《陳雷文選》

 | | | 轉寄

最後ê玫瑰

作者 陳雷 2009.04.05

有一擺伊愛真深，欠憾也真久，若精彩ê小說內底teh寫hit款。了後有一tsām，bē輸pak肚內生一粒膽結石，無去手術the̍h掉，不時心糟糟，giâ--起-來ui-ui-á痛。

伊知影，概成tse早tō注定。Hit陣伊讀台南女中，伊讀台南一中，ta̍k日早起去學校ê時，tī巷á口會相遇。M̄知tiâng時開始，看著伊，心肝tō會跳。M̄知tiâng時開始，阿母若講著伊，「這個gín-á古意koh gâu讀冊」，面tō燒hut-hut發面hông，tèⁿ無聽--著。

Taⁿ今á日teh beh畢業--a，伊讀台大外文系，伊讀土木工程系。同學mā是攏teh講，花枝--a kap英俊早tō注定--a，tse，伊聽了真慣勢，mā真自然koh當然。

所以英俊招伊去「流星」食冰，伊已經半知，ioh tī心內。M̄-kú英俊一碗冰直直lā，冰溶一半--a，hit句話猶講bē出嘴。所以花枝bē等--得，先講：「後禮拜beh畢業--a，...」冰攏溶了--a，伊才應：「我...我...beh結婚--a。」這個美麗王子，生作若像美國ê電影名星James Dean，等tsiah tsē冬--a，tsit-má這句才講出嘴！親像小說內底寫--ê，uì tsit-má起，二個永遠快樂，beh作伙圓滿過一世人。

伊伸手摸英俊ê手細聲問：「Tiâng時？...Tiâng時beh結婚？」Suah換伊一句話講bē好勢。「後禮拜。」「後禮拜？！...Tsiah-ni̍h迫，...我...我攏猶未kā厝--裡通知。」「我足失禮。無khah早kā你講。」伊頭tshih--落，koh講一擺：「我足失禮。」規個面烏陰憂愁，m̄是出日歡喜，o͘h，成實teh tshē m̄-tio̍h。「足失禮？...失禮啥？」花枝問。「我tsit-má先kā你通知。」「先kā我通知？」奇怪--a，看伊ê面，雄雄才瞭解，伊先kā伊通知，因為後禮拜tō beh kap別人結婚！身軀suah畏寒ka-冷-sún，是m̄是店--裡冷氣放siuⁿ強？「失禮--lah，花枝。」伊gīm伊ê手，beh koh說明。花枝--a手kiu--轉-來，khiā--起-來：「M̄免koh講。多謝你先kā我通知。」面對面，目tú目：「你teh beh kā我bē記，我khah久to會記--得-你。」ua̍t一個頭，tú好踏出店門口，一陣風燒hut-hut，心頭冷ki-ki，目屎已經liàn--出-來，tshun--ê攏m̄免知。

半行半走來到土木系。大進--a看著伊，緊uá--來。花枝--a一手kā giú--leh：「來，你tshuā我來去食冰。」拖--leh tō行。這個大進--a，jiok花枝--a四冬--a，人é-é，掛一副目鏡kāu-kāu，花枝--a無啥beh tshap--伊，同學叫伊四腳水雞候補--ê。Taⁿ今á日無出日teh落紅雨，花枝--a giú伊去食冰！歡喜一下，tsông作前行。來到放冷氣ê｢流星」，英俊已經無tī hia。大進--a問：「食啥物冰？」猶未坐好勢，花枝應：「你畢業了beh創啥？」微微笑--一-下，射一枝目箭，準準射入去大進ê胸坎窟。大進--a心肝中著箭，話講bē出--來，一個嘴開hāⁿ-hāⁿ：「我...我...公司鬥腳手。」花枝--a知影，大進--a老pē大間建築公司，等伊去作總經理。「你ê查某朋友啥物名？」花枝--a使一個目，又koh射一枝目箭，mā是koh準準射著大進--a心肝頭。可憐大進--a，食半碗冰中二枝箭，ná會堪--得。「我...我...無朋友，...我...我ing-暗請你看電影...」最後才勇敢講--出-來。Hit暗去新生看「巨人」。花枝--a愛看James Dean，大進--a愛看Elizabeth Tayler。

一禮拜後宣佈訂婚，畢業典禮hit日，花枝一腳鑽石手指土豆仁hiah大粒，展hō͘同學看。外文系ê同學攏huah：「I can’t believe it！」有ê欣羨，有ê替伊歡喜流目屎，有ê替伊可惜thó͘大khuì，攏真意外。Mā有人替英俊不平，îng話四界iāⁿ，講花枝愛錢khah贏愛情，四腳水雞變王子。這年畢業典禮，外文系kap土木系攏真鬧熱。

花枝嫁錢了後，心內ê大厝空空，ta̍k日看大進，ta̍k日想英俊，這個無情變心ê伊。Lú想lú m̄願。Tshiah-ia̍h koh tshì-tsha̍k，ak-tsak兼鬱卒，出去siok-phin買物件，開錢解心悶。百貨公司買suí衫、買han-to-ba-khuh。心情小bái tō小買，大bái tō大買。概成買khah-tsē物，心厝hit位空落ê所在beh通khǹg hō͘ tīⁿ。M̄-kú這個心厝ê空位真奇怪，tún lú tsē物，suah空lú大位。

