《陳雷文選》

 | | | 轉寄

聖徒保羅

作者 陳雷 2009.03.29

「萬億集團」其實資產khah無一億，有錢人號名愛膨風ê關係。簡董--ê in某西絲，好額人pak肚肥肥，面á油油，嘴唇不時胭脂紅ki-ki，厝--裡接電話，攏先應「阮tsia萬億」。這個名叫慣勢--a，出門入門自然是萬億ê扮勢。

這日tī高島屋遇著彩娥，giú--leh thi-thi tha̍p-tha̍p講bē suah。Taⁿ這個彩娥，以前楊董--ê秘書，tsit-má楊董ê某，少年iû-ia̍h，優美thiau-lāng，m̄-kú kan-na有百億ê扮勢。In翁楊火獅，人叫伊火獅董，tō是「全國」ê頭家。Thái有影全國，攏tī台北起販厝niâ，mā是有錢人愛膨風ê關係。

這個簡西絲thi-thi tha̍p-tha̍p，規厝內pùn-sò車bē了，刁工一腳手指金siak-siak tuà伊面頭前iāⁿ過來iāⁿ過去。彩娥手kā giú uá來tsîn，一粒藍寶石，土豆仁hiah大粒。藍koh反綠，光彩反射，若像天使ê目屎珠，天頂尾pua̍h--落-來-ê｡看kah目睭強beh閃--著。「Uâ!這粒外tsē?」西絲指頭á thí開，五枝té-té若煎好ê腌腸。「足俗--lah！才30萬niâ，…你若愛tio̍h趕緊，我tshuā你來去看。」講hit間麗娜珠寶行，買kah頭家有熟似。Koh講：「藍寶上蓋好，避邪保身。我kā你講，tsit-má珠á､玉á無人愛，藍寶上時行。」彩娥ām-kún 一kuāⁿ珠，手--裡一腳玉，hō͘伊講kah pháiⁿ勢，緊應：「西絲姊，珠寶這款物件，阮是tshìn-tshái買，猶是你khah內行。」

轉來厝--裡，thuah-á底tshuē phua̍h鍊出--來，頂面一粒藍寶，細細粒綠豆phí，舊年去泰國tshit-thô買--ê｡Kā火獅吵：「我kā你講，藍寶上蓋好，避邪保身。Tsit-má珠á､玉á無人teh買--a，藍寶上時行。」火獅講：「若是藍寶，巴西上tsē，suí koh俗。」

所以參加月底巴西旅行團，去巴西觀光買藍寶。一路辛辛苦苦，tsia停hia停，tse看he看，一位趕一位，若像teh趕鴨bî á。最後來到巴西第一大都市聖保羅。導遊陳先生介紹這個城市，講是紀念聖徒保羅起--ê，所以號伊ê名。Koh講，恁飛機頂若kuân-kuân看，規個城市一身基督ê大像，雙手伸tn̂g-tn̂g，永遠teh保庇這個聖徒保羅ê城市。

