《陳雷文選》

 | | | 轉寄

Tì帽á ê人

作者 陳雷 2009.03.01

Hit個惡夢已經來幾luā擺，這tsām khah tsia̍p｡龜怪--a,伸手去摸，he頭毛tō一枝一枝lak了了，變作完全ê禿頭。驚一下醒--來，身軀猶teh拚tshìn汗。趕緊peh起來照鏡，電火拍開，好得佳哉，一簇花花，猶koh tī hia｡細字用手去so,好勢好勢，一枝一枝在在，tī頭殼心hia｡Koh算一擺，攏總原在156枝，一枝無減。攏是阿玉á可惡，平時m̄-bat kā鼓勵，顛倒攏teh kā phí-siùⁿ：割tshun ê久菜尾，koh發也m̄成物--lah。也是有影，kā看，he毛ta̍k枝黃酸黃酸，bē死bē活。不而過伊有堅持，已經進入嚴重危機ê階段，這個最後防守ê戰線，絕對bē使失敗。

Tī伊面頭前，無人愛講『禿頭』這二字，kan-na in妹婿lò腳昌--a敢講，因為昌--a家己有禿頭：「無啥--lah，若是禿光光，作一頂假--ê來tì tō是。」Ná講tō伸手去摸頭，家己ê假頭鬃ni--起-來：「你看！」一tè薄薄--a,bē輸桌布用siuⁿ久無換。Hit粒頭殼光光若金瓜，hô͘-sîn hioh--起-lih tō會滑--落-來，一枝毛to無。在昆旭--a看--來，昌--a按呢光頭hiàn-hiàn, bē輸一kho͘人thǹg光光，khiā tī新光三越大門口hō͘人看thiòng--ê｡「我無像你，我無禿頭。」昆旭--a應。「你無禿頭？！木--a,泉--a,來，恁攏有看--著。昆旭--a,你帽á thǹg起來hō͘大家看！」激kah昆旭--a擋bē tiâu,帽á thǹg--落-來，ná比ná huah:「tse...tse...tse tsiah tsē,m̄是頭毛是啥？！」一簇花花，bē輸割tshun ê久菜尾。

大概阿玉á拍長途電話kā政雄tâu:「恁老pē頭毛落beh了--去。」政雄驚老pē頭殼無毛受風寒，舊年昆旭--a 69歲生日ê時，專工uì美國寄這頂帽á轉--來，吩咐講：「這頂帽á有Pete Rose親手簽名。」這個Yankee ê球手tī美國上出名，昆旭--a m̄ bat--伊。M̄-kú聽後生ê口氣，無輸美國總統簽名。Uì hit時起，人去到tó位，帽á tì到tó位。頭無離帽，帽無離頭。阿玉á對野球無看重，罵伊：「日時也tì,暗時也tì,hit粒頭beh hip hō͘生菇。」其實雖罔無愛野球ê人，看著hit頂帽á,外觀mā是真tshio-iāⁿ。規頂khóng色，一個帽á舌長長若鴨嘴，頭前紅字一個N，一個Y，tō是正港ê New York Yankee野球帽。

Lò腳昌--a beh嫁查某kiáⁿ進前，阿玉á早tō kā昆旭吩咐：「你去hō͘請，作大舅坐大位。千萬m̄通失人ê禮！」結婚hit日，tī台南大飯店請桌，鬧熱tshih-tshah。連hit個市議員林有信mā有去。昆旭--a這日作大舅坐大位，tiau西裝，拍ne-khu-tái,taⁿ慘--a!成實連hit頂帽á也tì--來！全場幾luā百人，tō是伊kap新娘tì帽á｡大家桌腳tshi-bú tshì-tsha,Ai-ioh，ná有一個大舅生作這款？bē輸外國jû-sù蕃，連這個禮數也m̄ bat！

可憐lò腳昌--a,目睭掠hit頂帽á直直看，規個面攏烏--去，pháiⁿ勢kah m̄知beh去bih tó位。暗靜kā阿玉á giú一邊，gīm拳頭母放tiau講：「Koh 5分鐘，恁昆旭--a hit頂破帽á若無the̍h掉，kā我出出--去！」阿玉á應：「你m̄知，tō是為著今á日這頂帽á,我kap伊冤家幾luā日！m̄聽tō是m̄聽！」當teh m̄知beh怎樣好，臨時去想著一步，哀pak肚痛。昆旭--a講：「你sió lún--leh。等我台á頂好話講幾--句-a才走。」阿玉á huah:「Bē等--得。定著是急性盲腸炎。」一個面反青反白，直直huah beh吐。昆旭--a著驚，kā昌--a念一聲「失禮」，猶未上台講話，先tō tshuā阿玉á走。按呢才好得佳哉，問題解決，昌--a面主留一半。了後害in某kap查某kiáⁿ khàu一晡，tsiù死tsuā後回絕對m̄請大舅。這個笑話傳--出-去，過--來凡若好事pháiⁿ事，hia ê朋友弟兄，攏無人敢請伊去。

