《陳雷文選》

 | | | 轉寄

Tak牛káng

作者 陳雷 2008.10.26

阮阿公名寶，kan-na阮阿媽叫伊這個名。庄--裡ê人攏叫伊「牛伯-- a」，大概是伊生作四壯，烏koh大欉，pak肚圓圓若牛ê關係。上蓋好性地，不時笑gi-gi，bē輸五歲gín-á,m̄-bat看伊受氣--過。Kan-na有一回，hit個坤--a ài tshit-thô,無去學校，tī溪溝sńg水hō͘伊看--著，叫來問：「坤--a，你thài無去學校？」坤--a tshìn-tshái應：「牛伯--a，我無鞋。老師m̄ hō͘我去上課。」「按呢o͘h？來，牛伯--a tshuā你去買--一-雙。」成實拖坤--a去宏--a hia買新鞋。隔轉日，又koh溪溝á遇--著，叫來問：「坤--a，你thài無去學校？」坤--a mā是tshìn-tshái應：「今á日siuⁿ熱，老師講會使hioh睏。」「按呢o͘h？來，牛伯--a ham你來去問老師。」一手kā坤--a giú--leh，一路pái腳thōng來到學校。Thài有影？規班gín-á攏teh上課。老師問：「坤--a，ah你m̄是講人艱苦，beh轉去hioh睏？」這回阮阿公tō成實無歡喜，kā老師吩咐：「坤--a若koh無來上課，你kā我通知。」坤--a tuà tī阮tau後壁，in母--a tī市á賣菜無îng,尾--a the̍h鞋á錢來還，阮阿公講：「月--a，你賣菜無îng,恁坤--a愛tshit-thô,我來kā你鬥張持。」koh講：「Gín-á當teh大，he鞋á liâm-mi tō bē穿--得。」Thài會beh kā the̍h鞋á錢？

龍叔--a講beh掠牛，念真久--a。這日去發--a hia看牛，價數攏講好勢，kíng一隻赤牛母kap一隻牛á kiáⁿ。He牛放tī牛埔看活過日，自由走。龍叔--a問：「明á tsài來，牛beh按怎掠？」發--a pok一嘴薰，割一把甘蔗尾，gīm-tī手--裡ná ia̍t ná hiu：「牛來，…牛來，…」像teh唱歌á戲。成實he牛tshuā牛á kiáⁿ tō uá--來，牛舌tn̂g-tn̂g來giú蔗尾。發--a講：「明á tsài,你tho͘-la-khuh駛--來，牛索kho͘--轉-去tō是。」

隔轉日，龍--a駛一台tho͘-la-khuh來，紅kì-kì ê細隻Tho͘-io-tah。發--a pok一嘴薰，割一把甘蔗尾，一手gīm牛索，khiā hia ná ia̍t ná hiu：「牛來，…牛來，…」像teh唱歌á戲。He牛母近視，tshuā牛kiáⁿ uá--來，beh到--a才看著發--a手--裡一khûn牛索，suah停腳m̄行，頭uat--leh作伊去。發--a看牛去，作後面ná huah ná趕：「牛來，…牛來，…」。He牛拍著驚，青狂走，二個jiok一睏，掠無牛。龍--a講，明á tsài叫阮海--a來鬥圍。

透早ham in後生清海--a、厝邊大鐘來掠牛。這回hia̍h á頂pak面巾，bē輸giâ 媽祖扛轎，按算beh大hut一睏。發--a又koh手--裡一把甘蔗尾、一khûn蔗索，khiā hia唱：「牛來，…牛來，…」牛母行uá--來，近視看著牛索，tsa-hng拍著驚，uat--leh又 koh走。四個人taⁿ好--a作一睏jiok。隨tō pháiⁿ天siàng大雨，pin-pin piàng-piàng,liâm-mi土腳路糊á muâi,人kap牛漿漿，牛頭、牛尾溜khah滑he ho͘溜，掠thài會tiâu!發--a huah：「牛kiáⁿ先圍！」Tshîⁿ uá--去，二個ián頭，二個kuāi腳，phiâng…一-下siàng tī土腳。趕緊牛索liù來捆，四腳pa̍k粽，捆作一kuāⁿ。Hiⁿ-hiⁿ hàiⁿ-hàiⁿ，搖搖háin-hián扛上tho͘-la-khuh。牛母看牛kiáⁿ hō͘人扛上車，khiā hia háu;「m̄-muâ,…m̄-muâ,…」頭犁犁，suah來tsing tho͘-la-khuh。牛母有kǹg-phīⁿ，發--a giú牛索，tioh牛phīⁿ。另外hit 3個uì後面sak牛kha-tshng，按呢sak一下thōm一步，舞一晡才上車。

