《《白袍．白杖》盲人醫師自傳》

 | | | 轉寄

《白袍．白杖》第五章 盲人學校

作者 Dr. David Hartman, MD, 台譯：宋麗瓊、林俊育 2018.08.19

我tī Overbrook盲校完成三年級ê通學教育，九月了後，拜一到拜五我tio̍h ài開始tòa校。雖然學校kah我ê厝距離無到五哩，m̄-koh，卻ná親像分開ê兩个大陸。起先，我得tio̍h許可ē-tàng每工暗時kah父母通電話，m̄-koh，幾禮拜了後，學校to̍h無koh允准à。Án-ne看起來，我kah-ná siuⁿ過依賴父母，m̄-koh，請會記得我當時tsiah八歲nā-tiāⁿ，而且tú-tú失明，驚惶koh困惑。對我來講，「離開父母」tiāⁿ-tiāⁿ是代表手術、tòa院、乙醚麻醉劑以及專制ê訪客時間。

大多數ê「盲校」lóng規定全盲ê學生tio̍h ài tòa校，kan-taⁿ ē-tàng tī週末會見父母。In ê解釋是，大多數盲童ê父母lóng siuⁿ過照顧in ê殘障兒童，in hō͘ gín-á免除危險，卻mā剝奪gín-á經驗事物ê機會。當gín-á ka-la̍uh湯匙，父母就隨時向前khioh起來，這會hō͘ gín-á tī生理上kah心理上養成依賴性。父母對gín-á ê失明常常有負罪感，因為án-ne，in tiāⁿ-tiāⁿ感覺需要一直滿足gín-á ê各種需求，來當做補償。不幸ê是，hiah-ê關懷最後會hō͘ gín-á bē-tàng喘氣，mā hō͘ gín-á失去活動力。所以，tī理論上，因為學校ê宗旨是beh培養gín-á ê自立kah自尊，所以起碼tio̍h ài tī一禮拜ê主要部分，tī gín-á ê成長上hō͘ in必要ê管制。

這是真趣味ê理論，m̄-koh，我寧可ài hō͘ gín-á通學kah參加夏令營，而且kah hiah-ê hông誤導ê父母協談。我kan-taⁿ ǹg望盲校真正koh khah有挑戰性，koh khah一致kah專業化。（我一定tio̍h ài強調：我ê觀察kah意見只限tī一九五○年代末期kah一九六○年代初期我家己ê學校經驗，並無反映今á日ê Overbrook盲校kah其它盲校；tī過去十年間，視障兒童ê教育顯然有真tsē進步ê趨勢。）

Overbrook盲校當時約有三百五十名學生，男女大約各佔一半；除了一般ê課程以外，新來ê學生每工tio̍h ài上兩pái個別ê點字教學。我真ài上點字課，m̄是因為我ē-tàng透過手指尖讀冊，卻是因為我真kah意我ê點字老師Springer小姐；她充滿熱情，hō͘ 我想beh hō͘ 她歡喜。

M̄-koh，老師中間hō͘ 我印象siōng深刻ê，是Tselli先生，伊是tsa-po͘ gín-á ê體育老師；伊深信（後來我mā深信）失明ê gín-á無應該kā in théng-sēng，嚴格一點á m̄-nā無損害，反tńg是有利益ê。伊用姓來稱呼學生：「Hartman，你tsit-má teh tshòng啥物？」聲調嚴厲，有一點á hō͘ 我la̍k-la̍k-tshuah。以前從來m̄-bat有人叫我「Hartman」，我私下ǹg望伊永遠bē發見我kan-taⁿ是「Dave」，一个猴gín-á而已。伊mā教我相ián，同時hō͘ 我贏ê信心。老父講過，我日後要求正確完成每項tāi-tsì ê性格kah Tselli先生有關係；起碼有間接性ê關聯，he純粹是因為我驚伊。我kah-ná bat tī週末tńg去厝裡向老父埋怨講，弱視者比較khah好運，因為teh做豹形健身（華語ê「伏地挺身」ê時，若是Tselli先生看別ê所在，in就ē-tàng lán-si，暫時歇睏，直到老師o̍at頭過來，tsiah koh再繼續做；m̄-koh，我看bē-tio̍h Tselli先生o̍at頭，所以，只好無停起起落落phah拚做，thiám kah喘phēⁿ-phēⁿ。若是我敢小khóa lán-si一下，我kiám-tshái隨時to̍h會聽tio̍h：「Hartman，你tsit-má teh tshòng啥物？」

