《Kah陳小小做伙讀台語》

 | | | 轉寄

信耶穌「做好人」，á是「做新人」？

作者 Virginia Yip，台譯：Lîm Tsùn Io̍k 2021.12.12

陳小小踏話頭

起初我是用華人儒家文化ê主軸，用佛道民間信仰ê靈界觀做輔助來理解基督信仰，所以，想講信耶穌一定是beh為tio̍h「做好人」，甚至tio̍h立志做「好人中ê好人—聖人」。讀聖經，看tio̍h「新造ê人」，感覺真有意思，m̄ koh「做好人」kah「做新人」ê差別tī tó位？我無法度掌握其中ê意義。

直到tsit幾年擔當聖經ê老師，tī準備課程ê過程中，tùi舊約到新約kā kui个創造神學ê結構建立起來，我tsiah明白「做新人」ê意義大大贏過「做好人」，大大贏過「做聖人」。

「做好人」是來自宗教lóng是勸人為善ê概念。M̄ koh啥物是「好」？啥物是「善」？ Ē tòeleh世俗文化流動。Tiāⁿtiāⁿ發生tsìn前想講是「好」ê價值觀，現代來講是無好。現代想講「好」ê價值觀，tsìn前來講是無好。講tio̍h未來，無人ē tàng肯定tsitmá ê「好」，是m̄是ē tàng續到永遠。

「做新人」tsiah是來自上帝ê創造，祂創造ê一切看做是好。Tsit種「好」，有永遠ê價值，世世代代lóng「好」。本期信望愛主打文hō͘你了解「做好人」kah「做新人」ê差別。

【信耶穌「做好人」，á是「做新人」？】作者:Virginia Yip

Tsristianity is not aboot being nice. It's aboot being new. ──Timothy Keller

基督教信仰m̄是ài你「做好人」，是ài你「做新人」。──提摩太·凱樂 提摩太·凱樂tī tsia講ê “being nice”（做一个好人），並無負面ê意思，親像咱人是表面上真nice，其實m̄是真心ê；是指in是按照人ê標準想講kakī真nice，bē記得kakī是完全墮落、心內無良善ê罪人；koh á是指咱人kantaⁿ顧扶tháⁿ別人，hō͘人講in好，á無惜妥協真理等等……hiah个 “being nice”。

凱樂所指ê”being nice”，是咱ta̍k个重頭生得救、認bat救恩、知影kakī無良善ê罪人，ta̍k个熱心疼主ê基督徒，lóng kiámtshái ē犯ê錯誤，而且真有可能是jú疼主ê人jú ē墮入ê陷阱。 “Being nice”是基於人ê宗教性，甚至thang講，是本tī人ê敬虔之心所產生ê一種出tī善意，卻無夠認bat福音ê表現。注意，tsia注重ê是一種「心態」，無一定是外在ê具體表現。


Hō͘人「做好人」ê宗教



“Being nice”指ê是咱人想講：我tsitmá是基督徒à，我一定tio̍h對人好，因為主要求我用好行為tī人前為祂做見證，我beh有美好ê性命見證，我beh過聖潔ê生活，我beh疼人親像kakī……這kám講一切lóng m̄ tio̍h？完全正確！無論是動機、á是目的，甚至是標準，lóng真有可能是完全正確無m̄ tio̍h，完全符合聖經。


M̄ koh，問題出tī tó位？問題to̍h是在tī，若是這to̍h是咱對基督教信仰全部ê認bat，ánne咱to̍h是本末顛倒khǹg，m̄ bat基督教ê獨有特殊性à。因為tsit種心智方式，是建立tī一種用外在標準來要求kakī生活行為ê基礎頂面。Ánne ê基督徒生活，一開始kiámtshái ē真有成就，別人mā kiámtshái ē看tio̍h你kah眾人無仝ê性命見證，因為ánne kā榮光歸hō͘上帝，你kiámtshái ē因為ánne 來帯領人歸主……tsiah个lóng是可能發生ê tāitsì。


M̄ koh久久了後，你to̍h ē感覺jú來jú thiám，因為你是用一種koân kah bē tàng達到ê道德標準來要求kakī，你只要成功一pái，下pái to̍h koh khah無法度承受失敗，來支持你繼續tsit種活落去，kiámtshái是別人對你美好行為ê oló，mā kiámtshái是你帯領人歸主ê效果。M̄ koh，你若漸漸發見，你ê好行踏m̄ nā得bē tio̍h別人ê oló，無法度hō͘人因為ánne kā榮光歸tī上帝，á是無法度因為ánne來帯領人歸主，顛倒hō͘人感覺你人善好欺負，á是hō͘人感覺信上帝ê人lóng kah你仝款真戇，甚至感覺做基督徒若是lóng tio̍h kah你仝款，in tsiah無beh做基督徒neh！Tsit時，你kám iáu ē tàng繼續有動力 “being nice”？


Kiámtshái一開始你ē有怨言，m̄ koh因為敬虔疼主ê心，你ē隨時意識tio̍h tsit種發怨言ê心是真m̄ tio̍h ê，就ánne努力用祈禱、認罪悔改ê方式來解決問題。M̄ koh你jú努力，jú發見你ê心態m̄ tio̍h，表裡不一，你mā to̍h jú自責。就ánne，你基督徒ê性命開始失去喜樂，日子pôaⁿ過，擔（tàⁿ）jú重，jú來jú無氣力。


