《陳雷文選》

 | | | 轉寄

我beh hō͘恁知

作者 陳雷 2008.11.09

雄雄身軀通電，腳手麻--一-下，頭殼內大聲huah：「擋車！…緊擋車！…」真知tō beh出代誌，已經bē赴--a。Tú衝過十字路，車tō tsing--來，uì巷á口tsông--出-來，無顧看，tú-tú好pâng --一-下tsiⁿ著車尾。幹！新牽車tō食pōng,今á日注衰。

這個少年家，紳士hái-kat-á頭，西裝tiàu ne-khu-tai，行uá來會失禮。佳哉車kha-tshng-phué細細khê一tsuā,無大傷害。量其大約，參詳賠四千kho͘準算。龜怪--a，看tō斯文斯文，thái見若uá--來，bē輸teh吹冷氣，畏畏tshìn-tshìn,強beh起雞母皮。Kā看，目kho͘烏烏thap-thap，目仁thó͘-thó͘ pok-pok，概成niau-á目bih tī暗間teh當niau鼠。是tó一tah kò-樣tîng-tâⁿ，kap人無仝？Kan-na有一個奇怪ê特感，khah想to想無，規日上班攏bē清彩。

Tsīng細漢tō有這款奇怪ê特感，老母講伊大金嘴，「未卜先知」。厝--裡姊妹三個，伊上大漢，kan-na伊會曉。身軀通電，腳手麻--一-下，按呢tō知--a。八歲hit時，半暝夢著阿媽來kah被，講：「幼真--a，你乖乖，阿媽beh轉--來-去。」透早起--來，kā阿母講：「阿媽轉--去-a。」老母罵伊大金嘴，tse話m̄通烏白講。幼真應：「阿媽講--ê｡」雄雄才會記--得，ai--ioh，家己昨暗mā夢--著，阿母衫穿suí-suí,頭毛lua̍h齊齊，眠床頭吩咐：「菊--a，我taⁿ beh來--去。」趕緊入去房間巡，老母83，好勢好勢，目睭kheh-kheh，無代無誌睏睏á已經過身--去-a。也是按呢佳哉，hit年29暝，菊--a無îng teh煮大頓，幼真講：「阿母，m̄免煮tsiah-tsē｡」菊--a講：「今á日29暝，大家煮tsheⁿ-tshau。」幼真講：「阿爸kap阿兄無beh轉--來。」半信半疑，拍電話去店--裡問，無人接。拜託厝邊明--a駛車去tshuē｡僥倖，tō是tsing著電火thiāu píng車。趕緊車去病院，險險bē赴救兩條命。所以菊--a學hō͘人聽，這個gín-á生成kap人無仝，未卜先知大金嘴。

下班等來到厝，藝芬khiā tī門外teh等--伊。「阿姊，你tsín才轉--來？」「Ah你m̄入--去，khiā tī tsia teh等啥？」藝芬tō是二姨ê查某kiáⁿ，uì高雄來台北上班beh一冬--a，kap伊公家稅這間a-pha-to͘h 。In二姨講，tuà作伙khah省，也通相照顧。「阿姊，我m̄敢入--去。」「M̄敢啥？」「內面有聲…」「啥聲？」「便所聲…便所有聲…」「Ai-ioh，ná有啥！阿英--lah。我tō有kā你講--過，若有聽著便所lìn-lòng叫，m̄免驚，mài tshap--伊。阿英bē kāng--人。」門開tō kā e--入-去。

這個少年查某阿英tsīng in搬--來tō有tī tsia，m̄知伊ê名，tshìn-tshái kā伊號作阿英。定定便所內吵，有時tsâng水，有時唱歌。另外猶一個細漢查甫gín-á,上愛房間內pin-pòng走，mā是m̄知影名，叫作Boy。幼真kā表小妹吩咐：「作你mài tshap--in。In bē kāng--人，m̄免驚。」藝芬問：「阿姊，是按怎kan-na你有聽--著。我攏無？」幼真應：「阿姊身軀通電，你無聽--著-ê,阿姊tō有聽--著，你無看--著-ê,阿姊tō有看--著。」Ai-ioh-uê,tse阿英m̄ tō若像魔siûⁿ-á?人講魔siûⁿ-á有好--ê也有pháiⁿ--ê,好--ê叫作魂，pháiⁿ--ê叫作鬼。Tse阿英kap Boy，阿姊講bē kāng--人，kap人仝款，應該tō是好--ê,m̄是鬼，按呢家己安慰，tō khah m̄驚。Ná知這日下班轉--來，家己一個，第一回聽著便所lin-lin-lòng-lòng,suah m̄敢入--去。

半個月無事，藝芬來勞保局上班滿一年，幼真講：「來，我請--你。」tshuā去「麥當勞」慶祝。一粒雙料漢堡咬tī嘴--裡，才注意著隔壁桌hit個少年，紳士hai-kat-á頭，西裝tiàu ne-khu-tai，對對tō是hit日kap伊tōng車hit個。身軀通電麻--一-下，無m̄ tio̍h--lah，細聲kā表小妹講：「Hit個，你看。」藝芬使目尾lioh--一-下，面骨骨，目kho͘烏烏thap-thap，目仁thó͘-thó͘ ，bē輸bih tī暗間ê niau-á目，講：「Bái-kê-kê!阿姊，你beh叫我看，mā kíng一個khah ian--ê｡」幼真講：「看hō͘真，這個，伊tō是你ê翁。」藝芬罵：「你是teh講啥？大金嘴，…這個，我一世人透底m̄ bat看--過。… 」