Overbrook盲校盡力teh教育學生，hō͘ in 除去盲人ê行為。行路ê時雙手tī頭前摸索是siōng大ê禁忌，其它hō͘人討厭ê行為通稱做「失明症候群」，he是失明ê gín-á tiāⁿ-tiāⁿ有ê行為，親像行路搖擺、頭lê-lê、身軀tńg-se̍h前進。無人ē-tàng確定盲人會有tsiah-ê動作，是因為in看bē-tio̍h，無法度知影「優雅」是啥物，á是是因為in失去視力所發展出來ê自我刺激。

Hō͘ 阮tòa校生敬畏ê Tselli先生，對tsiah-ê行為ê問題並無tùi哲學觀點來思考；伊會命令講：「Mài án-ne，Doltsin，你ê動作hō͘ 我暈船，我無帶暈船藥á！」Tsit位叫做Doltsin ê gín-á，伊行路用拖ê，親像嬰á，á是年紀真大ê老歲á；伊會先向前hua̍h一步，然後kā另外hit腳靠óa過來。我只要聽tio̍h伊ê腳所發出ê摩擦聲，就ē-tàng察覺伊tī附近。伊ê腳kah腿lóng無問題，伊只是m̄-bat看過別人行路ê款式。若是伊一定tio̍h行khah緊一點á，伊to̍h會親像嬰á teh緊行仝款。老師kan-taⁿ會責罵Doltsin，叫伊行khah緊一點á，m̄-koh，根據我所知，in無一个人bat掠tio̍h伊ê腳目，了後簡單koh憐憫對伊講：「Ed，tio̍h án-ne行路。」 體育課是認bat別人ê好所在。Tī比賽ê時，tī pha lìn斗ê時，你會去碰tio̍h人，會去la̍k-tiâu in ê手後khiau，來感覺出in是啥人。我會記得有一个人，伊講話ê聲hō͘ 人感覺好笑。有一工，我lòng-tio̍h伊，la̍k-tiâu伊ê手股頭；我ê手指（tsáiⁿ）掠tio̍h ê m̄是健壯ê筋肉，卻是滿手鬆軟，ná親像水母。經過tsiah tsē年以後，每pái想起伊，我ê記憶m̄是伊hit-ê好笑ê講話聲á是鬆軟ê感覺，mā m̄是伊ê面ê印象，因為我無需要知影伊ê面；我對伊ê記憶是一種影像―水母ê影像。Tsit-ê經驗會特別hiah-ni̍h生動，可能是因為我討厭鬆軟ê筋肉kah siūⁿ過tsē ê肥肉，he是盲童四常有ê現象，因為in tiāⁿ-tiāⁿ hông過度保護，限制in從事體力活動。

因為我自細漢to̍h真愛運動，所以我ê筋肉非常結實；這致使我tī體育課頂面有某種受人尊敬ê地位，雖然我平時因為全盲ê緣故，suah地位真kē。（阮全盲ê兒童tiāⁿ-tiāⁿ hō͘ 弱視ê兒童輕視，in稱呼阮「nih目á」，m̄-koh，阮tsiah-ê「nih目á」卻m̄敢kā in號任何綽號（tshiok-hō）。）

Iáu有視力ê兒童ē-tàng享受地位ê理由真簡單：in有權力；tsit種權力tī用餐ê時發揮kah siōng-kài完全。Iáu有視力ê兒童，準講kan-taⁿ ē-tàng分辨馬鈴薯泥kah小紅莓醬，in mā有機會hō͘ 女舍監指派去分菜。Hit-ê hō͘ 人siàu想ê工作有十足ê特權來命令別人恬去；你無服從bē-sái，因為伊有控制分菜ê大權。

