後to̍h m̄知伊ê去向。安子心內ê不安，suah hō͘ 她產生不吉ê預感。總講一句，tio̍h隨時通知瑞文，所以安子就khà電話hō͘ teh顧厝ê清子，交帶她轉達hō͘ in阿叔瑞文知。
過無góa久，出現ê m̄是瑞文，卻是清文kah景文；in兩人因為隨人有tāi-tsì beh來農場，tú好坐仝班車來。
大家坐tī別莊ê大廳，阿明ê tāi-tsì kah伊tsit-má tī tó位，成做話題ê中心。清文講阿明kah意虎頭埤，大概是去hia tshit-thô；伊卻無啥物擔心，顛倒有一點á kún笑ê口氣。
「Hiah òaⁿ iáu未tńg來，咱tio̍h來去叫伊。M̄-koh，阿明是一個相當詩情畫意ê人，前幾工，伊有kā歌頌虎頭埤ê漢詩hō͘ 我看，雖然hit首詩無合平仄（piâⁿ-tseh），m̄-koh，我會記得he是一首理念傑出ê詩；伊teh詠吟hit帶山岳ê樹木投水tī深湖....。」
清文因為看tio̍h安子真擔心ê款，thiau故意án-ne講，來kā她heⁿh驚。M̄知是啥物緣故，tsit幾工清文kah平常時無仝；伊無kah以往仝款真正經講出伊ê看法，卻時常帶kún笑ê口氣；這是因為伊tsit-má比啥人都khah鬱卒。伊當teh考慮是m̄是tio̍h繼續經營農場kah工廠？Á是tio̍h放棄？Taⁿ伊已經khiā tī tsit-ê重大決定ê十字路口。伊想beh下決心，卻躊躇bē決定，所以伊beh來kah安子參詳。總是，tsit-má koh去tú-tio̍h小弟景文，suah hō͘ 伊ê鬱卒加倍；伊極力beh掩蓋，卻成做tsit種有一點á冷笑ê口氣。
另外一方面ê景文neh？伊流露出比in阿兄koh khah kún笑ê口氣。伊ê個性一向都無beh正面講話，tsit工伊koh khah thiau故意án-ne。
「放心lah，阿明無論去南洋á是啥物所在，lóng是一個ē-tàng獨立生存ê青年，kah阮ê景仁完全倒páiⁿ。阿明準講beh投入去虎頭埤，mā會留伊ê詩落來。」 景文án-ne講，hō͘ 春鸞忽然koh khah掛慮in kiáⁿ，就koh出去外面tshōe。
「景文，你mài講hiah-ê不吉ê話lah。」
安子禁bē-tiâu án-ne責備景文。她對家己ê神經質感覺tio̍h驚。雖然是án-ne，景文iáu是koh無正經笑笑á講：
「我只是kā阿明kah阮kiáⁿ做比較來講ê lah。阮hit-ê猴死gín-á若是死，mā只有留落來債務；伊準講落地獄，mā會敲電報來要求匯錢hō͘ 伊。」
「景仁kám hiah-ni̍h gâu開錢？」
清文án-ne問，又koh khau洗講：
「這mā是因果ā，因為老父『有錢使鬼』，kám m̄是？」
景文聽tio̍h阿兄輕視koh khau洗ê話，kan-taⁿ感覺小khóa gāi-gio̍h而已，隨時to̍h koh回復kah-ná無tāi-tsì ê款，繼續講：
「Mā無一定是有hit種老父to̍h有hit種kiáⁿ。你看瑞文kah阿明，he是pháiⁿ竹出好筍ā。我因為有tsit種看法，對長男難免會有一點á kā伊sēng過頭。」
「可能是老父siuⁿ過kā伊灌輸金錢ê觀念，所以無妥當。」
「Án-ne，to̍h應該成做一個bē亂開錢ê人tsiah tio̍h ā。」
「世間事tú好倒páiⁿ；án-ne會hō͘ 伊掠準錢to̍h是beh用來開ê。」
景文對阿兄ê khau洗態度，心內感覺bē爽快。伊tsit-má當teh為tio̍h長男景仁ê tāi-tsì煩惱，清文m̄-nā無kā伊小khóa同情，á是誠意對待，連平常時誠懇ê阿嫂都對伊kún笑講：
