《現代台語新約聖經 讀經日記》

 | | | 轉寄

第五篇 到底是雅各ê家抑是上帝ê家？

作者 李南衡 2012.01.08

聖經版本：羅馬字版《現代台語譯本新約聖經》，2007，台北：台灣聖經公會
進　　度：使徒行傳第七章

第七章第26節後半：“Pîng-iú, lín sī hiaⁿ-tī, ná teh hō͘-siōng khi-hū?”《巴克禮版》按呢譯：Lín sī hiaⁿ-tī, siáⁿ-sū saⁿ khi-hū?《紅皮聖經》譯作：『朋友à，lín是同胞，按怎lín teh欺負來欺負去？』《現代中文》譯作：「你們是同胞，為甚麼自相傷害呢？」英文聖經 “RSV”譯作：“Men, yo͘ are brethren, why do yo͘ wrong eats other?”日文《聖書》ê意思是：恁敢m̄是兄弟？為甚麼beh互相傷害咧？《和合本》譯作：「你們二位是弟兄，為甚麼彼此欺負呢？」咱會tàng看出，無管是‘saⁿ khi-hū’、「欺負來欺負去」抑是「彼此欺負」，攏是早前ê翻譯，最近ê大部分譯作自相「傷害」抑是互相「傷害」。咱一般ê觀念那像是強對弱、大對細、上對下，才會講是「欺負」，平強平大、地位差不多ê，假那khah少人講互相欺負。講互相傷害、自相傷害聽tio̍h khah順。咱m̄知《現代台語譯本》是按怎beh譯作‘hō͘-siōng khi-hū’，感覺小可奇怪。

第46節：“Tāi-pit ū tit-tio̍h Siōng-tè huaⁿ-hí, thang kiû Siōng-tè tsún-i uī-tio̍h Ngá-kok ê ke tshē tsit ê khiā-khí ê só͘-tsāi.”看起來，大衛所祈求ê是為雅各ê家tshuē一個徛起ê所在。咱看《巴克禮版》按呢譯：“i tit-tio̍h un-tián tī Siōng-tè ê bīn-tsîng, ài beh kā Ngá-kok ê Siōng-tè tshē tsi̍t ê khiā-khí ê uī.”《紅皮聖經》譯作：「大衛得tio̍h上主ê寵愛，求上主允准伊為雅各ê上主預備一間居住ê所在。」《現代中文》譯作：「大衛蒙上帝喜悅，要求准許他為上帝－就是雅各的上帝－建造一座殿宇；」英文聖經 “RSV”譯作：“who foond favor in the sight of God and asked leave to find a habitation for the God of Jacob.”日文《聖書》ê意思是：向望為tio̍h雅各ê家會táng tshuē一個hō͘上帝徛起ê所在。無管是譯作：一座殿宇、上主居住ê所在、上帝徛起ê所在、抑是聖殿，意思攏仝款是指上帝ê「家」，m̄是雅各ê家。雖然《現代台語聖經》第189頁下面有註明:“Ngá-kok ê ke”ū ê tshau-pún si “Ngá-kok ê Siōng-té”總是猶原無法度理解“Ngá-kok ê ke”是啥意思，因為照舊約聖經《詩篇》第一百三十二篇第5節所記載：“Thìng-hāu guá uī-tio̍h Iâ-hô-hua tshē-tio̍h só͘-tsāi, Uī Ngá-kok ê tuā Kuân-lîng--ê tshē-tio̍h khiā-khí ê só͘-tsāi.”抑是本章第47節所講：M̄-kú āu-lâi uī-tio̍h Siōn-tè khí Sìng-tiān ê sī Só͘-lô-bûn. 可見前一節所講tsit ê khiā-khí ê só͘-tsāi是指聖殿、m̄是雅各ê家。Tsit-ê所在若一定beh愛有一字“ke”字，譯作“Ngá-kok ke ê Siōng-tè”可能就khah容易明白。

第51節後半：Lín kap lín ê tsó͘-sian sio-siâng, put-sî huán-khòng Sìng-Sîn!《巴克禮版》譯作：siông-siông puē-gi̍k Sìng Sîn; lín ê tsó͘ án-ni, lín iā án-ni. 《紅皮聖經》譯作：Lín tú親像lín祖先，lín也常常反抗聖靈！《現代中文》譯作：你們和你們的祖先一樣，總是跟聖靈作對！英文聖經 “RSV”譯作：yo͘ always resist the Holy Spirit. As yoor fathers did, so do yo͘. 日文《聖書》ê意思是：恁kah恁ê祖先仝款背逆聖靈。阮認為tsit-ê所在譯作puē-gi̍k（「悖逆」抑是「背逆」）比「反抗」、「作對」khah適當。