《現代台語新約聖經 讀經日記》

 | | | 轉寄

讀經筆記11　“Kap Siōng-tè kiàn-li̍p ha̍p-gî ê kuan-hē.”是啥意思？

作者 李南衡 2014.03.16

讀經版本：羅馬字版《現代台語譯本新約聖經》，2007，台北：台灣聖經公會

進　　度：羅馬書第二章、第三章

第二章第1節前半：“Só͘-í, lí tsit-ê phue-phuàⁿ lâng ê, bô-lūn lí sī sím-mi̍h lâng lóng buē-tàng piān-kái.”《巴克禮》：「所以見若擬斷人ê人ah，你無thang推託；」《紅皮》：「朋友á，所以無論你是什麼人，你若判斷人ê罪過，你就無辯解ê餘地；」《現代中文》：「朋友啊，你評斷別人，不管你是誰，都是不可原諒的。」《和合本》：「你這論斷人的，無論你是誰，也無可推諉。」《新譯本》：「你這判斷人的啊！無論你是誰，都沒有辦法推諉。」《現代台語》譯作“phue-phuàⁿ ”（漢字寫作「批判」），阮認為無真妥當，阮查《台日》、《東方》、《台話》各種詞典，甚至福建2006年出版的《閩方》mā攏tshuē無tsit-ê詞，可見伊m̄是台語mā m̄是廈門一帶所講的「閩南語」。唯一有收tsit-ê詞的是《台白》，不過張裕宏教授有註明：tse是日語文或台式日語；抑是終戰前不定時代的漢語文。《現代漢語》解說「批判」的意思是：「對所認為錯誤的思想、言行進行批駁否定。」既然tsit本聖經的名是《現代台語譯本》，用m̄是台語的詞，敢bē感覺怪怪？

第二章第8節前半：“Hiah-ê tsū-su, bô tsun-thàn tsin-lí, khì thàn put-gī ê lâng, ”阮認為“khì”kah“thàn”的中間若加一字“sūn”，變作“khì sūn than put-gī ê lâng,”，按呢讀起來會加khah順。

第二章第11節：“in-uī Siōng-tè bô phian-thāi lâng.”的tsit句“phian-thāi”，阮有查《台日》、《東方》、《台話》幾本詞典攏tshuē無tsit-ê詞，可見伊並m̄是「現代」台灣人teh使用的「台語」；連查《閩方》mā tshuē無，可見連廈門的「閩南人」mā無tsit-ê詞。原來tse是現代華語，《現代漢語》的解說講：「待遇不公平。」

第二章第15節尾句：“In ê liông-sim mā tsìng-sit,” 的tsit句“tsìng-sit”，阮有查《台日》、《東方》、《台話》攏tshuē無tsit-ê詞；連查《閩方》mā tshuē無，可見連廈門的「閩南人」mā無tsit-ê詞。《台白》有收tsit-ê詞，但是有註明是：戰後來台或在台的中語文。可見tsit-ê詞mā m̄是台語。

第三章第21節、24節、26節、28節、30節攏類似21節的寫法：“Kap Siōng-tè kiàn-li̍p ha̍p-gî ê kuan-hē.”阮看幾本譯本攏是講「稱義」，干單《紅皮》譯作「和合」。照阮平信徒粗淺的看法，基督教的道理若beh簡單講是「因信稱義」四字niā-niā，若beh講khah詳細是：人若心內相信、嘴裡承認講出耶穌是伊的救主，伊就白白稱作義人，伊就白白得救，得tio̍h永遠的活命。Tse kah一個人嚴守誡命、守割禮、拚命做好事、散財賑濟散赤人、修行等等攏無關係。阮bē tàng瞭解，tsiah呢簡單的道理，佇第三章忽然間出現幾個所在講“Kap Siōng-tè kiàn-li̍p ha̍p-gî ê kuan-hē.”hō͘阮愈看愈花。阮the̍h tsit幾段話請教教會的老前輩，in看看一下搖頭講m̄知啥意思；阮the̍h tsit幾段話問一般台灣人未信者，in mā搖頭講：看無，m̄知teh講啥物。阮想，新譯的《現代台語譯本新約聖經》的內容，上好是hō͘現代的台灣人攏看有，至少，mā愛hō͘現代台灣的基督徒看有才好。

註：《台話》是指《台灣話詞典》，陳修著，1991年，台北 遠流出版公司出版。