《Kah陳小小做伙讀台語》

 | | | 轉寄

新聖殿觀

作者 陳小小，台譯：Lîm Tsùn Io̍k 2022.01.02

陳小小踏話頭：

耶穌帶來ê福音，帶來第二聖殿到第三聖殿ê轉變，hō͘偤太人極大ê衝擊。「上帝ê道理ná來ná興旺。Tī耶路撒冷，門徒ê人數加添真tsē，koh有真tsē祭司來信福音ê道理。」（使徒行傳6:7, 《全民台語聖經》http://ctb.fhl.net）上帝神聖ê臨在已經離開第二聖殿，因為耶穌透過聖神降臨，到第三聖殿。聖所無koh是一棟建築物，卻是一陣有聖神內住ê基督徒ê集合，真tsē第二聖殿ê祭司mā信從tsit个道，轉變成做第三聖殿ê祭司。

新聖殿觀

Hit時，各地偤太會堂ê菁英lóng出現，beh抵擋耶穌帶來ê新理論所造成ê影響，in kah極有影響力ê司提反辯論。M̄ koh，司提反充滿恩惠、能力，靠智慧kah聖神講話，tsiah个偤太ê智者紛紛落敗，只好買人來抹烏，講伊謗瀆摩西kah上帝ê話，而且做假見證指控伊：「Tsit个人講話，直直teh蹧躂聖所kah律法。阮bat聽見伊講，tsit个拿撒勒人耶穌beh毀壞tsit所在，mā beh改變摩西所交hō͘咱ê規例。」（使徒行傳6章8～14節）司提反被指控「蹧躂聖所」kah「伊講，tsit个拿撒勒人耶穌beh毀壞tsit所在」，to̍h是因為伊有宣講一種前到taⁿ m̄ bat聽過ê新聖殿觀。


M̄ koh，tsit種新觀念絕對m̄是司提反獨有，使徒彼得、保羅mā有宣講tsit種新聖殿觀：「Lín kám m̄知lín ê身軀to̍h是聖神ê殿？聖神tiàm tī lín內面，to̍h是lín tùi上帝所領受ê。Koh再講，lín m̄是屬ka-kī。」（哥林多前書6:19）「Kui個建築物靠基督來結合，互相接連，漸漸擴展，成做聖殿來獻hō͘主。」（以弗所書2:21）「Lín mā tio̍h做活石，來hō͘上帝起造屬靈ê殿，koh做聖潔ê祭司，通過耶穌基督，來獻上ē hō͘上帝歡喜ê屬靈祭物。」（彼得前書2:5）新聖殿觀kah傳統ê聖殿觀大無相仝，大多數ê偤太人kā新聖殿觀看做是對上帝聖所ê褻瀆。


M̄ koh，千百年後，「教會是第三聖殿、信徒是聖殿祭司」tsit个重要ê道理，因為基督徒無法度閱讀聖經、bē tàng閱讀聖經，漸漸淹滅tī歷史ê大水中。直到五百gōa年前，馬丁路德讀聖經ê時重新發見「信徒皆祭司」（Priesthood of All Believers）tsit个真理，就ánne對基督徒呼籲：「洗禮有關所有聖徒，hō͘咱ē tàng成做聖潔，成做祭司。」所有聖徒to̍h是ta̍k位信徒，lóng是：「照伊ê祭司ê職分，基督徒是kah上帝做伙運用祂ê權能，因為上帝是按照祂ê要求kah心意做tāitsì。」一切呼召lóng是上帝所歡喜接納ê，伊甚至講：「每一个鞋匠，lóng thang成做上帝ê祭司，只要伊一直堅守tī崗位頂面，to̍h是執行祭司ê職責。」