轉來到the̍h-á,he牛原在釘腳m̄行。一個tio̍h牛phīⁿ，三個sak牛kha-tshng，一枝竹槌á ná摃ná huah：「牛行，…牛行，…」Tú好阮阿公uì hia過，uá來看牛，牛也kā看。阮阿公講：「趕緊，龍--a m̄通摃牛。」龍--a應：「牛pháiⁿ tio̍h教示。」阮阿公講：「牛母有身。」龍--a驚一tiô,taⁿ好--a，買一隻送一隻。竹槌á放--leh，kā牛講：「Ai-ioh，我m̄知你牛á有身。…清海--a，緊去割一把蔗尾來飼牛。」阮阿公so牛phīⁿ，giú牛hīⁿ來嘴邊，m̄知nauh 一句啥物好話，he牛母尾á sut--一-下，tō起行。阮阿公看牛kiáⁿ倒tī土腳，四腳pa̍k粽捆一kuāⁿ，規身軀漿糊糊，問：「龍--a，tse牛kiáⁿ作pháiⁿ犯啥罪？」龍--a講：「Ah to狗怪m̄行。」阮阿公講：「你四腳kā pa̍k一kuāⁿ，khiā to bē khiā,beh按怎行？緊tháu--開！緊tháu--開！」索á tháu開，牛á hu̍t--一-下khiā --起-來。二蕾牛目掠阮阿公釘，雄雄hīⁿ á gia̍h直直，尾á khiàu kuân-kuân,頭犁犁，tsông--leh tō jiok來beh tak。阮阿公若像早tō知，閃一下身，kuāiⁿ一枝腳，牛á siak tī土腳。He牛翻身peh--起-來，又koh jiok來tak。阮阿公伸一枝腳，牛á又koh kuāiⁿ tī土腳，四枝khōng腳khiàu｡翻身liòng--起-來，氣kah目睭紅ki-ki、血獅獅。M̄認輸，「m-mô͘｣一聲，又koh tsông--來。Ná知又koh kuāiⁿ一下，siàng tī土腳喘。Tok強peh--起-來，khiā hia thó͘-khuì,雄雄頭垂--落，嘴nuā直直tin，suah定定tshāi hia，無koh來jiok。阮阿公看牛m̄來，罵一句：「你牛青蕃！」進前一步，牛á退後一步，進前二步，牛á退後二步，直直退到竹抱腳，無位通走。阮阿公行uá--去，一枝牛hīⁿ tioh--來，好禮kā問：「Taⁿ你beh koh狗怪？」牛á m̄應，頭tshih-tshih，尾tuī-tuī,四腳phi̍h-phi̍h-tsùn,強beh un--落-去。

Hit暗the̍h á內lin-lòng叫。透早起來巡，一腳a鉛桶，tsàm kah mi-mi mauh-mauh，昨暗m̄知tó一隻惡牛發性地！kā看，牛母、牛kiáⁿ攏ku tī竹抱腳hioh睏。龍--a竹槌gia̍h--leh beh去問牛。Tú好阮阿公來，叫--伊：「龍--a，牛á有乖？」龍--a應：「牛pháiⁿ，一腳a鉛桶tsàm-tsàm破。」Ná講ná開籬笆門，猶未赴關，he牛á已經衝--出-去，頭無回，腳無停，直直tsông,khah慘是牛蜂釘著牛lān-pha。直透tsông到大路尾，才停腳hioh喘。龍--a ná huah：「你這隻惡牛！」Gia̍h ná jiok。阮阿公kā giú--leh，講：「Tse牛猶細漢，用講--ê,mài用摃--ê｡」「用講--ê?！牛伯--a，你gâu,你去kā伊講。」Tse牛母看牛kiáⁿ走--出-去，uá來籬笆看。阮阿公一枝牛hīⁿ giú--來，嘴邊細聲nauh一句，m̄知講啥好話，he牛嘴舌thóng tn̂g-tn̂g來tsuīⁿ伊ê手，尾溜ná ia̍t,行來大路頭，大聲叫：「m-mô͘,…m-mô͘,…」牛kiáⁿ聽著牛母叫，頭giâ--起-來，khiā hia想一晡。He牛母koh叫，雄雄牛kiáⁿ頭犁--落，四腳相jiok koh tsông倒轉--來。龍叔--a驚牛tak，bih tuà籬笆後huah：「閃！緊閃！」阮阿公作伊khiā hia pok薰。He牛kiáⁿ顧tsông無顧看，tsiⁿ著牛母kha-tshng，差一sut á pua̍h倒。頭àⁿ--落-去，tōng牛母pak肚，beh suh奶。牛母m̄ hō͘ suh，作伊行。牛kiáⁿ tuè後壁jiok，tsông入來the̍h á內。這時龍叔--a uì籬笆後探--出-來，問講：「牛伯--a，你是kā牛母講啥好話？」

古早羅漢內里門tsia，山內龍眼、suāiⁿ á種真tsē｡阮阿公少年ê時山內作sit種果子。阮阿媽講：「少年ê時外緣投--leh，kan-na伊一個鬍鬚，大家攏bat--伊。」

Hit tsām當熱--人，這日tī山內hō͘牛tak--著。「Thài會hō͘牛tak--著？」「Hioh--lah。阿福伯--a hit隻老牛káng tak--著。」「老牛káng pháiⁿ性地？」「M̄是，牛káng拍著驚。」「拍著啥物驚？」「恁阿公，hit日過年，tī山內放炮á｡」「山內過年放炮á hō͘啥人聽？」「M̄是beh hō͘人聽。Tō是驚人聽--著，才去山內放。」koh kā問，過來嘴suah thīⁿ--起-來，攏m̄ koh講，kan-na應：「恁阿公、鐵齒koh頭殼tīng!」

