《Kah陳小小做伙讀台語》

 | | | 轉寄

恩膏，基督徒ê指導教授

作者 陳小小，台譯：Lîm TsùnIo̍k 2023.12.24




恩膏，基督徒ê指導教授

陳鳳翔

指導教授約我tī開學tsìn前見面，了解暑假研究進度kah檢討學校讀冊期末報告。我提早一工到北部tsabó͘ kiáⁿ ê厝過暝。無想tio̍h準備離開ê時，被反鎖tī大門口，手機、錢包、鞋á lóng tī厝內。只好thǹg赤腳行落樓，踏tio̍h路裡siûⁿ lo̍plo̍p ê雨水，走tshōe幫忙。後來透過里長聯絡到tsabó͘ kiáⁿ，慢了半點鐘，tsiah看tio̍h指導教授。伊lóng無受氣，kui面平和微微á笑teh等我。兩人三兩句真緊to̍h進入正題，kahná tútú無任何tāitsì發生。

指導教授一一就用批滿紅字ê期末報告指教：「你án怎寫到tsia to̍h結束？Tio̍h koh再進入，tio̍h進一步思考。」「讀ê冊siuⁿ少，參考資料siuⁿ少。」「Ná ē犯tsit種基本ê錯誤？」......siōng尾我心肝phi̍hpho̍k跳，問講：「老師，我kám有及格？」（無及格，to̍h ài重修à。）伊tú親像平常時ê研究風格，簡潔無話屎，kā我恭喜講：「你ê分數真koân。」

結束了後，tī計程車頂，緊張弓ân ê心情漸漸放鬆落來。早起無掛目鏡，無掛嘴om，thǹg赤腳ê狼狽（lôngpōe），tsit時tsiah移山倒海koh浮現腦海。天父ê大大保守hō͘我驚一tiô，hō͘我tī注意聽指導ê時ē tàng專心，無受tio̍h hitê突發事件ê干涉攪擾。另外，hit份滿江紅ê報告無打擊我，顛倒kahná看tio̍h老師tī桌頭燈下面目tsiu buibui teh一一批閱報告ê神情，背後所付出ê心力kah時間。我ê指導教授是傳說中ê嚴師，tòe伊一年，研究jú來jú墊紮。

我深深感覺ē tàng hông了解、關心kakī ê人指正是何等ê幸福。因為兩種tiāⁿtiāⁿ看tio̍h ê狀況是：一頭是帶惡意攻擊ê責備；另外一頭tsiah是彼此尊重，只有講好聽ê話，完全無指出錯誤。Katsài，耶穌hō͘我一位性命ê指導教授，he to̍h是聖神上主。三十gōa年來，祂發出ê責備kah指正，幫贊我有永遠ê恩典kah各種好處。Á tsit位性命ê指導教授，ta̍k个基督徒lóng有：

對lín來講，lín tùi基督領受ê聖神一直lóng kah lín同在，所以，m̄免人來kā lín教示，因為tsitê聖神ē教示lín萬項事。祂ê教示是真實，m̄是白賊。Lín tio̍h遵照聖神ê教示，tio̍h kah基督結聯來生活。（約翰一書2:27）

Tsia ê「恩膏」to̍h是聖神ê敬畏代語。因為聖神真偉大lah，m̄敢直接稱呼，就用「恩膏」來代替。To̍h親像「上帝國」ê「上帝」tsiok偉大lah，m̄敢直接稱呼，用「天」來代替，to̍h是「天國」。Kui本聖經，「恩膏」kantaⁿ出現tī約翰一書2:20、27，lóng是teh指聖神上主。M̄ koh tsitmá教會界對「恩膏」tsit个名詞普遍誤用，kā「恩膏」kah舊約ê「聖膏」混用。
所以tsit節經文講to̍h是tī：「對lín來講，lín tùi基督領受ê聖神一直lóng kah lín同在，所以，m̄免人來kā lín教示，因為tsitê聖神ē教示lín萬項事。祂ê教示是真實，m̄是白賊。Lín tio̍h遵照聖神ê教示，tio̍h kah基督結聯來生活。」每一个基督徒因為信耶穌，內面lóng有聖神／恩膏常常存在。聖神／恩膏tī凡事頂面教導，阮tio̍h聽從聖神／恩膏ê教導。

聖神tī凡事頂面教導、指正、責備咱，tsitê觀念siōng早tī耶穌對聖神ê紹介出現。約翰福音12章開始進入來耶穌tio̍h離開門徒，tī十字架頂受死，koh活，做王ê情節。同時，耶穌開始紹介聖神上帝beh接棒。Tsìn前是耶穌kah門徒同在，續落來是換聖神kah門徒同在。耶穌講：

聖神來ê時，ē指正世間對罪、對義、對審判ê錯誤觀念。罪ê方面，因為in m̄信我；義ê方面，因為我teh beh tńg去天父hia，lín bē koh看tio̍h我；審判ê方面，因為tsit世間ê統治者已經受審判。（約翰福音16:8-11）

「Kakī責備kakī」ê譯法無真接近原文。約翰福音16:8 ê ἐλέγχω ê意思是「責備、指出問題」，直譯做聖神責備世間人、指出世間人ê錯誤。聖Kiáⁿ上主耶穌siōng重要ê使命之一to̍h是tsiūⁿ十字架來為世間人除罪，á聖神上主tsiah是tī信耶穌ê人內面，tiāⁿtiāⁿ指出錯誤，hō͘伊bē偏離義路，常常tòa tī主內。

因為耶穌，ta̍k个基督徒lóng有性命ê指導教授—聖神上主。祂疼咱，看見錯誤、指出錯誤，m̄是teh否定咱，卻是teh幫助咱。Tī祂ê鍛鍊下，基督徒應該koh khah能看見kakī ê錯誤，suah來改正錯誤，繼續tī義路裡進前。若是基督徒前到taⁿ lóng bē對人道歉認m̄ tio̍h、bē向上主認罪祈禱，to̍h ài自我反省性命tó位出問題，是m̄是kakī ê驕傲kah自高suah消滅聖神ê感動？

Siōng尾，容允我學習新約ê敬語用法，用「恩膏」代替hitê極其偉大尊貴ê聖神上主。「恩膏」是我一生siōng大、siōng重要ê指導教授，人生之路我beh時時注意聽「恩膏」ê教誨。「恩膏」指教我認bat各種關係耶穌ê tāitsì，mā指出我性命內面ê各種問題。