想起tī Overbrook盲校第四年發生ê tāi-tsì，我iáu會感覺痛苦kah五臟糾結（kiù-kat）。當時我是七年級，一koá五年級ê猴gín-á負責分菜hō͘ 我；我實在忍受bē-tiâu tsiah-ê顧人怨ê gín-á，m̄-koh出tī不得已，我iáu是盡量表現恭敬有禮。

當菜盤phâng過來ê時，我問講：「Heh，Mike，今á日咱有啥物菜？」 伊tshèng-kua̍h-kua̍h，ngâu-ngâu念講：「食物。」
「啥款ê食物？」
「To̍h是食物lah，kā我恬去！」

我真想beh kā伊thâi，m̄-koh，我一定tio̍h ài自我克制；伊tsit-ê單純ê命令中隱含一个齣頭（tshut-thâu），就是kā siōng好ê菜kan-taⁿ hō͘ 你一小匙，卻tī你ê菜盤邊á小khóa抹來抹去，hō͘ 舍監認為你已經分tio̍h真tsē，了後就kan-taⁿ留hō͘ 你凍霜ê一頓。另外一種甚至koh khah有威力ê武器是餐廳規則：所有khǹg tī菜盤頂面ê食物lóng tio̍h食清氣。若是你kah我仝款無ài食pue-lêng-á（華語ê「菠菜」），伊就會惡意kā pue-lêng-á ǹg你ê菜盤倒。所以，分菜ê人總是驕傲自大，tshèng kah 掠bē-tiâu，因為伊掌握七个無助兒童ê生死大權。

Kah任何社會仝款，Overbrook盲校ê學生mā照in ê地位階級koh分做幾个階層；若是你屬tī低級ê全盲生，án-ne，若想beh晉升到khah koân ê階層，你tio̍h需要有一个弱視ê朋友關照你，去化解困難。M̄-koh，m̄是所有ê弱視生lóng有能力；有一kóa弱視生是真ku怪ê人，in hông théng-sēng、軟弱、粗魯，hō͘ 所有ê人排斥，致使in ê地位比全盲生koh khah kē。

我ê阿姊Bobbie大約十五歲ê時，有一pái她來探訪我，引起一位大約十七歲，名叫做Ken ê弱視生ê注意。Ken去迷tio̍h她，因為án-ne，伊當然kā我當做黃金看待。我會記得有一工，當我坐tī校內hō͘ 阮稱做「修道院」ê一條長椅頂面ê時，有一个khah tsē歲，ta̍k工欺負人teh過日子ê koân大koh肥tsut-tsut ê弱視生開始欺負我。伊kā我tshoh，koh嘲（sau）弄我，因為伊知影我phah bē-tio̍h伊，若是我口頭kā伊罵倒tńg去，伊ē-tàng真簡單to̍h kā我phah kah碎碎。我ê朋友Ken行óa過來，伊kah hit-ê惡霸仝款看會tio̍h，m̄-koh，伊比hit-ê惡霸年紀khah大，而且漢草mā大。Ken就表現kah真友善，過去kā惡霸ê肩胛頭phah-phah-.leh打招呼；只是有一點á hō͘ 人感覺siuⁿ過熱烈。

「Haih，你好！Hngh？你kah意我ê小弟Dave，hngh？」了後koh「友善」出力kā伊phah一下肩胛頭，了後koh phah一下。

我就坐tī hit條長椅頂面，欣賞每一个時刻。Tsit-ê教示非常明白―我是bē hông欺負ê。

Beh ài Ken khiā tī我tsit pêng tsìn前，我一定tio̍h ài學會曉使用外交手段，這hō͘ 我tī以後幾年中間非常好過日。Tī我五年級ê時，我惹來一个敵人，當時我想bē出原因。伊漢草細，倔強（khut-kiông）koh真神經質，視力真好，好kah ē-tàng讀大字體，m̄免使用點字，差不多ē-tàng去讀一般學校。我聽講伊是來自一个恐怖ê家庭，這可能致使伊真ài利用視力好ê優勢，來欺侮比伊khah koân大，koh khah強壯ê人―我。伊會忽然tī走廊kā我偷襲、毆打，然後phùn走去。伊知影伊不管時to̍h ē-tàng kā我欺侮，而且mā確實án-ne teh做。我從來mā m̄-bat感覺tsiah-ni̍h無助koh無能過。有一工，我擋bē-tiâu，只好向老師報告，老師當然叫伊停手。M̄-koh，一點鐘久了後，伊koh來偷襲我、phah我，了後走開。

