《現代台語新約聖經 讀經日記》

 | | | 轉寄

第二篇 “tshì-tsha̍k” kap阮理解ê意思無仝

作者 李南衡 2011.12.18

讀經版本：羅馬字版《現代台語譯本新約聖經》，2007，台北：台灣聖經公會
進　　度：使徒行傳第二章

第二章7節　In tio̍h-kiaⁿ koh kî-kuài.《紅皮》：In tio̍h-kiaⁿ kám-kak kî-kuài.《現代中文》：在驚訝詫異中。《和合本》：都驚訝希奇。成百年前ê《巴克禮版》是按呢譯ê：Tsiū lóng gông-ngia̍h kî-kuài。tsit句gông-ngia̍h實在會hō͘今仔日ê咱看tio̍h gông去。照阮瞭解，tsit句gông-ngia̍h是廈門話、並m̄是咱在地ê台灣話。《廈英大辭典》解說gông-ngia̍h：suddenly surprised; startled and afraid.意思是忽然間ê驚惶；驚一跳。《閩南方言大詞典》：漢字寫作「怣愕」，發音仝款作gông-ngia̍h，華語註解作：驚奇詫異。《台日大辭典》：漢字寫作「昂愕」，意思是惘然；驚一跳suah m̄知beh按怎才好。除了《台日》以外，台灣出版ê各種辭典，像《台灣話大詞典》、《台語白話小詞典》、東方《台灣語辭典》攏無收tsit-ê詞。幾十年來，會使講是干單台灣基督長老教會內底teh使用niā-niā。《現代台語聖經》kā歸本聖經內底ê “gông-ngia̍h”攏改作 “tio̍h-kiaⁿ koh kî-kuài”，tse才是「現代台語」ê講法。

第二章37節前半：Tsìng-lâng thiaⁿ-tio̍h tsiah-ê uē, sim-lāi tsin tshì- tsha̍k. Tsia所用ê及阮所理解ê “tshì-tsha̍k” 無仝。阮理解tshì-tsha̍k ê意思是那像有刺仔teh鑿，抑是親像華語所講ê「如芒刺在背後」，會giauⁿ抑是會tsiūⁿ ê感覺，有一種bē爽快、gāi-gio̍h gāi-gio̍h ê感覺。《巴克禮版》仝款譯作：tshì-tsha̍k,《紅皮》：in ê sim tshin-tshiūⁿ hō͘ to tsha̍k- tio̍h，《現代中文》：覺得很扎心，日文《聖書》譯作：大いに心を打たれ，意思是講大大感動。阮認為日文《聖書》譯了上好。tshì-tsha̍k《廈英》解說作to grieve and pierce the heart; to dazzle the eye.《閩方》漢字寫作「刺鑿」，意思是刺癢、hō͘人感覺無歡喜、bē爽快抑是討厭。《東方》漢字寫作「刺鑿」，意思是鑿目；情緒無好。《台話》漢字寫作「莿鑿」，作動詞用，惹毛；作形容詞用，煩躁；騷癢。阮想講tsit ê所在台灣話那像會使講：鑿tio̍h in ê心肝khut-á。所以佇tsia: sim-lāi tsin tshì-tsha̍k若改作：lóng tsin kám-tōng可能khah倚意。

註解：
註1. 《廈英大辭典》(Dictionary of Vernacular or S[plem Language of Amoy]，杜嘉德(C. Dooglas)，1873年，英國倫敦　Trubner & Co., 出版。以下簡稱《廈英》
註2. 《閩南方言大詞典》，周長楫，2006年，中國　福建人民出版社出版。以下簡稱《閩方》。
註3. 《台日大辭典》，小川尚義，1931-32年，台北 台灣總督府出版。以下簡稱《台日》
註4. 《台灣話大詞典》，陳修，1991年，台北 遠流出版公司出版。以下簡稱《台話》
註5. 《台語白話小詞典》，張裕宏，2009年，台南　亞細亞國際傳播社出版。以下簡稱《台白》。
註6：《東方台灣語辭典》，村上嘉英，2007年，日本東京 東方書店出版。以下簡稱《東方》。