《Kah陳小小做伙讀台語》

 | | | 轉寄

上主tsiah是主角

作者 陳小小，台譯：Lîm TsùnIo̍k 2023.12.03



上主tsiah是主角

讀聖經ê方法á是秘訣千百種。若ài我分享閱讀聖經ê秘訣，而且時間有限kantaⁿ ē tàng講一點，he to̍h是「上主tsiah是主角」！

世俗閱讀重點，總是ē kā聖經人物當做主角。親像，以色列人出埃及ê故事被翻phah做電影幾nā pái，各種戲劇相片經過美術設計，lóng是紅海ê水聚集kui堆、直直khiā leh親像堡壘，摩西khiā tī頭前，á是gia̍h劍、á是gia̍h杖，一副蓋世英雄ê架勢，出埃及ê主角成做大先知摩西。若問主日學gín’á兄：「啥人帯領以色列人出埃及？」無例外ê，答案lóng是摩西。甚至大人mā lóng是ánne認為，講台mā是tsit種教導。

Hō͘ 咱回想十誡第一條：「「我是耶和華—你ê上主，bat tshōa你tùi埃及地，tùi做奴隸ê家出來ê。「我以外，你m̄ thang有別个上帝。。」（出20:2-3）啥人帯領以色列人出埃及？上主ê答案是祂kakī！

祂iáu出示kakī ê名—耶和華。Kahná驚日子siuⁿ過久，世間人bē記得是tó一位神帶領以色列人出埃及，若用電腦聖經工具關鍵字搜tshōe「出埃及」，幾十筆經文，四界lóng顯示帯領以色列人出埃及是耶和華！上主應該真無歡喜聖經讀者kā榮光歸hō͘摩西。以下列舉兩條：

「「你tio̍h注意亞筆月，來守耶和華—你ê上主ê Pôaⁿ過節，因為上主—你ê上主tī亞筆月暗時tshōa你出埃及。」（申 16:1）

「你出去kah對敵交戰ê時，看tio̍h馬、車，以及人民比你khah tsē ê，m̄免驚in，因為tshōa你出埃及地ê耶和華—你ê上主kah你同在。」（申 20:1）

Hō͘ 咱koh一pái tńg來「啥人帯領以色列人出埃及？」tsitê問題頂面。當時，以色列人男丁60萬，出埃及ê總人數預估是200萬人。試想一个人一工tio̍h lim 2000cc ê水，tsit陣人一工tio̍h lim掉40億cc ê水。一个便當50kho͘，tsit陣人一頓to̍h ài用掉1億kho͘。連全球好額人前幾名ê馬斯克、比爾•蓋茨á是台灣ê郭台銘lóng 擋bē過幾禮拜，á區區一个老牧羊人摩西，án怎ē tàng帯領以色列人出埃及？Koh khah免講ài有軍事能力，tùi當時ê強權國家埃及法老王手裡離開。Tsiahê，只有耶和華tsiah做ē到！

正確ê聖經閱讀方式，一定tio̍h先kā焦點khǹg tī主角上主—聖父上主、聖Kiáⁿ上主耶穌、聖靈上主，咱tsiah bē siuⁿ過高舉人，suah看bē tio̍h聖經人物ê罪惡。

繼續用出埃及故事做例，bē少人掠準摩西kā欺負kakī同胞ê埃及人phah死，tsit種行為真tio̍h。好萊塢電影koh khah是tiāⁿtiāⁿ見tio̍h英雄kā pháiⁿ人thâi死，甚至波及無辜、致使路人受傷mā無要緊。

「後來，摩西已經長成，伊出去到伊ê同胞hia，看tio̍h in teh做苦工。伊看tio̍h一个埃及人teh phah一个希伯來人，to̍h是伊ê同胞。 12 伊看四箍圍無人tī hia，就phah死hitê埃及人，kā伊埋tī沙裡。」（出2:11-12）

M̄ koh聖經並無tsit種意思。希伯來文tiāⁿtiāⁿ見tio̍h文學對稱法，類似ê情景重複發生，是ài讀者「注意」：思想！目tsiu仁m̄ thang siuⁿ緊tshu過去。

「隔tńg工koh出去，看tio̍h有兩个希伯來人teh相phah，to̍h對hitê m̄ tio̍h ê講：「你ná ē phah你ê同伴？」（出2:13）

頭一工故事ê情景是「埃及人欺負以色列人」，hitê欺負人ê埃及人被摩西phah死。隔tńg工故事ê情景變成「以色列人欺負以色列人」，hitê摩西是m̄是mā照ánne，kā hitê欺負人ê以色列人phah死leh？

Hitê人對摩西講：「你ná ē phah你ê同伴？」 14 Hitê人講：「啥人設立你做首領kah審判官來管阮？你kám ē想beh phah死我，親像phah死hitê埃及人？」（出2:14a），tsit句話指出摩西ê問題。埃及法老王iáu無立摩西做領袖kah審判官，m̄ koh摩西to̍h自認為是領袖，私刑殺人。仝款，耶和華mā iáu無立摩西做以色列人ê領袖kah審判官。若hō͘ ánne ê摩西做領袖，真可能ē照kakī ê意思辦tāitsì，無寶惜人命，真驚人！就ánne，摩西離開埃及、去曠野成做牧羊人，40年ê性命淬鍊，到80歲，上主tsiah使用伊。

華人基督徒閱讀聖經，常帶儒、道、佛ê眼光閱讀，kā焦點khǹg tī偉人、聖人身tsiūⁿ，beh學ánne，追求成聖、成佛、成仙。就ánne，聖經中siōng hō͘人欣羨ê角色是先知、神人。M̄ koh ánne ê追求，往往ē帶來驕傲自負，kā kakī當做上主，suah陷落tī各種ê試探。有tang時á聽tio̍h有kóa牧者長執動用公款，雖然是用tī教會事工，m̄ koh無經過法定ê開會程序，siōng尾因違法來致使落監。Tsiahê行為類似摩西ê權柄界線無分，也to̍h是kā kakī當做首領kah審判官、甚至當做上主。

M̄ kantaⁿ是閱讀聖經，日常生活做tāitsì ê秘訣，第一要點lóng是「上主是主角」！kā上主khǹg tī siōng重要ê位置，其它各種ê位置mā lóng ē一一漸漸正確。