「因為你對錢siuⁿ過凍霜m̄甘放，tsiah會引起kiáⁿ兒beh偷偷á開錢ê心！」 景文禁bē-tiâu，牙齒根咬teh講：
「連阿嫂mā án-ne講oh？總是，別人ê kiáⁿ án怎，無我ê tāi-tsì lah。」
「Mā m̄是án-ne講lah。金錢比孔子ê教示khah優先，這是玉簾講tio̍h你ê時ê講法。總講一句，無論啥物重要ê tāi-tsì，因為你lóng是掠錢做優先，所以....。」
「可能是án-ne；m̄-koh，若是關係tio̍h kiáⁿ兒ê tāi-tsì，to̍h bē hiah-ni̍h簡單處理；天下父母心，我mā無例外。大家lóng掠準我凍霜kah刀割身軀mā bē流血，án-ne，我tsit-má to̍h來像童乩，割hō͘ lín看！」
景文án-ne teh講khau洗家己ê話ê時，hō͘ 玉簾tī邊á teh罵人ê話掩蓋tiâu-.leh。
「免講mā知！準講會流出血，你所流ê mā是豬血lah！」
真傷人ê話！豬血，he是tī屠宰場，kā刀鑿入去豬ê心臟，koh kā噴出來ê血貯tī桶á撒鹽，hō͘ 黏糊糊ê血變成kui塊，thang做料理用。Hiah-ni̍h惡毒ê話！景文用懷恨ê眼光睨in bó͘，m̄-koh，伊家己控制tiâu-.leh，kan-taⁿ haiⁿ一下冷笑一聲。
大家lóng kah伊對敵，無一個人理解伊，了解伊。In平常時to̍h是án-ne teh kā伊對待，今á日是伊家己進入來tsit種難堪ê場面；ná親像niáu鼠tsông入去當niáu鼠ê籠á內，hō͘ gín-á teh鑿，teh tshòng-tī ê情形。M̄-koh，今á日大家偶然聚集做伙，精神lóng真激動，自然而然就想beh kā hit-ê尖尖ê觸（tshiok）角，向hit-ê siōng無受感動ê人鑿去；án-ne，siōng安全ê目標to̍h是景文。M̄-koh，tsit工ê景文是比大家所想像ê koh khah有第六感ê人，伊漸漸點to̍h報復ê心，想beh kā hiah-ê輕視金錢ê假面具剝落來；一種tī平常時所無ê感情，tùi伊ê心底teh bo̍k一下bo̍k一下發酵起來。
「M̄-koh，阿嫂，若是tú-tio̍h tsit種情形，你beh án怎處理？家己ê kiáⁿ tī學校成績無好，放蕩koh無守規矩，完全無顧父母ê面子，而且因為痴情suah hō͘ 對方索取一千圓ê大筆錢....。」
景文ê面露出微微á ê笑容，目tsiu tsîn安子。「準講你是真堅強koh真溫柔，tī tsit款ê境遇之下，你mā是會tio̍h急，kám m̄是？」伊想beh án-ne問安子。
安子tú-tsiah有tùi玉簾ê嘴知影tsit項tāi-tsì，m̄-koh，清文tsit-má tsiah第一pái聽tio̍h。
「Ngh，有tsit款tāi-tsì oh？」
「我已經對伊無辦法à，真傷腦筋，請阿兄hō͘ 我一koá意見。」
「意見無啥路用lah。面對tāi-tsì，tio̍h ài家己先有覺悟lah。」
景文知影tsit pái瑞文ê kiáⁿ阿明ê tāi-tsì，兄嫂有親身teh kā伊照顧，m̄-koh，伊ê kiáⁿ景仁ê tāi-tsì，伊ê兄嫂m̄-nā無teh關心，mā無真誠ê關懷，景文看tio̍h，心內真bē爽快。
