《陳雷文選》

 | | | 轉寄

寫hō͘ 學生朋友ê代誌 41 - 中醫ê危險性

作者 陳雷 2019.12.29

（Siá hō͘ ha̍k-sing pîng-iú ê tāi-tsì 41）（寫hō͘ 學生朋友ê代誌 41）

Tiong-i ê huî-hiám-sìng / 中醫ê危險性

Tsuè-kīn ū tsi̍t-tsat sin-bûn. Li̍p-huat-īⁿ thê-àn “Tiong-i huat-tián huat”, puah-tsîⁿ thui-sak huat-tián tiong-i. Guá siūⁿ tsit-ê huat-àn ū su-iàu tsìn-tsi̍t-pō͘ khó-lū.

最近有一節新聞. 立法院提案 “中醫發展法 ”, 撥錢推sak發展中醫. 我想這个法案有需要進一步考慮.

Lán lâi khuàⁿ tiong-io̍h pō͘-hūn. Tiong-io̍h tsheh（pí-jū Siōng-hái Tiong-i ha̍k-īⁿ kàu-tsâi-tsheh “Tiong-tsháu io̍h-ha̍k”）kā tiong-io̍h io̍h-sìng hun sù khuì(hân, jia̍t, un, liâng)gō͘ bī(sin, kam, sng, khó͘, kiâm). Hân-liâng io̍h tī jia̍t-sìng-pēⁿ. Un-jia̍t-io̍h tī hân-sìng pēⁿ……kam-bī io̍h ē pó͘, ji̍p pî. Khó͘-bī io̍h tshing-jia̍t, sià-ē, kàng-gi̍k, ji̍p sim-king……tsióng-tsióng. Pí-jū:tsio̍h-ko tshing-jia̍t sià-hué, ti-táⁿ-tsiap kái-to̍k, lîng-iûⁿ-kak pîng-kuaⁿ…….tsha-put-to tsuân-pō͘ sī hîng-iông-sû, thiaⁿ--khí-lâi kài-sîng ū-iáⁿ ū-tsiah, ná-ū ná-bô. Lí kám tsiâⁿ-si̍t ē-tàng liáu-kái I teh kóng-siáⁿ？ Siáⁿ-mi̍h sī hân, jia̍t, un, liâng? Siáⁿ-mi̍h sī sià-hué, kái-to̍k? siáⁿ-mi̍h kiò-tsò ji̍p-kuaⁿ-king, ji̍p pî-king？ Kám ū jīm-hô si̍t-thé kho-ha̍k ê tīng-gī? Tui-kiù lâi-guân, tap-àn lóng-sī kó͘-tsá “pún-king” “pún-tsháu kang-bo̍k” …….ū án-ne siá. Kî-si̍t bô puàⁿ-tih sò͘-jī, kho-ha̍k si̍t-giām kin-kù. Kui-phiⁿ tō-sī tsò bûn-tsiong, uē-hó͘-lān. Bô kū-thé lāi-iông.

咱來看中藥部分. 中藥冊（比如上海中醫學院教材冊“中草藥學”）kā中藥藥性分四氣（寒, 熱, 溫, 涼）五味（辛, 甘, 酸, 苦, 鹹）. 寒涼藥治熱性病. 溫熱藥治寒性病…..甘味藥ē補, 入脾. 苦味藥清熱, 瀉下, 降逆, 入心經..……種種. 比如：石膏清熱瀉火, 豬膽汁改毒, 羚羊角平肝……差不多全部是形容詞, 聽--起-來蓋成有影有跡, 若有若無. 你敢成實ē-tàng瞭解伊teh講啥？啥物是寒, 熱, 溫, 涼？啥物是瀉火, 解毒？啥物叫做入肝經, 入脾經？敢有任何實體科學ê定義？追究來源, 答案攏是古早冊“本經” “ 本草綱目” …..有按呢寫. 其實無半滴數字, 科學實驗根據. 規篇tō是做文章, 畫虎爛. 無具體內容.

Kuí pah-tsióng sīm-tsì tshian-tsióng tiong-io̍h lāi-té, tiāⁿ-tio̍h ū ē íng-hióng sin-thé, ū io̍h-sìng ê mi̍h. tān-sī ū io̍h-sìng, bô io̍h-sìng, in tī-liâu pēⁿ-tsìng ê hāu-kó lóng-bô kho-ha̍k-ti̍k ê phîng-kó͘, liáu-kái. “Ti-táⁿ-tsiap kái-to̍k”, iōng-lâi tī ba̍k-tshiah, n̂g-thán, sī siáⁿ-mi̍h kin-kù? Koh-khah giâm-tiōng sī, kin-pún tsit-ê “to̍k” m̄-tsai sī siáⁿ. Bô-huat-tō͘ tīng-gī, beh tsuáⁿ-iūⁿ lâi phîng-kó͘?

幾百種甚至千種中藥內底, 定tio̍h有ē影響身體, 有藥性ê物. 但是有藥性, 無藥性, in治療病症ê效果攏無科學ti̍k ê評估, 瞭解. “豬膽汁改毒”, 用來治目赤, 黃疸, 是啥物根據？Koh-khah嚴重是, 根本這个“毒” m̄知是啥, 無法度定義, beh怎樣來評估？

Tiong-io̍h í-guā, kî-tha tiong-i ê lāi-iông mā-sī kâng-khuán ê būn-tê muá-muá-sī. Tiong-i só͘ kin-kù ê kin-pún lí-lūn tshut-huat-tiám, tshin-tshiūⁿ king-me̍h, khì, hân, jia̍t…..bô kū-thé, bîng-khak ê tīng-gī. Só͘-í bô-huat-tō͘ iōng kho-ha̍k ê hong-huat lâi tsìng-bîng I tio̍h iah-sī m̄-tio̍h. tshiáⁿ-mn̄g beh án-tsuáⁿ tsìng-bîng “tsio̍h-ko tshing-jia̍t sià-hué” “ti-táⁿ-tsiap kái-to̍k” ？ In-uī tse “hué” “to̍k” sī bô kū-thé ê mi̍h-kiāⁿ, bô-huat-tō͘ tshik-niû.

