《Kah陳小小做伙讀台語》

 | | | 轉寄

跟tòe者siōng重要ê tāitsì

作者 陳小小，台譯：Lîm Tsùn Io̍k 2022.06.12

跟tòe者siōng重要ê tāitsì

陳鳳翔

華人ê宗教文化背景，teh讀聖經ê時，容易無自覺使用宗教語錄ê方式，kā經文切做一小段一小段，甚至一小節一小節閱讀。M̄ koh ánne ê讀經方式ē tiāⁿ失作者精彩鋪陳ê內蘊主軸。以馬可福音ê三明治寫作筆法，一定tio̍h三段做伙讀。三明治頂下兩片是吐司，中間是歐姆卵kah肉片，讀者tio̍h一嘴咬落去，tsiah ē tàng感受tio̍h酥香koh脆ê吐司片來反映出歐姆卵kah肉片ê銷魂好味。

馬可福音10章1-31節，通常分做三段故事。(1)耶穌教導翁ábó͘兩人成做一體，bē tàng離婚。(2) beh進入上帝ê國度，tio̍h親像gín'á。(3)有德、有錢、有權ê少年人，無法度進入上帝ê國度。M̄ koh tshng過三段故事ê背後主軸強調人kah人、人kah上帝之間疼ê關係ê重要！

兩人一體

第一段常常hông切出來做律法教導，警戒基督徒bē tàng離婚。M̄ koh，耶穌m̄是律法主義者，用離婚來定人罪；耶穌mā絕對m̄是是反律法主義者，離婚無所謂。耶穌道成肉身來，為tio̍h beh幫贊罪人成全律法，祂beh幫贊翁ábó͘有能力來復原破碎ê疼。離婚本來to̍h是不幸，翁ábó͘若無tú tio̍h痛苦，bē選擇離異。耶穌ê「bē tàng離婚」ê理由指向「兩人成做一體」。人間有「兩人一體」，天頂有「三位一體」，tsapo͘人、tsabó͘人lóng是照上帝ê形象所造，「兩人一體」是teh反映「三位一體」上帝之間親密ê關係。

「兩人一體」之美，可見tī男女相疼之初，你人我人，天造地設，充滿默契。建立婚姻盟約是hō͘「兩人一體」關係直到死亡為止，一生共同面對人生各種遭遇，tio̍h算意見無仝，卻ē tàng彼此欣賞、接納，彼此尊榮、互相服事。「兩人一體」tī無盡頭ê歡喜中間。M̄ koh人人lóng是罪人，自我中心，加上私慾kah罪（貪婪、pîntōaⁿ、驕傲、淫亂…），「兩人一體」關係ê經營無容易。

耶穌ê「bē tàng離婚」，是因為tī上帝眼中，疼ê關係koh khah贏過一切。M̄ koh，翁ábó͘ tú tio̍h婚姻破裂，世俗角度往往考量重點在tī得tio̍h siōng tsē ê賠償金，khah少去設法修補關係。M̄ koh gín'á kah上帝ê角度仝款，in致意ê是父母關係復合。In ē想講阿爸阿母應該彼此坦誠，道歉認m̄ tio̍h，來解決衝突kah爭執，盡力和解、修復關係。

跟tòe耶穌

續落來第三段，一位少年官請教耶穌：「良善ê老師，我該做啥物才能夠得tio̍h永遠ê性命？」耶穌回答：「除了上帝一位以外，koh再無良善ê。」耶穌向伊披露「我是良善ê，我是上帝」驚人事實。

續落來耶穌問伊以下tsiahê誡命是m̄是遵守：「bē tàng thâi人；m̄ thang姦淫；bē tàng偷the̍h；bē tàng做假證；bē tàng欺詐；tio̍h孝敬父母。」tsiahê lóng是人kah人之間疼ê關係。真tsán，tsitê少年人lóng總有做到，m̄ koh伊kah上帝之間疼ê關係又koh是án怎？耶穌知影tsitê少年人ê問題，祂講：「你iáu欠缺一件：去變賣你所有ê，pun hō͘ sàntshiah人，to̍h一定有財寶tī天頂；你tsiah來跟tòe我。」Tsitê少年人欠缺ê是kah上帝之間疼ê關係。耶穌hō͘伊跟tòe ê機會，m̄ koh伊因為錢財，放棄tsitê機會。M̄ koh，「永遠」、「進入上帝ê國度」，to̍h是kah上帝有永遠ê疼ê關係。所以耶穌禁bē tiâu吐大氣：「有錢財ê人進上帝ê國度是何等ê困難！」

恩典ê上帝

馬可福音ê三明治，khǹg tī十二門徒ê頭前，彼得對耶穌講：「看ah，阮已經放下所有來跟tòe祢à。」表示in ta̍k个lóng比hit位少年官khah聰明，lóng選擇跟tòe耶穌，選擇siōng好ê福分：kah上帝之間tio̍h有疼ê關係。M̄ koh，kám真正是ánne？

馬可福音10章32-45節，指出彼得等人放下所有ê跟tòe耶穌，圖謀ê m̄是疼ê關係，圖謀ê是彌賽亞進入耶路撒冷，ē得tio̍h ê權力、財富kah榮光。雅各、約翰請求耶穌：「賜阮tī你ê榮光裡，一个坐tī你正pêng，一个坐tī你tòpêng。」其餘十个門徒聽見，就ánne激心雅各、約翰。

馬可福音ê三明治，khǹg tī每一代ê跟tòe者面前，tsit時khǹg tī你我ê面前。咱ài ê是上帝ê恩典，á是恩典ê上帝？

Kui个基督信仰，其實一直teh談疼ê關係贏過一切。馬可福音10章koh再繼續閱讀，耶穌被問：「誡命中tó是第一要緊？」耶穌回答講：「第一要緊ê to̍h是：盡心、盡性、盡意、盡力疼主─你ê上帝；其次to̍h是疼人親像kakī。」

當跟tòe者ài ê是恩典ê上帝，卻m̄是親像十二門徒原來出tī私心ài ê是上帝ê恩典，tsiah ē tàng jú來jú知影啥物是疼，mā用這來真誠疼周圍ê人。若無，一切疼ê關係kantaⁿ ē是權力、財富、榮光算計ê考量。