《Kah陳小小做伙讀台語》

 | | | 轉寄

帶有兩約延續性ê舊約神學

作者 陳小小，台譯：Lîm Tsùn Io̍k 2022.12.18

帶有兩約延續性ê舊約神學

陳鳳翔

無仝語言之間，本身to̍h存在「bē tàng翻譯性」（untranslatability），翻譯一定造成某種程度ê意義流失，特別是tú tio̍h雙關語，通常kantaⁿ ē tàng二選一，á是tī後面加括號說明。Á聖經翻譯ê困難to̍h是tio̍h tī有限ê經節字句中，想beh表現跨(khòa)文化可能ē有ê海量ê含義，m̄ koh教學現場to̍h無tsit種侷（kio̍k）限，thang用真tsē角度ê詮釋來詳細說明它ê意思。

M̄ koh聖經ê研究，tiāⁿtiāⁿ容易忽略舊約希伯來文聖經kah新約希臘文聖經之間mā有tàu陣跨語言ê問題。我tī神學院教授新約聖經kah希臘文，不時tio̍h tshōa學生回溯（sok）舊約聖經kah希伯來文。親像看起來kahná簡單ê「悔改」，希臘文μετανοέω ê意思偏向當事人感覺自責、悔悟，m̄ koh，新約聖經承載ê是使用希伯來文ê以色列人ê思想，因為ánne，「悔改」是teh對應希伯來文ê「迴轉」שׁוּב。後者m̄ kantaⁿ是停留tī心理層面，á一定tio̍h接有具體ê「迴轉」動作—當事人原本行tī錯誤ê道路，轉向正確ê道路繼續行，所以是包含連續行為ê詞。

Án怎hō͘學生實際了解「悔改」kah「迴轉」ê差別，我總是用路加福音15章浪子故事做例。浪費一切財產ê細kiáⁿ，落魄到去幫人飼豬，連餓到想beh食phun，mā無人hō͘伊。Tsit時伊想起in老父，醒悟過來。希臘文á是華語「悔改」大概kantaⁿ ē tàng講tio̍h心思意念ê改變，m̄ koh細kiáⁿ起來，往in老父hia去，這續接ê行動to̍h是「迴轉」ê真理。

tńg來舊約tshōe根源

Beh明白新約聖經，to̍h tio̍h tńg來到舊約聖經tshōe根源。就ánne，我tùi新約神碩，行到舊約神博ê路裡，tshōe tio̍h兩約ê延續性，hitê宏觀ê記事hō͘人驚kah phi̍hphi̍h tshuah。Á舊約學者葛丁桂（John Goldingay）ê《21世紀舊約神學：tùi歷史kah記事描繪以色列ê福音》（Old Testament Theology: Israel's Gospel），伊ê冊中to̍h tiāⁿtiāⁿ詳細說明兩約ê延續性，針對真tsē基礎ê、咱人自認為bat ê概念，深入拆破分析，而且舉出鮮活ê例證。

葛丁桂ê文字功力超越眾人，用講聖經故事ê方式講述深奧ê神學理論，hō͘一般讀者mā容易理解。用詩篇33篇5節做例，「伊喜愛仁義公平；滿四kè充滿耶和華ê慈愛。」咱認為kakī bat啥物是「仁義公平」（צְדָקָה וּמִשְׁפָּט）、「慈愛」（חֶסֶד）；m̄ koh 多譯本並列閱讀ê時，前者另翻譯做「公義公正」、「正義公理」，á「慈愛」ê譯詞有「堅愛」、「信實」，意涵tsing差非常大，hō͘讀者難免ē giâu疑。葛丁桂幫贊讀者理解צְדָקָה，是一个人本tī kakī kah他者ê關係所做出ê正確行動。伊舉以賽亞書51章做例，上主hō͘人民tùi受掠中得tio̍htháu放，kah「公義」á是「公平」完全無關係，因為棄sak上主ê以色列不配得tio̍h啥物好。上主צְדָקָה ê舉動，是因為祂忠於kakī ê應允，beh實踐對以色列ê責任，tsitê字ê意義koh khah óa近tī「忠誠」。講tio̍h מִשְׁפָּט一詞，就ánne kah治理者有關。兩个字合做伙來描述上主，表示祂忠於kakī ê應允，祂是一位好ê治理者。

Á華語「慈愛」个意思是長輩對後輩ê疼，m̄ koh，חֶסֶד談ê是極特別ê委身：（1）形容一个人決定beh去做一件無義務做ê tāitsì，親像喇合保護以色列ê報馬á；（2）形容一个人決定beh連續去做應當做ê tāitsì，tio̍h算代價真大，tio̍h算享受權利ê另外一方早to̍h喪失資格，mā bē改變祂ê決志，親像以色列總是悖逆，m̄ koh耶和華決定beh疼in到底。

tī新約tshōe答案

真有意思，葛丁桂可能因為本冊是舊約神學，詳細說明詩篇33篇5節「慈愛」hit段ê siōng尾，指出חֶסֶד是kah希臘文ἀγάπη相對應ê字，kahná是留hō͘讀者新約ê功課。Tsia thang應用tī耶穌三pái問彼得「你kám疼我？」ê難題。

約翰福音21章，tiāⁿtiāⁿ看tio̍h使用希臘文兩種疼—ἀγαπάω kah φιλέω來詮釋。耶穌前兩pái lóng用ἀγαπάω來問彼得，彼得lóng用φιλέω來回應。耶穌第三pái問to̍h無koh用ἀγαπάω[聖潔á是神聖ê疼、上主ê疼]來為難彼得，接受彼得kantaⁿ ē tàng用φιλέω[人ê疼]來疼祂。M̄ koh問題是， ἀγαπάω mā用tī底馬貪戀世間，聖潔神聖ê疼並無想像其中hiahni̍h神聖，天父疼耶穌mā用φιλέω，粗俗人ê疼mā無想像中hiahni̍h 粗俗。

耶穌kah彼得ê對話，m̄是使用希臘文，tsia應該tio̍h回溯（sok）到希伯來文，耶穌三pái問彼得koh khah可能是用חֶסֶד：意思是「你是m̄是決定beh疼我到底？」kah聖潔á是神聖ê疼ê意義無關係，重點在tī委身。牧者一定tio̍h有親像耶穌仝款委身ê疼，就ánne耶穌tńg來kā彼得講：「你養飼我ê羊。」耶穌kah彼得對話，另外一个對應φιλέω ê疼可能是אָהַב。葛丁桂指出אָהַב，m̄ kantaⁿ是表達溫暖ê感覺，伊ê語意koh khah óa近實際ê應允。

Siōng尾，一kóa教會因為對「律法」兩字ê誤解，致使舊約聖經無得tio̍h正確ê對待。失去舊約記事ê新約，真容易滲入傳統文化kah自我對宗教ê想像。葛丁桂提起：「我mā無kā舊約看做是律法，然後迎來福音。舊約信仰ê動態kah新約是真類似。Tī新舊兩約，上主lóng是tī恩典中行向一陣完全不配ê子民。」

Tsit本舊約神學詳細說明前後兩約ê延續性，ē tàng帶hō͘讀者對信仰要義ê認bat，而且hō͘讀者閱讀享受驚奇kah讚嘆ê喜樂，以及實際應用tī舊約跨新約、新約跨舊約ê聖經ê研究上。



《21世紀舊約神學：tùi歷史kah記事描繪以色列ê福音》
Old Testament Theology: Israel's Gospel

作者：葛丁桂（John Goldingay）

譯者：譚達峰、bat有信、倪宏坤

出版社：校園冊房出版社