《Kah陳小小做伙讀台語》

 | | | 轉寄

你koh khah ài談論衪ê聖潔， á是祂ê慈愛？

作者 Virginia Yip，台譯：Lîm Tsùn Io̍k 2021.09.12

陳小小踏話頭：我信耶穌三十gōa年，聽過人講教會問題出tī無疼心，教會總是ài講罪、ài定別人ê罪。Mā聽過人講教會ê問題是有siuⁿ tsē掛名ê基督徒，所信ê lóng是sio̍k價ê福音，信主後m̄讀經、m̄祈禱、m̄奉獻、m̄服事。親像信望愛tsit篇主打文寫ê。

兩pêng講ê lóng總無m̄tio̍h。上帝是聖潔ê，信ê人mā tio̍h聖潔。上帝是疼，信ê人mā tio̍h彼此相疼。Tsiahê評論了kui半工，往往to̍h是jú看教會jú討厭，kui氣換教會，á是就ánne m̄去教會。

M̄koh tòeleh年紀增長，jú感覺教會本來to̍h是一陣蒙恩ê罪人ê組合。眾罪人lóng iáu teh成長進步，行成聖ê路上，本來隨便to̍h ētàng被檢討出一大堆一籠á ê問題。

就ánne我jú歡喜做ê，to̍h是檢討kakī。是m̄是tī人生ê引誘試探中，靠主來選擇聖潔？活出聖潔？Tī人生ê各種衝突關係中，靠主來取得疼ê力量？Ta̍k工歡歡喜喜來感謝上帝ê恩典，因為有祂，hō͘我tī成長進步成聖ê路裡，享受福音ê力量。

【你koh khah ài談論衪ê聖潔， á是祂ê慈愛？】文/Virginia Yip

The real gospel gives us a God far more holy than a moralist can bear and far more loving than a relativist can imagine. —Timothy Keller

真正ê福音，咱看tio̍h ê是一位聖潔ê上帝，á衪ê聖潔大大超過道德主義者所ētàng承受ê；mā看tio̍h一位慈愛ê上帝，á祂ê慈愛大大超過相對主義者所ētàng想像ētio̍h。—Timothy Keller

「M̄ koh，上帝有顯明祂對咱ê疼，咱iáu是罪人ê時，基督有替咱死。」（《全民台語聖經》）羅馬書五章8節tsit段經文，thang講是福音派基督徒siōng熟sāi ê經節之一，m̄koh有tang時á，咱對jú熟sāi ê經文顛倒jú少用心思去詳細思考。

#兩派福音

Timothy Keller tsit句話to̍h是對tsit節經文徹底ê詳細說明。今á日猶原願意承認kakī是福音派ê華人教會中，充滿兩派ê人，一派人想講今á日教會ê問題出tī無疼心，教會總是ài講罪、ài定別人ê罪，基督徒kui工面àu tu̍htu̍h，一屑á都無喜樂，欠缺恩典……，á解決ê方法to̍h是beh強調「福音」。若你問in福音是啥物？In往往ē回答：福音to̍h是上帝疼世間人，kā耶穌基督賜hō͘咱，基督拯救咱，照咱ê本相來接納咱。所以，咱既然lóng是蒙恩ê人，to̍h m̄thang彼此批評論斷，tio̍h彼此相疼tsiah是。

另外一派ê人就ánne想講，今á日教會ê問題是有siuⁿ tsē掛名ê基督徒，in所信ê lóng是sio̍k價ê福音，信主後m̄讀經、m̄祈禱、m̄奉獻、m̄服事、無參加團契，主日崇拜iáu tiāⁿtiāⁿ遲到早退，生活mā無見證，kha̍p bētio̍h to̍h發怨言……，á解決ê方法to̍h是ài強調「福音」。若你問in福音是啥物？In往往ē回答：福音to̍h是世間人lóng犯罪，虧缺上帝ê榮光，á上帝是公義ê、是聖潔ê，祂定tio̍h beh審判罪人。人只有接受耶穌基督做救主kah性命ê主，tsiah ētàng bē滅亡，反tńg得tio̍h永生。所以，咱信主ê人， tio̍h過聖潔ê生活，凡若m̄ giâ起kakī ê十字架來跟tòe主ê人，to̍h m̄是真正ê基督徒。

