《Kah陳小小做伙讀台語》

 | | | 轉寄

上帝ê創造

作者 陳小小，台譯：Lîm Tsùn Io̍k 2023.02.05





《創世記》是一部連非基督徒lóng略á知一二ê聖經冊卷。上主創造世界、創造亞當、夏娃；伊ê創世故事帶來siōng tsē ê紛爭、歧見kah看輕，因為kah現代科學ê「宇宙大爆炸」（Big-Bang）bē合。網路ê「維基百科」koh再án怎設法簡述大爆炸論，卻mā用tsiâⁿ萬字ê篇幅，讀者「燒腦」看tio̍h siōng尾，tsitê二十一世紀獨有kah久長人類歷史中真tsē創世故事lóng bē合ê科學家創世故事，仝款是khiā tī真tsē無法度驗證ê假說。咱人大部分認為科學是幾分證據講幾分話，m̄ koh事實上，科學家mā lóng知影而且承認bē少科學理論是建立tī未經過驗證ê假說Tâibûn。Thang講，科學其實mā是一種信仰。

世界各地ê老古早民族流傳無仝版本ê創世信仰。華人ê創世故事，天地kah萬物是盤古死後ê身軀kah器官所化成；印度ê創世故事，天地由一神創造，梵天用kakī ê身軀造出四種階級無仝ê人，siōng底層ê人tio̍h服侍頂面三層ê人。韓國ê創世故事是兩个神鬥爭戰死了後，伊ê身軀kah器官化做山川田野。以色列人先祖亞伯拉罕ê故鄉—美索不達米亞，考古發見古早時代近東ê創世信仰《以利瑪以利斯史詩》（Enuma Elish）、《亞楚哈西施》（Atrahasis）。前者ê創世mā是來自眾神鬥爭，人類是由神ê血kah土糜所造成；後者suah講人類被造ê目的是代替hit kóa無停罷工ê kē階神，因為kē階ê神tio̍h服侍高階ê神。

無論是現代科學ê創世故事á是老古早民族ê創世故事，世界被造lóng出tī無目的、隨機亂算，á是眾神戰鬥。人類被造ê目的，是為tio̍h beh服事階級高等ê神 á是人。Tsiahê神kah人lóng無倫理道德，無好pháiⁿ á是善惡，m̄ koh聖經ê創世故事完全無仝！創世記一到二章，創造宇宙萬物ê耶和華上帝分別「好pháiⁿ á是善惡」（טוֹב וָרָע）；祂創造ê時，lóng是創造好ê、善ê（טוֹב）。世界kah人類ê被造是好ê，是有意義ê，是祂一步一步按照次序ê計畫來展現。祂透過「講」來創造，每完成一个創造段落，後面to̍h tòe teh講「上帝看tio̍h是好ê」。親像，創一章9-10節：「上帝講：『天下ê水tio̍h會聚tī一个所在，hō͘旱地露出來。』Tāitsì就ánne成à。上帝稱旱地做「地」，稱水ê聚集所在做「海」。「上帝看tio̍h是好ê。」第一章內面總共有七處tsit種ê話句（一章4、10、12、18、21、25、31節）。

耶和華創造偉大工程「好」ê巔峰是人類被造（一章27節）。互相比較tī其它受造，人類是「好」kah無tè比，因為人類是照上主ê形像kah樣式（בְּצַלְמֵנוּ כִּדְמוּתֵנוּ）所造！人類性命反映出上主ê本質，男kah女lóng是根據上主ê形像kah樣式所造。其它創世故事，人類被造ê目的是悲慘ê，是做眾神ê苦力。聖經內面，人類tio̍h ē工作，m̄ koh m̄是服苦役，因為耶和華「講有，to̍h有；命令khiā起來，to̍h khiā起來」，祂無需要人類做奴隸幫祂做tāitsì。祂hō͘男女tī工作中享受自我實現kah彼此成全ê快樂，反映出上主創造ê美好。Tsit種創世故事，人類ê地位何等ê koân！

人類照上主ê形像kah樣式被造，mā teh暗示人類親像上帝所出ê gín'á，gín'á所做ê一切ē tàng榮光老父。上主親像父母，為teh beh出世ê gín'á打造嬰á房、嬰á床、嬰á用品……等等sùsī爽快ê環境，世界tùi bē tàng tòa，一步一步被造成適合人tòa。創世記一章1節：「起初，上帝創造天地。」原文是「Hitê天kah hitê地」，一章2節：「地是空空渾沌，深淵ê頂面烏暗；上帝ê靈運行tī水面。」（《全民台語聖經》）詳細描述「hit所在」án怎被造，á無描述「hitê天」án怎被造，因為kah咱人類無關係。

2021年底出版ê《現代台語漢字》翻譯做：「地是渾沌，iáu未成形；深淵ê頂面烏烏暗暗；上主ê神運行tī水面。」kā「hit所在」被造之初hit種「未成形」ê概念譯出來。「淵」תְּהוֹםkah「水」 מַיִם，意思是講人類beh tòa ê「hitê所在」siōng起初被造是「未成形」kah一堆水混做伙，「空空渾沌」תֹהוּ וָבֹהוּ，意思是混亂、無形狀，koh khah深ê意思是荒涼、bē tàng tòa。上主一步一步整理「hitê所在」，hō͘ 它ē tàng hō͘人類來tòa。

因為耶穌，我得tio̍h極大ê恩典，ē tàng稱呼耶和華做：「阿爸！父！」（羅馬書八章15節；加拉太書四章6節）tī《創世記》中體會tio̍h kakī是tī疼ê計畫中被造，工作m̄ kantaⁿ為tio̍h thàn食，卻是有koh khah深ê意義kah價值。我享受工作，歡喜服事別人，因為tī其中我感受tio̍h阿爸kah我同在，阿爸看tio̍h我，歡喜我手所做ê，反映祂創造我ê榮光。Tsitê創世故事，帶有天父ê心。