《Kah陳小小做伙讀台語》

 | | | 轉寄

「免阮ê債，親像有阮免人ê債」kám是藉tio̍h赦免來得tio̍h赦免？

作者 Monica Augustine Tsen，台譯：Lîm Tsùn Io̍k 2021.11.07

陳小小踏話頭：


勸人赦免，若無勸好，to̍h ē hō͘人感覺是「白蓮花」，hit種裝純潔、裝清高，其實心內臭phú陰暗ê人。信望愛電子報提起臨床心理師甚至用「善良婊」ê強烈字眼，來形容勸人放落ê公道人。伊想講你無經歷過hiah个事，to̍h m̄ thang勸別人放落。有kóa tāitsì你無經歷過，to̍h mài隨便評論。


我kakī細漢ê時mā經歷過重大ê心靈傷害，期間有幾nā個月。換做現代，我kiámtshái tio̍h去心理輔導治療。信主hit刻，我有赦免，因為明白我欠主ê tsē，hit个欠我ê雖然tsē，互相比較之下to̍h m̄值得提起。


M̄ koh人生ê路真長，後面大大細細ê tāitsì，á是tio̍h用赦免。我想講赦免ê關鍵在tī tùi凡若tāitsì以kakī做中心，轉做hō͘主成做性命ê中心。就ánne tú tio̍h人生各種bē堪得ê時，to̍h ē tàng體會hit个hō͘ 人陷害至極、幾pái差一點to̍h死去ê約瑟，是án怎ē tàng講出：「以前lín ê意思是pháiⁿ，總是，上帝ê意思是好；祂beh保全真tsē人ê性命，親像今á日。」（創 50:20 ）


咱m̄做「白蓮花」、「善良婊」勸任何人赦免。Monica Augustine Tsen用「m̄赦免人ê惡僕」譬喻kah各種角度，深入淺出說明〈主禱文〉中ê赦免，á我分享主án怎tháu放我無hō͘ kakī ê、別人ê「債」綑縛。


【「免阮ê債，親像有阮免人ê債」kám是藉tio̍h赦免來得tio̍h赦免？】

作者:Monica Augustine Tsen

聖經ê道理中，「ē tàng知」卻「oh得行」ê to̍h是「赦免」之道。因為「傷害是實實在在ê，咱tú tio̍h傷害了後，to̍h無想beh koh受傷害。咱無容允kakī被利用，咱想beh向傷害咱ê人算帳」[1]。


臨床心理師洪仲清to̍h無法度認同勸人「放落」ê「善良婊」，無掠做當然ê表示：「有kóa tāitsì你無經歷過，to̍h mài隨便評論。」，「你無食過別人ê苦，to̍h m̄ thang勸別人有度量。」，「你無經歷過hiah个事，to̍h mài勸別人放落。」，而且受氣ê責備：「話講kah真簡單，你失戀看māi？看你kám ē tàng容忍kakī siōng愛ê人kah別人結婚？」[2]


若是看過韓星IU（李知恩）kah呂珍九tī2019年主演ê韓劇《德魯納酒店》，mā bē oh得發見tùi社長張滿月（IU飾）到旗下ê ta̍k位員工，在生lóng有無hō͘人知ê怨念，beh等到放落了後tsiah ē tàng離開kā in縛tiâu已經千年、百年á是數十年ê「月之客棧」，行向奈何橋。


Tio̍h講是赦免真正真oh，m̄ koh，耶穌卻一再要求祂ê跟tòe者一定tio̍h赦免；祂教導門徒祈禱ê時甚至ē祈求赦免ê人一定tio̍h赦免別人：「 求祢赦免阮ê辜負，親像阮mā有赦免辜負阮ê人。」（馬太福音6:12，全民台語聖經）。


問題來à，tsit句「 求祢赦免阮ê辜負，親像阮mā有赦免辜負阮ê人。」，是m̄是表示咱thang藉tio̍h赦免別人來「得tio̍h」上帝ê赦免？


答案tio̍h tńg去到《馬太福音》18:23-35節tsit个「m̄赦免人ê惡僕」ê譬喻tshōe。故事ê第一幕是一个奴僕欠落來oh得相信ê一千萬兩銀á債務，當伊請求寬限ê時，主人竟然免除伊所有ê債。


M̄ koh到第二幕，tsit个tú得豁免ê奴僕tú tio̍h欠伊十兩銀á ê朋友，伊竟然無客氣ê要求隨時還債，而且m̄ tshap對方寬容ê懇求，直接kā欠伊債ê人落監。


逆轉ê結局發生tī第三幕，看bē落去ê同伴kā tsit个 tāitsì對主人講，大受氣ê主人「撤回伊ê赦免，用伊對待別人ê方式來對待伊」[3]。


咱tī tsit个比喻裡清楚看見，tsit个惡僕原本oh得還清ê債務ē tàng免除，kantaⁿ是因為主人「有起慈心」（馬太福音18:27），而且主人ê回答「m̄是答應伊拖欠，卻是一筆勾消，遠比所祈求ê寬厚koh khah tsē」。


