《陳雷文選》

 | | | 轉寄

Pháiⁿ嘴

作者 陳雷 2009.03.15

萬--a tī黎明國小教音樂，人是bē bái，tō是hit枝嘴bái。特別be-a-luh lim--落-去了後，hit枝嘴bē輸he屎ha̍k á空，見講tō是臭ko͘ⁿ-ko͘ⁿ--ê，定定按呢得失人。這日來tī 『阿秋鵝肉』食鵝配bi-luh。Lim了差不多--a，peh--起-來beh去便所放尿。Hua̍h一步顛二步，無細字踏著人客ê腳，差一sut á pua̍h倒。受氣罵hit個人客：「你這個死人！別位m̄去死，死tī tsia tìn路，kā恁pē kuāiⁿ腳。」拳頭母gīm--leh tō beh tsing。Hit個人客坐tī壁角家己一個，面sán-sán，嘴薄薄，目眉tn̂g-tn̂g，看--起-來紳士紳士，穿一su khóng色ê西裝，結一條紅色ê ne-khu-tái，khuaⁿ-khuaⁿ-á應--伊：「你來踏我ê腳，koh罵我pháiⁿ嘴。」khiā--起-來，tsiah大漢，lò-lò比伊kuân一粒頭。萬--a無lún--伊，tshîⁿ uá--去：「恁pē罵你tō按怎？！你好死m̄死。…幹！你看，恁pē這枝腳…」「我也無踏著你ê腳，…」「無踏--著？…你看，踏一下折--去-a，痛kah beh死。」一腳giâ起來桌á頂，ná比ná huah：「幹！比死khah艱苦！」Hit個人客本來猶好禮teh講，聽伊罵這句「比死khah艱苦」，雄雄面白死殺，目睭tsheⁿ-tsin一直kā gîn，烏仁反綠tsiah大蕾，講：「少年--ê，你m̄-bat死--過，thài會烏白講這款pháiⁿ聽ê話？」萬--a mā氣kah面紅ki-ki:「幹！恁pē m̄-bat死--過，ah你tō bat死--過hioh？！…外pháiⁿ聽？死外艱苦你敢知？」Hit個人客想beh koh應，壁頂時鐘khiang一聲，tú好六點半。一句話吞--落-去無講，嘴念：「失禮，我ài趕時間。」uat--leh作伊去。萬--a ná罵：「好死m̄死，緊去死hō͘恁pē看。」

小停尿放了，bi-luh lim ta，鵝肉食飽，氣猶未消。問頭家娘：「Tú-tsiah hit個人客是啥人？」阿秋應：「生份人客，m̄-bat來--過。」萬--a念：「幹，來tsia欠恁pē教示。」車駛leh走。酒醉tshìn-tshái駛，tsia tsông hia tsông，紅燈綠燈也無teh看。來到十字路口，雄雄m̄知按怎，目睭小寡起花，一堆人圍tī hia，相爭teh看車禍，一台西美lòng kah歪哥tshih-tshua̍h。另外路中央一台救護車，風螺hīⁿ-hō͘ⁿ叫，燈火lia̍p-lia̍p sih。Tú好隔壁阿泉in老pē uì hia過。奇怪--a，這個春木伯，斷腦筋成半冬--a，倒tī眠床bē tín動，thài會tsit-má suah好--起-來，穿一su睏衫tī大路行？Tō kā叫：「春木伯--a，ah你m̄是teh艱苦，beh tó去？」老人應：「Bē--lah，攏bē艱苦--lah。」koh講一句：「失禮，我ài趕時間。」ua̍t頭作伊行。斟酌看，ai-io-uê，邊--a tuè一個查甫人，sán-sán lò-lò，khóng色ê se-bi-loh，紅色ê ne-khu-tái，注死m̄死，tō是tú-tsiah阿秋hia hit個人客。Tō kā tuè--去，ná講；「幹！你這個好死m̄知死。恁pē來教示--你。」

二個作前lú行lú緊，去到一位天橋tō peh--起-lih，beh過大路。萬--a也tuè in起--lih。Ná知雙腳踏一tsàn，人suah Ńg骨強beh un--落-去。規身軀ê khuì力bē輸水道水無關，放leh一直lāu，身魂teh beh流無--去。

Tok強peh到天橋頂，突然間人足看活，輕鬆浮浮teh beh飛，阿秋--a hia be-a-luh lim有夠khuì hit款。才注意著橋腳大路頂，車kap人攏無--去，tiām tsiuh-tsiuh一大片，青--ê､紅--ê…，熱--人ê公園花teh開。有聽著輕聲ê音樂，幼秀清亮，uì hn̄g-hn̄g ê天頂飛--落-來。He音樂伊有熟悉，tō是Mo͘-tsa-to͘h ê小提琴奏鳴曲。M̄知啥人演奏--ê，真正好聽。He小提琴kap鋼琴一句來一句去，bē輸高尚ê天使歡喜teh對話。也bē輸teh kā伊講，萬--a，你一世人真tsē歡喜kap福氣。伊想，我知，我beh kā真tsē人說多謝。天橋hit旁光--起-來，闊曠曠，天teh出大日。時間一目nih概成停tī hia，無teh tín動變作永遠，一時心內底真正和平，罕得這款無煩無惱。又koh bē輸he天頂ê光彩kap音樂tō是伊ê祈禱，一世人第一回，tsiah-ni̍h虔誠謙虛，o-ló伊ê生命。M̄-kú he Mo͘-tsa-to͘h ê音樂，雖罔是天頂--ê，伊知影總是也是人寫--ê，有lām著淡薄á數念ê人情、無彩、可惜。有影--lah，tsiah-ni̍h好ê所在，咱tsia阿秋ê鵝肉、be-a-luh，…。失禮ho͘ⁿh，定定kap英--a冤家，罵pháiⁿ嘴。

