《Kah陳小小做伙讀台語》

 | | | 轉寄

所羅門王求賜一粒ē tàng聽ê心

作者 陳小小，台譯：Lîm TsùnIo̍k 2024.09.29

所羅門王求賜一粒ē tàng聽ê心
陳鳳翔

若是上主tsit時對你講：「你願我賜你啥物？」你ē求啥物？建議你先停落來，the̍h起筆，寫落來你beh對上主講ê話。了後讀完本文，比對kakī所求ê。

上主bat問所羅門：「你願我賜你啥物？你thang求。」列王記上3:4-3:28 kah歷代志下1:1-13 lóng有記載，所羅門第一个想tio̍h ê m̄是kakī，所以伊無為kakī求資財、豐富、尊榮、滅絕對敵人、長壽，伊tāi先想tio̍h ê是上主ê恩典kah上主ê tāitsì！

所羅門想tio̍h kakī ē tàng坐tī tsitê王位是耶和華ê恩典。橫直上主tsìn前to̍h ē tàng hō͘有罪ê掃羅phah無去王位，自然mā ē tàng hō͘有罪ê Tabi̍t王朝斷站。上主卻恩待所羅門ê老父Tabi̍t王，hō͘伊ê一个kiáⁿ坐tī王位—伊kakī有蒙上主ê恩賜，來續接老父Tabi̍t做王。所以伊先oló上主：「祢ê奴僕—阮老父Tabi̍t用誠實、公義、正直ê心，行tī祢ê面前，祢to̍h向伊大施恩典，koh為tio̍h伊保存大恩，賜伊一个kiáⁿ坐tī伊ê王位，tú親像今á日仝款。」（王上3:6-7a）續接所羅門tsiah表達kakī ê所求。伊向耶和華求ê是beh kā上主交辦hō͘ kakī ê tāitsì做好！

所羅門發見kakī siuⁿ過少年，無能力管理千千萬萬ê人民，伊講：「總是，我是gín’á，m̄知tio̍h án怎出入。祢ê奴僕tiàm tī祢所揀ê人民中間，tsiahê人民tsē到算bē了。 求祢賞賜祢ê奴僕智慧ê心，thang判斷祢ê子民，來分別好pháiⁿ，因為啥人ē tàng判斷祢tsiah tsē ê人民？」（《全民台語聖經》王上3:7b-9）

和合本tsit段翻譯，中間失落幾个真重要ê關鍵字。「求你賜『我』」ê原文וְנָתַתָּ לְעַבְדְּךָ是「求祢賜『祢ê奴僕』」。所羅門並m̄是自稱「我」，mā m̄是自稱「王」，卻是自稱「上主ê奴僕」！所羅門真清楚，上主tsiah是tsit陣人民ê王，kakī只是代理人，是耶和華ê奴僕。

而且，tsiahê人民m̄是「我所羅門」ê民，卻是「祢耶和華」ê民。原文thang看tio̍h所羅門有強調兩pái tsiahê民是「祢ê」—「判斷『祢ê』民」、「啥人ē tàng判斷真tsē ê『祢ê』民leh？」甚至，伊講「奴僕tòa tī祢所揀選ê民中」，意思是講tsit陣以色列人mā是蒙上主ê恩典所揀選ê。上主ē tàng揀選其他民族成做祂ê子民，無一定tio̍h揀選以色列人。

所羅門講出頂面所講tsiahê話，有夠額來顯示伊ê智慧超越眾人。因為伊清楚上主是啥人、kakī是啥人、人民是啥人。

Á「求祢賜我智慧」原文וְנָתַתָּ לְעַבְדְּךָ לֵב שֹׁמֵעַ是「求祢賜祢ê奴僕一粒ē tàng聽ê心」，所羅門為tio̍h審斷人民ê訴訟案件，求上主賜hō͘伊一粒「ē tàng聽ê心」。所羅門深知司法對治國ê重要。司法一定tio̍h有公平正義ê判決，tsiah ē tàng heⁿh驚人mài 去犯罪，hō͘罪人bē心存佳哉，維持社會秩序，帶來全民福利。法官ài有一粒「ē tàng聽訟ê心」，高高在上ê伊屈尊下聽原告、被告、證人ê話語，tsiah ē tàng徹底了解真相，做出正確ê判決。「ē tàng聽ê心」mā是雙關語，法官ài有「聽命上主ê心」，tsiah bē致使判案隨人ê私慾，偏離神聖ê律法。