一禮拜後，下班轉--來，見著阿姊tō罵：「攏mā是你這個大金嘴！」幼真問：「你今á日遇著伊？」結局hit日勞保局來一個新手--ê,siàⁿ-siàⁿ tō是hit個「bái-kê-kê｣ê少年家，kap伊仝出納組。「我講--過-a。注定--ê｡啥物名？」「陳天佑」「無m̄ tio̍h,tō是伊--lah。」話講suah，雄雄便所水又koh lin-lòng叫。

這個陳天佑雖罔無明星hit牌ê看頭，to也斯文斯文，對人有禮，辦代誌有頭有尾。有機會tō來tshuē藝芬七tāⁿ八tāⁿ，有講有笑，明明對伊有hit個意思。Taⁿ查某gín-á你to 知，上驚好意，bē堪得人po-so。這個天佑--a，嘴nuā kiáu tiⁿ-tiⁿ，好話哺爛爛，不時來kap伊thi-thi tha̍p-tha̍p kho̍k bē suah。漸漸、漸漸，he人tō lú看lú也bē bái｡這個藝芬--a，一粒青春ê心，若棚á頂ê菜瓜花pha̍k著日，un-un-á,un-un-á也tō開。無外久熱--人過了，hit日kā幼真講：「阿姊，你講了無m̄-tio̍h｡這個tō是我ê翁。」作伙tshuā轉去高雄見pē母，tō掛手tsí訂婚。

了後越jú鬧khah厲害。不時房間pìn-pòng走，便所水lìn-lòng叫，koh有救護車hīⁿ-ho͘ⁿ hīⁿ-hoⁿ風螺tân bē suah。幼真hō͘ in吵kah擋bē tiâu,受氣便所門拍開tō beh kā罵。第一回，頭一擺，面對面khiā直直，白蒼蒼，sán-pi-pa，lò-lò-lò,mua一領睏衫闊lòng-lòng,長頭毛烏mà-mà,散iā-iā｡雙手kā頭毛pué開，ai-ioh-uê,白死殺，kan-na空空一個面框，無鼻無嘴無目睭。一直念：「…我m̄是自殺--ê,…我m̄是自殺--ê,…你m̄通聽in烏白講。…」He聲bē輸鐵枝路火車頭teh擋車，ki-ki叫…想beh kā問，hu̍t--一-下koh無--去。

幼真kā藝芬講：「這個阿英，伊m̄是自殺--ê｡」「人害--ê?」「冤枉死--ê｡」 Taⁿ慘--a，人講冤枉死--ê會來報冤討債。這個阿英，是魂抑是鬼？Lú想lú畏，心內青tshìn｡隔日上班，問天佑：「你khah早敢有交一個查某朋友？」「我m̄是有kā你講--過-a？」「你有kap伊訂婚無？」「有--a，我有kā你講--過-a。」「尾--a按怎suah--去？」「Tse…tse…我mā有kā你講--a，尾--a，…尾--a，…伊自殺。」藝芬雙手拳頭母gîm ân-ân,冷ki-ki。「為啥物自殺？」「悲憂症，醫生看足tsē攏醫bē好。」「伊按怎自殺--ê?」「吞藥á｡…規罐吞--落-去…家己一個關tī便所，in老母市á轉--來看--著，便所水lìn -lòng叫，叫救護車hīⁿ-ho͘ⁿ hīⁿ-ho͘ⁿ，已經bē赴--a。」「Ah你--leh？…你tī tó?」天佑--a無歡喜，強beh起變面。「我teh作兵。…Tú好放假轉--來。」「伊…伊啥物名？」身軀起ka-冷-sún,m̄敢問，tok強問…「淑英…阿英…阮大學仝班，in tau kan-na生伊一個。」雄雄畏寒phi̍h-phi̍h-tsùn,起雞母皮，頭殼會hîn,hīⁿ-á ki-ki háu,抱心強beh吐。Tō是已經二個月月經無來，有身--a。

In koh驚koh歡喜，m̄敢講hō͘表姊知影。Tō按呢kap天佑趕年底結婚，搬--出-去。過--來便所tō tiām--去。M̄-kú定定聽著阿英teh唱歌：「火車已經到車站，…阮ê心肝漸漸重，…看人歡喜來接親人，…阮是傷心來相送，…無情--ê…無情--ê…無情--ê…」

過一個外月，hit暗藝芬雄雄轉--來，面皮青sún-sún,目睭紅ki-ki，嘴唇烏綠綠，mua一領睏衫闊long-long拖土，kā幼真講：「…阿姊，我m̄是自殺--ê,…你m̄通聽伊烏白講，…」幼真坐tī房間teh看電視，驚一tiô,腳手通電麻--一-下…tú好這時電話giang，阿姨ê聲ki-ki叫，uì高雄拍--來-ê:「…你緊去kā看--一-下！藝芬--lah，佑--a tú-tsiah電話來，…講藝芬食m̄-tio̍h藥á,規罐吞--落-去，m̄知人……hioh--lah，救護車車去病院…」這時便所門uâiⁿ--一-下家己開，阿英khiā tī hia teh照鏡，手--裡牽一個細漢查甫gín-á,2,3歲á｡「我m̄是自殺--ê,…你m̄通聽伊烏白講…」雄雄ua̍t頭過--來，第一回看著伊ê面，真suí ê少年查某ê面，抹胭脂、畫目眉，若ang-á｡Phīⁿ-kóng teh流血，下huâi一tsuā細細tsuā ê khî,一直念：「…我無beh食藥á自殺，…我pak肚已經2個月--a，…」