我真想beh kā伊thâi死，我知he是kah-ná桌項ni柑hiah簡單ê tāi-tsì，因為伊ê漢草比我細真tsē―只要我ē-tàng la̍k-tiâu tsit-ê oh得掠tio̍h ê猴gín-á。我心內teh按算beh phah斷伊ê手股頭ê方法。我ê想法是，la̍k-tiâu伊ê手股頭，出力向我ê腳頭u tshi̍h落去；我想kah非常認真，kah-ná真正聽tio̍h伊骨折（tsi̍h）ê聲音。M̄-koh，當伊ê手股頭痊癒（tsoân-jú）了後，伊iáu是會koh來phah我，所以，我一定tio̍h想出一个辦法來kah伊達成協議。

有一工，我tshōe-tio̍h伊食飯ê所在，就去坐tī伊ê邊á，kā伊講：「注意聽，我beh kah你講hō͘ 清楚。是啥物tāi-tsì hō͘ 你對我hiah-ni̍h受氣？」我會記得伊埋怨講，我是宿舍內ê大人物，是舍監ê寵兒（thióng-jî），koh有一kóa hō͘ 伊gē-siâu ê該死ê tāi-tsì。講清楚了後，阮成做朋友―加減ē-tàng án-ne講。

我想beh用koh khah直接、koh khah男子漢ê方式kā伊修理，m̄-koh，我做bē到。盲人to̍h是無法度照家己ê意思四界去kā人比中指，講lah-sap話。我用siōng痛苦ê方法了解tio̍h：我是由在人排比ê人；除了kah我仝款失明ê人以外。

幾nā年了後，我已經是Gettysburg大學四年級ê學生，一个koh一个醫學院拒絕接受我ê入學申請，hō͘ 我ê身心極端痛苦。Hit時，一个學校ê組織為tio̍h當時ê名律師Ralph Nader舉行一个午餐會，我設法去坐tī伊ê對面。話題來到我ê困難ê時，伊同意既然我ê成績有夠thang進入醫學院，in拒絕我ê原因真明顯是因為我是盲人。「你知，」Nader律師講：「我想咱ē-sái kā它成做一个案例，咱kiám-tshái ē-tàng透過法律來抗爭，hō͘ 你入去醫學院。」

我興奮kah嘴笑目笑，答應tńg去了後beh隨時寫phue hō͘ 伊，kā伊講所有重要ê經過。M̄-koh，後來我無寫。因為我真緊to̍h意識tio̍h，準講Nader律師kah法院ē-tàng hō͘ 我進入醫學院，m̄-koh，只要學校想beh，in一定有辦法hō͘ 我考試無及格來kā我退學。我會hō͘ 學校百般刁難，tú親像tsìn前hō͘ hit-ê可恨ê gín-á攪擾仝款。Tī法庭上勝訴並m̄是唯一ê辦法，我決定beh用家己ê方法來解決。

所以弱視生管轄全盲生，筋肉健壯ê盲生管轄體弱無力ê盲生，有朋友ê盲生管轄無朋友ê盲生；而且階級制度不斷下降，可能達到無底深坑。 不管盲生是án怎安排in家己複雜ê階級制度，thang去管別人á是hō͘ 別人管，最後ê權力tī tó位是無啥thang懷疑ê；舍監掌有最後ê權柄。而且我認為，舍監mā有in家己ê階級制度。若是án-ne，我心目中siōng有權力ê人，一定是hit位hō͘ 人難忘，我kā她稱做Reinhold女士ê人。我真遺憾，她bat是我ê舍監。她是一个威風凜凜ê人物，一个約五十歲ê寡婦。 我想，一般人lóng認為―tī真tsē情況下lóng真正確―hiah-ê會盡她á是伊ê一生來關懷可憐ê小盲童ê人，in大部分lóng是有同情心、無私koh有社會良知ê人。總是，tsit種人mā有可能懷有一種khah無hông人發覺ê可能動機，to̍h是去掌控hiah-ê容易順從ê受害者；甚至是kā家己殘酷ê行為隱藏tī行善之下。現代文學中，kā tsit種性格描寫kah siōng深刻ê人物之一，to̍h是《飛越杜鵑窩》（One Flew Over the Cuckoo’s Nest）內底，一个名叫做Rattsed ê護士（譯註：Nurse Rattsed，小說人物，是一个冷酷無情，掌控精神病人ê女暴君)；tsit種人tī所謂ê助人行業中tiāⁿ-tiāⁿ lóng看會tio̍h。

