《現代台語新約聖經 讀經日記》

 | | | 轉寄

第七篇　是按怎譯作「靈語」？

作者 李南衡 2012.01.28

　 讀經版本：羅馬字版《現代台語譯本新約聖經》，2007，台北：台灣聖經公會
進　　度：使徒行傳第十章

第十章第46節：In-uī in ū thiaⁿ-tio̍h hiah-ê lâng kóng lîng-gú koh tshing-tsàn Siōng-tè ê uí-tāi. 內底tsit-ê“kóng lîng-gú”阮認為有小可問題。早前阮讀《巴克禮版》是譯作「in用tsiah-ê腔口teh講」抑是讀《和合本》譯作「說方言」，那像攏bē感覺有啥物奇怪。因為tsit-ê詞英文是譯作“speaking in tongues”。真歹勢，阮m̄-bat希臘文抑是希伯來文，m̄知原文按怎寫。

　　咱來看佇使徒行傳第二章第4節頭一遍出現tsit-ê詞，《巴克禮版》是譯作「開嘴講別樣ê腔口」，後面各所在譯作「土腔」「腔口」；《和合本》譯作「說起別國的話」，佇後面各所在攏譯作「方言」；《現代台語聖經》譯作：“kóng pa̍t tsióng gú-giân.”後面有譯作“īng in ê pún-tuē-uē tuì in kóng-uē”、“īng lán ta̍k ê lâng ê pún-tuē-uē teh kóng-uē”；各種英文版本攏是譯作“to speak in other tongues”，而且佇後面各所在mā攏是譯作“in tongues”、“in a tongue”。是按怎《現代台語聖經》佇後面攏譯作“kóng lîng-gú”（講靈語）咧？

咱知影，為tio̍h beh hō͘福音傳khah緊koh遠，聖神hō͘初代教會信徒三項恩賜：醫病ê能力、傳講福音ê能力kah講別國話ê口才。佇使徒行傳第二章第4節至第8節，咱看tio̍h uì各國轉來ê猶太人聽tio̍h使徒講出in所來ê各所在ê腔口，就大tio̍h驚。咱uì聖經bē tàng看出tsit-ê口才tī tang時、按怎變kah tio̍h人來解釋，致使保羅先生顚倒khah希望信徒有會曉傳講福音ê能力。（請參看《哥林多前書》第十四章第2節至第5節）Tsit種會講外國話ê口才那像初代教會了後tio̍h漸漸佇教會中減少，但是一直無斷。一直到二十世紀才忽然間koh興起來。變作有時身軀會la̍k-la̍k tshuah、會大細聲喊喝、發出含糊不清、別人聽無ê話語。

　　咱看《現代中文》譯作「靈語」，因為“holy spirit”in譯作「聖靈」，受聖靈感動講出ê話語譯作「靈語」會通。《現代台語聖經》“holy spirit”是譯作“Sìng Sîn”（聖神），受聖神感動所講出ê話譯作“lîng-gú”（靈語），敢bē感覺怪怪？何況阮看幾個英文聖經版本（註解1），tsit幾段經文攏是譯作“in tongues”抑是“in a tongue”，無一本無一位改作“Divine Language”（靈語）。可見“in tongues”kah“Divine Language”兩個詞佇英文中應該有差別。所以，阮認為《現代台語聖經》譯作“lîng-gú”（靈語），無真適當。

　　Tsit-ê詞，《現代台語聖經》譯作“kóng lîng-gú”（講靈語），英文譯作“speaking in tongues”，日文譯作「異言を語る」，《和合本》譯作「說方言」，現代中文譯作「講靈語」。《紅皮》雖然字句有khah長一絲仔，不過阮認為譯了上好mā khah bē有爭議，《紅皮》譯作：「入神來講奇妙ê言語」。
註解：
1. 阮查過KJV（欽定版聖經）、ASV（權威標準版）、NIV（新國際版）、NSAB（新美國標準版）等五六本英文聖經。