《主編e5話》

 | | | 轉寄

信望愛FHL Taigi IME台語輸入法報導

作者 潘為欣 代撰 2009.05.24

信望愛FHL Taigi IME台語輸入法是由台語信望愛負責人林俊育先生發起募款，集合台語界有志ê奉獻，請磐石公司設計程式，陳柏中教授kap蕭平治老師整理詞庫。所以這套輸入法ê產生是台語界有志集結心力共同來完成ê,由此可見台語界人士團結一至ê超強向心力，為tio̍h台語文án-nē用心phah拚，tsit份心力真使人感動。

FHL Taigi IME台語輸入法ē-sài講是目前siāng好用ê輸入法，以下tio̍h來紹介tsit套輸入法ê優點。這套輸入法ē-tàng phah台羅版kap白話字(教羅版)，只要uì輸入法ê「設定」內底去勾選台羅版a̍h是白話字(教羅版)，tio̍h ē-sài方便phah出你beh ài ê拼音版本，taⁿ tsit點tio̍h是tsit套軟體siōng大ê好處，過去ê輸入法lóng是單一套拼音版本，假使有慣習使用兩種拼音phah字ê人tio̍h必須ài灌兩種軟體，但是信望愛台語輸入法將tsit個麻煩問題解決ah，安裝一套輸入法tio̍h hō͘你簡單tī兩種拼音之間轉換，實在是真利便。

而且tsit套輸入法koh ē-sài hō͘你選擇全羅輸入法kap漢羅輸入法。若是選擇全羅輸入法，tī羅馬字後面直接phah數字調號，軟體tio̍h ē直接將數字調號轉做unicode調號，m̄免koh透過TP軟體轉調號。若是選擇漢羅輸入法，將beh ài ê詞ê羅馬字phah khí-khì,tshi̍h SPACE鍵，漢字tio̍h會走出來，漢字邊á koh有括弧標示tsit個詞ê羅馬字，若是beh選擇ho͘羅馬字出現，真簡單一個動作tio̍h ē-tàng完成，仝時加tshi̍h SHIFT鍵tio̍h會走出已經轉做unicode調號ê羅馬字ah，整體設計tio̍h是hō͘人感覺tsiok利便，將所有功能集結做夥，hō͘你自由選擇使用，用過ê人保證滿意。另外tsit套輸入法mā結合林俊育先生進前開發ê輕鬆輸入法ê特色，三音節以上ê詞，phah音節首碼字母tio̍h ē走出字詞，tsit點ē-sài解決大家phah字母ê時間，尤其對phah字速度khah慢ê人來講，真正是一大福音。

使用信望愛台語輸入法mā免驚你beh ài ê漢字走bē出來，若是輸出ê漢字顯示bē出來，代表電腦內底無tsit-ê字，tsit-ê輸入法有uì越南漢字取得 Han-Nom_A kap Han-Nom_B字型，去信望愛網站downluad“ Han-Nom_AB字型 ”kap支援台語ê Unicode字型”，裝入去你ê電腦，kā無顯示出來ê字ê 字型換做 Han-Nom_A a̍h是 Han-nom_B，漢字就會顯示出來ah。此外，tsit套輸入法koh有親像日語漢字頂面ē-sài標註假名ê功能，tī台語漢字頂頭ē-sài加註羅馬字，這是空前絕後ê創舉，目前所有輸入法lóng無tsit種功能，信望愛台語輸入法做到ah，對編寫台語教材ê老師來講，kám m̄是一個福音leh。

信望愛台語輸入法好處不只頂面講ê hia,伊koh有一個高明ê所在，伊有設計「自訂詞庫」tī設定選項內底，若是原底詞庫無你ài ê詞，ē-sài家己加詞入去詞庫內底，建立一個屬於你家己ê個人詞庫，這是以前ê輸入法所做bē到ê所在。你若慣習 「也輕鬆(YKS)輸入法」，將也輕鬆ê“台語詞庫KKS_KauloV3.00.cin” kap“客語詞庫 KKS_Hakka.cin”複製入去 「自定詞庫」ê “% tsardef begin” kap “% tsardef begin”之間，就ē-tàng 「也輕鬆(YKS)輸入法」kap tsit-ê新輸入法混合來phah字。所以信望愛FHL Taigi IME台語輸入法m̄-nā是設計hō͘ 台語使用者使用ê輸入法，客語族群也是tsit套輸入法照顧ê對象。

Tī tsia特別提起林俊育先生，伊無論人tī美國a̍h-sī台灣，總是盡心盡力為台語文phah拚，伊了解台語文ài電腦化tsiah ē-sài向外界廣闊推銷咱台灣ê文化，所以自kuí冬前伊tio̍h全心投入台語電腦這個領域，開發台語、客語輸入法。伊秉持精益求精ê精神，一直有心來替大家開發新ê台語文輸入法，咱今á日tsiah有tsit套功能完備koh便利ê輸入法，台語界有親像俊育先生án-nē ê人才，實在是咱ê福氣。