兩个差謬

基督徒若m̄知kakī是聖殿ê祭司，to̍h ē有兩大差謬。第一个差謬，基督徒想講教會事工是神職人員ê tāitsì，kakī kantaⁿ需要ta̍k主日定時到教會，啥物事工lóng無需要參與，坐tī台á kha輕鬆欣賞、享受牧者kah長執同工ê服事to̍h ē sái。M̄ koh，tńg來到聖經，聖殿祭司無一个是閒職，人人lóng tio̍h參與聖殿ê工作。所以，ta̍k个基督ê跟tòe者，應該tio̍h自發性參與教會事工，甚至是普世教會ê工作。第二个差謬，基督徒想講讀聖經是神職人員ê tāitsì，in kantaⁿ需要主日聽講道to̍h ē sái。M̄ koh，tńg來到聖經，聖殿祭司m̄ nā kantaⁿ ài負責保存律法冊（聖經），mā tio̍h有能力閱讀、傳講。


摩西五經ê申命記tī 17章記載，上帝早to̍h預見以色列人ē討厭祂做王，選立人王，所以事先對in講，若是未來in立人王，做王peh起lí國位，to̍h tio̍h tshōe祭司利未人借律法冊，為kakī抄錄一本，平生誦讀，thang好敬畏耶和華，免得心高氣傲，背離誡命。若tsit位君王ē tàng謹守遵行律法冊一切ê言語kah律例，伊kah伊ê kiáⁿ孫to̍h thang tī國位頂面年久月深。


Tùi tsia咱thang知影，聖經ê閱讀gōani̍h重要！上帝想講君王siōng重要ê tāitsì，to̍h是讀聖經。君王有讀聖經，遵行聖經一切ê言語kah律例，自然to̍h ē有治理國家ê智慧，上帝ē hō͘伊kah伊kiáⁿ孫ê國家長治久安。仝款，聖殿祭司除了進行聖殿日常ê庶務以外，iáu koh ài負責保存、閱讀、講解聖經。至少，in ài負責君王所需要ê ê聖經事宜。


明君之治

聖經對君王、國家ê重要性，實際發生tī約沙法王、約西亞王ê身tsiūⁿ。南國偤大約沙法kah聖經ê故事，記載tī歷代志下17章。伊一tsiūⁿ任，先堅固國防，安置軍兵、防兵tī偤大境內各城邑中，防備北國以色列人。續落來伊除掉一切異教ê祭壇kah偶像，m̄拜巴力，獨獨遵行耶和華ê誡命，上帝to̍h kah約沙法同在，堅定伊ê國。（歷代志下17章1～6節）


約沙法遵行耶和華ê道m̄是出tī勉強，卻是歡歡喜喜，心甘意願。伊感覺上帝ê話語真美好、真重要，kakī讀聖經無夠，iáu koh ài kā聖經分享hō͘全國頂下ê人民。伊做王第三年，差遣五位大臣，帶領九位利未人kah兩位祭司，一陣人帶耶和華ê律法冊，行遍偤大各城去宣講、教導人民。用現代ê話語來講，等於約沙法派出一个16人ê佈道團，到各種城市開聖經教室、查經班，人人聽聖經，人人照聖經ê教導來行（古早時代tsē文盲，聖經khah tsē是用聽ê，少數人tsiah有能力閱讀聖經）。


因為約沙法做tsiah个tāitsì，「上主hō͘偤大四箍圍ta̍k邦國真驚，m̄敢kah約沙法交戰。」（歷代志下17章10節）原文koh khah清楚表示：「對耶和華ê驚畏，臨到偤大四圍所有ê列國，in m̄敢kah約沙法相戰。」南國四kho͘ 圍ê國家，lóng知影tsit个國家獨尊耶和華，tsit个國家有耶和華，á in驚畏耶和華。


約沙法免費一兵一卒，無相thâi戰場、血流成河，to̍h得tio̍h真tsē貢品。強猛ê非利士人主動送約沙法禮物，而且繳納貢銀。阿拉伯人mā送來綿羊káng、山羊káng各7,700隻。用今á日ê價siàu換算，等於新台幣3億元。


全國tùi頂到下，人人lóng聽聖經，照聖經來行，偤大國漸漸強大。百業醒起來、大興土木，約沙法甚至iáu koh ài起造積貨ê城來屯積ta̍k項物產。Á伊tī首都耶路撒冷持有ê戰士，to̍h是大能ê勇士，to̍h有116萬人，這iáu未kā其他各地戰士算在內。


