《Kah陳小小做伙讀台語》

 | | | 轉寄

Siōng「趕」人ê講道

作者 陳小小，台譯：Lîm Tsùn Io̍k 2022.05.22

陳小小踏話頭：

Tī神學院裡，幾个學生當面稱呼我是siōng感動人ê老師，siōng ē曉講感動人ê故事。我聽kah嘴角掩藏bē tiâu驕傲ê微微á笑，in卻笑笑á講此「趕」非彼「感」──陳老師是siōng「趕」人ê老師，siōng ē曉講「趕」人ê故事。

想想leh，kahná真正是ánne。Ta̍k pái歇睏時間，師生做伙講sńg笑，想beh結束都無法度suah ê時，卻真正是我講趕人ê話：「差不多à，大家各自去做正事loh。」

我反省kakī tī khangkhòe場kah網路互動mā是ánne，大多數ê對話是我做結束：「Mài浪費你ê時間，做你去無閒，bye。」我的確是「趕」人ê老師。

天降ê靈糧

M̄ koh耶穌tsiah是siōng「趕」人ê老師！祂比我koh khah ē曉講「趕」人ê故事。祂總是「我實實在在kā lín講」，講了真理之道，tiāⁿtiāⁿ致使聽眾大起議論，耶穌m̄驚有人聽了to̍h離開。


耶穌bat行一个神跡，萬人跟tòe祂；了後講一篇真理之道，萬人離開祂。Siōng尾，耶穌iáu問kakī siōng核心基本盤ê十二門徒：「Lín kám mā tio̍h離開？」


Hit場吸引萬人跟tòe祂ê神跡，to̍h是hō͘五千人食飽ê「五餅二魚」神跡；四本福音書lóng有收錄。咱tio̍h知，四福音lóng有記載ê神跡kantaⁿ tsitê；另外一个是耶穌tùi死人中koh活ê神跡，可見tsitê神跡是何等重要。講tio̍h我是án怎講tsitê神跡吸引萬人跟tòe祂，kám m̄是五千人？m̄是我數學無好，卻是hit五千人是tsapo͘人，若是kā tsabó͘人kah gín’á lóng算入去，總人數to̍h超過萬人以上。


咱來注意，耶穌tī五餅二魚神跡了後ê hit篇「趕」人ê講道，kantaⁿ記載tī約翰福音。耶穌講：「我實在kā lín講，lín tsiahê人tshōe我，是因為食餅食到飽，m̄是因為看tio̍h神跡。M̄ thang為tio̍h ē敗壞ê食物來勞苦，tio̍h為久長tī leh ê永遠活命ê食物來phah拚，to̍h是人子beh hō͘ lín ê，因為天父上帝已經kā祂蓋印認定。」（《全民台語聖經》約翰福音6:26-27）


眾人kanta giàn期待耶穌重現出埃及記裡摩西tùi天降落嗎哪ê神跡，mā期待耶穌不斷hō͘萬人食飽ê五餅二魚神跡，m̄ koh耶穌kā眾人講，嗎哪kah餅魚lóng是ē變臭、pháiⁿ去ê食物，請in kā目神khǹg tī另外一个種koh khah重要ê食物頂面，he是ē tàng存到永生ê食物，tio̍h為tsit種食物來勞力。眾人to̍h問耶穌：「阮beh完成上帝ê工作應該tio̍h án怎來做？」 29 耶穌應講：「信上帝所差來ê，這to̍h是做上帝ê工。」（約6:28-29）


Tsit四節重複出現希臘文ἐργάζομαι，意思是「工作、投資、做、努力」，出現tī「tio̍h為tsit種食物來『勞力』以及「這to̍h是『做』上帝ê工」。用21世紀ê現代語言來描述，to̍h是耶穌ài大家投資永生ê食物；眾人就ánne請教投資之道是án怎？M̄ koh，耶穌講出祂kakī to̍h是hitê投資目標—永生ê食物；大家to̍h無想beh投資，suah一个一个離開。Á耶穌講ê永生ê食物投資之道to̍h是「信上帝所差來ê（耶穌）」，就ánne無人tshap祂à。

永生ê食物


耶穌一直講kakī to̍h是永生ê食物，「我是活命ê餅。來我tsia ê人絕對bē iau，信我ê人永遠bē嘴乾。」（約翰福音6:35）「我to̍h是活命ê餅。」（約翰福音6:48）「我to̍h是tùi天降落hitê活ê餅，人若食tsitê餅to̍h ē永遠活leh。我所beh hō͘人ê餅to̍h是我ê肉，是為tio̍h beh hō͘世間有活命來獻ê。」（約翰福音6:51）

聽眾已經彼此爭論講：「Tsitê人ná ē用祂ê肉hō͘咱食？」 耶穌對in講：「我實在kā lín講，lín若無食人子ê肉，無lim祂ê血，lín ê內面to̍h無活命。食我ê肉，lim我ê血ê人，有永遠ê活命，tī末日，我ē hō͘伊koh活。我ê肉是真實ê食物，我ê血是真實ê飲料。食我ê肉，lim我ê血ê人，伊tiàm tī我內面，我mā tiàm tī伊內面。」（約翰福音6:52-56）因五餅二魚ê神跡phah算beh加入耶穌陣容ê人，聽tsit篇講道了後to̍h離開，門徒中真tsē人聽見mā表示：「Tsiahê話真困難明白koh鑿耳，啥人聽ē落去？」人mā ánne來行離開。


Tùi真ka'ia̍h到門可羅雀，耶穌bē擔心，mā無teh驚。耶穌對hit十二門徒講：「Lín mā beh離開，是無？」西門•彼得回答講：「主ah，祢有永遠活命ê話，阮tio̍h koh去tòe啥人？阮已經信，koh確實知祢是上帝ê聖ê。」（約翰福音6:61-69）


彼得ê話，咱來重新對焦，tńg來到永生ê食物投資ê講法：「信」上帝所差來ê，to̍h是「信」耶穌。Πιστεύω「信」，m̄ kantaⁿ是理性上ê「相信」，koh khah有行動上ê「忠信」ê意思。偤太人講「信」上帝，to̍h是除祂以外，無別ê上帝。忠心跟tòe耶穌到底，人子to̍h ài賞賜永生ê食物，á祂本身to̍h是永生ê食物。


Ta̍k pái聖餐禮，基督徒領主餐，to̍h是teh lim食耶穌。祂ê肉真正是thang食ê，祂ê血真正是thang lim ê。食耶穌ê肉、lim耶穌ê血ê人不時tī祂內面，祂mā不時tī食伊、lim伊ê人內面。


Siōng尾，現代教會強調教會ê增長，用各種ê方式吸引人，m̄ koh mā tio̍h tńg去到聖經，來反省約翰福音第六章所記載耶穌ê tsit篇siōng「趕」人ê講道。傳講信息ê人是m̄是ē tàng順從聖靈來講道，kám m̄驚萬人ê教ē hō͘真理之道舞kah tshun十二个人？