《現代台語新約聖經 讀經日記》

 | | | 轉寄

讀經筆記17 割禮無可能是「家己割傷身軀」！

作者 李南衡 2015.06.21

讀經筆記17　　　　割禮無可能是「家己割傷身軀」！　
讀經版本：羅馬字版《現代台語譯本新約聖經》，2007，台北：台灣聖經公會
進　　度：腓立比書第三章

第2節後半：tsù-ì hiah-ê ka-kī kuah-siong sing-khu ê lâng. 阮讀三遍mā m̄知tsit句話啥意思，想講kā寫作「漢羅」來讀，是m̄是會khah好瞭解？「注意hiah-ê家己割傷身軀的人。」無，猶原看無。只好tshuē看別種譯本按怎寫。《巴克禮》：「持防tsiah-ê受傷割ê。」老實講mā無法度瞭解啥意思，m̄-koh tio̍h想講巴克禮牧師的《新約聖經》是成百冬前的1916年翻譯出版的。《和合本》：「防備妄自行割的。」mā是看無，仝款mā是成百冬前的1919年出版的。咱看1975年一月taⁿ仔翻譯好出版tio̍h hō͘警備總部沒收兩千兩百本的《紅皮》：「警戒hiah-ê堅持割禮ê人。」“BBE”：“against those of the circumcision.”咱知“circumcision”意思就是「割禮」；預定2015年出版的《全民》：「注意hiah-ê堅持割禮ê人。」三種版本攏足清楚。有人譬相(phí-siùⁿ)「哲學」是用一寡咱聽無的言詞來講一項咱原本知影的代誌。阮希望tī二十一世紀譯寫出版hō͘現代台灣人讀的聖經，mài hiah呢「哲學味」thsng hō͘人讀khah有。而且照第5節保羅先生講“Guá tshut-sì tē-pueh ji̍t tsiū siū kat-lé,”請注意tsit字“siū”是被動的，因為「割禮」是被動的，無可能家己割傷。可見第二節寫作“ka-kī kuah-siong sing-khu”是錯誤的。

第15節前半：Só͘-í, lán toing-kan sîng-si̍k ê lâng tio̍h ū siâng-khuán ê siūⁿ-huat. 阮看tio̍h“sîng-si̍k”會想講到底是啥物「成熟」，是智能成熟？是體能成熟？辦事能力成熟？抑是啥物成熟？看別的譯本按怎寫。《巴克禮》：「所以咱見若做完全ê tio̍h存tsit-ê心志；」《紅皮》：「所以咱在靈性上長大成人ê，lóng tio̍h抱仝款ê心志。」《全民》：「所以，咱中間靈性成熟ê人，tio̍h有仝款ê心志；」《和合本》：「所以我們中間，凡是完全人總要存這樣的心；」《現代中文》：「所以，我們當中所有靈性成熟的人都要有這樣的想法。」所以，阮建議佇“sîng-si̍k”的頭前加兩字“lîng-sìng”，會加真清楚。

第20節前半：M̄-kú, lán sī thiⁿ-tíng ê kong-bîn. 用“kong-bîn”tsit-ê詞無適當。咱看《巴克禮》、《和合本》、《紅皮》、《全民》攏譯作「國民」。咱知，見若有取tio̍h 一 國國籍的人，無分男女老幼，攏是hit國的國民；一國的國民，koh享有公法上權利kah負擔公法上義務的人才會tàng稱作公民。公民佇法律上享有憲法所賦hō͘伊的權利，照現此時台灣的「中華民國憲法」來講，見若有中華民國國籍的人民攏叫作國民，國民年滿二十歲，而且tuà佇台灣地區，才叫作「公民」，公民有選舉、罷免、創制、複決的權利，有服兵役的義務。所以佇現此時的台灣，未滿二十歲的國民並無公民權利mā無公民義務。咱台灣基督教長老教會內有接受小兒洗禮的嬰兒，kah二十歲以前接受洗禮的青少年，攏是教會的一份子，mā攏總是天頂、也就是上帝國的國民。阮完全m̄知，天頂的「公民」tsit-ê概念是uì叼位生出來的，足奇怪。想bē曉《現代台語》那會去譯作「公民」咧？原來是in照《現代中文》的用詞。阮一再發現，《現代台語》內底有一寡錯誤的語詞，大部分是根據《現代中文》的用詞。誠遺憾！