中藥以外, 其他中醫ê內容mā是仝這款ê問題滿滿是. 中醫所根據ê根本理論出發點, 親像經眽, 氣, 寒, 熱….無具體, 明確ê定義. 所以無法度用科學ê方法來證明伊tio̍h ia̍h是m̄-tio̍h. 請問beh按怎證明 “石膏清熱瀉火” “ 豬膽汁改毒 ” ？因為tse “火” “毒” 是無具體ê物件, 無法度測量.

Tiong-i ê pún-tsit sī hui kho-ha̍k--ê. I tī Tâi-uân, Tiong-kok ē sî-kiâⁿ tsûn-tsāi, tsú-iàu sī khò tsìng-tī ê tsi-tshî kap it-puaⁿ lâng ê bû-ti. Lî-tshiáⁿ tsin-tsē pēⁿ-tsìng, pí-jū kam-mō͘, sī khah-siông m̄-bián tsia̍h-io̍h tsū-jiân ka-tī ē hó. Lí nā khì tsia̍h saⁿ thiap tiong-io̍h, kam-mō͘ hó--khì, kám ē-sái kóng sī hit saⁿ-thiap tiong-io̍h tī-hó--ê?Tsin-tsē lâng tsia̍h tiong-io̍h kám-kak ū-hāu, kî-si̍t sī pēⁿ ka-tī hó--khì. Só͘-í i-liâu ê hāu-kó it-tīng tio̍h-ài kho-ha̍k-ti̍k ê thóng-kè pí-kàu, tsiah ē-tàng kiat-lūn.

中醫ê本質是非科學--ê. 伊tī台灣, 中國ē時行存在, 主要是靠政治ê支持Kap一般人ê無知. 而且真tsē病症, 比如感冒, 是khah常m̄免食藥自然家己ē好. 你若去食三帖中藥, 感冒好--去, 敢ē使講是hit 三帖中藥治好--ê?真tsē人食中藥感覺有效, 其實是病家己好--去. 所以醫療 ê 效果一定tio̍h-ài科學ti̍k ê統計比較, tsiah ē-tàng結論.

Tuā Tiong-kok tsú-gī kā tiong-i tòng-tsò kho-ha̍k ê sîng-tsiū, tse-sī ka-tī phiàn ka-tī. Tiong-i m̄-nā sī hui-kho-ha̍k, lî-tshiáⁿ sī ké kho-ha̍k （psedoscience), huán kho-ha̍k. tsit-ê bô king-kuè kho-ha̍k tsìng-bîng, hi̍k-tsiá bē-tàng tsìng-bîng ê i-liâu, sī lōng-huì tsu-guân, sīm-tsì ē ín-khí i-liâu siong-hāi. Tse tō-sī tiong-i ê huî-hiám-sìng. Tī au-bí, bô king-kuè giâm-keh kho-ha̍k tsìng-bîng ê tī-liâu sī hui-huat.

大中國主義kā中醫當作科學ê成就, tse是家己騙家己. 中醫m̄-nā是非科學, 而且是假科學（psudoscience), 反科學. 一个無經過科學證明, 或者bē-tàng證明 ê 醫療, 是浪費資源, 甚至ē引起醫療傷害. Tse tō是中醫 ê 危險性. Tī 歐美, 無經過嚴格科學證明ê治療是非法.

Tsìng-hú tsi-tshî tiong-i tī-liâu, tō-sī kā tiong-i tsit-ê hui kho-ha̍k, ké kho-ha̍k, huán kho-ha̍k ê mi̍h-kiāⁿ tsún-tsò ū kho-ha̍k kin-kù ê tì-sik！Tong-jiân bô ha̍p-lí, bô ing-kai. Tse tō-sī tiong-i līng-guā tsit-hāng ê huî-hiám-sìng. Ko͘-bú tsiòng-lâng khin-sī kho-ha̍k.

政府支持中醫治療, tō是kā 中醫這个非科學, 假科學, 反科學 ê 物件準作有科學根據 ê知識！當然無合理, 無應該. Tse tō是中醫另外一項 ê 危險性. 鼓舞眾人輕視科學.

Tsìng-hú ìng-kai thîng-tsí tsi-tshî tiong-i tī-liâu. Thîng-tsí i-liâu tsìng-tī-huà. Thîng-tsí iōng kong-ka ê tsiⁿ lâi hù “iûⁿ táⁿ-tsiap tī hì lô-siong” tsit-khuán mi̍h-kiāⁿ, tsit-khuán ké i-ha̍k. ìng-kai iu-sian iōng kho-ha̍k hong-huat kap kuan-liām lâi phîng-kó͘ tiong-i tsit-ê mi̍h-kiāⁿ.

政府應該停止支持中醫治療. 停止醫療政治化. 停止用公家ê錢來付 “羊膽汁治肺癆傷” 這款物件, 這款假醫學. 應該優先用科學方法kap觀念來評估中醫這个物件.

（Tsok-tsiá tsù:tshiáⁿ-iōng pe̍h-uē-jī)（作者注：請用白話字）