我認為，我愛Reinhold女士ê原因，kah hiah-ê被監禁tī死亡集中營ê人熱愛in ê獄卒是仝款ê。我是一个驚惶ê gín-á，她卻是絕對ê權威；我tī成長過程中切望hō͘ 人歡喜，她卻意愛別人來hō͘ 她歡喜。我一定極機巧koh極早to̍h發覺tio̍h：若無選擇疼她，to̍h是beh hō͘ 學校kah宿舍ê生活忽然變kah非常艱苦。

我頭一pái感覺tio̍h Reinhold女士無所不在ê權力，是有一工她hit-ê phòa-tshe̍h koh tshò耳ê聲忽然出現tī男浴間：「Lín慢sô-sô是teh tshòng啥物？啥人tī hit間豬寮內？Tó一隻豬tī hia teh搖搖pái-pái？」

我從來m̄-bat聽人án-ne使用「搖搖pái-pái」tsit字，以後mā lóng m̄-bat聽過，m̄-koh，tī阮hit間高尚ê盲校裡，「搖搖pái-pái」tsit字卻不時tī空中流動，充滿迷惑、不祥kah禁忌ê意味；這是Reinhold女士對語言ê獨特貢獻。

雖然我m̄是hiah-ê hông指控是tī豬寮內ê人，m̄-koh，她hit-ê hō͘ 人tio̍h驚ê指控卻hō͘ 我隨時充滿驚惶kah罪惡感。我確信她知影―而且會kā我ê秘密洩漏hō͘ 大家―tī過去一兩年，我有一个邪惡ê快樂方式，to̍h是ài thǹg腹the̍h倒tī我ê眠床（tī厝裡，絕對m̄-bat tī
Overbrook盲校，絕對bē án-ne），用我hit粒溫暖koh友善ê泡棉枕頭來摩擦身軀。有一工，我hō͘ 老母發見，她講：「Dave，你teh tshòng啥物？」她ê話證實我是teh做大錯特錯ê tāi-tsì。我無確定是m̄是bat聽過謠傳講，若án-ne做，手心會生出毛來；謠傳當然無講，若是我siuⁿ tsia̍p án-ne做，目tsiu to̍h會變tsheⁿ-mê。M̄-koh，我真正相信，只要我若án-ne做，第二工to̍h會過kah真慘，而且果然，第二工mā的確會發生無好ê tāi-tsì。我常常án-ne做，所以悲慘ê tāi-tsì mā不斷teh發生。一个有感知ê少年人kám iáu需要啥物進一步ê確證？

Reinhold女士知影tsit項tāi-tsì！我感覺家己tshōe無所在thang bih。Reinhold女士睏tī宿舍siōng後面ê一間房間，她對夜間隱私ê要求，是kan-taⁿ ē-sái關她房間ê紗窗門；he對阮ê隱私根本都無啥物路用。阮ê起床號是她ná虎豹母ê大細聲hiu：「我一點á都無睏，因為tsit隻大豬！」有時我知影她teh指啥人，有時我m̄知影。「伊總是搖搖pái-pái，kui暗lóng teh搖動伊ê眠床。」Hit時，我從來m̄-bat懷疑過，她tī hiah-ni̍h遠ê所在，是án怎ē-tàng聽kah hiah清楚，m̄-koh，我kah hit个犯人tòa仝一間房間卻啥物都無聽tio̍h。