一下看起來，兩派所講ê lóng真有道理，真符合聖經，m̄koh神學性ê問題往往to̍h是出tī tsia──m̄是在tī你講ê是啥物，á是在tī你無講啥物。J. I. Packer bat講過一話句，真少有異端是公然反對某一項正統ê教義，異端往往lóng是單一、片面、選擇性來強調某一項á是幾項正統ê教義，來thiau故意忽略其它方面ê教義。

Tsit點，相信大家lóng真清楚à。M̄koh tī tsia，咱發見Keller並m̄是用一種平衡左右 ê方法來糾正tsit兩派人ê錯誤，卻是用一種「用他人ê矛攻他ê人ê盾」ê方式來kā左右兩派ê人講，in其實lóng無正確認bat福音。

#兩个矛盾

道德主義者ê問題是啥物？M̄是in強調上帝ê聖潔，卻是在tī in潛意識裡總感覺人ētàng做好，人ê敬虔ētàng hō͘聖潔ê上帝滿意。你若是追問in是m̄是真正啥物lóng做夠額à，是m̄是真正想講kakī ētàng滿足上帝聖潔ê標準，in kiámtshái ē承認in做kah無夠好。M̄koh，in往往ē想講kakī起碼是盡力teh做好，這比hiahê「屬世、屬肉體ê、掛名ê」基督徒khah好真tsē。換句話來講，上帝起碼ē看重in ê「心」。當然，當一个人ê行為做bē到ê時，伊有意願總算是好！

這to̍h是道德主義者、律法主義者kah敬虔派khau洗ê所在à。In本來是siōng強調上帝至koân無上ê聖潔標準，m̄koh teh實踐信仰ê時，koh不得不kā上帝聖潔ê標準降到in ētàng達到ê位置。對tsiahê人，Keller講：「Lín kám想講強調上帝ê聖潔to̍h是解救ê方法？上帝ê聖潔大大超過lín想像ê ánne，世tsiūⁿ kantaⁿ有一个人ētàng滿足上帝聖潔ê要求，he to̍h是基督。所以，若lín想講蒙基督ê拯救了後，iáu koh ài靠tio̍h lín個人ê敬虔來蒙歡喜接納（tio̍h講是靠一粒有心ê『心』mā好），ánne lín iáu是bē明白福音ê人。」

無ài講罪，kantaⁿ講疼心、反對批評論斷ê人，tsiahê人最後淪做相對主義者。In ê問題是啥物？M̄是在tī in強調上帝ê疼，卻是在tī in ê觀念中，上帝疼人是應當ê。祂kám是上帝，咱人lóng是無完美ê，既然「疼」是上帝ê屬性，ánne tsit位完美koh有疼心ê上帝疼人類，kám m̄是一件真自然ê tāitsì？既然連上帝mā意愛疼咱tsiahê無完美ê人，ánne咱siōng好mā m̄thang彼此批評論斷，應該用疼心來互相包容lah！

這to̍h是相對主義者siōng khau洗ê所在。In本來是siōng講疼kah包容ê，in聲聲句句tio̍h疼、tio̍h會接納、tio̍h包容所有ê罪人，m̄koh，in對hiahê反對in tsit種觀點、hiahê堅持真理、責備罪惡ê人，卻是一屑á都bētàng容忍。

對tsiahê人，Keller講：「Lín kám想講強調上帝ê疼to̍h是解救ê方法？Lín根本bē明白上帝ê疼究竟有gōa深！Lín所理解上帝ê疼，是基於上帝本性ê疼，是一種天然ê行動。M̄koh ，lín遠遠看bētio̍h，上帝為tio̍h疼罪人，祂有做出gōa大ê犧牲！祂ê疼是tī咱iáu做罪人ê時，叫祂ê獨生kiáⁿ為咱死tsit項tāitsì頂面顯明出來。上帝是tsit款恨罪惡，為tio̍h解決罪惡，祂有付出hiahni̍h沉重ê代價，á lín tsitmá既然是上帝所疼ê人，卻hiahni̍h輕視上帝為tio̍h疼lín所做出犧牲ê疼，可見你iáu是bē明白福音ê人。」