若是你tsit時tú tio̍h啥物困難，你koh khah想講是因為你ê靈性無好，上帝teh kā你責罰。若是你看tio̍h有基督徒kui氣棄sak過聖潔生活ê努力，kah世間人同流合污，ánne，你ē一屑á都無留情面kā in批評論斷，ná親像你想講你做kah無好ê時，上帝mā是ánne處罰你仝款。我ánne ê描述並m̄是靠tio̍h憑空猜測，卻是真tsē華人教會中疼主ê兄弟姊妹ê寫照。

用道德視角來理解「褔音」



Ná ē知影一个人接受ê是道德主義，卻m̄是福音？真簡單，只要問in對kakī屬靈性命ê評價，看in是m̄是tiāⁿtiāⁿ想講kakī tsit種、ánne lóng做無好，達bē到聖經ê要求；in嘴中tiāⁿtiāⁿ講ê是，基督徒一定tio̍h做啥物、做啥物……；á是tùi in講話ê字縫中，總是ē暗暗á流露出對上帝有驚tshuah koh埋怨ê氣味；koh á是in對上帝本身是一个公義ê法官tsit个教義ē tàng講kah條條是道理，m̄ koh，in對上帝是「父」tsit个教義，若m̄是一屑á都無概念，to̍h是kantaⁿ有普普á ê頭腦智識；koh á是，in對hiah个犯罪pua̍h倒ê基督徒，往往一屑á都無留情來ka定罪、藐視。


問題究竟出tī tó位？問題出tī咱用道德要求來代替福音。福音是啥物？福音是認bat咱今á日tī上帝面前蒙主歡喜接納ê一切因由，lóng是基督為咱成就ê。咱是一屑á óa靠都無，啥物都無來hō͘上帝接納做kiáⁿ兒，á父上帝tī接納咱做kiáⁿ兒ê時，完全知影咱是án怎ê景況──咱乃是內面一屑á都無良善、立志卻tshia跋péng、行善卻半途而廢、疼主卻三心兩意ê人。咱ta̍k人lóng是ánne，若是你看tio̍h某某人比你khah敬虔真tsē，he只不過是你表面ê觀察kah你對罪ê認bat iáu真膚淺ê緣故而已。Jú認bat kakī、jú敬虔疼主ê人，jú ē承認頂面所講ê一切，這是一定ê反合性（paradox，koh稱「逆理」）。


Tùi褔音視角來看行為、禍福 認bat福音ê人，bē kā個人ê好行踏看做是基督教信仰ê中心，in kantaⁿ ē看tio̍h基督為in做ê kah上帝對in無條件ê接納。Tú因為ánne，in心內to̍h自然產生一股動力，tiāⁿtiāⁿ teh想tio̍h ē tàng為主做kóa啥物。In真心發出一股疼主ê心，因為ánne ē tàng自然而然來疼人親像kakī。

M̄ koh當in ánne做ê時，kakī並bē意識tio̍h in teh為主做啥物美好ê見證，若無，in kantaⁿ ē感覺主為in做kah siuⁿ過tsē，in m̄知án怎回報主ê大疼，án怎活kah koh khah sêng in ê主，án怎koh khah ē tàng榮光神利益人。In ê目tsiu頭尾lóng khǹg tī基督kah基督hō͘ in ê恩典頂面。

當in發見kakī做kah無好ê時，bē因為ánne來失落、鬱卒，卻ē因為ánne koh再認bat上帝ê救恩有gōa偉大，koh再認清kakī是何等不配，koh再tńg來到上帝ê懷抱，感謝上帝對in ê疼，koh再認定基督ê救贖之恩，koh一pái懇求上帝幫贊in khiā起來，koh再試一pái。當in發見in所做ê，得bē tio̍h所ǹg望ê效果ê時，in mā無要緊，因為in知影kakī是做上帝歡喜ê to̍h夠額à！

當in看tio̍h其他兄弟姊妹犯罪pua̍h倒ê時，in kantaⁿ ē想tio̍h，若是換做是in，tī tú tio̍h仝款ê環境á是試探ê時，恐驚mā真有可能落到仝款ê光景中。所以，in對犯罪pua̍h倒ê兄弟姊妹，非常意愛用主恩待in ê hit種恩典去對待對方。 當in tú tio̍h苦難ê時，in bē錯誤想講tsit个定tio̍h是in做啥物無好ê tāitsì來受tio̍h主ê處罰，ē不止á有確定ê根據來相信，無論是困苦á是刀劍，主一定有夠額ê恩典hō͘ in安然度過。

In對待別人，往往bē kantaⁿ用 “being nice”做標準，ē用疼人親像kakī ê真理做標準。因為in ê目的m̄是靠kakī ê好行踏來得tio̍h對方歸主，in to̍h ē真自由、無束縛來做到好、到真、到美ê物件施予別人，其中包括 “being nice, but also being truthful”（做好人，mā做誠實ê人）。

Hō͘人「做新人」ê基督教



Tsit種基督徒ê人生，是一種自然tùi心內發出ê，m̄是礙tī外在要求所產生ê性命──是新生ê性命，mā是全新ê性命，這to̍h是 “being new”（新造ê人）ê意思。

啥物tāitsì若是出tī心內慾望ê催逼，lóng是桌頂ni柑 koh是輕鬆ê擔（tàⁿ）。任何物件，若是基於外在ê要求，無論是人情ê要求、道德標準ê要求、社會文化ê要求、面子ê要求，á是宗教標準ê要求，lóng一定是沉重ê擔（tàⁿ）。 “Being new”是一種tùi內到外ê性命發射， “being nice”是一種注重外表、tùi外到內ê規範要求；前者是福音ê大能所「生」出來ê新性命，後者是宗教規範所「製造」出來ê好人，這乃是所有宗教ê特質，卻m̄是基督ê信仰。