不過空虛mā是會結籽，隔冬生一個查某kiáⁿ，kap大進仝款，仝一個模印ê水雞面，欠一副目鏡。親tsiâⁿ朋友pháiⁿ勢嫌bái，攏講古錐成老pē。花枝心內知影，想著hit當時，若是來嫁英俊王子，生一個查某嬰suí kah若公主。結局心情越 lú沈落，憂愁m̄愛講話。醫生講是歡喜了過頭，產後悲憂ê症頭。

過--來悲憂越lú gâu結籽，二冬生三個，攏是查某--ê。僥倖，一個比一個lú-khah成老pē。三個查某kiáⁿ，未去學校攏掛目鏡，目鏡仁kāu-kāu tah一iân霧。花枝--a tsiù-tsuā，m̄敢koh再生。

過--來飼kiáⁿ、教kiáⁿ無îng，無時間去想東想西，心情khah tshe̍h--落-來。這個意外ê婚姻，親像臨時發生tī路口ê車禍，後悔無khah tsua̍h。時間久了，to也會慣勢--去。這個婚姻，無去kā計較，概成是teh食頭路，盡一份作人ê某、作人老母ê責任義務niā-niā。漸漸，少年時ê熱情變作âng-á冊內底ê gín-á故事，差一sut á，差一sut á tō攏總準suah bē記--得。

M̄-kú咱人有時tō是這個差一sut á teh作怪。Hit年台大土木系同窗會，畢業了30冬第一回。Hit個âng-á冊內底ê緣投王子，bē輸美國電影名星William Holton，穿西裝結ne-khu-tái，uá來介紹：「你敢猶會認--得-我？」會認--得-你？我定著mā會認--得。「你，...你是...？」花枝tèⁿ bē認--得。「英俊，我tō是英俊--lah。」Taⁿ害--a，hit二蕾目睭少年ê時hō͘伊bē食bē睏，又koh掠伊ê身魂m̄放。

「這個tō是我ê牽手淑惠。」英俊kā in介紹。「你tō是花枝o͘h？...阮英俊定定teh講--你。」淑惠大聲huah，手kā giú--leh，bē輸30冬無見--過ê姊妹。「恁是按怎熟sāi--ê?」花枝想beh問，無張持hīⁿ空內ki-ki-叫，有聽人teh huah：「你已經kā我通知--a，tshun--ê我攏m̄免知。」話掛nuā吞--落-去，也牽淑惠ê手，講：「英俊kap阮大進上蓋好朋友。」

大進嘴--裡一枝si-gah (cigar)，手--裡一杯XO，講：「花枝kap我有三個查某kiáⁿ，攏大學畢業結婚--a。」The̍h相片出來hō͘英俊看。三個排一排，掛目鏡，kap大進仝一個模印--出-來-ê。又koh刁治故大聲kā英俊、淑惠講：「阮公司tsit-má足無îng，厝起kah bē赴通hō͘--人。」因為伊有聽同學teh風聲，最近英俊生理失敗，公司beh倒。英俊tiām-tiām，淑惠也tiām-tiām，客氣一直tìm頭。這日，30冬後，伊tō是完全ê勝利者。

所以同窗會了後，花枝又koh去百貨公司siok-phin，買suí衫、買han-to͘-ba-khuh。連續一禮拜，買bē夠khuì。尾--a tsheh心，去美娜珠寶店，買一粒藍寶石，土豆仁hiah大粒，心情才khah安定落--來。

Liâm-mi畢業31年，又koh同窗會。這日，花枝--a頭毛電té-té，白衫tha̍h烏裙，大學時代ê打扮。看著英俊，家己一個，又koh心頭phok-phok跳，面á發hông，問伊：「淑惠thài無來？」才知影in某淑惠半冬前車禍過身去--a。

這時樂隊奏「熱--人最後ê玫瑰」，以前有人kā伊改作ua-lu-tsuh，in大學時代上蓋時行，花枝上蓋愛跳。無張持伊來牽手，無聲說伊來uá身，雙腳滑溜浮--起-來，bē輸水--裡ê魚teh siû，熱--人最後ê玫瑰芳貢貢，人生最後ê玫瑰醉醉醉。

生日hit日決心，kā大進講，伊beh離婚。大進--a驚一tiô，叫是teh老蕃顛，老人gōng呆症。叫三個仝模á印--ê查某kiáⁿ來鬥講。花枝講，伊beh kap英俊結婚。麗娟、麗惠、麗玉三個查某kiáⁿ罵老母：「你是teh老蕃顛？！食到七老八老--a､才來teh離婚tuè人走。M̄驚笑破人ê嘴！」罵伊老三八。花枝--a想，人生一擺niā-niā，我以前錯誤，已經30冬--a，tsit-má生命ê熱--人teh beh過--去，我bē-tàng koh再等候，我是熱--人上suà尾ê玫瑰。應講：「笑作in去笑。我無teh蕃顛，也無teh三八。」三個查某kiáⁿ受氣：「你m̄驚人笑，ah阮--leh？！」花枝--a堅持，決心離婚。54歲hit年，離開大進。出門hit日，一領衫，一領裙，規櫥á suí衫、han-to͘-ba-khuh攏無the̍h，雙手空空行出--去。

隔轉年同窗會，大進--a無去。後--來同窗--ê teh kā講，花枝--a牛á褲穿e̍h-e̍h，頭毛染紅紅，kap英俊--a ua-lu-tsuh跳規暝bē siān。樂隊一直奏「熱--人最後ê玫瑰」。