音樂停--去，hit二個已經到天橋hit頭，teh beh落--去。萬--a趕緊jiok--去，kā叫：「小等--一-下。春木伯--a，我kap你來--去。」春木ua̍t頭過--來，kā講：「萬--a，你無teh趕時間，先轉--去。厝--裡英--a teh等--你。」Hit個穿se-bi-loh ê人客，行uá--來，雄雄出大力腳尾kā tsàm一下，萬--a huah一聲：「我腳痛kah beh死！」tō精神過--來。

有人teh kā ji̍h胸坎，huah講：「轉--來-a，…轉--來-a，…」目睭peh金，tō是倒tī救護車內底，人teh kā伊急救。風螺ò͘ⁿ-ò͘ⁿ tân，救護車sù-sù走。原來m̄知tiâng時，也m̄知按怎出車禍，tōng一下m̄知人，心臟定--去，人死--去。好得佳哉，koh救活轉--來。送去病院，kan-na腳尾小傷，tshun--ê攏好勢，tō hō͘伊轉--去。

轉來到厝，in某英--a tō kā叫：「Ah你是走tó去？隔壁春木伯--a過身去--a。你緊去kā in看--一-下。」萬--a講：「我tú-tsiah路--裡才遇--著-伊，行路好勢溜溜，thài有過身--去。」In某講：「敢是你認m̄-tio̍h人。六點半腳-tau過身去--a。」萬--a m̄信：「明明我有kā叫。伊講，萬--a，你無teh趕時間，先轉--去。」Koh kā in某講，m̄知按怎出車禍，hit台西美lòng kah歪哥tshi̍h-tshua̍h。英--a念伊：「早tō kā你講，lim酒m̄通駛車，攏m̄聽。…你明明是teh tshuē死！」萬--a走去隔壁看，成實泉--a in規厝內人攏teh khàu。春木伯--a已經平安過身去--a。Lú想lú奇怪，khah想to想無，心內giâu疑不安。

隔轉工，koh來阿秋tsia食鵝肉lim be-a-luh，siàⁿ-siàⁿ hit個人客又koh來tī hia。仝款紳士hit扮，khóng色se-bi-loh，紅色ne-khu-tái。萬--a想著前日春木--a奇怪ê代誌，心內膽膽，好禮uá去kā講：「人客，hit日我lim酒醉，踏著你ê腳，pháiⁿ嘴罵--你，khah失禮。」人客也好禮問--伊：「你腳敢猶會痛？」萬--a應：「痛是猶會痛，…」人客koh問：「Ah敢會痛kah比死khah艱苦？」萬--a心頭tshia̍k一下，hit日pháiⁿ嘴講一句「痛kah比死khah艱苦！」Hō͘人客罵：「少年--ê，你也m̄-bat死--過，thài會烏白講這款 pháiⁿ聽ê話？」趕緊kā伊tshē:「Bē--lah，bē--lah，死攏bē艱苦。」人客ná笑，khiā--起來，sán-sán lò-lò kuân伊一粒頭，講：「少年--ê，若是你，tsit-má講這句話，才khah有理。」雄雄會記得hit日uàⁿ晡天橋頂ê景緻，原來tō是死ê安排！原來伊tō是死！驚一下面青sún-sún，差一sut á siàm尿，直直kā tshē m̄-tio̍h，ná講：「失禮，ài趕時間，ài趕時間......。」趕緊作伊走leh lōng。

青狂tsông轉來厝，喘phēⁿ-phēⁿ kā in某講：「英--a，我看著死！」英--a罵--伊：「又koh這枝嘴！…Taⁿ你看著死，he死生作啥款？你講來聽。」「Sán-sán lò-lò，穿一su khóng色se-bi-loh，結一條紅色ne-khu-tái，…」英--a起愛笑：「Hit個o͘h？伊tō是死o͘h？…Ah你m̄ khah早講，tú-tsiah猶tī咱門腳口行來行去，…敢是teh等--你？」萬--a ua̍t頭看門口，ai-io-uê，成實是伊！Tī亭á腳行來行去。Tú想beh去kā趕，in某哀一聲大大聲：「我頭殼痛kah beh死，…」一句話講猶未suah，phiâng--一-下倒tī土腳，tō m̄知人去--a。kā看，亭á腳hit個查甫人也無--去。