《現代台語新約聖經 讀經日記》

 | | | 轉寄

第六篇　是puàn-sin-put-suî 抑是piàn-suî ê？

作者 李南衡 2012.01.22

讀經版本：羅馬字版《現代台語譯本新約聖經》，2007，台北：台灣聖經公會
進　　度：使徒行傳第八章

第八章第7節：Ū tsin tsuē hō͘ siâ-sîn hū-sin ê lâng tuā-siaⁿ huah, tuì in só͘ hū-sin ê lâng tshut-khì. Ū tsin tsuē puàn-sin-put-suī kap kha-pái-ê mā tit-tio̍h i-hó. 內底tsit-ê“puàn-sin-put-suī”是新語詞，漢字寫作「半身不遂」。《巴克禮版》kah《紅皮》攏譯作“piàn-suī”、mā有人讀作“puàn-suī”，漢字寫作「半遂」。《日語聖經》譯作「中風患者」，《現代中文》kah《和合本》譯作「癱瘓的」。咱若看1931年出版ê《台日》“piàn-suī”（半遂 ）ê解釋：半身不隨。全身不隨。中風。仝本《台日》「半身不隨」ê解釋有加tsit-ê（國），（國）ê意思是「國語」（當時ê「國語」是日語）也就是講「半身不隨」是日語ê講法。按呢咱就知影，無論“piàn-suī”抑是“puàn-suī”是咱台灣人原本ê講法，受日本殖民統治了後才借用日語講法，台灣tī日治時代，因為教育ê影響，真濟台語原本tio̍h有ê語詞煞改用外來ê日語語詞，雖然寫日本漢字、讀出來卻是用台語發音，tse會使講是台灣當時uì日本來ê外來語ê一大特色。Tsit類ê例真濟，像講「屎礐」(sái-ha̍k)攺作講「便所」(piān-só͘)、「客棧」(kheh-tsàn)改作講「旅館」(lí-kuán)、「學堂」(o̍h-tn̂g)改作講「學校」(ha̍k-hāu)等等。借用外來ê tsit-ê新語詞「半身不隨」有一點tio̍h注意，台語「隨」(suî)發音第五聲，「遂」(suī)發音第七聲，無仝。若是寫作“puàn-sin-put-suī”漢字是「遂」，並m̄是原本ê日語漢字「隨」。

若是認為新語詞“puàn-sin-put-suī”比原本用慣勢ê“piàn-suī”khah好，是按怎佇《馬太福音》第四章第24節猶koh使用“piàn-suī”？另外《馬太》第八章第6節，每一本聖經攏有寫hit-ê奴僕患tio̍h“piàn-suī”（抑是講「癱瘓的」、「中風患者」）干單tsit本《現代台語聖經》譯作：“Tsú ah, guá ê lô͘-po̍k tó tī tshù-lāi buē tin-tāng, hui-siông kan-kó͘ .”無講伊患tio̍h啥物病。阮m̄知啥原因beh按呢省略。

　　仝tsit節內底tù-tsiah講ê tsit-ê詞“puàn-sin-put-suī”後面ê“kha-pái-ê”，讀tio̍h真bē順。無論是《巴克禮版》抑是《紅皮》，攏寫作“pái-kha-ê”，《現代中文》kah《和合本》譯作「瘸腿的」，咱台語mā是講“pái-kha-ê”，那像khah罕得聽人講“kha-pái-ê”。我手底有ê幾本台語辭典字典、甚至中國出版ê「閩南話」、「廈門音」辭典，無一本有收“kha-pái-ê”tsit-ê詞。我想，真有可能是譯者ê筆誤抑是排版ê疏忽。

第八章第20節：Pí-tik tuì i kóng, “Lí ê tsîⁿ kap lí tsuè-hé khì sí ! Lí káⁿ siūⁿ-beh īng tsîⁿ bué Siōng-tè ê un-sù ! ” tsit句 “Lí ê tsîⁿ kap lí tsuè-hé khì sí ! ”《巴克禮版》譯作：「你ê銀kap你saⁿ-kap滅無。」《紅皮》譯作：「你ê錢tio̍h kap你作伙滅亡！」《現代中文》kah《和合本》譯作：「你跟你的金錢（銀子）一起滅亡吧！」甚至連《日文聖書》kah“RSV”ê意思mā攏是滅無、滅亡。干單tsit本《現代台語聖經》譯作“Lí ê tsîⁿ kap lí tsuè-hé khì sí ! ”阮ê疑問是：有生命ê人有可能kah無生命ê錢做夥（“saⁿ-kap”）滅無、滅亡，但是無生命ê錢beh按怎kah有生命ê人做夥去死咧！感覺怪怪。