《陳雷文選》

 | | | 轉寄

傳道者

作者 陳雷 2008.03.23

（1）

盧重義長老今年74歲，作人樂觀，身體猶足勇健，不時家己一個出國，四界去旅行。不過伊有一個習慣，tō是遊覽愛兼傳道，去到tó位，有機會tō講福音hō͘人聽。少年ê時，bat去巴西作生理移民，tī hia tuà過成十年，也看過真tsē艱苦人想bē到ê悽慘代誌。這個習慣大概tō是hit個時陣tuì hia開始ê。

這幾年伊常常去中國旅行，聽講最近有發生一件龜怪ê代誌。舊年tō無koh再去。不過關於這個故事，伊本人m̄ bat kā人說明過，是經過伊ê細漢後生hia聽來ê。

大概四、五年前，伊tī上海有熟悉一個地下教會ê朋友，經過這個朋友安排，去江西ê草地旅行講道。來到一個細細ê庄腳叫作石口，khiā家無外tsē,大部分姓石，穿破衫tuà土厝，真是散赤。長老tuà tī一個作sit人ê厝內，姓石名大斤，是三代ê基督徒，真是虔誠，看起來五、六十歲，in某tsiah 20外。原來這個所在散鄉，查甫人四、五十歲tsiah有才調tshuā某，ah查某gín-á 十外歲á tō hō͘ 人嫁出門去，所以庄裡真tsē攏是這款老翁少年某。

大斤招人來厝裡聽長老講道，有七、八個人，一個70外歲ê阿婆講是外庄行路來ê，長老真感動，替in祈禱吟詩，講道理，大家聽了真入耳（ní）。Tú好聚會suah ê當時，雄雄聽著一聲悽慘ê叫聲，親像野獸teh叫。長老驚一tiô，問大斤啥物代誌，大斤講：“長老免驚，無啥物事。”這時又koh叫一聲，長老tsông出去看，原來厝後面一個細ê豬椆，內面一隻豬倒tī hia teh叫。Uá近去看，ái-iō-uê，m̄是豬！有腳也有手，明明是一個人！He人倒tī土腳nuà，規身軀ê屎尿，頭鬃長lò lò散iā iā，kā面kap身軀khàm一半。一枝腳hō͘鐵鍊鍊--leh，tī hia tshuah bē開，大聲哀叫。He聲像豬á hō͘人thâi hit時teh吱，長老聽kah起ka-líng-sún雞母皮。問大斤：“靠主名憐憫疼惜，這個人是按怎pa̍k tī tsia？”大斤應：“長老m̄免不安。伊已經按呢真慣勢a，liâm-mi家己tō tiām去。”長老beh入去豬椆內，大斤kā擋：“你m̄通入去，伊會咬人拍人。”He人看有人入來，mo͘h去壁角，身軀kiu作一球phih-phih-tshuah。長老ku落來對伊講：“你m̄免驚，我bē傷害你。”Hit個人頭gia̍h起來，規個面烏má -má，一iân厚厚ê土kap屎尿，kan-na有二個目睭仁，看bē出是人ê面。長老jîm一條巾á kā伊拭目睭kho͘拭面，tsiah看出來是一個十外歲-á ê查某gín-á，鼻目嘴攏有。長老huah：“這個是啥物人？Thài會按呢hō͘人準精牲款待？”大斤吐一個khuì，講：“長老，這個是我ê查某kiáⁿ。”長老驚一tiô，huah：“主a，請你赦免，請你原諒伊。…你ê查某kiáⁿ是作啥物pháiⁿ代誌，犯啥物大罪hō͘人pa̍k tī tsia？”大斤講：“伊無犯罪，也無作pháiⁿ代誌！…伊起siáu!” “起siáu?！…” “Siáu真厲害。伊m̄知影伊是人，想講伊家己是豬，規日土腳nuà，四腳pê，已經二冬a攏bē好。”長老問：“有去看醫生食藥-á無？”大斤恬恬，搖二個頭。

長老拜託inkuaN7水來，he查某gín a看著水，一下tō àⁿ落去，面tu tuà水桶，lim一大睏水猶bē到khuì。雙手kā長老掠leh，m̄ hō͘伊走。長老看，雖然分bē出是人抑是精牲ê表情，he目神是深深ê 驚惶、恐怖kap哀求。長老gīm伊ê手，kā伊講：“請你m̄免驚，無人會koh再放捨你。”伊向大斤請求：“請你kā伊放開。” 大斤搖頭，連續五、六遍m̄肯，目屎suah liàn落來，講：“長老，我若kā伊放去，伊會hō͘庄裡ê人拍死，受傷害。”長老講：“請你祈禱有信心。我kā你保證，你若kā伊放開，伊bē受傷害。” The̍h五張一百kho͘ ê人民幣hō͘伊：“Tsia ê錢hō͘你去看醫生食藥-á，買清氣ê衫hō͘伊穿。”大斤kā錢收起來，in某跪落去感謝，kuāⁿ水來kā查某kiáⁿ洗頭洗身軀。大斤kā鐵鍊a拍開，扶伊ê查某kiáⁿ雙腳khiā起來，腳軟koh un落去，幾luā 擺tsiah khiā-tiâu｡。長老問：“你叫啥物名？”伊koh聽有，應：“冬。”長老講：“冬，你liâm-mi tō會好。我明年koh再來看你。”