「像lín清子án-ne ê傑出tsa-bó͘-kiáⁿ當然無話講，m̄-koh，像阮hiah-ê不成材ê小kiáⁿ，一生to̍h hō͘ 父母操心。我若無hō͘ 伊錢，伊就無beh tńg來，kah-ná teh kā我威脅leh。我受氣，無kā伊回phue，伊竟然tùi東京tńg來....。」
景文期待阿兄聽了會tio̍h驚，koh kā伊同情，mā會hō͘ 伊啥物意見。總是，清文雖然對景仁tùi東京tńg來，有一點á感覺意外，m̄-koh，伊tsit-má ê心不便對景仁ê tāi-tsì有啥物批評，á是同情kah關懷。
「伊m̄是teh威脅，是受逼kah無路。若m̄是逼kah不得已，伊bē hiah遠tùi東京tńg來。你to̍h kā錢the̍h出來，趕緊解決。」
「真正是不成材，kan-taⁿ hō͘ 父母操心。」
「M̄-koh，你送一千圓kā阿母祝壽，你to̍h仝款送lín kiáⁿ án-ne ê一筆錢。」
「兩者並論，我擋bē-tiâu。」
「M̄-koh，你真有錢ā。」
「大販（hoàn）á無必要有錢。」
景文一半自負一半自嘲（sau）án-ne講。In bó͘ 玉簾忍bē-tiâu講：
「你免操心，ài你tsit款守財奴the̍h出tsit筆錢，真可憐！我來處理to̍h好。」
「你tang時hiah有錢？」
「我是大sing-lí人ê夫人ā，當然有錢。」
「啥物？你最後mā是對我哀求，其它無啥撇步lah。」
「真討厭！你tsit-ê人對待家己ê bó͘ á是kiáⁿ兒，to̍h親像teh飼雞á，kan-taⁿ hō͘ 牠飼料niā-niā。」
「M̄-koh，咱tau ê雞母生ê卵無好。」
「He是因為雞公無好。」
「你去教會了後，iáu koh是hiah gâu罵人。教會kám無教你tio̍h疼你ê丈夫？」
「你mā有需要疼oh？無kah大bó͘ 參詳to̍h娶細姨，講好beh hō͘ lín bó͘ 有夠額ê lân-san費用，卻講話無算話ê tsa-po͘人，kám有權利要求真正ê疼？Ueh，你kám有tsit種權利？」
玉簾想beh得tio̍h清文kah安子ê認同，她teh tsîn in兩人ê表情。總是，清文kah安子知影玉簾本身顯然有缺點，所以in兩人m̄知beh án怎回答，就恬恬無出聲。玉簾真火大；宗教á是信仰並無改變她ê個性á是性地。她想講她是一個hiah-ni̍h無辦法ê tsa-bó͘人；家己所欠缺ê物件一屑á to̍h lóng無加添，她是tsiah-ni̍h-á不幸。Tsit種ê痛點去hō͘ 丈夫講tio̍h，而且連兄嫂都kah-ná認同ê款，致使玉簾忽然感覺擋bē-tiâu。她突然使khioh-ka̍k（自暴自棄）起來，無顧體面á是自尊，就嚷起來：
「Ai-ah，我擋bē-tiâu，擋bē-tiâu！Tú嫁來ê時，我討厭你ê面，然後討厭你ê心。總是，我kah你無仝；我有權利追求疼，kah-ná嘴ta teh ǹg望水。我kah你無仝neh，我有像孵雞卵ê雞母ê腹肚有溫暖；無像你冷淡，ná狗á ê鼻hiah-ni̍h冰冷。你不管我gōa-ni̍h無幸福，gōa-ni̍h心酸，你lóng無teh關心，無teh看，一點á都無感覺tio̍h我ê可憐。家己親生骨肉ê長男，陷入tī hiah-ni̍h深ê困境，你卻m̄甘the̍h錢出來。雖然是án-ne，我iáu想beh tùi你ê身上tshōe看有啥物優點無。M̄-koh，我tsit-má已經看破à，無論如何，我lóng無所謂ā。總是，tsit pái我無法度忍受，我beh kah你拚，kah你拚到底....。」
