《現代台語新約聖經 讀經日記》

 | | | 轉寄

第三篇 “nā-sī”漢字有兩種寫法

作者 李南衡 2011.12.25

讀經版本：羅馬字版《現代台語譯本新約聖經》，2007，台北：台灣聖經公會
進　　度：使徒行傳第五章

第五章13節 《巴克禮版》白話字聖經是按呢譯：kî-û â lâng bô tsi̍t-ê káⁿ kūn-uá in; nā-sī peh-sìⁿ tsun-tiōng in; 早前讀tsit節經文ê時會感覺怪怪，等到《巴克禮版》漢羅字版出版了後，看in按呢譯：其餘的人無一個敢近倚in，若是百姓尊重in。老實講tsit節經文愈讀愈花。好佳哉，讀《現代台語聖經》tsit節經文按呢譯：Tsìng-lâng lóng tsin tsun-tiōng in, m̄-kú bô-lâng káⁿ kap in tsiap-kun. 才喘一個大氣：tio̍h ah按呢才是「現代」「台語」。

　　《巴克禮版》白話字聖經干單新約聖經就有187位“nā-sī”，大部份攏是「但是」ê意思，真少是「若是」ê意思，像講《馬可福音》第十四章29節，《現代台語聖經》無kā「若是」譯出來，《紅皮》譯作：彼得對耶穌講：「假使其他ê人ê信心攏會起動搖，我絕對bē按呢。」《馬太福音》第六章29節前半，《巴克禮版》：nā-sī guá kā lín kóng,《現代台語聖經》譯作：Put-kò guá kā lín kóng,《紅皮》譯作：Tān-sī Guá kā lín kóng。《現代台語聖經》大部分kā“nā-sī”譯作m̄-kú、put-kò，有ê所在意思會通就省略起來無譯。

　　咱來看辭典按怎寫：《廈英》“nā”有兩個意思，第一個“nā”漢字寫作「若」，文言音讀作“jio̍k”，英語意思是if, like。“nā-sī”意思是if it be (only)。第二個“nā”漢字寫作「但」，文言音讀作“tān”，英語意思是only。例句有m̄-nā，英語意思是not only。“nā-sī”英語意思是only, if。巴克禮牧師佇伊所編ê《廈英》補遺第156頁，仝款kā“nā”作兩種解說，一種是「若」，一種是「但」。甘為霖牧師編著ê《廈門音新字典》（以下簡稱《廈音字》）496頁仝款kā“nā”作兩種解說，一個是「若」，一個是「但」。「若」ê例句有：nā-sī, nā-bô, lí nā-beh;「但」ê例句有：nā-sī, nā-tiāⁿ, m̄-nā。所以《巴克禮版》漢羅字版tsit節經文若kā漢字寫作「但是」，咱讀起來就會真清楚。

　　咱查戰後台灣、日本出版ê各種台語辭典，「但」攏無“nā-sī”ê用法，甚至tsit幾年中國出版廈門話á是閩南語辭典，「但」mā攏無“nā-sī”ê用法。唯一會tàng看tio̍h ê是一九三一年出版ê《台日》，仝款分兩個：第一個nā-sī意思是：如果，假使，唯一；第二個nā-sī意思是：但是，干但。 　　
按呢，咱可能會使假定，連tsit-má中國廈門漳泉一帶ê人所使用所謂ê「閩南語」，mā無用「但」來作nā-sī ê語詞ah。

註解：
註1：甘為霖編著ê《廈門音新字典》(A Dictionary of The Amoy Vernacular spoken Throoghoot The Prefectures of Tsin-tsiu, Tsang-tsiu, and Formosa[Taiwan])，甘為霖(Rev. W. Campbell)， 1913年，台南 台灣教會公報社。以下簡稱《廈音》