《現代台語新約聖經 讀經日記》

 | | | 轉寄

讀經筆記18一枝嘴m̄是一個嘴　

作者 李南衡 2015.06.28

讀經版本：羅馬字版《現代台語譯本新約聖經》，2007，台北：台灣聖經公會
進　　度：雅各書

第一章第4節 Lín tio̍h jím-nāi kàu lō͘-bé tsiah uē-tàng ta̍t kàu uân-tsuân koh uân-tsíng, long bô khuat-tiám. “uân-tsuân koh uân-tsíng”那像重複，無好。《紅皮》kah《全民》可能仝款認為《巴克禮》譯作「完全齊備」無真理想，才改譯作：「十全十美」。《現代中文》可能認為《和合本》譯作「成全、完備」無夠好，所以改譯作「十全十美」。華語「十全十美」咱台語應該講作「十全」(tsa̍p-tsn̂g)，因為「十全十美」m̄是台語。台語講「十全大補湯」的時會講“si̍p-tsuân”。
第一章第17節　mā bô thian-thé tńg-seh ín-khí ê iáⁿ 阮讀歸晡猶原無法度瞭解的，是別的版本攏無的“thian-thé”tsit-ê詞，看《日文聖書》：「天体の動きにつれて生ずる影もありません（mā無因為天體變動所引起的影跡）」，才知影原來是漢字的「天體」。各種版本佇tsit節經文的頭前tio̍h有先講，《巴克禮》「tuì眾項光ê父落來。」所以才會講：「伊無變換，也無轉旋ê影。」《紅皮》：「tuì光明ê創造者上主賞賜落來ê。」所以才會講：「伊永久不變，也無改變ê影跡。」《和合本》：「從眾光之父那裡降下來的；」所以才會講：「在他並沒有改變，也沒有轉動的影兒。」《現代中文》：「是從天父來的；他是一切光的創造主。」所以才會講：「他不改變，也沒有轉動的影子。」阮認為，佇tsit節的頭前有講“uì thiⁿ-tíng kng-bîng ê Guân-thâu só͘ sù.”已經真清楚ah，假使一定beh講「天體」tsit-ê概念，若是改作：「宇宙眾星辰」，tsit句話變作“mā bô ú-tiū tsiòng tshiⁿ-sîn tńg-seh ín-khí ê iáⁿ.”是m̄是會khah清楚？

第二章第6節　M̄-kú lín bô tsun-tiōng sàn-tshia-lâng.各種版本的用辭無仝。語氣上輕的是tsit本《現代台語》：“bô tsun-tiōng”漢字寫作「無尊重」；續落去是《紅皮》kah《全民》：「看輕」，比「無尊重」khah重一絲仔；續落是《日文聖書》：「貧しい人を辱めた。」（暴辱散赤人）、“BBE”：“have put the poor man to shame.”（暴辱散赤人）、kah《和合本》：「羞辱貧窮人。」仝款；續落去是《現代中文》：「侮辱窮人。」，上嚴重的是《巴克禮》：「凌辱」。阮m̄知希臘語原文是按怎寫的，事實上阮有看出in的語氣輕重差別真大，m̄知tó一個khah正確。

第三章第10節　Kám-siā kap tsiù-tsó͘ ê uē lóng tuì kâng tsit-ê tshuì tshut. “tsit-ê”漢字寫作「一個」，華語講嘴會講「一張嘴」bē講「一個嘴」。足奇怪的是《巴克禮》、《紅皮》、《全民》攏仝款m̄-tio̍h寫作“tsit-ê tshuì”。咱台灣話無講「一個嘴」，攏mā講「一枝嘴」，罵人「干單捾一枝嘴」（華語講作「光說不練」）；「歸身死了了，tshun一枝嘴。」（華語的意思是「死不認輸」）；「一枝嘴ná青竹絲」（華語的意思是「嘴很毒」）。咱所講的「量詞」（抑是講作「數助詞」）攏是「約定俗成」的，像講「一領衫」、「一蕊目睭」、「一口灶」、「一坵田」、「一腳皮箱」，因為無啥道理，致使定定有人會講m̄-tio̍h，莫怪村上嘉英編《台灣語辞典》的時，特別加編附錄2〈常用量詞一覽〉，可惜伊無收「嘴」字的量詞。