《主編e5話》

 | | | 轉寄

母語ê基本概念──二月二十一日世界母語日

作者 Tsuniok 2007.02.18

1) 母語是指一個族群源起頭ê共同語言，母親若m̄是使用伊ê族群原來語言，to̍h bē-sái講hit-ê母親講ê是母語。

2) 母語m̄-nā是人際溝通ê語言，koh-khah重要ê是對族群ê感情。所以殖民者bueh滅一個族群，lóng先滅伊ê母語。

3) 自然會曉ê母語是指講kap聽，無包括讀kap寫；bē曉讀kap寫家己ê母語，mā是母語ê文盲。

4) 母語ê講kap聽是環境ê培養，m̄是用教ê,所以家庭、教會tio̍h使用母語。「年輕人+母語禮拜=教會有未來」。

5) 母語權是siōng基本ê人權，所以做父母ê m̄-thang剝奪咱第二代ê母語權。

6) 母語是咱人類siōng寶貴ê共同文化資產，聯合國教科文組織(UNESCO)呼籲各族群拯救teh-beh死亡ê語言，所以咱台灣人有責任來保存咱家己ê母語。

7) 各族群之間tio̍h互相欣賞並尊重其他族群ê母語，「國語政策」是母語ê殺手，mā是族群衝突ê原兇，咱m̄-thang koh做hit-ê原兇ê幫兇！

8) 族群有家己ê母語tsiah活tio̍h有尊嚴，台灣目前ê情形是「無中國人ê中國統治」，活kah無尊嚴koh真鬱卒。

9) 母語是族群文化ê傳承媒體，失去母語就無法度kā咱族群文化傳承落去。

10) 「環保」以外iáu-koh有一個真重要ê「語保」，家己ê母語環境tio̍h靠家己來保護。