《Kah陳小小做伙讀台語》

 | | | 轉寄

好ê撒馬利亞人kah永生之道

作者 陳小小，台譯：Lîm TsùnIo̍k 2024.09.22



好ê撒馬利亞人kah永生之道

十gōa年前，台灣ê《緊急醫療救護法》無保障施救者ê條例，koh tiāⁿtiāⁿ有施救者hō͘家屬誣賴á是誣告ê新聞，就ánne有人提倡引進歐美國家ê「好撒馬利亞人法」（Good Samaritan law）。Á tsitê名稱ê典故是來自耶穌講ê譬喻故事，好撒馬利亞人to̍h是一位緊急醫療施救者：

有一个人tùi耶路撒冷落去耶利哥ê時，落tī強盜手頭。In剝伊ê衫褲，kā伊phah kah半死， kā伊tàn leh to̍h離開。Tú好有一个祭司tùi tsit條路落來，看見伊to̍h tùi hit pêng過去。Koh有一个利未人來到tsitê所在，看見伊，mā照常tùi hit pêng過去。獨獨一个撒馬利亞人行路來到hia，看見伊心to̍h真m̄甘，向前用油kah酒倒tī伊tio̍h傷ê所在，包好勢，扶伊起lì騎kakī ê 驢á，tshōa到店裡ka照顧。隔tńg工the̍h出二錢銀á來，交hō͘店主，講：「請你ka照應；這以外所khaiê，我tńg來一定還你。」（路加福音10:25-37）

事故發生ê地點，位置是tī耶路撒冷到耶利哥城24公里ê路段頂面。耶路撒冷海拔754公尺，耶利哥城海拔-250公尺，是koân度1000公尺ê崎度起落變化。兩pêng lóng是風雨侵蝕過ê光滑koh真崎ê山phiâⁿ，山頂有真tsē洞穴，tiāⁿtiāⁿ有bih土匪。Tī tsiahni̍h險惡koh荒涼ê半路tú tio̍h搶劫，並m̄是稀奇ê tāitsì。Á過路ê人無向前救助，mā真可能出tī懷疑he是土匪ê假事故，á是無想beh麻煩tsiūⁿ身，就ánne se̍h過去行開。故事中ê祭司kah利未人看見hō͘強盜phah kah半死ê人，「to̍h tùi hit pêng過去」[1]，m̄ koh撒馬利亞人是選擇出手來援助。

Tsit位撒馬利亞人應該是經常旅行ê人，因為伊kah旅館主人有熟悉，所以店主tsiah ē同意hō͘ tsitê半小死ê人入門。另外，伊做人值得信賴，所以店主相信伊ē tńg來支付對傷患ê照顧kah tòa歇ê費用。

撒馬利亞人起憐憫，伊知影今á日若無ka救，暗時非常寒冷，tsitê人ê衫褲koh hō͘強盜搶去，到暗時定tio̍h ē死亡。伊做緊急ê醫療施救，the̍h出酒來消毒孔嘴，抹藥油[2]，用tsingseⁿ kā伊載到旅館。Hit工暗時，傷患定tio̍h發高熱，伊可能照顧kah kui暝bē落眠。隔工，伊付二錢銀á，拜託店主繼續照顧傷患。

一kóa國家ê「好撒馬利亞人法」koh khah積極，m̄nā是被動來保護施救者，甚至規定「假無看見」是違法，公民有幫贊施救ê義務。Hit位撒馬利亞人，伊ê救助kah照顧是大大超過現代siōng積極ê規定，mā超過摩西五經ê律法規定。撒馬利亞人mā是雅各ê kiáⁿ孫—耶和華ê子民，kah偤太人ê差別在tī bat kah外族人通婚，kantaⁿ讀摩西五經，有kakī 敬拜上主ê所在[3]。撒馬利亞人對傷患ê種種照顧，充分實踐律法規定ê永生之道之一「koh ài疼厝邊親像kakī」。

耶穌講tsitê比喻故事，m̄是用來建立《緊急醫療救護法》，是beh回應律法教師ê考試：「我該做啥物tsiah ē tàng承受永生？」律法教師siōng知影律法Torah[4]，伊想beh試看耶穌ê本等。