Beh保持Reinhold女士對阮有好ê評語，jú來jú成做非常緊急ê tāi-tsì。Tī她指控一个tsa-po͘ gín-á是「搖搖pái-pái」ê人以後，其他ê人to̍h會開始罵伊是「搖pái ê人」；m̄是kan-taⁿ嘲弄，是正經ê。Koh khah恐怖ê是，tsa-po͘ gín-á會任命家己成做治安人員，去掠hiah-ê iáu未hông指控ê人，結果形成一種競（kēng）賽。我kám ē-tàng閃避受指控，以及hō͘ 想像中無法度應付ê結局所侮辱，直到我成做她ê執法人員？ 我做到à。七年級ê時，我成做她ê「tsa-po͘ gín-á頭」之一，來管教年輕koh iáu未教乖ê gín-á。我感覺家己終其尾等到tsit工ā；她頭一pái對我講：「Hartman，有人tī洗浴盆裡搖搖pái-pái，我ài你去kā伊教示一下，而且確定伊有受tio̍h洗冷水浴ê處罰。」M̄-koh，她tiāⁿ-tiāⁿ無滿意委派責任；她會家己衝入去浴間，la̍k-tiâu hit-ê犯人，koh親身督促伊洗冷水浴。

Reinhold女士kah她對道德純潔ê熱心，可能to̍h是hit个tī走廊偷襲我ê猴gín-á tiāⁿ-tiāⁿ tshōe我麻煩ê原因。我知影―其實每一个人lóng知影―對她來講，伊就是一个siōng搖搖pái-pái ê人。有一工，tī體育館裡，出tī擔心伊ê未來，我問伊講；「你是án怎ài搖搖pái-pái？」

「因為我歡喜。」
「你會kā你ê一生舞bái去。」
「是án怎leh？He ná會傷害tio̍h我leh？」

我m̄知tio̍h tùi tó位開始；你beh án怎處理一个六年級生ê無知leh？雖然我是七年級生，我mā m̄知tio̍h kā伊講啥物；我只有一般ê概念，m̄-koh無確實ê證據，thang kā伊講he會hō͘ 你成做一个強姦犯，á是其他啥物款人。所以，我盡我所知ê向伊解釋講：「這會kā你以後kah tsa-bó͘人ê性關係舞bái去。」伊無論如何lóng m̄聽我ê苦勸，koh決定beh kā我修理，因為伊認為我是Reinhold女士訓練出來ê寵（thióng）物。

七年級ê時―我認bat Reinhold女士ê第三年―我受tio̍h一个hō͘人tio̍h驚ê覺悟所衝擊：我一點á to̍h無愛hit-ê舍監；我坦白面對事實：我恨她。 今á日，我有一種持久koh根深柢固（kin-tshim-tì-kò͘）ê懷疑，hiah-ê人ê一生是藉tio̍h行善之名，kā in家己有問題ê身分隱藏tī社會計畫kah制度化ê同情中間。Tī「幫助」盲人ê世界，kah其它「幫助」人ê世界，行善有時kan-taⁿ是一種掩護，通過建立家己ê優越感，來控制kah剝削（pak-siah）hiah-ê無助kah值得同情ê人。每pái我鼻tio̍h tsit類助人ê ài管閒á事ê人ê時，我to̍h會看tio̍h tsit類極端koh怪孽（gia̍t）ê奉獻方式，koh會想起親愛ê、可愛ê、關心人ê Reinhold女士，她ê一生lóng致力tī m̄ hō͘ 阮做阮家己。

我所有hiah-ê會hō͘ 人頭眩目暗ê恐怖故事，lóng tio̍h感謝Overbrook盲校kah我tī hia度過ê四年。其中一个無tè比ê經驗―後來我tī高中、大學kah醫學院，lóng m̄-bat koh tú過ê―to̍h是平等ê權利、完全ê接納，以及所有ê人lóng接受平等ê待遇。失明並無hō͘ 我變kah特別，我m̄免去應付別人ê同情；我想我寧可應付殘忍，卻m̄是同情。成做一个殘酷行為ê受害者，至少ē-tàng hō͘ 我―若是我án-ne選擇―感覺家己比hit-ê想beh對我表示優越感ê人koh khah優越。

