《主編e5話》

 | | | 轉寄

少年人＋母語禮拜＝教會有未來

作者 宋信樂 2007.03.18

Bat有關注母語ê學者強調：「失去母語，就失去民族ê根。」筆者m̄-nā煩惱台灣文化漸漸衰微，mā掛慮阮/咱台灣基督長老教會優良ê信仰傳統teh-beh流失，因此，「好膽」tī-tsia呼籲各教會正視禮拜語言ê問題。

Tsit幾年來，真tsē教會lóng teh成立華語禮拜，理由免講lóng是「發現少年人流失」，「少年人聽m̄-bat台語」，「將禮拜程序簡化，hō͘少年人參加」等等。我想tsiah-ê lóng是關心教會發展koh真用心思考ê人所提出ê觀察。無m̄-tio̍h！「少年人流失」ê現象的確是咱長老教會宣教上一個值得注意ê現象；但是，少年人流失ê因素，除了禮拜語言之外，iáu有其他真tsē thang改進ê空間，特別是藉tio̍h禮拜ê多元化，來吸引少年人參加台語禮拜，tsit方面已經有真tsē專家提出真好ê建議，譬如講道內容ê生活化，少用神學術語、hō͘少年人參與禮拜中ê服事，使用power-point，多使用少年人喜愛ê音樂等等，lóng是少年人較喜愛ê禮拜方式。

多年前，筆者就已經teh思考「如何hō͘少年人歡喜做禮拜？」，「如何hō͘少年人聽bat講道？」等問題。當時，我發現語言kap型式確實是問題ê關鍵所在。思考一段時間了後，我ê感動kap心得是「語言是thang訓練ê！」後來，我馬上提出一個構想，mā馬上實施。我看tio̍h有kuá少年人(當我講「少年人」ê時，實際上lóng是指國中、高中以及一部分ê大學生)做禮拜ê時àⁿ頭teh sńg手機裡ê電動遊戲，甚至有時tshi-tshi-tshu̍h-tshu̍h講話，tsit種現象實在令我憂心。我就kā家己假設為「少年人」，「如果我聽m̄-bat台語，我án怎做禮拜？」，「台語真正hiah-ni̍h oh bat mah？」

後來，我因為tio̍h堅持台語傳統，聖靈感動我想出一kuá thang行ê方案。我首先買一大疊ê空白筆記本交hō͘學生團契ê會長，並tī禮拜tsìn前發hō͘每一位青年(in lóng是學生團契聖歌隊員)，鼓勵in記錄我ê講道文章。我ê配套措施，第一是雙重獎勵；第二是改進我講道ê用語。所謂「雙重獎勵」是，請in做禮拜時記錄牧師ê講章，我每週閱讀並評分，一季了後，「特優」者頒hō͘ in三百元ê文具禮券，「優等」者hō͘二百元ê禮券，一季ê中間只寫一pái ê mā hō͘伊「參加獎」50元禮券。為tio̍h呼籲家長ê關心kap投入，我tī禮拜中當場提問：「你ê gín-á ē-tàng聽bat koh記落來牧師ê講道，看有guā tsán！如果教會發hō͘伊三百元ê文具禮券，lín是m̄是願意相對koh再hō͘伊三百元來獎勵in？」會眾中有真tsē人興奮回答：「願意！」並且露出滿足ê bî-bî-á笑。

為tio̍h hō͘少年人歡喜聽講道，我開始放棄「講道八股」，無koh用填鴉式ê講法，放棄一kuá oh bat ê字眼，若一定ài使用，mā選擇少年人聽bat ê字眼，譬如「釋放」改成「解脫」或「hō͘內心輕鬆一kuá」，「事奉」改成「為主服務」或「為教會做一kuá事」、「屬靈」改成「koh-khah接近耶穌」或「心靈koh-khah接近天父」等等。講道中，我mā常利用生活化ê實例或信仰偉人ê見證，甚至引用一kuá現代科技ê問題，引申到信仰或心靈上ê思考，少年人lóng聽bat，並且記錄得真好，自然就願意參加台語禮拜。

