《陳雷文選》

 | | | 轉寄

寫hō͘ 學生朋友ê代誌 44 - 黃昏美夢

作者 陳雷 2019.12.29

（Siá hoo7hak8-sing pîng-iú ê tāi-tsì 44）（寫hō͘學生朋友ê代誌 44）

Hông-hun bí-bāng / 黃昏美夢

Lán lâng ta̍k-mê tsò-bāng, m̄-kú khah siông sī tsing-sîn tō bē kì-tit liáu-liáu. Tsuè-kīn tsi̍t-ê bāng, tsing-sîn liáu, bāng--nih ê tāi-tsì, tuì-uē, kíng-tì...tsîng-tsîng-āu-āu tshing-tshing-tshó-tshó, si̍t-si̍t-tsāi-tsāi, bē-su sī tú-tsiah uì hit-ê hiān-si̍t ê sè-kài tńg-lâi tsit-ê hiān-si̍t, m̄-sī tsò-bāng.

咱人ta̍k瞑做夢, m̄-kú khah常是精神tō bē記得了了. 最近一个夢, 精神了, 夢--裡ê代誌, 對話, 景緻...前前後後清清楚楚, 實實在在, bē輸是tú-tsiah uì hit个現實ê世界轉來這个現實, m̄是做夢.

Guá kiâⁿ-lâi kàu tsi̍t-tsâng tuā-tshiū-kha. Tuā-ki tshiū-ue ē-bīn tiàu tsi̍t-pak tô͘, tsha-put-to phó͘-thong ê tiān-sī hiah tuā-bīn. Tshái-sik hún-pit uē--ê, tsin suí koh tsin si̍k-sāi. Kā khuàⁿ, guân-lâi sī Tâi-uân lâm-pō͘ hit-ê tsháu-tē sió só͘-tsai Muâ-tāu ê kíng-tì. Guá ê kò͘-hiong ê tshân-hn̂g, jua̍h--lâng ê hông-hun. Tsi̍t tuā-phìⁿ kim-sik ê tiū-á. Hn̄g-hn̄g tsi̍t-tsuā thn̂g-tshiúⁿ ê sió hué-tshia teh tsáu, tsi̍t-tsat tsi̍t-tsat, kam-tsià thūn tīⁿ-tīⁿ. Siông-sè kā khuàⁿ, siōng ē-bīn-kak kak-á tsi̍t-tsuā iù-jī. Bū-bū tha̍k-bô. Khó-lîng sī tsit-tiuⁿ tô͘ ê miâ hi̍k-tsiá uē ê lâng-miâ. Khuàⁿ--khí-lâi tsin sîng guá ê pîng-iú Lîm Sim-tì sin-seⁿ ê hîng-thé.

我行來到一叢大樹腳. 大枝樹ue下面吊一pak圖, 差不多普通ê電視hiah大面. 彩色粉筆畫--ê, 真 suí koh 真熟似. Kā看, 原來是台灣南部hit 个草地小所在麻豆ê景緻. 我ê故鄉ê田園, 熱--人ê黃昏. 一大片金色ê稻á. Hn̄g-hn̄g 一tsuā糖廠ê小火車 teh走, 一節一節, 甘蔗thūn tīⁿ-tīⁿ. 詳細kā看, 上下面角角á一tsuā幼字. 霧霧讀無. 可能是這張圖ê名或者畫ê人名. 看--起-來真成我ê朋友林心智先生ê形體.

Lú khuàⁿ lú ài, tsiah-ni̍h un-luán tshin-tshiat. Sim-lāi siūⁿ, tsit-tiuⁿ tô͘ nā-sī guá ê, ta̍k-ji̍t puê-guá tsò-phuāⁿ, kám m̄-sī tsin-hó?Tú-hó tsi̍t-ê tsa-po͘-lâng kiâⁿ-uá--lâi, 30 thóng huè, tsò-kang-lâng hit-khuán. I kóng tsit-pak tô͘ sī lán Muâ-tāu tsi̍t-ê uē-ka, tsuan-kang uē hō͘ lán Muâ-tāu tsi̍t-ê Tâi-to̍k ūn-tōng ê sian-puè. I pí tuā-tshiū koh kuè--khì hit-king tuā-tshù, saⁿ-tsàn-lâu, li̍k-sik ê tshù-khak, kóng:「Tsit-pak tô͘ pún-lâi sī tsit-king bí-su̍t phok-bu̍t-kuán ê. Tsit-má sī guá ê.」Guá khuàⁿ hit-king tuā-lâu, tō-sī guá í-tsîng tī Ka-ná-tāi tuà ê tshù, ná ē piàn-tsó bí-su̍t phok-bu̍t-kuán?I kóng tsit-tiuⁿ tô͘ i beh bé, khui-kè bí-kim sì-bān nn̄g-tshing kho͘.

Lú看lú愛, tsiah- ni̍h溫暖親切. 心內想, 這張圖若是我 ê, ta̍k日陪我做伴, 敢m̄是真好？Tú好一个查埔人行uá--來, 30 thóng歲, 做工人hit款. 伊講這pak圖是咱麻豆一个畫家, 專工畫hō͘ 咱麻豆一个台獨運動ê先輩. 伊比大樹koh過--去hit間大厝, 三層樓, 綠色ê厝殼, 講：「這pak圖本來是這間美術博物館ê. Tsit-má是我ê.」我看hit間大樓, tō是我以前tī 加拿大tuà ê厝, ná ē變做美術博物館？伊講這張圖伊beh賣, 開價美金四萬二千kho͘.

Khó-sioh bē-hù kā bé tō tsing-sîn--a. Tshíⁿ--khí-lâi thàu-tsá saⁿ-tiám saⁿ-tsa̍p-hun. Tsi̍t-sî suah bē-hiáu hun, iáu tī bāng--ni̍h, á-sī tńg-lâi tī līng-guā tsi̍t-ê hiān-si̍t. Tī guá jîn-sing ê hông-hun, tsin hok-khì bāng tsit-ê bāng. Guá ê nn̄g-ê kò͘-hiong, Tâi-uâng kap Ka-ná-tāi, bāng-tsò tsi̍t-hué. Khuàⁿ-tio̍h tsit-pak suí-tô͘, íng-uán kì tī thâu-khak-lāi. Kám-sī uì līng-guā tsi̍t-ê pîng-hîng ê ú-tiū(parallel universe)sàng--lâi ê sìn-hō? Hi̍k-tsiá sī tshin-tshiūⁿ guán Muâ-tāu ê Bûn-hē sin-seⁿ tshiùⁿ ê kua, hông-hun ê kò͘-hiong teh kiò-guá--leh？

可惜bē赴kā買tō精神--a. 醒--起-來透早三點三十分. 一時suah bē曉分, iáu tī 夢--裡, á是轉來tī 另外 一个現實. Tī我人生ê黃昏, 真福氣夢這个夢. 我ê兩個故鄉, 台灣kap加拿大, 夢做一伙. 看tio̍h這pak suí圖, 永遠記tī頭殼內. 敢是uì另外一个平行ê宇宙（parallel universe)送--來 ê信號？ 或者是親像阮麻豆ê鄉親文夏先生唱ê歌, 黃昏ê故鄉teh叫我--leh？

（Tsok-tsiá tsù:tshiáⁿ-iōng pe̍h-uē-jī) （作者注：請用白話字）