《陳雷文選》

 | | | 轉寄

主席萬萬歲

作者 陳雷 2008.03.16

這個人口真tsē ê國家有一個大獨裁者，一人統治已經20外年。Tī國內，伊ê地位bē輸人間ê神明，講烏tō烏，講白tō白，全國攏無人kap伊有無仝款ê意見。伊ê正式稱呼簡單叫做“偉大ê主席革命ê舵手萬歲萬萬歲”。

這個國家tī伊統治之下，社會改制作像軍隊hit樣ê組織。中央命令落來，上下一致，一通電話，全國動員，beh拍hô͘-sîn tō拍hô͘-sîn，beh掠niáu鼠tō掠niáu鼠，會使講，全國ê精牲鳥蟲kap百姓仝款，攏管kah好勢溜溜。其他ê國家大事，親像工業增產、農業大產種種，隨時beh外tsē tō外tsē，bē輸用huah ê tō 有按呢。

這個偉大ê主席革命ê舵手雖然講是看起來若神，事實是人，年歲大來，身體也會有無tú好ê所在。特別是規日薰suh無停，肺部傷害，不時khuh-khuh喀，大khuì喘bē lī，造成一個全國憂心ê問題。Tú好hit年大水災，死人幾luā 十萬。He百姓知影，自古以來ê傳說，凡是遇著這款百年天災，m̄是gâu人ài死，tō是朝代ài換。所以謠言四界，講主席病勢 siong-tiōng,m̄知tiâng時tō會死。總是主席kap in某tuà tī皇帝城內面，四圍kuân城，警察衛兵，五步十步，m̄是báng-á hô͘-sîn會tàng烏白出入ê所在。關於這項代誌，一切消息封鎖，bē-tàng進一步證實，也無人知影詳細內容。

Taⁿ這個主席ê某比伊少年20外外歲，以前是作戲á ，tsit má是革命同志。雖然伊tī政府內面無正式ê職位，總是有組織一個四人幫，靠in翁ê勢，利用主席ê名義控制權力，把握一切。He四人幫知影主席病重，會議決定，偉大ê主席絕對bē使死。所以全國四界派人tshuē奇巧(khá)ê藥草、祕方仙丹來hō͘伊食，to也無彩工。到尾無法度，叫留美ê專科醫生來看。in某kā留美醫生講：“偉大ê主席革命ê舵手絕對bē使死。”Koh kā伊警告：“主席若bē講話，你tō死; 主席若會講話，你tō活。”

這個醫生詳細檢查診斷，taⁿ苦ah，he主席現現肺癌尾期，thuàⁿ kah規身軀，心肝pak內攏pháiⁿ 去，明明作人到tsia盡磅ah，taⁿ beh按怎？橫直拚也死，無拚也死，kā主席in某講：“Kan-na這個辦法。”結果手術大開刀，死牛作活馬醫，用最新ê科技，ngē救才救起來。

過來無外久，全國新聞電視報真tsē消息，偉大ê主席身體真勇健。Liâm-mi去海邊phak日，liâm mi跳大河siû水，比全國選手代表siû khah緊koh khah hn̄g。按呢人心才安定落來，革命又koh充滿光iàⁿ-iàⁿ ê前途。

這個以後，佳哉主席真緊精神恢復，比以前重倍獨裁。國內年年革命，國外到處戰爭。Tī西南有一個已經受in軍事征服ê國家，主席講he蕃á 人種，文化攏m̄好，suá百萬ê移民入去佔領，beh kā蕃á 改作像in按呢。又koh南旁ê隔壁國，講是無禮得失著主席，出兵beh kā in教示，顛倒hō͘人修理轉來。連hit個海峽外旁ê島國Hok-lu-mo͘-sah，講是in ê，自古以來kap in分bē開。後來全國發動文化大革命，教百姓相鬥爭，作革命。有讀冊ê就是pháiⁿ人，送去作sit；作sit ê tō是好人，送去讀冊。按呢舞過來舞過去，連續舞幾luā 冬，舞死幾百萬人。到尾a舞一下siuⁿ大場，suah bē收腳。He反對派聯合起來，組織一個五人幫，姓鄧ê tshuā頭，用軍隊包圍皇帝城。

