《主編e5話》

 | | | 轉寄

100個祈禱義工

作者 陳小小 2009.05.03

我有兩個朋友，感覺信望愛ê事工真有意義。但是，in生活中無juā需要用tio̍h電腦，mā真少上網，一個甚至連 email 都無。M̄-koh，in對我講，真想beh成做信望愛ê義工。

He to̍h是兩個月前，我ê母親突然離世，除了傷痛，iáu-beh處理真tsē後事，走戶政、走地政、走郵局、銀行、勞健保局…，原本ê例行事務mā bē-sái停，kui-ê腦袋糨糊一片，真tsē過去kah-ná桌頂ni柑ê事，hit時辦起來lóng感覺非常食力，in就講：「我bueh為你守望祈禱」。

就突然看見kap電腦網路無緣ê in ē-tàng做什麼義工？he就是擔任守望祈禱ê義工，咱真正需要祈禱彼此支持。

信望愛ê義工，有甲狀腺亢進心悸失眠ê；有gín-á是自閉症需要格外費心照顧養育ê；有ta-ke患tio̍h癌症tio̍h陪伴最後一程ê；有博士論文今年底beh完成；iáu有teh等換腎；有進行性肌肉失養症、身心症、鬱症，tú-tú電話知影某位義工重鬱症發作，tsit兩工就beh去tuà院loh……。

每一個義工ê生命lóng hō͘我佩服，in生活裡各有難處，但卻iáu ē-tàng把握時間來服事主。Mā是因為án-ne，雖然遭遇母喪，我mā無願意停落信望愛ê事工，因為iáu是有零碎ê時間thang處理網頁。信望愛義工群若tī世俗命理學來看，就是衰kah bē講得帶衰ê歹命人。但上帝卻賞賜夠用ê恩典，hō͘咱「甚麼時tsūn軟弱，甚麼時tsūn就jú強。」（哥林多後書十二章10節）這to̍h是基督信仰對「成功」下ê嶄新定義，基督徒面對人生苦難，活出無仝ê生命。

信望愛有了祈禱義工，用祈禱托tiâu每一位義工，我相信ná親像我hit兩位朋友，用祈禱托tiâu腳步沈重ê我，hō͘我會得thang照平常仝款完成真tsē該做ê事，眾義工mā會服事koh-khah有力koh-khah jú強。

事實上，m̄-nā hit兩位朋友，其他義工當in知影我ê情況時，mā lóng來電、來email鼓勵打氣，以及默默代禱支持。甚至iáu有一位讀者koh-khah敏銳，伊只不過看tio̍h一篇文章《人生三明治》就來信請安。Tsiah-ni̍h-tsē人ê關懷，hō͘差一點á瀕臨輕鬱症ê我，真緊行向陽光，並且頭腦恢復正常，甚至iáu有能力，接一個大學團契輔導事工。

所以，tī tsia，信望愛徵求100位祈禱義工。為tio̍h信望愛眾義工ê身心靈情況祈禱，為tio̍h信望愛ê事工祈禱，以及信望愛頂面友好機構（創文、希望森林、學園、校園、路加、勵馨、新儷人、傳揚、工福、國際日報、台灣聖經公會、香港聖經公會、香港基督徒學生福音團契）祈禱。

尤其，時下全球經濟不景氣，真tsē機構lóng會有財務食ân ê問題。但，祈禱上帝賞賜夠用ê智慧，hō͘大陣錢少iáu是ē-tàng辦大事。Ná親像信望愛十幾年，錢一直無tsē，因為倚靠上帝，卻iáu是ē-tàng有真tsē事工推出。所以徵求100位祈禱義工mā為tsiah-ê機構祈禱，hō͘上帝賜hō͘ in夠用ê恩典。

如果你有感動beh ài擔任信望愛ê祈禱義工，煩請 email hō͘我。 Virginia@fhl.net或 virginiafhl@gmail.com 並tī email告知，真實姓名、筆名（若tio̍h用筆名公布）、地址。我會公布tsit 100位祈禱義工名單。講到地址是為tio̍h beh郵寄掌上型ê華語聖經朗讀機hō͘ tsit 100 位祈禱義工。

Tsit 100份my-iBible聖經朗讀機又koh是另外一個美好ê故事。My-iBible是一個新加坡公司，由一陣熱愛將上帝話語傳遍ê基督徒所組成。In出版華語聖經朗讀機了後想beh出版台語聖經朗讀機，了後來tshuē-tio̍h信望愛tsia。My-iBible真感動信望愛義工為上帝擺上，便捐贈100具台、華語聖經朗讀機，希望咱幫忙送hō͘需要ê人。

我想，就將tsit-ê重大責任交hō͘ tsit 100位祈禱義工。如果家己有需要，就收落來。如果家己無需要，就幫忙kā tsit-ê聖經朗讀機轉交hō͘需要ê親友、同事、厝邊。

另外，萬一祈禱義工人數超過100位，後面報名ê祈禱義工，阮就郵寄市面上已經買bē-tio̍h ê珍本聖經《委辦譯本》。同上，如果家己有需要，就收落來。如果家己無需要，就幫忙kā tsit-ê珍本聖經轉交hō͘需要ê親友、同事、厝邊。

不管你是tuà-tī美加、日韓、或是中亞、非洲等國家，只要你願意成做祈禱義工，阮lóng會kā my-iBible聖經朗讀機或《委辦譯本》寄過去。郵資信望愛出，m̄免擔心。傳揚上帝ê話語到世界各地，tsit-ê一向是阮ê榮幸。

陳小小敬上