《主編e5話》

 | | | 轉寄

我前目盲，taⁿ有看見

作者 Tsuniok 2007.05.13

我開始台語文運動就決心bueh做台語點字，hō͘盲朋友也有機會讀台語。

甘為霖牧師uì廈門引進白話字點字系統，hō͘盲朋友ē-tàng透過點字來受教育。國語政策迫害台灣母語，目前台語點字kan-ta tshun雙連教會盲朋友teh使用。原本全台語點字ê週報，連聖經部分台灣改華語，台語聖詩佳哉吳月雲幹事(盲朋友)生前有製作台語版本。

我每pái tńg來台灣猶原ài去雙連教會，kap盲朋友坐tàu陣禮拜是我ê最愛。我kā台語點字系統定義好勢了後，就請信望愛網站蔡哲民兄寫台語羅馬字點字轉換程式。Taⁿ我ē-tàng將白話字聖經節轉換做台羅版，koh再轉換做點字版hō͘許梅芳幹事(盲朋友)列印週報。

禮拜中讀tio̍h週報聖經kap台頂司會者讀ê台語聖經仝款，「O-ló主！感謝主！」ê聲，hō͘我歡喜kah tuè-teh講「O-ló主！感謝主！」

「道成肉體」ê上主開嘴講台語，盲朋友ē-tàng koh再讀tio̍h台語聖經ê週報，in-ê歡喜mā是我ê歡喜。

哲民兄kap我當teh設計「西羅亞台語信望愛」網站，目前台語信望愛內面約二百guā萬字白話字，是盲朋友渴望ài讀ê靈性米糧。請代禱：願「我前目盲，taⁿ有看見」早日實現！