玉簾kā面仆tī桌á頂，心內悲傷kah激動哮出來，koh哭teh kā清文講： 「阿兄，請你原諒！我無經過你ê同意，家己kā你ê重要收藏品the̍h去賣掉。這lóng是因為我kah景文之間ê情形是án-ne，出tī無奈tsiah án-ne做。」 她哭teh說明她kā古董the̍h去賣ê tāi-tsì ê時，安子心內非常不安，她掠準清文聽了會tùi椅á跳起來。M̄-koh，hō͘ 她tio̍h驚ê是，清文並無她所意料ê激動，顛倒是景文ê面色變青。
「玉簾，你ná會做出tsit種糊塗tāi-tsì？你ná會kā別人ê物件....？」
「Lóng mā是你m̄好ā！是你siuⁿ過凍霜，所以我逼kah不得已tsiah án-ne做ā。」
「阿兄，hit-ê物件價值gōa tsē？」
「我講賣八百圓ā。」
就án-ne，景文隨時tùi lak袋á jîm出一把錢teh算。Ah，ná會hiah浪費？景文ê心內顯然是án-ne teh想，伊ê tséng頭á尾小khóa teh phi̍h-phi̍h-tshuah。
M̄-koh，m̄-nā是hō͘ 伊ê tséng頭á phi̍h-phi̍h-tshuah，mā hō͘ 伊ê心情激動，koh hō͘ 伊感覺絕望，因為伊並m̄是大家所想ê，m̄甘開tsit條錢。伊沿路算錢，沿路講，聲音是奇怪ê低沉：
「我tùi早起開始to̍h tī街á路走tsông。我帶tsit筆錢，m̄-koh，m̄知景仁人tī tó位，無法度kā錢hō͘ 伊，所以就來農場看bāi。我kah世間一般ê老父無啥無仝，m̄-koh，無人理解我ê心，連一點á都無人beh kā我理解；我kan-taⁿ hō͘ 人認為是凍霜，看錢ná性命leh。我可能確實是án-ne，m̄-koh，我謹慎小心。是ah，我已經決心beh kā錢hō͘ 景仁，m̄-koh，玉簾iáu講我是凍霜鬼。她lóng是án-ne kā tāi-tsì舞kah亂七八糟，她根本都無理解我；經過hiah 長ê歲月，她iáu是bē理解我....。」
總是，清文ê面結結。Tùi伊ê教養看起來，tī人ê面前m̄知見笑teh展示錢ê做法，伊看bē慣勢。小弟tsit種tī人ê面前算錢ê態度，比古董hông賣掉，koh khah hō͘ 伊bē爽快。
「你teh tshòng啥？緊kā hiah-ê錢收起來！」
「Kám講hit ê古董ê價值koh khah koân？」
「He無所謂lah！你掠準金錢ē-tàng解決一切oh？」
景文看出這惹起清文非常受氣，伊想講以後tsiah來還錢，就kā錢收入去lak袋á內。伊靜靜khiā tī四面楚歌之中，感覺kah-ná hông擊倒。若是以前，伊會感覺án-ne被打倒無啥物了不起；伊會kah-ná無啥tāi-tsì koh peh起來，無要無緊to̍h行開，m̄-koh，tsit-má伊卻無法度隨時peh起來。Beh peh起來需要一股氣力tsiah ē-tàng，這是真嚴肅ê課題。伊有生以來第一pái感覺tio̍h人類ê嚴肅課題：若beh有權利得tio̍h疼á是理解，mā需要hiah-ni̍h困難ê過程tsiah ē-tàng得tio̍h。
「阿兄一下提起錢to̍h kā它輕視，m̄-koh，阿兄ê事業mā bē-tàng忽視錢ā。」
景文ê面已經一屑á笑容都無。
「如果阿兄ê事業失敗，破產....。」
「我tang時破產leh？」
「我是講如果。無lah，你何必硬講你經營上無問題neh？我知影，知影你公司ê狀況án怎。」
「你免家婆lah！這kah你有啥物關係leh？」
「阿兄你koh án-ne講à；你總是對我有tsit種看法。當初你設立鳳梨罐頭工廠ê時，我hiah-ni̍h反對，你卻bē了解我ê心情；我並m̄是擔心你會成功á是bē成功而已。」