蓋博知影昆旭禿頭m̄認輸，愛創治伊，kā煽動：「簡單--lah，你the̍h一tè老薑母浸ui-su-kih，ta̍k日頭殼皮kā lù kā tshè,免一個月，頭毛發kah hō͘你剪bē lī!」又koh烏吐白吐，吩咐講：「Lù了帽á tì--leh，攏m̄通洗。」昆旭買一干紅標ê Johnny Walker，浸老薑母，大力lù細力tshè,頭殼皮lú kah beh火燒，koh sīⁿ koh痛，成實帽á hip leh攏m̄敢洗，規個頭lú抹lú臭。阿玉á罵，比人sīⁿ kiâm菜khah臭。M̄ kap伊睏仝眠床。

這日kap木--a､ 泉--a in去台北tshit-thô｡Uì淡水漁人碼頭坐渡船去八里。He淡水河tī hia嘴闊闊beh出海。看he景緻，頭前有八里半山ba̍t-ba̍t ê墓á埔，後面是台北平地tsa̍t-tsa̍t ê kuân樓á厝，真是優雅美麗。當teh欣賞讚美，雄雄船頂風透，無細字一頂帽á suah siàn一下飛--去。昆旭--a huah一聲「害」，伸手去sa,已經bē赴--a,suah王見王禿頭照著日頭，光光iāⁿ-iāⁿ，若一tè反射鏡。趕緊àⁿ落去beh khioh帽á,tō是這時胸坎tsa̍t,bē喘khuì,人tō un--落-去。不幸心臟病來發作。趕緊送病院急救，險一大險，差一sut á死無去。出院了後，lú想lú驚死，不時煩惱心臟病koh來。Kā in某講，我這帽á若koh lak--去，心臟病koh發，ah tō無救。自tse以後，顧hit頂帽á若顧命根，帽無離頭，頭無離帽。一頂Yankee bē輸頭殼生--出-來-ê,日--時tì leh行，暗時tì leh睏。後--來hia ê朋友規氣無叫伊ê名昆旭，改叫伊Yankee。

這下晡tī公園樹á腳行棋，注該beh有代誌。泉--a hō͘昆旭--a抽一枝車，m̄甘願huah講：「幹！Yankee，你敢食我ê車！…」昆旭--a無食háⁿ，應：「食tō食，敢有teh lún--你？」Tú好5、6個tshit-thô gín-á竹雞á黨uì樹á腳過，也是叫作Yankee。聽著有人操幹kiāu,huah:「幹！Yankee…」規陣圍uá--來。Kā看，頭殼頂攏tì Yankee ê野球帽，有N koh有Y，kap昆旭ê仝款。Tō是台南m̄成gín-á竹雞á幫，號美國á名khah iāⁿ！Tshuā頭hit個穿一領無ńg ê lan-lin-guh，二枝手股若雞腿，正旁刺一隻戰車，倒旁刺一枝火箭，好禮tō問：「頭--ê,你叫beh請 ？」Taⁿ這個泉--a操幹kiāu,得失著竹雞á Yankee幫，m̄敢tèⁿ-siáu,一頂瓜笠緊tō the̍h--落-來，比對面昆旭--a,講：「這個朋友，伊叫作Yankee。」He雞竹á頭看昆旭，一粒hiūⁿ-hiūⁿ若pua̍t-á籽m̄成物，龜怪--a,koh tì一頂Yankee帽，有N koh有Y。明明是teh裝假--ê,鬧--sńg ê｡心內bē爽，tō beh惹事：「頭--ê,tse帽á小弟借看--一-下。」伸手tō來sa 。昆旭--a hiahN3一大驚，這頂帽á hō͘你sa--去，老身m̄ tō無命！趕緊雙手帽á舌giú--leh，huah講：「Tse…tse帽á bē使the̍h…」he雞竹看伊帽á m̄放，giú koh khah雄，龜怪，suah bán bē起--來，bē輸he帽á發草釘根。大力koh hia̍p 3、 4下，連頭殼皮也beh bán--起-來。昆旭--a哀一聲「害」，he帽á才giú--落-來 。Taⁿ tō成實驚一下破膽兼siàm尿，刺激著心臟，koh再來發作，人tō un--落-去。Hia ê竹雞本成想beh修理兼拍人，看昆旭--a未拍tō倒--落-去，一kho͘死人色gōng人面，驚一下無顧拍tō溜suan走。這時昆旭--a還魂一半轉--來，泉--a,木--a看伊khuì猶有，大聲kā叫：「昆旭--a,你看！」牽伊ê手去摸，ai-io-uê,奇怪--a,規頭ê毛！té-té粗粗，ām-ām tsa̍t-tsa̍t,bē輸新發ê hm̂-á草，m̄是割tshun ê久菜尾，suah無禿頭！勉強kā泉--a､木--a講：「恁看，我無禿頭！」回復查甫作人ê尊嚴，嘴角bi一下，thó͘一個khuì,tō上路去。

猶是阿玉á生理頭腦轉khah緊，tsuâⁿ按呢落去拍市場。叫人hip一張昆旭--a ê相，無tì帽，頭毛發ām-ām,tah tī干á頂面，用伊ê âng-á頭作標頭。這個『起毛好』禿頭藥水，老薑母浸ui-su-kih祕方製造。干á頂面說明用法『起毛好』一日抹2遍。Tì帽á,m̄通洗。尾á賣去台灣全國各所在，聽講也有外銷，生理外成功--leh。