《Kah陳小小做伙讀台語》

 | | | 轉寄

咱所疼ê親人死後kám ē變天使？

作者 陳小小，台譯：Lîm TsùnIo̍k 2023.09.02


咱所疼ê親人死後kám ē變天使？

陳鳳翔

2023年五月14，台灣媒體報導歌手余天kah李亞萍翁á bó͘，tī tsabó͘ kiáⁿ因為癌症往生後，頭一pái公開露面錄製綜藝電視節目，李亞萍說明對tsabó͘ kiáⁿ ê思念kah疼，講她相信tsabó͘ kiáⁿ已經「去天國」，「走去變天使à」。

「好人死後ē變天使，á是成爲比人類koh khah高等ê存在形式」是一種信念，á tī台灣，抱tsit種信念ê人真tsē。我kakī聽過細漢gín'á講往生ê阿公阿媽á是外公外媽變天使，網路頂mā有bē少討論「人死後是m̄是ē變天使」ê文章。Ta̍k年清明pōe墓，koh khah tiāⁿ看tio̍h一kóa人，包括基督徒，khiā tī墓牌前，àⁿ頭默禱向死去ê親人說明生活大事，祈求亡者ē tàng保佑遺族。甚至mā ē tàng tī基督教追思禮拜中，聽tio̍h牧者教導á是暗示tsit種觀念。

M̄ koh問題是「好人死後ē變天使」kám符合聖經kah基督教正統信仰？

流行文化kah儒釋道ê影響

對台灣人來講，基督教是外來宗教。根據台灣中央研究院社會學研究所2019年公布ê調查結果，tī台灣人口中間kantaⁿ有5.5%是基督徒，大多數人民信奉傳統民俗宗教（49.3%），佛教（14%），道教（12.4%），á是無宗教（13.2%）。大多數台灣人對基督教ê理解，á是tùi歐美電影、戲劇、小說、繪本等等娛樂文化來認bat。真tsē人—無論是基督徒á是非基督徒，lóng相信好人死後ē進入天堂，成做天使，因為he是in tùi（後基督教時代ê）歐美影視、流行文化中得來ê印象。

除了歐美流行文化以外，真tsē人相信「虔誠ê宗教信徒死後ē成做天使」，mā是因為爲受tio̍h Tsiná傳統文化ê影響。華人ê佛、道、儒kah傳統民俗宗教lóng相信，「虔誠」ê信徒死後ē成做比人類koh khah koân ê存在。所以華人ê宗教理路ē合理推論「虔誠」ê基督徒死後ē成做天使。

華人ê儒教參天地、贊化育，修養內在ê心體、性體，tùi普通人向頂koân，達tio̍h君子、賢人、到終為永遠ê聖人，教化萬世。佛教宇宙觀為六道輪迴，透過靈修向頂koân層層peh koân，tùi人到阿修羅、天人，到終極跳出輪迴，進入不生不滅ê涅槃成佛，普渡眾生。道教透過練炁(khì)追求長生，到終極得道來飛升成仙，恩澤眾人。傳統民俗宗教koh khah是相信「好」人死後成做神靈，保佑後世kiáⁿ孫。Tī tsit類人類向頂koân peh、死後成聖、成佛、成仙ê宗教系統觀念ê引tshōa之下，華人基督徒真容易跟tòe「好人死後成做天使」ê迷信。

無符合聖經ê觀念

M̄ koh，tī聖經內面，從來無「好人成做天使」ê教義。按照聖經，人to̍h是人，天使to̍h是天使，兩者是完全無仝ê受造。

創世記1:1：「起初，上主創造天地。」本節「天地」ê希伯來文是「hitê諸天（הַשָּׁמַיִם）kah tsitê地（הָאָרֶץ）」。上主創造兩个世界，一个是人肉眼看bē tio̍h ê超自然世界（俗稱屬靈世界），to̍h是「諸天」（英文是複數ê「heavens」，無論是NIV á是NRS、YLT，真tsē英文版本lóng是翻譯做「heavens」，koh khah óa近希伯來文原文ê意思）；另外一个是人肉眼看ē tio̍h、人所khiā ê世界—「tsitê地」。

詩篇115:16 kā tsit種「天地無仝」ê觀念講述kah koh khah清楚：「天，是耶和華ê天；地，祂卻賜hō͘世間人。」（The heavens are the LORD's heavens, but the earth he has given to the tsildren of man.）諸天ê概念mā thang見哥林多後書 12:2，保羅bat提起kakī受tòa到第三層天，指ê to̍h是hitê人肉眼看bē tio̍h ê「hitê諸天」—超自然世界。

Á「tsitê地」創造ê siōng 高潮是人類。人類是照上主ê形像（צֶלֶם）kah樣式所造！צֶלֶם tsit字mā用來指君王塑像ê建立。人類是上主設立tī「tsitê地」siōng尊貴榮光ê受造，人類是上主tī受造世界ê代表。人類六日工作，反映上主創造天地，受造萬物tùi人類ê工作看見上主智慧kah大能ê連續。人類工作本身to̍h是榮光上主ê行為，人類代表上主管理「tsitê地」。Á六日工作了後，tio̍h一工安歇，無論啥物工lóng bē tàng做。Tī hit日，人類全心全意來記念上主、敬畏上主，知影世界ê運轉是靠耶和華，m̄是人類。Mā tī hit日，人類回顧手所做ê工，為kakī過去六工ê成就充滿上主ê智慧、創意、巧思，來感謝oló歸榮光hō͘造物上主。