「Án-ne，你是teh擔心啥物？你kám是擔心家己會hō͘ tsit-ê災難拖累？」
「M̄是lah，我ê心情....。Tio̍h án怎講tsiah好leh？我無像阿兄你tsit種學者型，bē曉高深ê講法。譬喻講，阿兄若是身軀無半項ê情形....。」
「你iáu是teh擔心這oh？」
「無lah，你注意聽，我是講如果。阿兄如果陷入tsit種地步，我一定會幫忙；我ê立場是bē-sái無救阿兄，你kám bē明白？」
「你kám是tsiah-ni̍h有同情心ê人？」
「我又koh hō͘ 人án-ne講à。我的確是親像阮bó͘ 所惡毒指責ê凍霜lah，薄情lah。M̄-koh，我m̄是kan-taⁿ án-ne，真正m̄是kan-taⁿ án-ne。大家ná會lóng bē了解我ê心情leh？」
景文因為家己想beh講ê話無法度適當表達出來，心內真tio̍h急，瘦koh薄板ê身軀hián來hián去，手ia̍t來ia̍t去。伊ê根本觀念確實無真明確，連家己都無真了解，m̄-koh，伊想beh hō͘ 人理解是事實。
「陳家m̄是阿兄一個人起造ê；我mā是有teh起造，瑞文mā是其中一份子。我雖然凍霜、固執，m̄-koh，我所做ê tāi-tsì m̄是為我一個人teh做。Tsit-má我對tsit點有清楚了解à；我一向連家己都無真明白我有án-ne teh做。M̄-koh，確實是án-ne，若無，我bē有tsit種心情。我感覺非常委屈，真想beh哭。」
景文ê想法、行為，確實tī無意識中有teh為家己ê家族kah家己ê祖先。Koh再講，tī伊ê心內若是有疼，he並m̄是集中tī個人ê疼，卻是一種無明確ê大家族ê疼。因為清文是台灣人，伊應該會明白tsit點，m̄-koh，因為新思想kah教養hō͘ 伊脫離舊傳統，所以tī伊看起來，景文tsit種精神kah行為，只不過是無意識ê表現，因此伊所顯示出來ê to̍h無啥物特別ê努力kah痛苦，所以一屑á都無法度打動清文ê心。
M̄-koh，景文tsit時hō͘ 激烈ê自我意識震撼，雖然伊m̄知tio̍h án怎打動人ê心，m̄-koh，至少伊家己對家己已經有感動。
「我是無聊ê人，無像阿兄做tāi-tsì出色koh súi氣。鳳梨罐頭事業tī社會ê評價bē bái，厝裡ê人mā因為有農場感覺真歡喜。Án-ne比起來，我koh khah明顯無價值，連老母都無kā我肯定。Tsit種情形kám好？當然阿兄是了不起，m̄-koh，阿兄若加減kā我了解一下，小khóa kā我擁護一下，mā bē致使我成做一個hō͘ 人看bē起ê tsa-po͘人。」
景文吐露伊激烈ê憤怒kah譴責了後，伊就大pān挺胸講：
「M̄-koh，我無beh koh講啥物不平ê話ā。到最後，無一定厝裡ê人lóng tio̍h óa靠我；我有tsit種力量。應該the̍h錢出來ê時，我to̍h會the̍h出來，無惜kā所有ê財產the̍h出來。Ai-ah，阿兄，請你清楚講一下，hit-ê古董到底價值gōa tsē？」
清文beh回答，卻koh躊躇。
