《主編e5話》

 | | | 轉寄

咱來關心盲朋友ê母語讀寫

作者 Lîm Tsùn-io̍k 2007.10.21

母語hō͘咱對所khiā起ê土地有感情，咱來關心盲朋友ê母語讀寫，這需要台語點字系統ê建立。

台語點字系統是1885年甘為霖牧師(Rev. William Campbell)引進ê廈門音白話字點字系統，配合台灣長老教會早期重視白話字ê推廣，tsit-ê點字系統mā利益tsē-tsē盲人ê教育kap信仰追求。

國民黨政府流亡來台了後，以殖民者ê作法來推行錯誤ê國語政策，迫害台灣母語，盲校無koh教台語點字，台語漸漸行入死亡ê路，現此時可能kan-ta雙連教會ê盲朋友teh使用，週報ê聖經kap聖詩使用台語點字。

2001年，我開始踏入台語tsit條路，就下決心bueh將台語點字救活。因為台語拼音系統一直到2006年9月29日tsiah整合好勢，我就請華語點字金點一號/超點開發主導人洪錫銘老師來進行台語點字ê電腦化，koh請台語點字ê精英石賢哲、龔素珠、許梅芳、楊錦鍾來研討點字kap台羅拼音方案ê定義。Siōng重要ê是信望愛網站ê蔡哲民教授全心投入，將我整理好勢ê台羅kap點字對照表，tī台語信望愛下腳設台羅點字轉換工具( http://sloan.fhl.net/tran/ )，同時也設立西羅亞信望愛( http://sloan.fhl.net )hō͘盲朋友試讀。 咱台語信望愛有開發真tsē台語工具，用華語轉台語工具ē-tàng kā華語文章轉做漢羅台語，koh用漢羅轉全羅工具kā伊轉做全羅台語，koh用教羅轉台羅工具kā伊轉做台羅，án-ne就ē-tàng轉做台語點字。Tsit-ê西羅亞信望愛網站今後ē-tàng提供盲朋友無限ê台語讀物，這需要大家來tàu相kāng phah拚。

類似超點ê雙向(台羅→台語點字/台語點字→台羅)軟體若開發好勢，盲朋友ê台語作品mā ē-tàng上網hō͘盲朋友kap明眼人來讀，這to̍h是聖經所講ê「上主(上帝)hō͘失明ê koh看見」，願一切榮耀歸hō͘咱ê主！