《Kah陳小小做伙讀台語》

 | | | 轉寄

家庭ê主要目的是榮光上帝

作者 彭彥華，台譯：Lîm Tsùn Io̍k 2021.09.05

陳小小踏話頭：Ta̍k對翁ábó͘ lóng ē有意見bē合，甚至口角、衝突、冷戰，阮mā無例外。

M̄koh，三十gōa年落來，阮成做對方siōng重要ê安慰kah扶持，做伙克服、面對人生算bē清ê風雨，mā做伙享受辛勞ê成果。

信望愛主打文〈家庭ê主要目的是榮光上帝〉是真重要ê方向提醒，我實際ê婚姻經驗mā ná親像ánne ê感受。我想講家庭ê主要目的若kantaⁿ是teh追求兩人ê好處，往往到siōng尾，ē變成追求一己ê好處，顛倒彼此棄嫌對方做kah無夠tsē、無夠好。



若兩人是追求上帝ê國kah祂ê義，顛倒彼此欣賞對方，是án怎伊ētàng做kah tsiahni̍h tsē、tsiahni̍h 好？是án怎伊ētàng做kah比我khah tsē、比我khah好？

【家庭ê主要目的是榮光上帝】 文/彭彥華 家庭對每一个人lóng影響真大，一个和諧kah整齊koh sùsī ê家庭，是ta̍k个家庭成員ê樂園；一个充滿混亂kah冤家ê家庭，就ánne kiámtshái是ta̍k个家庭成員ê地獄。所以，咱來kah敬虔ê清教徒學習，看māi in tùi聖經歸納出án怎ê家庭觀，以及in實際上án怎處理家庭ê事務。

清教徒對家庭ê觀點，是根據「家庭ê目的」發展出來ê。一屑á都無意外，in想講家庭ê主要目的是beh榮光上帝。有一位清教徒講：「Ta̍k位基督徒應該盡力彰顯上帝ê榮光，一个有真好秩序ê家庭，ē對上帝ê國度帶來真大ê好處。」

清教徒相信家庭制度是上帝親自設立ê，家庭m̄是人類墮落ê產物，上帝tī起初創造ê時，並m̄是kantaⁿ創造一个人，卻是：「照kakī ê形像造人，乃是照祂ê形像造男造女。」而且ài人類：「Tio̍h生湠真tsē，充滿tī地上。」（創世記1章27～28節）這表明婚姻kah親子關係（to̍h是家庭）是上帝起初ê心意，上帝beh透過家庭來榮光祂kakī。

榮光上帝tsitê目的，ē引tshōa一家成做屬靈ê家庭，卻m̄是屬世ê家庭，而且ē決定家庭ê大細事務，包括án怎運用時間kah金錢。

清教徒相信家庭是敬虔社會ê基本單元，in想講：「家庭án怎，社會kah教會mā定tio̍h án怎。」
「家庭是社會ê真實縮影，若家庭得tio̍h適當ê治理，社會to̍h凡事順利。」清教徒想講，社會ê本質kah道德取決tī gín'á tī厝裡裡學tio̍h啥物，á是無學tio̍h啥物。Cotton Mather講：

「有秩序真好ê家庭，其它團體自然ē產生真好ê秩序。當家庭無真好紀律ê時，其它團體ê紀律mā ē真慘。」

清教徒並無忽略家庭ê另外一个目的，to̍h是為tio̍h beh hō͘ ta̍k个家庭成員得tio̍h滿足。HenrySmith想講，婚姻ê其中一个目的是「避免孤獨無爽快」，上帝設立婚姻kah家庭，「是為tio̍h beh hō͘咱tī今生tútio̍h算bē清ê困難中，thang透過互相安慰、扶持來克服tsiahê困難。」簡單來講，家庭ê路用是啥物？Robert Clifford講：「家庭親像一个細細ê國家，若是治理kah真好勢，to̍h ētàng hō͘上帝ê榮光得tio̍h koh khah tsē彰顯，而且hō͘真tsē家庭得tio̍h好處，iáu ē hō͘家庭成員過sùsī爽快kah滿足ê日子。」