Tī另外一kóa聖經經文中就ánne有人類kah天使ê比較。詩篇8:4-8，詩人觀看上主所造ê天，kah陳設ê月娘星辰，就講：「人算啥物，祢竟然siàu念伊？世間人算啥物，祢竟然照顧伊？祢叫伊比天使（אֱלֹהִים）微細一點á，而且賜伊榮光尊貴做冕旒。祢派伊管理祢手所造ê，hō͘萬物，to̍h是一切ê牛羊、田野ê獸、空中ê鳥、海裡ê魚，凡若行海道ê，lóng服tī伊ê腳下。」

Tùi tsit段經文來看，人類ê受造kahná是比天使kē一tsân。M̄ koh，jú來jú tsē ê聖經學者掠準tsia原本ê翻譯無好（אֱלֹהִים翻譯做天使，m̄ koh אֱלֹהִים tī聖經中大部分翻譯做「上主」，天使有其他ê字מַלְאָךְ。），khah新ê華語聖經紛紛kā它修訂，《和合本修訂版RCUV》譯做：「m̄ koh你hō͘伊比『上主』微細一點á，賜伊榮光尊貴做冕旒。」《現代華語譯本修訂版TCV》譯做：「m̄ koh，你造伊kantaⁿ比『祢kakī』khah kē；祢用光榮尊貴作伊ê華冠。」

因為詩篇8:4-8呼應創世記第一章。詩人稱頌上主ê創造，mā oló上主派人類代表祂，管理上主手所造ê一切萬物，人類án怎有tsit種特殊ê榮幸？Tùi新ê翻譯來看，人類ê受造無比天使kē一tsân。

簡單講，上主創造兩个世界，天使、kilō͘pik、活物是諸天世界ê受造，á穹蒼、各種水、陸地、日月光體、動植物kah人類是tī tsitê世界ê受造。人kah天使是完全無仝ê受造。當tsitê地過去，新天新地來臨，人mā無變天使，信耶穌ê lóng早to̍h tòe耶穌成做新造ê人。人to̍h是人，天使to̍h是天使。

對靈修觀ê影響

Tī聖經內面，人ê地位可能iáu比天使khah重要。因為天使並無照上主ê形像kah樣式受造，另外，天使墮落，聖Kiáⁿ耶穌mā無為in道成肉身、死tī十架頂拯救in。Á tsitê觀念ē影響華人基督徒對靈修ê看法。

儒教ê靈修目標是成聖，佛教ê靈修目標是成佛，道教ê靈修目標是成仙，傳統民俗宗教ê靈修目標是成做神靈。Tī成聖、成佛、成仙、成做神靈ê宗教觀念影響下，bē少基督徒ē認為基督信仰ê靈修目標是tùi人向頂koân一層一層peh koân，到天使，到終極成做神。台灣ê世界宗教博物館對靈修ê定義請看下面，á華人基督徒對靈修ê理解mā kah這差不多：

靈修是一種宗教ê修行，牽涉tio̍h嚴肅ê心智á是沉思；tsitê詞ê源頭是拉丁文，意思是講深奧而且專心斟酌ê思考……靈修ê實踐thang定義做tī知覺上探討ê一種性命新道。經歷初階ê淨化kah統合，修行者hō͘自我空靈超脫來求轉化新生，終其尾ē tàng kā tsitê覺醒存在tī日常生活ê中間……

M̄ koh，無論是舊約聖經á是新約聖經完全無「靈修」tsitê詞。Tùi世界宗教博物館對靈修ê定義，內底寫ê「此詞源自拉丁文」，thang知影「靈修」是後期tsiah有ê觀念，因為聖經是用koh khah早ê希伯來文、希臘文寫完成。

大部分基督徒對「靈修」ê理解，只不過是是讀經、唱詩、祈禱。M̄ koh有kóa人帶成聖、成佛、成仙、成神靈ê觀念來實行靈修，to̍h ē引進世界各種宗教ê靈修方法。聖經從來無tsit種「人成做koh khah koân一級ê受造」ê靈修概念，甚至聖經真tsē所在強調人類受造本身to̍h充滿上主ê榮光。讀經、唱詩、祈禱，lóng是為tio̍h beh koh khah認bat聖父、聖Kiáⁿ、聖靈，了解上主tī咱身tsiūⁿê恩典hiahni̍h'á大，tī生活中所行、所做來反映出祂，kā一切歸榮光hō͘祂。

若真正tio̍h講基督教ê「靈修」目標是啥物？應該是聖靈所結ê果tsí：仁愛、喜樂、和平、忍耐、恩慈、良善、信實、溫柔、撙節。（加拉太書5:22-23）追求tsitmá ê kakī比過去ê kakī koh khah知影啥物是疼，疼上帝、疼厝邊，因為耶穌是為tio̍h ánne來到世間。聖靈保惠師幫贊信耶穌ê人，性命ê品質漸漸成長、thǹg去罪惡，反映上主公義kah慈愛ê屬性，因為咱本來to̍h是照祂ê形像kah樣式受造。

咱無需要欣羨成佛、成聖、成仙，tio̍h知影別ê受造，甚至是天使，lóng m̄是照上主ê形像kah樣式受造。所以基督徒lóng thang稱頌上主創造咱是一个人！M̄免掠準天使是比咱koh khah koân一級。咱kantaⁿ比上主微細一點á。祂賜咱榮光尊貴做冕旒，派咱管理祂手所造ê。主耶穌疼咱，為tio̍h beh拯救咱，m̄是為tio̍h beh拯救天使，來死tī十字架頂。