耶穌對律法教師講：「律法頂面寫ê是啥物？你念ê是án怎leh？」意思是永生之道lóng寫tī律法裡à。律法教師回答，永生之道to̍h是疼上主kah疼厝邊，á疼上主ê方式tio̍h盡心、盡性、盡力、盡意，疼厝邊ê方式ài親像疼家己。耶穌講，無m̄ tio̍h！就是ánne去行，to̍h一定ē得tio̍h生。

律法教師ê陷阱終其尾浮出來，tsia siōng困難ê是厝邊ê定義：「啥人是我ê厝邊？」「厝邊」רֵעַ，m̄nā有厝邊[5]ê意思，koh khah有同伴、密友、同胞ê意思。Tī十誡ê「bē tàng做假見證陷害『人』。Bē tàng貪戀『人』ê厝宅；mā bē tàng貪戀『人』ê bó͘、僕婢、牛驢á，kah『伊』一切所有ê。」內面ê「人」、「伊」原文lóng是用רֵעַ「厝邊」tsit字，指雅各家族十二支派ê信仰共同體。Kah外族通婚ê撒馬利亞人，kám算是偤太人ê「厝邊」？尤其耶穌ê跟tòe者無gōa久tsiah發生kah撒馬利亞人ê衝突事件，耶穌beh往耶路撒冷去，伊派使者先去，in到撒馬利亞ê一个庄社，hia ê人無歡迎in。門徒雅各、約翰非常受氣對耶穌講：「主ah，你kám是ài阮吩咐火tùi天頂降落來燒滅in？」（路加福音9:51-56）

Á耶穌ê譬喻故事，thiau故意選祭司、利未人kah撒馬利亞人三个角色。祭司kah利未人kui日研讀而且教導上主ê話，in深深了解「疼上主kah疼厝邊」ê永生之道，卻對kakī ê同胞受難假無看見，撒馬利亞人卻有實踐「疼厝邊親像kakī」ê永生之道。

耶穌m̄nā beh回答律法教師ê問題，同時mā對邊á ê門徒做機會教育。耶穌反問律法教師：「Tsit三个人tó一个是落tī強盜手裡ê人ê厝邊leh？」律法教師回答「是憐憫伊ê」，死都無願意講出「撒馬利亞人」tsitê答案。Tsìn前想beh用天火燒死撒馬利亞人ê雅各kah約翰，應該mā真排斥「撒馬利亞人」tsitê答案。

撒馬利亞人有實踐「疼厝邊親像kakī」，ē tàng承受永生。Á祭司、利未人、耶穌ê門徒雅各kah約翰kantaⁿ是頭殼認知「疼厝邊」，m̄ koh生活所行卻無顯露任何慈心kah憐憫，所以無法度持有永生。

注意！聖經ê「永生」kah華人民間信仰ê「永生」無仝，後者重視「永遠bē死bē滅」，m̄ koh咱ê永生是「tī疼ê關係裡，直到永永遠遠」。試想看māi，tī真實日常做伙，你kah意kah祭司、利未人及撒馬利亞人其中tó一个做伙生活leh？任何人lóng知影kah hitê撒馬利亞人做伙是何等幸福。

華語新約聖經真tsē所在ê經文kā「疼厝邊親像kakī」轉譯做「愛人如己」[6]，koh khah搭óa耶穌ê意思。耶穌來，to̍h是beh幫贊所有信祂ê人漸漸親像hit位撒馬利亞人，kakī幸福，mā hō͘邊á ê人帶來幸福。「愛人如己」並無容易，m̄ koh有聖靈內住tī咱內面。活tī彼此相疼ê溫暖幸福關係中，直到永永遠遠，這tú好是永生ê意義。



註1.ἀντιπαρέρχομαι 意思to̍h是「tùi另外一pêng邊se̍h過去」。

註2.以色列人ê油，tòe teh用途ê無仝，成分mā無仝，用途包括食用、照明、醫療、日常保養、宗教。

註3.無tī耶路撒冷，á tī基利心山。

註4.Torah koh khah搭óa ê意義是「上主ê教導」，目前真tsē書籍選擇音譯做「妥拉」，kah律法作區別。因為「教導」涵蓋性koh khah闊，律法kantaⁿ是教導ê一部分。

註5.「厝邊」שָׁכֵן 。

註6：太19:19；22:39；thang 12:31, 33；加5:14；雅2:8。