《Kah陳小小做伙讀台語》

 | | | 轉寄

問題是kah上帝ê關係，卻m̄是神學無夠

作者 洪奕蕾、張法芸，台譯：Lîm Tsùn Io̍k 2021.11.21

陳小小踏話頭：我ê信仰經驗是gín'á跟tòe天父上帝ê經驗。

過程中，gín'á sù常m̄ bat阿爸ê心。Gín'á受氣阿爸無照kakī ê想法來。 M̄ koh照kakī ê想法來，ná親像gín'á想講ánne食飯tsiah tio̍h，卻食kah滿四kè，霧sàsà。氣阿爸，氣kakī。

信望愛電子報主打文咱來lio̍há看輔導ê過程。並m̄是每間教會á是團契lóng有夠額ê輔導資源。Á我tsiah是tī祈禱安靜中，kah上帝對話，kā kakī抽離kakī，kakī kah kakī對話。

Ná親像「陳鳳翔，妳是án怎一定tio̍h hō͘ kakī tsiahni̍h無閒？」「陳鳳翔，妳真正是teh致意啥物？」

Kakī kah kakī對話有一个好處是，thang問kah真利，直探罪ê核心。M̄免致意講話siuⁿ過直接ē傷害tio̍h kakī。這是其他輔導辦bē到ê tāitsì；別人輔導總是beh hō͘被輔導者留面子。Tī kah上帝、kah kakī ê對話了後，我有時ē哭起來，tī主內面得tháu放。


現代人ê問題是tsiah个靜觀默想ê時間，大部分lóng被工作á是3C娛樂佔滿。「咱tio̍h盡力進入tsit个安息」（希伯來書4:11）


【問題是kah上帝ê關係，卻m̄是神學無夠】

作者:洪奕蕾、張法芸


一位女士經過醫生診斷患憂鬱症。她頭一pái來輔導ê時，足想beh知影kakī是m̄是thang kah in翁離婚，因為伊欺騙她，hō͘她憂鬱到tio̍h看醫生ê程度。Tī講述kakī問題ê過程中，她講，「若是ē tàng有koh khah tsē ê上帝thang學智識，kakī to̍h bē做出錯誤ê決定，mā bē bôtshái三個月ê時間lóng tehtaktîⁿ tsit个問題。」


神學以外ê問題




這是一个需要注意ê關鍵細節：她kā kakī「對離婚ê滾絞kah考慮」kah「無夠額ê上帝thang學智識」聯結做伙。所以tī kah她對話ê過程中，需要挑戰她kah主ê關係，若無，她真oh看見kakī ê滾絞並m̄是因為tùi神學智識無夠，卻是kah上帝ê關係有出問題。


Tī談到她kah上帝ê關係是án怎ê時，她想講iáu ē tàng：「我祈禱、讀經，而且ta̍k禮拜lóng參加主日崇拜。」真明顯tsiah个tāitsì她lóng有做，m̄ koh，她ê問題並無因為ánne來得tio̍h解決──tsit个狀況mā發生tī真tsē基督徒ê身tsiūⁿ。續落來，她koh真緊承認，kakī hit段時間kah主ê關係已經有一點á距離；像講，她ē hō͘ kakī維持某種程度ê無閒狀態，to̍h免為kakī 無盡力，到主ê面前teh感覺罪過。


Tsit个時tsūn咱該án怎回應？「Tùi今á日暗時開始，tio̍h確定kakī睏前ē用時間來到上帝面前。」Tsit个建議真好，m̄ koh，她kám做ē到？ Á是咱tio̍h提醒她：「妳無kā上帝khǹg tī siōng優先ê秩序上。」事實上，她真有可能已經知影tsit點，所以tsiah ē感覺有罪惡感。


智慧ê做法kiámtshái是，應該問她：「是án怎一定tio̍h hō͘ kakī tsiahni̍h無閒？」她講kakī其實知影án怎做tsiah tio̍h，m̄ koh卻無想beh去做，所以to̍h想beh迴避面對上帝。


Tsit時，咱thang講kóa啥物？「妳無需要閃避上帝，因為祂是無所不知ê。」話是ánne無m̄ tio̍h，m̄ koh，這kantaⁿ是hō͘她一个正確ê神學答案，無一定ē tàng tī她真實ê光景中tú tio̍h真實ê她。


事實上，她無想beh面對上帝ê原因，無一定kah她是m̄是知影某一个神學觀點有關係，卻是kah她生活中ê滾絞有關係。


深入問題根源



Tī一kóa對話了後，她忽然哭出來，她講kakī是teh對上帝受氣，而且她知影kakī無應該ánne，因為她知影上帝ê旨意永遠bē m̄ tio̍h。M̄ koh，她ê頭殼to̍h是無辦法m̄去想，是án怎無好ê tāitsì常常ē發生tī她ê身tsiūⁿ；了後，為tio̍h kakī有ánne ê意念kah感受，她koh感覺真有罪惡感。


Tsit時，咱應該án怎來理解她？她已經努力hō͘ kakī繼續去教會、祈禱、參加小組──m̄ koh，她對上帝受氣。了後，因為已經學tio̍h神學智識，她koh強迫kakī m̄ thang受氣，因為上帝是完美ê、聖潔ê，她無應該對上帝受氣──m̄ koh，她看見kakī的確to̍h是tsit个款式。


Á若是咱無開始往「她kah上帝ê關係」tsit个方向談，她bē講tio̍h tsiah个tāitsì，她iáu teh想講kakī ê滾絞，是因為無夠額神學智識。