Overbrook盲校教我tī明眼世界中ê盲人生活ê基本技能，he是一般學校學bē-tio̍h-.ê。我學習洗衫褲、穿衫、khoán行李、避免phàng見物件á是bē記得物件，koh學習讀kah寫點字。我有一位代課老師真tsán，而且常常鼓勵學生；tī學校ê生涯中，啥人ē-tàng算出一个、兩个，á是極加三个會伸展學生心智ê老師neh？

我無法度完全理解我五年級老師—Dave Rudolph先生ê態度，m̄-koh它點to̍h我ê性命之火。我kan-taⁿ beh講一項tāi-tsì：有一工，伊帶一kóa大塊ê巴沙木（譯註：balsa wood，一種輕質柴枋）kah一kóa尖利（lāi）ê雕木刀來。向危險挑戰是一項hō͘人la̍k-la̍k-tshuah ê tāi-tsì。事實上，無人割斷手指á是流血致死；雖然有一kóa小割傷，m̄-koh，我想he是beh知影刀á是m̄是尖利ê siōng好ê方法。伊koh有帶一堆雕刻模型來，thang hō͘ 阮摸，koh kā它複製。我選擇雕刻一隻狗á。Rudolph先生會tī一塊柴枋ê頂面刻出一个凹槽（au-tsô），tī側面mā刻出一个凹槽，了後伊教我講；「Tsit-má kā tsit兩條線之間ê部分lóng刻掉。」Ai-iah，結果真正是變成一隻狗á。我tsit-má猶原kā它保留leh，而且真珍惜它。Tī課程結束ê時，伊頒發雕刻獎，而且是我得tio̍h獎；我想he是因為我一開始to̍h是伊siōng kah意ê學生。伊mā是我siōng kah意ê老師，有一部分是因為伊ê名mā叫做「Dave」。

Koh來to̍h是阮ê童子軍團，he幫贊備辦我後來成做正式ê童子軍。Iáu有，Overbrook盲校kah Tselli先生教我相ián，he對我後來ê學校生涯kah人格發展有發揮重要ê作用。

教會kah主日學是我無因為失明suah有所改變ê生活部分。阮ê青年團契每禮拜日暗時聚會，mā不時tī禮拜五暗時交誼，做一kóa óa近罪惡ê tāi-tsì，親像sńg se̍h矸á（譯註：spin the bottle，一種團體遊戲；se̍h一支矸á，矸á停ê時，se̍h ê人tio̍h ài tsim hō͘ 矸á嘴指tio̍h ê人）。我tī Overbrook盲校讀六年級ê時，團契選我做會長，he是我所ē-tàng想像ê siōng hō͘人興奮ê tāi-tsì。我懷疑團契會員是認為有一个盲人會長是一項真phāⁿ ê tāi-tsì。M̄管in ê理由是啥，我受tio̍h大大ê扶thán。我真ài做主席主持會議，m̄-koh，有一个暗時，我kā議事槌lak落去土腳，我彎身去khioh，嘴suah去lòng-tio̍h講台。我ê嘴唇皮破，血流kah kui四界。會友lóng非常驚惶，我mā感覺真làu-khùi。我感覺家己ná親像是我siōng討厭ê hit種盲人白癡。

每禮拜一早起beh離開厝去學校ê時，我會欣羨Bobbie ē-tàng kui禮拜lóng kah父母tòa做伙，tiāⁿ-tiāⁿ感覺家己kah-ná hông剝奪某種珍貴ê物件。記憶中我m̄-bat懇求父母hō͘ 我去讀一般學校；認為讀盲校對我有利益，he只是阮全家ê一種假設。

前景是hō͘ 人興奮ê，m̄-nā是因為he表示ē-tàng tòa tī厝裡，每禮拜七工lóng是家庭ê一份子，而且koh有象徵性ê理由；tsit-ê理由最近tsiah漸漸明朗。我無確定家己是m̄是已經完全除去三年級ê時ê幼稚念頭，認為ē-tàng透過意志kah祈禱來挽回我ê視力；意思to̍h是講ē-tàng離開Overbrook盲校。四年後，我認為離開Overbrook盲校ê意思是回歸正常，m̄管án怎，我已經無親像以前hiah-ni̍h-á盲目ā。