其實tsit个惡僕ê朋友所欠ê債，kantaⁿ有惡僕欠主人債額ê「六十萬分之一」，m̄ koh，tsit个惡僕「tú hông免除全部債ê有罪ê債主，卻iáu堅持kakī ê債權」[4]。Tsit位惡僕ê m̄肯赦免，有說明伊「iáu未真正明白伊欠主ê，kah另外一个奴僕欠伊ê，兩者有gōa大ê分別」[5]。


事實上，若是「咱ê目tsiu被phah開」，咱to̍h ē「看見咱得罪上帝是何等罪大惡極，比較起來，別人對咱ê傷害根本to̍h是無tapsap」；另外一方面，「若咱風神別人對咱ê冒犯，這to̍h證明咱kē估kakī ê罪」[6]。


上帝對咱ê赦免完全是出tī祂ê憐憫，m̄ koh iáu要求「被赦免ê對象一定tio̍h悔改」；「當咱決意m̄赦免別人ê時，to̍h表示咱無願意悔改，mā阻礙上帝ê赦免」[7]。惡僕ê「鐵石心腸」tútú證明伊無「真誠ê悔改」，mā因為ánne，最後bē tàng得tio̍h赦免ê恩典。


Tùi另外一个角度來看，咱ē hiahni̍h要求赦免，是因為咱除了主人已經免除ê「舊債」，iáu不斷teh累積「新債」。好katsài因為有上帝ê疼，咱thang來到神ê面前求赦免，而且安慰人ê是：「ta̍k pái咱需要ê時，隨時lóng ē tàng白白得tio̍h赦免」。


其實咱赦免別人，kantaⁿ是「Kā上帝早to̍h賜hō͘咱ê kui桶水ê內面，分出一滴á來hō͘別人」[8]。赦免是白白得tio̍h，咱án怎thang m̄甘 hō͘ hit个得罪咱ê人？


「咱向上帝祈求ê物件（赦免咱ê罪），咱卻m̄願施捨別人，he無憢疑是錯誤ê[9]。因為「無實踐kah人和好，to̍h無權利祈求kah上帝和好」，「這m̄是講門徒有赦免別人，所以有資格得tio̍h上帝ê赦免，卻是講門徒赦免別人ê時to̍h有表明上帝已經赦免in，因為上帝赦免ê疼已經hō͘咱kakī變kah謙卑」[10]。


所以「對m̄赦免人ê人，to̍h無赦免ê存在」。Tsit个惡僕ê m̄赦免「真有力見證ánne ê事實：伊前到taⁿ無悔改過」，伊頭尾kā kakī看做是性命ê中心，最後ê結果to̍h是「喪失一切」[11] 。


Kah這m̄肯赦免ê惡僕顛倒ê，咱若是「得tio̍h赦免ê人」，咱「應該ē tàng得tio̍h動力kah能力去赦免人」。雖然這iáu是「出tī意志ê行動」，你我iáu需要「致意m̄怨恨咱ê兄弟á是姊妹」[12]，m̄ koh，「願意赦免人」無憢疑有說明咱「已經得tio̍h赦免」ê事實。


所以，John Stott牧師講ê無m̄ tio̍h：「『親像阮有免人ê債』，m̄是ài咱藉tio̍h赦免別人來得tio̍h kakī ê赦免。顛倒是講，伊指出咱蒙上帝赦免ê其中一个證據，to̍h是願意赦免hiah个得罪咱ê人」[13]。


這m̄是表示赦免因為ánne變kah「kahná桌項ni柑hiah簡單」，m̄ koh，對得tio̍h赦免之恩ê人來講，赦免無koh是無可能ê要求。因為「赦免別人ê基礎m̄是在tī人本身，卻是最後在tī天父ê憐憫」[14]。


耶穌tsit个比喻所beh說明ê tútú to̍h是：「咱領受上帝無條件ê赦免了後，to̍h ē深受感染，而且改變咱所有ê人際關係」。「經歷憐憫ê人，to̍h ē顯露出憐憫」，「接受祂ê赦免，to̍h已經謙卑進入天國ê性命裡，tsìn前一切屬世ê價值觀完全顛倒過來」[15]。


所以赦免別人，表面上是「施恩hō͘別人」，實際上tsiah是「得tio̍h上帝ê恩典」；咱因為祂ê疼kah能力，m̄免koh再困tī「月之客棧」，ē tàng「赦免hiah个虧待咱ê人，thang好tiāⁿtiāⁿ保持救恩中ê喜樂」，mā證明咱ê罪債真正得tio̍h赦免[16]！


有人kiámtshái ē感覺，若是隨便赦免人，kám m̄是siuⁿ過食虧？M̄ koh，堅持m̄肯赦免，受拖磨ê最後iáu是kakī。《信心ê tiô跳》ê作者to̍h講tio̍h伊認bat一个tsabó͘人：「是伊所認bat ê人中間siōng bái猴、尖酸、刻薄ê一个」。