她續落來koh講：「因為過去上帝tī一kóa tāitsì頂面無看顧我，所以，我無確定祂tsit pái kám ē khiā tī我tsit pêng。妳看，tsìn前我mā ē祈禱，而且求上帝引tshōa我，m̄ koh siōng尾，我iáu 是受傷。所以tsit pái，理性上我知影祂ē看顧我，m̄ koh tī心裡，我無確定。因為祂是我ê上帝，我bē tàng去懷疑祂是m̄是ē看顧我，所以，我to̍h用另外一種方法──tshòng hō͘ 它清楚koh khah tsē神學觀點──來處理我對上帝ê懷疑。」


她對上帝ê看法內面，是m̄是kiámtshái有錯誤ê觀點？是m̄是有啥物無好ê神學需要被糾正？無m̄ tio̍h。M̄ koh，準講她ê神學智識增加，有夠額來hō͘她看見kakī kantaⁿ學tio̍h關係上帝ê一半真理，á是有夠額來hō͘她看見tsìn前ê教會無強調神學ê教導影響她，有時她iáu是ē感覺無法度確定kakī對上帝ê信仰是m̄是正確。Á kantaⁿ單靠tsit點，to̍h有夠額來kā她ê個人生活tshòng kah亂七八糟！


咱應當明白，符合聖經ê輔導無應該kantaⁿ是簡單勸人讀經、祈禱、團契、接受聖禮而已；mā m̄是機械式來收集聖經金句，the̍h來提醒人做tāitsì kah做人應該遵照啥物準則。符合聖經ê概念，kiámtshái ē被過頭簡化kah歸納，suah致使變成臭酸話；to̍h kahná bē符合聖經ê概念，mā kiámtshái ē快速變成複雜難解ê神祕道理。上帝所賜符合聖經ê智慧原則看起來kahná真簡單，thang用來探討、理解複雜ê事物，卻m̄是一種m̄ tshap事物複雜性、過分簡化ê原則。


有智慧ê輔導



輔導本身to̍h是一个神學課題，是實踐性ê神學；á生活ê ta̍k个面向lóng kah上帝有關係，所以，有智慧ê輔導定tio̍h來自一種看待生活kah性命ê神學方式（mā to̍h是咱ê世界觀），thang hō͘咱知影應該án怎來理解人、問題kah解決之道。


有關輔導事工ê本質、目標kah處理問題ê本質，以及tio̍h用啥物理念來處理問題等等，歷史上有真tsē信經、信條kah其它智慧著作，已經有表達教會所同意ê生活智慧；聖經輔導ê觀點、目標kah實踐mā lóng應該kah in連結。


「萬物lóng是tùi祂hia來，koh óa靠祂。」（羅馬書11:36）人ê生活完全tùi上帝來，因為ánne，輔導一定是神學性ê。聖經輔導委身tī用基督ê眼光看所有tāitsì，mā委身tī活出基督。基督是成做肉體ê道，顯明上帝ê榮光hō͘咱看，而且ài咱藉tio̍h模仿祂來學習óa靠上帝。咱活leh ē看見真tsē tāitsì，m̄ koh對環境ê解說，在tī咱án怎來理解上帝kah祂ê話語。


聖經視角ê透鏡非常廣闊、闊大、深刻koh真實！Á輔導ê工作，to̍h是beh透過tsit个透鏡，kā經文真óa意來kah被輔導者ê生活聯結做伙。基督啟示出聖經有一條大故事ê線：上帝ê創造、人類ê墮落犯罪、上帝偉大ê救贖計畫，kah所有tāitsì最後ē被成全──這to̍h是咱ê透鏡。任何智慧ê事工，lóng tio̍h透過tsit个故事線來理解，特定ê經文kah個人獨有特殊ê人生經歷。輔導過程中，個人化、自然流通ê智慧交談，就ánne tùi整體全部ê聖經神學發出來。


這以外，kah聖經有關ê事物無一件是抽象ê，ta̍k項tāitsì lóng thang連結到個人ê性命kah生活。親像講，聖經是對特定處境下一个特定ê人群ê記載，突出in對特定事件ê具體反應；á這mā是聖經輔導ê工作之一。咱委身tī幫贊被輔導者看見hit位名叫耶穌ê人，mā幫贊in看見聖經中ê以色列人kah咱之間ê關聯是gōani̍h’á親密。


雖然m̄是每一个人lóng需要成做輔導員，m̄ koh，其實每一个人ta̍k時刻lóng teh做某一kóa輔導。甚至thang講，每一pái咱人開嘴講話to̍h是teh輔導──á是teh做起造人ê輔導，á是teh做拆毀人ê輔導。聖經本身ê內含有關係輔導方法論ê一般性指導方針；tī tsit个方針之下，koh許可輔導方法ê個人化kah多元化。


聖經輔導致力tī用智慧kah疼心，kā上帝包含一切ê真理「豐富á bē貧乏」，「簡明á bē簡化á是複雜化」，「koh khah正確而且koh khah少錯誤」，來應用tī真實、複雜ê生活內面，應用tī真實、複雜ê人身tsiūⁿ。上帝ê話語呼召咱，tio̍h koh khah有智慧來使用óa意ê實際方法，來處理特定ê人所面對ê特定問題。


**本文由性命樹聖經輔導研究中心授權刊登。
●伸長閱讀

《聖經輔帶入去門：輔導原則kah實踐ê基本指南》 （Introduction to Biblical Coonseling），偉恩‧麥克著，江淑敏譯， 中華福音神學院出版社，2003年。

圖片提供/123RF