He是大概一年前，有人tī支那發見hit-ê古董，帶tńg來台灣，清文就用便宜ê錢買落來。得tio̍h hit-ê有宣紙模樣ê白瓷細花瓶了後，清文ê興奮是無法度形容ê；無論是釉彩、光澤，á是紋路，hit-ê奇巧ê美麗，jú看jú hō͘ 伊ê心弦受tio̍h震撼。聽講he是宋代定窯ê出品，當然是真稀罕ê瓷á。Hit站á，伊看kui百遍mā bē倦teh欣賞，而且koh詳細調查hit-ê瓷á。總是，tú親像男人ê迎新棄舊，清文對它ê熱度真緊to̍h消退，連伊家己都感覺不可思議。這並m̄是因為後來清朝ê御用窯興起，仿造早前瓷á ê歷史事實hō͘ 伊起疑心，mā m̄是實際上伊對瓷á有鑑定ê能力，卻是伊teh欣賞ê中間，m̄知án怎suah失去興趣，tsiah開始厭煩起來。因為清文對真品kah仿品有久長ê鑑定經驗了後，結果發現伊只不過是看tio̍h稀罕名品ê幻影niā-niā；清文最近tsiah了解tio̍h tsit點。 清文想beh kā事實講出來，m̄-koh，伊看tio̍h小弟罕得有ê激動，認真teh kah伊應嘴應舌，所以suah講出小khóa khah「誇張」ê話：
「He是一世人oh得兩pái入手ê精品。He是我ê大財產，準講我身軀無半sián錢，hit-ê古董mā夠我食五六年。」
「阿兄，kám有影？」
「Lín是外行，hit-ê古董ê價值是用萬做單位ê。」
這是gōa-ni̍h-á恐怖ê失敗kah災難！景文kah-ná踏無tio̍h一坎階梯，一時失去氣力。「玉簾，你....。」伊只有講出án-ne，就已經無氣力發脾氣，kan-taⁿ用怨恨ê眼光睨玉簾。伊tú-tsiah有講出大話：無惜kā所有ê財產the̍h出來；伊m̄是隨便講講leh，事實上，若是真正發生tsit種大tāi-tsì，伊一定會án-ne做。M̄-koh，為tio̍h放蕩kiáⁿ ê無檢點來處理善後，á是為tio̍h愚戇ê bó͘ ê無知做法來收拾善後，卻....。
伊竟然會陷入hiah-ni̍h悽慘ê地步！
清文看tio̍h景文hiah-ni̍h絕望ê神情，伊感覺tsiok內疚（kiù）。
「景文，你m̄免hiah悲觀，是騙你ê lah，m̄是真ê lah。因為你siuⁿ過認真應嘴應舌，我suah想beh kā你heⁿh一下。我已經了解你ê心情，咱mài koh冤家ā。Hit-ê物件無啥物要緊，其實玉簾顛倒賣了好價錢。」
景文kah-ná免hông判死刑，就án-ne安心落來。玉簾卻kah-ná觸tio̍h啥物，一腹火giâ起來。她對清文比手畫腳，講：
「Siuⁿ過份lah！阿兄siuⁿ過份lah！Beh滾sńg笑mā tio̍h看時間kah場面ā。聽tio̍h價錢koân到上萬ê時，你想我ê感覺án怎？我tio̍h驚kah目tsiu前烏暗，我想我活bē落去à；景文mā是仝款。我kā kan-taⁿ價值八百圓ê別人ê物件擅（siān）自the̍h去賣掉，想起來to̍h痛苦，tsiah走來tsia；我是真誠ê。景文今á日mā是真誠ê，伊tú-tsiah mā是kiōng-beh流目屎。」
清文一直叫她mài koh講lah，mài koh講lah。玉簾iáu是m̄聽，繼續講： 「你卻teh滾sńg笑，án-ne kám ē-sái？你kám一點á都無感覺阮可憐，無kā阮同情？景文mā是人，無論如何，你án-ne講話tùi鼻孔出來，teh heⁿh驚人，看人無起，hiah-ni̍h欺負人，啥人擋會tiâu？好！我tsit-má to̍h去kā hit-ê物件the̍h tńg來；準講ài一萬á是兩萬，我mā一定買tńg來hō͘ 你看....。」
玉簾kah-ná siáu-.ê teh嚷，倉倉pōng-pōng走出去。
景文三聲無奈講：「她ê脾氣to̍h是án-ne，請mài見怪！」
伊對兄嫂露出pháiⁿ勢ê神情，m̄-koh，卻真奇怪，伊竟然歡歡喜喜tòe in bó͘ ê後壁jiok去。
清文kah安子一時gāng去。肝火旺盛過了後，蒼白ê面互相看一下；in一切lóng了解à，就忍bē-tiâu微微á笑出來。