走去問阿公：「你少年鬍鬚足緣投？」伊笑笑--a應：「恁阿媽kā你講--ê?」「阿公，你tī山內放炮，beh hō͘啥人聽？」「恁阿媽kā你講？」我搖頭，「伊講你鐵齒koh頭殼tīng｡」伊一枝粗手若鐵杷，牽我樹á腳坐。「來，阿公講hō͘你聽。」這時中晝日當khiā,伊hia̍h á汗直直suê,瓜笠á the̍h tī手--裡ia̍t｡「M̄是山內放炮，是去試炸彈。」「是按怎beh試炸彈？」「Beh去炸電塔。」「啥物電塔？」「Hit陣咱tsia山內入去，有一枝軍用ê無線電塔。」這tsām新聞攏teh報，美國恐怖份子炸大樓。「你敢是美國恐怖份子？」伊起愛笑。「M̄是恐怖份子，阿公是反對蔣介石份子。」「蔣介石是啥人？」講tō是阮學校內拜ê蔣總統。「蔣總統？你是按怎beh反對--伊？」「伊真pháiⁿ。」薰the̍h出來pok，koh講：「實在真pháiⁿ，人世間ê魔鬼。」「總統作無好，thài無愛選舉hō͘伊無tiâu?」阿公hàiⁿ頭，若像beh笑koh笑bē出來，講in hit時無選舉。Tse我想無，若是無選舉，總統按怎來--ê?「伊按怎足pháiⁿ？」「Thâi真tsē人，掠真tsē人，kā台灣人準牛馬駛。」「阿公，阮學校講蔣總統上gâu｡」阿媽講阿公鐵齒koh頭殼tīng,敢是這個關係？

「牛káng tak tī tó位？」伊褲腳li̍k--起-來，腳肚烏烏一大khî,腳肚肉siah一半，tō是按呢行路páiⁿ腳。「牛pháiⁿ性地？」「牛聽著炮，hiahN著驚，起牛瘋，來jiok阿公。」「Ah來--leh？」「Ah來阿公青狂走pua̍h倒，hō͘牛tak。」「Ah來--leh？」「Ah來阿公腳好了，去tshuē牛，kap伊參詳。Kā伊講，牛--a，我寶--a kap你仝款，hō͘人作牛款待，kǹg-phīⁿ拖leh行，你敢無看--著？據在人beh掠bêh thai。Taⁿ tsit-má,我寶--a m̄願作牛hō͘人欺負，beh來去pōng電塔，kā in教示。寶--a試炮pōng大聲，牛--a，你m̄通驚。…你ài知影，寶--a kap你仝款，咱攏是牛，…」Tshuē牛講幾luā擺，hē牛顧食草，m̄知聽有--無？

「Ah來--leh？」Ah來阮阿公有一日uì牛灶過，外口一隻牛pa̍k tī牛khit，m-muâ,…m-muâ…，teh叫。He聲真熟sāi,阮阿公kā看，taⁿ怪--a，tō是伊，阿福伯--a hit隻老牛káng｡Ah thài會m̄知死來tī這款所在，等beh hō͘人thâi?Uá去問牛：「Tsia啥物所在你敢知？Thài會來tī tsia創啥？」牛伸舌來tshuīⁿ伊ê手，目睭teh講：「我kap寶--a仝款，作牛kǹg-phīⁿ，hō͘人掠，hō͘人thâi｡」阮阿公驚一tiô,緊入去牛灶tshuē頭家，問講：「石--a，你外口hit隻牛，敢m̄是阿福伯--a ê?」「Hioh--lah，內面tsín無îng,小等tō輪著伊。」「Liâm-mi teh beh thâi?」「Ah無敢beh tshāi hia拜公媽？」阮阿公著急，kā參詳：「石--a，tse牛老--a，也無作啥物pháiⁿ，犯啥物罪，sán kho̍k-kho̍k無油無肉，thâi也無利，khah輸來賣--我。」現金tu hō͘伊，牛牽轉去山內放生食草。過--來kap牛上熟sāi,suah學會曉聽牛話，mā會曉講。

結局beh 40冬前--a，阮阿公無去炸電塔，教示蔣介石。因為伊進前試炸彈，取炮心作炸藥，hit tsām炮á買siuⁿ tsē,賣炮--ê嫌疑，驚連累著，去密告。所以未曾去炸tō hō͘蔣介石ê jiàu-pê-á掠--去。判15冬，若牛á關10冬，蔣介石死ê時才「大赦」放--出-來。

「阿公，我敢會使騎牛á kiáⁿ？」「你beh騎牛，ài先去問--伊。」「Beh按怎問牛？」「先kap伊作朋友，kap人仝款。」「阿公，你教我講牛話。」伊一枝粗手若鐵杷kā我ê肩胛掠--leh，「m̄-mô͘,…」一聲足大聲，哈、哈、哈直直笑，笑kah khuh-khuh嗽，笑kah流目屎。