其實tsit个 tsabó͘人「少年ê時是一个美麗可親koh有趣味ê tsabó͘ gíná」，可憐ê是「十九歲hit年，tī她結婚ê前三工，她ê未婚夫kah她ê小妹背叛她來私奔」。


「她ê傷心kah侮辱是用腳頭u想mā知ê。Tsit个悲劇hō͘她選擇對她ê小妹kah未婚夫採取一世人gêng心肝m̄赦免ê心態。」「雖然她ê小妹對她感覺萬分抱歉，tī後來ê五十gōa年中真tsē pái試beh來向她道歉、補償，m̄ koh lóng bē tàng改變她ê心意。」


結果to̍h是：「每一个無疼、m̄原諒ê決定，lóng hō͘她心內ê尖酸刻薄koh khah深刻，她ê仇恨結局kā她ê人生永遠染色。」「上帝賜hō͘她ê先天美好，已經hō͘她重複選擇ê尖酸刻薄來消磨kah強beh無去，她siōng起初ê決定siōng尾變成她ê本性。」


Tsit个悲傷ê故事提醒讀者：「咱jú選擇某一kóa tāitsì，咱beh離開它to̍hjú無簡單。直到有一工，咱ê決定根深柢固來長存在tī咱ê心內，促使咱成型ê動力變kah無法度阻擋。咱ê決定ē塑造出咱ê性格，á咱ê性格koh se̍h過頭來，jú來jú強力影響咱ê決定。」[17]


我bē否認有kóa基督徒kiámtshái有bē輸tsit个可憐tsabó͘人ê傷痛，m̄ koh，咱thang決定是m̄是beh hō͘「m̄原諒ê決定」不斷tī咱心內纏頭絞尾，最後「變成咱ê本性」？


主耶穌既已經赦免你我「無法度計算ê罪債」，這赦免to̍h「一定tio̍h tī得tio̍h赦免ê人性命中被複製」，hō͘「禧年ê赦免tī耶穌同在ê國度裡成做可能」。


願你我靠主ê恩典，ē tàng無koh對bat得罪á是iáu teh得罪咱ê人硬心，mā用憐憫ê態度待人；m̄ nā tùi傷害ê監牢ē tàng解放，mā tùi赦免中真實體驗tio̍h kakī是得tio̍h「有效ê憐憫」，因為祂ê憐憫「ē tàng hō͘人更新變化」[18]！


註： [1] Mitsael J.Wikins博士著《馬太福音（卷下）》，漢語聖經協會，2016年，頁744。

[2] 洪仲清臨床心理師，〈你身邊有無hit種「善良婊」？〉，20210322。

[3] Peter H. Davids & F. F. Bruce &Manfred T.Brauts合著《聖經經典500問：一套以提問出發ê註釋冊（新約篇）》，校園冊房，2021，頁60。

[4] R.T.France博士著《丁道爾新約聖經註釋：馬太福音》，校園冊房，1996，頁312。

[5] 曾思瀚博士著《壞鬼譬喻：馬太福音篇》，基講出版社，2015，頁126。

[6] D.A.Carson博士著《馬太福音》，美國麥種傳道會，2013，頁350~351。

[7] Dooglas R.A.Hare教授著《解經講道註釋 ：馬太福音》，台灣教會公報社，2010，頁85。

[8] N.T. Wright博士著《馬太福音，真是這樣？！（下）》，友友文化，2005，頁60、92。

[9] Darrell L.Bock博士著《路加福音》，漢語聖經協會，2008年，頁334。

[10] David L. Turner博士著《房角石聖經註釋叢書：第十一卷上：馬太福音》，恩道出版，2019，頁166。

[11] D.A.Carson博士著《主耶穌kah神ê國度》，美國麥種傳道會，2003，頁115。

[12] Mitsael Green，牛津威克里夫教學廳資深研究員）著《聖經信息系列：馬太福音》，校園冊房，2009，頁322323。

[13] John Stott牧師& Dooglas Connelly合著《耶穌ê邀請：kah斯托得做伙讀peh山寶訓》，校園冊房，2019年，頁118。

[14] 黃漢輝博士著《Kah人同在ê彌賽亞君王：馬太福音析讀（卷下）》，基道出版社，2016，頁43。

[15] Mitsael J.Wikins博士著《馬太福音（卷下）》，漢語聖經協會，2016，頁744。

[16] Mitsael J.Wikins博士著《馬太福音（卷上）》，漢語聖經協會，2016年，頁310~311。

[17] Gregory A Boyd教授& Edward K.Boyd合著《信心ê tiô跳》，1999，頁4647。

[18] Klyne R. Snodgrass博士著《主耶穌ê譬喻》，美國麥種傳道會，2013，頁172173。

圖説： 《惡僕》（The Unmerciful Servant），Eugène Burnand。（圖片提供/www.eugene-burnand.com）