無gōa久to̍h來一个案件，「一工，有兩个妓女來，khiā tī王ê面前。」（王上3:16）妓女是社會ê邊緣人物，伊總是ē tàng交hō͘ á是推hō͘屬下來審理。Tsit節to̍h有驗證所羅門是真心teh求「ē tàng聽訟ê心」，tio̍h算地位kē ê一般人，所羅門lóng願意àⁿ聽案情。

Tsit兩个tsabó͘人tòa做伙tī一个厝內，in接連lóng生tsapo͘嬰á，其中一个tī夜間過往。兩人爭講活leh ê gín'á是kakī ê，死去ê gín'á是對方ê！古早時代無DNA親子鑑定法，beh án怎斷定leh？Ē tàng tùi tsabó͘人講ê話看出一kóa鋩角。Tāi先，原告講：「夜間，tsit个婦人人ê gín'á死去，因為她倒tī伊ê頂面。」Gín'á死亡ê原因kám是hông壓死？其次，原告既然已經睏去，án怎知影對方半暝偷換gín'á？Siōng尾，既然發見gín'á死去，是án怎hiahni̍h鎮靜等到天光，tsiah詳細觀察？無啥sêng一般人ê反應。

M̄ koh tio̍h算ē tàng看tio̍h tsiahê疑點，iáu無法度結案。上主回應所羅門ê祈求是「你看，我beh照你ê話來做，我beh賞賜hō͘你聰明智慧ê心，致到以前無人親像你，以後mā無有人親像你。」（王上3:12）Tsit件世紀ê難案，所羅門ê結案方式出tī眾人意料，另外開闢路徑，顯出上主已經賜伊智慧。伊講：「Kā我gia̍h刀來！」人to̍h gia̍h刀來。（王上3:24）原文ê「人」是複數ê「in」，可見這是大刀，一个人扛bē振動。

王就下令：「Kā tsitê活leh ê gín'á破做兩半，一半hō͘ tsitê tsabó͘人，一半hō͘ hitêtsabó͘人。」Hitê活ê gín'á ê老母因為心疼kakī ê kiáⁿ，to̍h對王講：「Oh我ê主，kā活gín'á hō͘ 她lah，千萬m̄ thang thâi伊！」M̄ koh另外一个tsabó͘人講：「伊kah m̄是歸我，mā無歸妳，kā伊破做兩半好lah！」

所羅門王有做出判決：「Kā活ê gín-á hō͘ tsitê tsabó͘人，千萬m̄ thang kā伊thâi，因為她真正是伊ê老母。」（王上3:27）

上主hō͘所羅門一切需要ê：「ē tàng聽ê心」、「智慧kah聰明ê心」，就ánne伊順利kā上主ê tāitsì辦好。這以外，上主iáu加強「富足」、「尊榮」、「長壽」。這完全呼應耶穌所講：「Tio̍h先追求上主國度kah照祂ê旨意來行，tsiahê物to̍h lóng ē順續賞賜hō͘ lín。」（太6:33）

所羅門ê祈求，直到今á日猶原發生。以我所參與ê信望愛聖經網站做例，siōng要緊ê是清楚上主是啥人？Kakī是啥人？民眾是啥人？咱tio̍h感謝上主，蒙祂揀選，tsiah ē tàng tī正職以外iáu有時間、體力參與義工團隊，服事tsit代ê人。Tsitê網站是上主ê，各部門ê義工lóng是代理人。無需要向上主祈求捐款奉獻來維持網站經營，tsiahê需要天父lóng知影，祂一定ē預備。咱ài向上主祈求，眾義工tī祂內面ê靈命kah專業能力繼續成長kah進步，直直做出好ê聖經資源來建置服務眾使用者。

當今流行ê祈禱教導，有kóa是外邦人ê祈禱模式。Ná親像用重複ê話，掠準話增加一定ē蒙主àⁿ耳孔聽，á是祈求一kóa次要ê物件。咱來向所羅門學習祈禱，「求祢賜祢ê奴僕有一粒ē tàng聽ê心」，來搭óa上主ê心意。