2

隔轉年長老koh來石口，大斤請伊來厝裡。伊ê查某kiáⁿ已經加真大漢，穿清氣ê衫，ka整齊ê頭鬃，完全是一個無仝款ê人。長老問：“你敢會認得我？” 冬搖頭：“我未認得你，m̄ kú我ê老爸不時kā我講，你tshòng水hō͘我lim，kā我洗面，hō͘我看醫生食藥-á。” 長老無想著會有tsiah大ê進步，意外ê歡喜。大斤講：“長老，你講了無m̄ tio̍h｡我kā伊放開，伊無受傷害。你看，我已經失去ê獨生查某kiáⁿ又koh倒轉來a。”長老koh the̍h五百kho͘ hō͘伊繼續看醫生食藥á。

Hit日真tsē人來聽長老講道，有ê是聽著長老舊年ê故事好奇來ê。講道了，一個少年來tshuē伊，講：“長老，你講ê道理hō͘我真感動心。請你來阮tau，我ê老pē 破病siong-tiōng，請你講道理hō͘伊聽。”長老kap大斤tuè少年人去in tau，mā是一間破散ê土厝，一個老人倒tī tshu草ê壁角teh喘。長老uá去伊身邊，吟詩讀福音hō͘伊聽。He老人目睭kheh-kheh，m̄知聽有抑聽無。這時外面雄雄奇怪ê叫聲，少年人馬上tsông出去，長老tuè伊後面，tsông來到厝邊一個豬椆，內面一個人倒tī hia teh叫。少年人sa一枝柴ue，一直kā kòng。長老驚一tiô，趕緊kā giú leh，講：“Tse是啥物人？你thài按呢kā伊責罰？”少年人停手，柴ue放leh，講：“Tse tō是我ê老母！”suah khàu出來。Koh問才知影，這個老母tsīng舊年起siáu，mā是m̄知人，家己準作豬-á，四腳pê，不時to會叫，tio̍h ài kòng才會tiām 。長老kā看，這個查某人規身軀ê屎尿kap土砂粉，一枝腳鐵鍊-á鍊leh，tàm土腳nuà，像豬-á kǹg-kǹg叫，liâm-mi koh me屎來食。長老不忍心，向少年人請求：“請你mài kā伊kòng，kā伊放開，tshuā伊入去厝內照顧。”The̍h五張一百kho͘人民幣hō͘伊tshuā老母看病食藥-á。少年人錢收去，kuāⁿ水來kā老母洗，鐵鍊-á拍開，tshuā伊入去厝內面。

長老kap大斤轉來到半路，又koh聽著有人哀叫。路邊人家厝ê豬椆內面，仝款有一個人起siáu m̄知人，hō͘人pa̍k leh，準作豬tī土腳thún nuà。長老m̄甘心，替伊請求，hō͘伊tháu放。 Mā the̍h 五百kho͘ hō͘伊看醫生食藥-á。

沿路轉來到厝，長老tsiah問大斤：“這個石口所在是m̄是自來真tsē人起siáu ？”大斤搖頭：“以前kan-na冬一個。”

第三年長老又koh來到石口。一大堆人來看伊，真tsē是鬥鬧熱ê。大斤ê厝內té bē落，長老tī厝外ê空地講道。Tú tsiah講無幾句話，雄雄聽著哀叫ê聲，有近也有hn̄g，大聲細聲叫bē停。眾人ê中間有人huah：“長老，長老，趕緊，有人起siáu a！有人起siáu a！”親像teh huah火燒厝。長老停落來，beh走去看，雄雄路hit旁三、四個穿制服ê保安警察uì對面jiok來。眾人看警察來、huah一聲作一下走kah lī lī。警察來到tè，kā長老kap大斤掠起來，手扣扣leh，ka7in ah轉去隔壁庄，關tī派出所內面。

Hit暗tī lông -á 內，大斤細聲kā長老講：“長老，以後無法度koh再kap你見面a。分手以前，有一項代誌我beh對你後悔，有一句話我beh講明白。”長老講：“我看你bē輸兄弟，請你有話講明白。”大斤講：“有人因為無得著你ê錢，怨妒目睭紅，去報警察來掠人。” 長老講：“我知影。” 大斤koh講： “Hia ê庄裡起siáu ê攏是裝假ê。”長老看大斤tàm頭講：“我知，kan-na冬起siáu醫好a。” 大斤驚一tiô問：“你知影？！” 長老講：“我知影，因為in目睭內是看著金錢慾望kap歡喜，m̄是得著疼惜ê安慰kap感恩。” 大斤問：“你to知影，thài beh koh錢hō͘ in？”長老停一時á，笑笑á講：“Ah，我ê朋友，我ê兄弟，你看，一個好好人甘願kā家己看作豬，準作精牲thún踏，敢bē比一個m̄知人起siáu ê koh khah可憐可悲？”大斤無應伊，久久才講：“長老，阮想講恁台灣人真gōng呆好騙，實在是家己無目睭騙家己。”

結果保安單位提出控訴，講長老「妖言惑眾，非法傳道。」石口真tsē人因為聽伊妖言講道起siáu，kā伊關起來。後來長老in tau ê人得著這個消息，趕緊叫伊ê細漢後生去中國走tsông打tia̍p。M̄知罰外tsē錢tsiah放出來。又koh kā伊警告，以後不准入境中國。Tō是按呢自舊年起，盧重義長老無koh去中國旅行。