為tio̍h達到教育訓練ê目的，我每一個禮拜評改作業簿。一開始，因為iáu未養成習慣，in大部分寫兩、三tsuā，siōng好ê mā寫六、七tsuā，就寫bē落去。但是，我hō͘ inê分數lóng「真甜」，寫兩、三tsuā ê得A-，寫六、七tsuā ê得A 。一開始，in會kā我抱怨講：「牧師！阮聽m̄-bat，所以bē曉寫！」我講：「lín tú-tú開始寫，ē-tàng寫án-ne已經真好loh！」經過不斷鼓勵了後，大約五∼十週了後，lóng能tuì兩、三tsuā進步到十tsuā左右，siōng好ê是寫完整一頁。實施三年後，已經有人寫到兩頁，目前平均有八成ê少年人lóng能the̍h到A＋＋ê成績。這表示in不但聽bat台語講道，而且ē-tàng掠tiâu重點記錄落來。有一位少年人參加學校ê資優檢定，老師所提出包羅萬象ê問題，伊lóng答得真好。母親問伊：「妳怎麼會曉回答？」伊講：「我做禮拜ê時若認真聽牧師講道就會答ah！」感謝主！伊成全了「語言」kap「教育」兩方面ê事工！ 猴能騎腳踏車，九官鳥能講「來食飯！」，我相信，靠tio̍h信心kap毅力行事，上帝凡事lóng能，當然，台灣ê少年人一定能聽bat台語講道，除非咱事先就投降或對家己母語早就存有自卑感。

使用台語禮拜真tsē好處：第一，祖孫三代同聚一堂做禮拜。這是我tuì美國人ê禮拜中觀察ê心得，如今mā實現tī家己ê教會中。目前，本會一堂禮拜lóng超過320人，只ē-sái講是上主ê憐憫kap恩典。有一pái，一位他教會ê執事(執業醫師)到我教會來做禮拜，伊講tī伊ê教會無法度享受tsit種氣氛：(一)少年人kap in ê父母同在一個聖殿敬拜主；(二)少年人lóng專心聽道並做筆記。Mā因此，伊kuí-nā-pái滴落來感動ê目屎，有真tsē家長mā不時tī禮拜中享受tsit-ê份感動。

第二，有kuá教會實施華語禮拜，少年人就真難kap父母或祖父母同齊敬拜上帝。此外，當in習慣tī家己tī另外一個時空做禮拜ê時，無形中形塑in家己ê信仰kap風格，甚至漸漸建立另外一種kap父母無仝ê思想kap信仰文化。我常聽tio̍h某一kuá教會華語禮拜ê同工kap小會以及長執會意見bē合(ha̍h)，甚至造成分裂，實在遺憾。 容我直言，華語禮拜ê另外一缺點是講師大部分m̄是牧師，因為若安排tī同一時段，牧師就無法度分身，只好請長老或執事去「代打」，大家lóng認為只要有「華語」就好，禮拜ê形式kap講道ê內容就m̄是hiah-ni̍h重要，suah致使漸漸忽略長老教會堅實而正統ê信仰。 第三，當無仝年齡層ê少年人lóng參加華語禮拜而且實施十年、二十年了後，真難想像教會ê大禮拜中會koh再使用台語。Hit時，使用台語禮拜ê信徒kap使用華語禮拜ê信徒之間，必然形成某一kuá程度ê隔閡，甚至造成信仰斷層ê現象。

鼓勵少年人參與台語禮拜，並m̄是完全無容允in tī教會使用華語，譬如tī團契中、野外活動中、或查經研經中，lóng thang跟tuè語言ê理解程度使用華語，或台語kap華語並用。

根據以上ê思考、觀察、實驗了後，筆者以siōng真誠ê心建議各教會ê牧長kap同工，若m̄是不得已，請mài開設華語禮拜。雖然，堅持hō͘少年人參與台語禮拜所beh付出ê精神kap時間lóng相對khah-tsē；但是看tio̍h少年人kap教會ê融和kap成長，絕對m̄是一句「享受」或「成就感」所ē-tàng形容！畢竟，信仰教育kap事工發展lóng bē-tàng抄短路便宜行事，必須一步一腳印、長期耕耘落去！咱大家同齊來phah拚pah！