五人幫kā四人幫攏總掠起來關。姓鄧ê kap劉司令同志入來皇帝城見主席。主席四四正正坐tī大交椅頂，四圍有槍子tuāⁿ bē過ê玻璃圍leh。看in入來大聲tō罵：“恁tsia ê反革命ê走資派！出賣無產階級革命ê罪人！美國帝國主義ê走狗！…”目睭gîn ò͘ⁿ-ò͘ⁿ ，一支嘴一直罵，大聲huah：“劉司令！你tsit má馬上kā我拍原子彈！美國炸掉！…”一時siuⁿ 過激動，m̄知啥物原因，雄雄pông一下一聲，主席ê面kap嘴suah歪一旁。過來又koh pông一聲，主席ê頭suah khi去，目睭tshauh -tshauh nih，kan-na hit支大嘴ki-ki kia̍uh-kia̍uh猶teh罵。姓鄧ê驚一tiô，趕緊拍開玻璃tsông uá去扶主席ê頭殼。Ná知taⁿ苦ah，摸一下he頭suah lo̍k-lo̍k hián，強beh落去。僥倖ah，tō是he ām-kún早tō切斷ah，下面接幾luā條塑膠kóng kap一大堆電線，通tuì身軀後面去。斟酌kā看，taⁿ慘ah，he身軀有腳有手，原來是假ê，作來tshāi hit粒頭殼用ê niā-niā。

這時隔壁khin-khin-khong-khong，走去看，規房間ê儀器kap機器，幾luā 排ê開關，一大堆紅紅綠綠ê電火閃閃sih sih，明明是電腦控制ê先進ê科技品，攏無人teh顧。原來偉大ê主席肺癌尾期，thuàⁿ kah規身軀，kan-na頭頭殼猶未有。He留美醫生kā伊手術大開刀，規個身軀切掉tàn thó-kak，留hit粒頭，用塑膠kóng kap電線接電腦kap機器，所以猶活leh 無死。因為當時主席in某有講：“主席若bē講話，你tō死; 主席若會講話，你tō活。”所以留美醫生有專工另外裝一台le-soh(laser) hip相機，主席ê嘴nā振動講話，le-soh hip相傳去電腦，照he嘴形換作人工發聲，所以會講話，會罵人，koh會huah號令。In某問主席：“你按呢有舒是無？”主席應：“我beh suh薰。”真實會講話。醫生theh nih-ko͘-tin (nicotine) ê 射注入去塑膠kóng內面，按呢tō是hō͘伊suh薰。主席ê某問醫生：“按呢會tàng擋外久？”醫生講：“若照起工保養照顧，一百年無問題。”In某真歡喜，huah：“主席萬萬歲！”

Taⁿ這個姓鄧ê khiā tī hia看kah gâng-gâng，he 主席ê二粒目睭tshauh-tshauh nih，kā伊看，明明嘴to歪一旁ah，猶koh teh罵：“原子彈！原子彈！美國炸掉！…”伊雙手phóng hit 粒頭，想著tsiah tsē冬來，天下大亂，liâm-mi戰爭，liâm-mi革命，huah起huah落，攏是手裡這粒圓圓ê物件teh作怪，tsit-má koh命令拍原子彈…心肝會tshuah，m̄知beh如何處理？雄雄這時主席ê面色作一下變無去，目睭kheh 去，he嘴才tiām去…。Tō是劉司令tī隔壁出手kā先進ê機器ê開關攏總關hua去。He姓鄧ê這時才決定，雙手kā hit粒頭抱leh ，kā伊koh tshāi轉去大交椅頂坐。

無外久政府宣佈，偉大ê主席革命ê舵手萬歲萬萬歲過身去。He百姓若像有預料著，無啥意外ê反應。因為hit時國內有發生大地動，強力八級，死四、五十萬人。He百姓知影，自古以來，不管有百年ê天災抑是無，一個國家見若經過這款tsiah nih久人造ê苦難，m̄是gâu人ài死tō是差不多朝代ài換lah。

五人幫kā主席ê遺体khǹg tī水晶ê棺材內面，四圍khàm鮮花，排tī紀念館hō͘人敬看。He百姓看了，有人流目屎懷念主席ê偉大，總是攏無人知影，革命ê舵手頭殼已經切斷去ah，he ām-kún以下ê身軀是假ê。