Hit日下晡包一台遊覽ba-suh，市內遊覽，來到聖保羅教堂觀光。陳先生介紹，tse教堂mā是紀念聖徒保羅起--ê｡火獅kap彩娥tī教堂頭前khiā uá-uá hip相，通the̍h轉來hō͘人看。教堂內se̍h一liàn，khah無20分鐘，大家kā陳先生吵，beh khah早去市內siok-phin，足tsē物件猶未買，驚時間無夠。規陣趕上車，來到就近鬧熱ê市區，大間店、細間店規街路光iàⁿ-iàⁿ，suí當當ta̍k項有，遊客一大堆。陳先生kā大家講、tī tsia自由siok-phin，m̄通走hn̄g--去。Koh吩咐講，街á真tsē gin-á乞食，會來ko-ko--tîⁿ，大家ài細字，上好攏mài tshap--in。大家落車--來，成實一大陣gín-á若ho͘-sîn作一下tshîⁿ uá--來。有ê teh賣物，有ê beh分錢，腳來手來，閃bē lī｡彩娥kā火獅giú--leh想beh走，hō͘三個查甫gín-á圍--leh。Hit個大漢--ê 12、3歲，烏目睭大大蕾，thǹg phak-theh，穿一領內褲，另外二個成10歲á，thai-ko流phīⁿ-kô｡三個tsia giú hia giú，七tîⁿ八tîⁿ，m̄知teh講啥。Tī hia tîⁿ一晡，陳先生uá來鬥tsâm，才好佳哉走有lī｡趕緊tsông入去店內，kā看，規間光iāⁿ-iāⁿ，suí當當。櫥á內m̄是金tō是銀，也有真珠，也有寶石，紅--ê､綠--ê､藍--ê滿滿是。穿西裝、結ne-khu-tái ê店員uá來「Go͘d afterno͘n」招呼，tìm頭行禮，介紹頭到尾。陳先生替伊翻譯，tsia ê寶石攏是咱巴西出產--ê，世界出名，suí koh俗，這個月聖保羅ê生日，一律八折。彩娥看he藍寶石ê手指、phua̍h鍊、hīⁿ鉤，大粒細粒排規排，藍koh反綠，光彩反射，bē輸天使ê目屎，天頂尾pua̍h--落-來-ê｡Huah一聲「火獅，你看！」，hē落去七kíng八kíng，一晡kíng一腳白金手指，一粒藍寶比土豆仁khah大粒。算算--leh，折台幣45萬。Kā in翁講：「火獅，tse巴西ê藍寶石suí koh俗。」歡歡喜喜買--落-來，笑bi-bi家己念：「Taⁿ比你西絲ê khah大粒。」算錢ê時，才注意--著，火獅ê錶-á thái會無--去！？趕緊四界tshuē，lak袋á､皮包á內底攏抄--出-來，青狂直直hiu:「火獅--a､你ê lō͘-lê--leh！你ê lō͘-lê走去tó?！…」大家聽伊hiu，圍來看，一人一句，二人十句，顧teh摸家己ê錶á､錢袋á，hi-hi huā-huā，鬧熱tshih-tshah。頭家khiā hia看，無彩一車ê人客tī店內，顧teh講話，無顧買物。氣tī心內，lún tī pak內，知影又koh是街á路hia ê gín-á乞食搶人客，鬧kah生理bē作--得，罵tī嘴內：「Tsia ê死gín-á，又koh欠人修理！」

Tō是hit三個查甫gín-á，落車ê時七tîⁿ八tîⁿ，hit個大漢--ê Carlos，剪鈕á專門，m̄知tiâng時，一粒lō͘-lê-á剪剪--去。Carlos作頂前，二個細漢--ê作後壁，三個ná行ná走，tsông轉來聖徒保羅ê教堂。坐tuà石gîm-á，hi-hi ha-ha，koh sńg koh笑。Hit個大漢ê Carlos，錶á jîm--出-來，khǹg tī手--裡看，日頭腳金sih-sih，一粒金殼ê lô͘-lê，頂面鑲六粒鑽石phí｡另外hit二個，Jose kap Pedro，相爭搶leh看。「敢是真正金--ê?」「定著mā是，恁摸tō知。」「外tsē peso？」「外tsē peso?」Carlos ná講，uì in手--裡kā錶á the̍h--轉-來。「Kā恁講恁也m̄信。舊年一粒像tse，Mario hō͘我2000。」「2000 peso！--uâ!」二個細漢--ê目睭tsia̍h大kòng:「2000 peso！會tàng買一粒腳球？」「新ê o͘-lin-phi-khuh ê腳球！」「白--ê!牽烏線kap紅線！」Carlos bi-bi á笑，ná tìm頭：「O͘-lin-phi-khuh ê腳球！全San-phau-lo͘h(聖保羅)kan-na咱有。Angelina ta̍k日來kap咱踢腳球…」Carlos上愛Angelina。

Hit個紳士穿西裝，kuāⁿ一腳kha-bang uì in頭前行--過，頭hiàⁿ-hiàⁿ，概成無看著in三個，koh概成驚in來搶，一kue̍h薰kha-tshng tso̍h tī土腳，趕緊大步行。二個細漢--ê緊jiok--去，薰kha-tshng ni--起-來，一人一嘴照輪suh。三個gín-á歡喜坐tī石gîm-á，穩心等Mario來。一時聖保羅都市ê西照日紅ki-ki，照著教堂ê大門kap石壁，親像teh火燒厝。Liam-mi天暗--去，火hua--去，一個一個觀光ê人客也無--去。

Uàⁿ-uàⁿ等到暗暝，Mario無來。三個kiu tuà教堂邊，bih tī壁腳路燈照bē著ê所在。因為in有經驗，知影暗時hia khah安全，khah bē hō͘人看--著。Carlos講：「我先來去看Maria。」Beh去kā伊報好消息。錶á the̍h hō͘ Jose，吩咐講：「收hō͘好，恁二個tuà tsia等Mario。我liâm-mi轉--來。」kho͘ sî-á，家己一個ná走ná跳，親像teh踢腳球，sut--一-下走無--去。

