《主編e5話》

 | | | 轉寄

感恩kap期待

作者 Tsuniok 2006.12.31

感謝上主ê恩典帶領，咱台語信望愛tī大家ê努力phah拚之下，已經深受各界人士ê肯定。每工參觀ê統計，tuì今年2006年正月ê 380人次增加到十二月ê 1,250人次，達到一年3.3倍ê生長率，歸榮光hō͘咱ê上主！

咱iáu有生長ê空間，因為咱tī教育部公布台羅拼音方案了後ê一禮拜中完成台羅版ê選讀，成做第一個台羅版網站http://tailo.fhl.net，並受tio̍h教育部ê獎助。咱tio̍h繼續開發台羅版ê工具kap影音短片，中山醫學大學台語系學生也有成立工讀團隊，bueh來tàu腳手完成tsiah-ê khang-khuè。

客語信望愛mā是咱今年度ê努力目標，tī邱善雄牧師ê協助kap支援之下，咱已經有「客語影音教學專區」。客語白話字kap台語是仝一套羅馬字系統，目前咱已經完成「Kài輕鬆客語漢羅輸入法」，其他如全羅轉漢羅、漢羅轉全羅、華語轉客語ê詞庫需要來建立，這需要客家人來幫助，若有使命感bueh tàu腳手ê客家人，請e-mail( limtsuniok@gmail.com) kap我連絡。

早期長老教會傳教師m̄-nā為明眼人設計白話字，也有為盲人設計白話字點字系統，有出版過白話字點字聖經kap聖詩，但目前全世界可能只有tshun雙連教會ê二三十個盲人朋友teh用。我開始參與台語文運動ê時就有一個夢：將白話字點字kap華語點字(金點一號)仝款，ē-tàng tī電腦頂面明盲對話。會記得hit當時我tī台語網發佈tsit-ê夢，有得tio̍h鄭良偉教授ê鼓掌，kan-ta伊一人對我回應一句話 “ tsán! ”，hō͘我永遠bē-sái放棄tsit-ê使命感。

Taⁿ我已經完成台羅版白話字點字對照表，ǹg望普立爾文教基金會、淡江大學盲生資源中心kap信望愛資訊文化藝術基金會聯合起來，ē-tàng緊來完成tsit-ê有歷史性ê任務，hō͘咱ê盲人朋友mā有使用電腦來讀寫台語文ê機會。

Tsit套明盲對話ê電腦軟體完成了後，就有可能將已經翻譯好勢ê「聖經現代台語譯本」轉譯做白話字點字聖經，hō͘盲朋友ē-tàng kap咱仝款讀tio̍h現代台語譯本ê聖經，願一切榮光歸hō͘主！

2006年已經進入尾聲，咱有感恩kap期待，明年2007年就會koh-khah好！願主繼續引tshuā帶領。