《現代台語新約聖經 讀經日記》

 | | | 轉寄

讀經筆記19　否定的否定敢m̄是肯定？　　

作者 李南衡 2015.12.20

讀經版本：羅馬字版《現代台語譯本新約聖經》，2007，台北：台灣聖經公會 進　　度：彼得前書第一章至第四章

第二章第19節：Tú-tio̍h bô ing-kai siū ê thòng-khó͘, Tsit句話講kah lò-lò長，到底teh講啥實在無瞭解。看別的版本按怎講？《巴克禮》：因為人受冤枉。《紅皮》：枉屈苦楚。《和合本》：冤屈的苦楚。《現代中文》：不當的痛苦。《全民》：人受冤枉ê時。以上任何一個版本，敢m̄是攏加真清楚？
第三章第10節：tio̍h kìm-tsí tshuì-tsih bô kóng pháiⁿ-uē. Tsit句經文內底的“bô”字是加寫的，因為否定的否定是肯定。若是kā tsit字“bô”刪掉變作：“tio̍h kìm-tsí tshuì-tsih kóng pháiⁿ-uē, ”才讀會通。犯錯誤的m̄是干單tsit-ê版本，《巴克禮》犯tio̍h仝款的錯誤：「就tio̍h禁止嘴舌無pháiⁿ，」 《和合本》mā犯tio̍h仝款的錯誤：「須要禁止舌頭不出惡言，」好佳哉，猶有人無犯tio̍h tsit-ê錯誤：《紅皮》：「就tio̍h m̄-thang講pháiⁿ話，」《全民》：「tio̍h禁止嘴舌講pháiⁿ話，」《現代中文》：「就得禁止舌頭說壞話，」

第三章第19節：Thong-kè I ê lîng, I mā ū khì tuì hiah-ê tī kaⁿ-lāi ê lâng thuân-tō. Tsit節經文所講的“kaⁿ-lāi”，應該m̄是咱一般所認識的「監內」，有幾個版本譯了誠好： 《紅皮》：「伊ê靈去kā hiah-ê tī陰府ê靈魂傳道。」《全民》：「通過祂ê靈，祂mā bat去傳道理hō͘受關tī陰府ê靈魂。」《現代中文》：「他曾以這靈去向那些被囚禁的靈魂傳道。」雖然譯了m̄是誠清楚，不過猶原看有，算是bē-bái。

第四章第7節：Bān-iú ê tsiong-kio̍k kūn-lah！咱台語除了uì華語直接譯過來的新名詞「萬有引力」以外，那像真少人用「萬有」。Khah tsia̍p聽tio̍h的是像《巴克禮》、《全民》、《現代中文》使用的「萬事」，《和合本》、《日文聖書》使用的「萬物」，抑是《紅皮》使用的「一切」。　第11節中：sū-hōng ê, tio̍h tsiàu Siōng-tè só͘ sù un-sù ê le̍k-liōng lâi sū-hōng,“sū-hōng”漢字寫作「事奉」，咱台語那像khah少人按呢講，想講he是華語。咱khah tsia̍p聽tio̍h的台語是「服事」“ho̍k-sāi”。

有一點tio̍h theh出來講的，是阮讀《彼得前書》的時，發現譯者群有可能為tio̍h文字的簡潔，真濟所在節省文字，致使讀tio̍h怪怪。阮大膽kā一寡字補入去，囥佇 ( ) 內底。請試看māi，是m̄是讀tio̍h有khah順、有khah清楚？ 第一章第7節：Tse sī beh tsìng-bîng lín ê sìn-sim (ē會) kham-tit siū khó-giām. 第9節：in-uī lín uē tit-tio̍h sìn (gióng仰) ê kiat-kó, tsiū-sī lîng-hûn ê tit-kiù. 第11節：In tit-tio̍h tī in sim-lāi Ki-tok ê (Sìng聖) Sîn tuì in ê tsí-sī, 咱看第12節尾，mā-sī寫作“Sìng Sîn”。第14節：m̄-thang tsiàu lín (í以／tsá早) tsîng m̄-bat Siōng-tè ê sî án-ni hòng-tshòng su-iok. 佇第二章第10節、第25節，仝款有需要加“í以”抑是“tsá早”字。

第二章第2節：Tio̍h tshin-tshiūⁿ tú tshut-sì ê eⁿ-á tsin ài (suh吮) sûn (kiat潔) ê sio̍k-lîng ê lin, 第8節：Tī pa̍t-uī (koh) ū kì-tsài。 第18節：liân (tuì對) khik-po̍k ê mā tio̍h án-ni.

第三章第8節：Tsóng kóng (tsi̍t-kù一句)；lín tio̍h tang-sim, 第18節：In-ui Ki-tok uī-tio̍h (lán-ê咱的) tsuē siū-khó͘,　為tio̍h啥人的罪？會hông誤會是伊家己的罪。

第四章第6節：m̄-kú in ê lîng uē-tàng tsiàu Siōng-tè ê khuán (sik式) lâi-ua̍h. (150606)