Maria減Carlos一歲，ta̍k暗Carlos攏來看--伊。因為3冬前，in老母Maria beh死ê時，有kā伊交代：「Carlos，你khah大漢，tio̍h照顧Maria。」3冬概成足久，伊kan-na會記--得，老母足suí，烏頭鬃，大目睭。Maria成in老母。Carlos看著Maria，tō會想著in老母。代先Maria kap Carlos作伙，tsit-má khah大漢--a，換去kap Angelina作伙。Angelina比伊大二歲，kap Maria上蓋相好，tī離教堂無外hn̄g hia，hit個大車路ê橋腳。

Hit三個查甫人來到位ê時，腳步無聲。In已經睏kah眠眠，二個gín-á kiu作一伙，bih tī大間聖保羅教堂邊ê壁腳，路燈照bē著ê所在。因為Carlos khah大漢有kā in教，暗時hia khah安全，人看bē著。所以這三ê查甫人bi uá--來ê時，in也無聽著腳步聲，mā無聽著tuāⁿ槍ê聲，攏是用細枝機關槍，pi-pi pia̍k-pia̍k，5、6聲tō suah--去。Ji-puh駛走，koh去巡別條街á路。這角勢日時鬧熱作觀光客ê生理，暗時巡壁腳路燈照bē著ê所在。

Carlos hn̄g-hn̄g看著ji-puh駛走--過，bi he路邊烏暗ê所在緊張細字行。轉來到教堂，tiām tsiuh-tsiuh，四界闊long-long無半個人。二個gín-á倒tī壁角lám--leh，kiu作一伙，bē輸睏--去，tī聖保羅教堂邊--a ê壁角，路燈照無著ê所在。Liâu-liâu-á爬uá--去，摸伊ê身軀，一tshok tâm lok-lok ê血，伸手入去jîm伊ê褲袋á，jîm著錶á，趕緊peh--起-來tō走，青狂走，…拚死無顧看，一直走，一直走，…。

隔轉日旅行團坐飛機離開聖保羅。Tī飛機頂有看--著，淡薄雲霧遮--leh，bē輸基督ê大像雙手thí開，teh祝福這個聖徒保羅ê都市。Mā bē輸teh kā旅客講，歡迎koh再來tshit-thô｡彩娥坐tī飛機內，看手--裡藍寶ê手指，金金sih sih，lú看lú kah意，kā in翁講：「大獅，咱這tsuā tshit-thô了有價值--lah。」規路歡喜睏bē去，轉來到台北。

無幾工tī菜市á碰著添花，以前in翁作土水，tsit-má teh作董事。「你巴西轉--來-a nih？Ah有好tshit-thô--無？」彩娥應：「實在好，我kā你講，he物件俗koh suí｡」一枝手伸--出-來，五枝指頭á，一腳手指，一粒藍寶，金金sih-sih，比土豆仁khah大粒。「你看，這粒才45萬。」添花看kah目睭無nih，強beh閃--著，嘴nuā直直吞。「我kā你講，藍寶上蓋好，避邪koh保身。Tsit-má珠á､玉á無人beh愛，藍寶上時行。」添花直直tìm頭，表示十分贊成。「你若去hia siok-phin，ài khah細字。阮火獅，一粒lo͘-lē-á phàng-phàng--去！」「Ah是按怎？」「He街á路，猴死gín-á一大堆，tshîⁿ uá--來，一個giú，二個giú，sut--一-下，剪鈕á tō kā你剪--去！」「Ah警察攏無teh趕--nih？」「無--lah，攏是無pē無母--ê，睏tī街路一大堆，beh趕去tó位？」

添花--a去kā簡西絲tâu:「人彩娥，巴西轉--來，一粒藍寶才45萬，比土豆仁khah大粒。」西絲聽講巴西ê藍寶比伊ê khah大粒，心內無歡喜。一手伸--出-來，五枝指頭á té-té，mā是一腳手指金金，一粒鑽石sih-sih，比土豆仁khah大粒，應講：「添花，你m̄知，我kā你講，tsit-má藍寶無人愛。Tse蘇聯鑽上蓋好，減肥koh保庇長歲壽。」