列祖之罪

南國偤大約西亞kah聖經ê故事，記載tī列王記下22～23章。伊八歲登基，to̍h行耶和華眼中看做是正義ê tāitsì，行伊ê祖Tabi̍t一切所行ê，無偏左右。伊做王第十八年ê時，差遣書記沙番進行聖殿ê修繕。過程中，大祭司tī聖殿內得tio̍h一卷律法冊，講hō͘書記知。沙番向約西亞稟明tsit項事，而且宣讀hit本冊hō͘王聽。


約西亞一聽冊頂面ê話，to̍h拆裂衫褲，因為伊ánne tsiah知tsìn前先祖列王亂tshòng，án怎惹上帝憤怒。In kā聖殿當做異教神明ê倉庫，內底khǹg為巴力、亞舍拉所造ê偶像，拜天頂萬象，甚至異教崇拜ê孌童、男娼mā tī聖殿內搭建厝宅。聖殿附近iáu有各式各種異教ê神壇，包括西頓人可惡ê女神亞斯她錄、摩押人可惡ê神基抹、亞捫人可惡ê神米勒公，iáu有日月行星、天頂萬象等等。


約西亞隨時差遣人召聚偤大眾人kah耶路撒冷ê居民，而且祭司、先知kah所有ê人民，無論大細，lóng做伙來到耶和華ê殿，了後約西亞to̍h kā耶和華殿裡所得tio̍h ê約冊唸hō͘ in聽。王khiā tī柱á邊，tī耶和華面前立約，beh盡心盡性來順從耶和華，遵守祂ê誡命、法度、律例，成就冊裡所記ê約言，眾民lóng服從tsit个約。續落來，約西亞to̍h全部清楚除去tsiah个神壇kah偶像，而且禁止異教ê邪惡活動，親像父母燒kiáⁿ兒獻hō͘神明。


M̄ koh，耶和華向偤大所發猛烈ê受氣iáu無suah，因為頭前諸王所行ê pháiⁿ tāitsì siuⁿ tsē、siuⁿ重。這kah久長以來祭司失職mā有關係，聖經竟然是tī聖殿修繕tsiah發見，原本君王一tsiūⁿ任，祭司to̍h應該kā它呈獻hō͘王，而且教導王關係冊裡一切ê tāitsì。


君尊ê祭司


聖經對君王、國家ê重要性，m̄ nā kantaⁿ tī約沙法、約西亞兩位王看tio̍h，歷世歷代mā lóng有見證無論是個人á是群體，只要尊敬上帝ê話語而且照ánne去行，to̍h ē有力量。


COVID-19疫情氾濫成災，天災人禍一直teh發生，一kóa基督徒被各種關係末日ê假講道、假消息tshòng kah kui工驚惶不安。事實上，根據聖經，末後ê日子早to̍h已經來到，到taⁿ已經將近兩千年。早tī五旬節聖神降臨to̍h phah開末世ê序幕，to̍h是先知約珥所講ê：「上帝講：Tī終末ê時日，我beh用我ê聖神降落去hō͘世間人。Lín ê後生，lín ê tsabó͘ kiáⁿ ē講預言，lín ê少年人ē看tio̍h異象， lín ê老人ē得tio̍h託夢。」（使徒行傳2:17）



M̄管世界koh再án怎怪奇多變，基督徒只要扎根tèng根tī聖經，知影所信ê上帝極其偉大，祂創造宇宙萬物，掌握控制時間kah空間，koh知影kakī持有何等尊貴ê聖殿祭司職分kah任務，to̍h bē致使被愚弄來搖動。耶和華當時án怎kah約沙法同在，án怎堅定伊ê國，仝款，耶和華to̍h ē án怎kah咱同在，堅固咱。咱koh一pái來kā kakī講，你我lóng是受揀選ê族類，是有君尊ê祭司，是聖潔ê國度，是屬上帝ê子民，beh去宣揚hit个召咱出烏暗入奇妙光明ê美德！