《現代台語新約聖經 讀經日記》

 | | | 轉寄

第十篇 保羅敢有可能講「兄弟姊妹」？

作者 李南衡 2013.01.13

讀經版本：羅馬字版《現代台語譯本新約聖經》，2007，台北：台灣聖經公會
進　　度：羅馬書第一章

第3節後半 “Tuì jîn-sìng lâi kóng, I sī Tāi-pit ê hō͘-tāi.”咱看《巴克禮版》：“tsiàu jio̍k-thé ”、《和合本》：「按肉體說」、《新譯本》：「按肉身說」、日文《聖書》：「肉によれば」、“RSV”：“according to the flesh”攏是譯作肉身、肉體，像講現代中文：「從身世來說，」阮mā猶會tàng接受。阮實在m̄知影是按怎《現代台語聖經》kah《紅皮》仝款譯作“jîn-sìng”（人性），按呢敢有妥當？

第13節前半“Hiaⁿ-tī tsí-bē, guá tsin ài lín tsai,”看tio̍h“Hiaⁿ-tī tsí-bē”, 確實hō͘阮驚一tiô，保羅敢有可能按呢稱呼羅馬的信徒？阮tio̍h去查阮tshuē會tio̍h的各種聖經版本。《巴克禮版》：「兄弟ah」、《紅皮》：「諸位兄弟」、《現代中文》、《和合本》kah《新譯本》仝款：「弟兄們」、日文《聖書》：「兄弟たち」、“RSV”：“brethren,”阮實在無法度亂ioh是按怎獨獨《現代台語聖經》會譯作“Hiaⁿ-tī tsí-bē ”？若是用按呢來表示基督教無輕視女性，koh khah m̄ tio̍h！因為按呢翻譯是違背歷史事實。咱知耶穌kah保羅hit-ê時代的猶太地抑是羅馬帝國，相當無尊重女性。咱看耶穌「五個餅兩尾魚」的神跡，馬太福音第十四章21節按呢記載：「Tsia̍h ê lâng, hū-jîn-lâng kap gín-á bô-sǹg, iok ū gō͘-tshing ê ta-po͘-lâng.」有看tio̍h無？五千人干單指查甫人niā-niā，婦人人kah囡仔無算額。可見hit陣查某人kah囡仔仝款是無社會地位。保羅的批信，攏是稱呼「兄弟ah，」無可能加一句「姐妹」。阮m̄知譯者群是m̄是有發現tio̍h新的文獻？若無，按呢翻譯連翻譯三個原則的第一個「信」都做無夠，mài講「達」kah「雅」。

第26節前半節“In-uī án-ni, Siong-tè tshut-tsāi in hòng-tshiòng hā-liû ê jio̍k-io̍k;”《巴克禮版》：「上帝交付in tī見笑ê情」、《紅皮》：「照in ê慾情去做見笑ê tāi-tsì」、《現代中文》干單講：「放縱自己的情慾」、《和合本》：「放縱可羞恥的情慾」、《新譯本》：「放縱可恥的情慾」、“RSV”：“gave them up to dishonorable passions.”、日文《聖書》：「恥ずべき情欲にまかせられました」。看起來各種版本攏是講「見笑」、「可恥」“dishonorable”的情慾，獨獨《現代台語聖經》講“hā-liû”（下流），阮認為無真適當。

第26節下半節“Tsa-bó͘-lâng kap tsa-bó͘ lâng īng huán tsū-jiân ê sìng-kuan-hē tāi-thuè kap ta-po͘-lâng tsū-jiân ê sìng-kuan-hē;”《巴克禮版》：「in ê婦人人用順性ê路用變做逆性ê路用」、《紅皮》：「in ê婦人人m̄ ài自然ê肉體關係，ài無自然ê肉體關係。」、《現代中文》：「不但女人顚倒性的正用，有了違反自然的性行為。」、《和合本》：「他們的女人把順性的用處變為逆性的用處；」、《新譯本》：「他們的女人把原來的性的功能，變成違反自然的功能；」、“RSV”：“Their women extsanged natural relations for unnatural,”、日文《聖書》：「女は自然の関係を自然にもとるものに変え、」各種版本看了，真可能會感覺愈快愈花，特別是《現代台語聖經》。其實，tsit句話若照“RSV”版簡單講，意思是：「In ê婦人人kā自然的性關係變作違反自然的性關係。」按呢敢m̄是khah清楚koh明瞭咧？