《主編e5話》

 | | | 轉寄

搶救靈魂互相支援

作者 陳小小 2013.02.10

戰爭片一個常見ê畫面，我總是無法度認同。槍林彈雨、砲火猛烈，男主角看tio̍h家己同袍陣亡倒落去，就放下家己ê武器，攬tiâu好友痛哭。我一向笑講「kám-bē siuⁿ過濫情！！」相thâi若ē-tàng huah卡暫停，專心來舉哀。真想beh用手指鑿男主角ê頭殼，「加悲傷一個五分鐘，就會koh再加死一個隊友eh。」

最近，我深深認bat tsit-ê「濫情」，三年前遭遇母親忽然間往生，頂個月底koh遭遇類似ê狀況，父親旅遊猝死，hō͘人lóng無心理準備。Lóng iáu未tuì母喪完全恢復，taⁿ koh加上父喪傷痛，尤其是父親iáu未信主，我已經m̄知影面上ê表情該怎樣控制，日子ài怎樣喜樂開心來過，工作ài怎樣充滿力量來執行。

就tī m̄知怎樣tsiah好ê時，上帝hō͘我想起tsit-ê戰爭片ê畫面。我ná親像男主角為tio̍h死者痛哭，陷落tī hit內面，久久無法度自拔。Kah-ná聽tio̍h上帝細聲teh講：「你thang艱苦心，m̄-koh bē-sái siuⁿ久。因為tī屬靈戰場，加悲傷一個五分鐘，就會減救一個人。」信望愛網站thang講是上帝ê軍團，來自無仝教會ê基督徒義工ná陸、海、空三軍，各有上帝賞賜ê無仝恩賜。阮咱透過網路聚集力量，同齊收割稻埕已經熟ê五穀。M̄-koh每一個人mā lóng有各自ê人生苦難ài面對，另外一個義工ê小弟mā tī最近車禍喪生，有kuá義工是厝裡有需要長期看護ê長輩或病人，有kuá則是gín-á有kuá問題，tio̍h用真tsē精力去培育。...禁bē-tiâu想tio̍h提摩太後書二章3-4節保羅ê勉勵：「你tio̍h kah我同受苦難，kah-ná基督耶穌ê精兵。凡若tī軍中做兵ê，無hō͘世務纏身，thang好hō͘ hit-ê招伊做兵ê人喜樂。」

父親往生hit日，to̍h是台北重新長老教會開放講台，hō͘信望愛去報告網路事工。教會牧師黃春生，是信望愛 《牧師，我有問題》專欄ê主要義工寫手。伊ê文字簡潔優美，m̄-koh siōng特別是牽涉ê題目除了基本ê教義問答以外，koh-khah tsē是日常生活一般人會對基督教ê提問，像講《結婚手指該掛tī tó一指？》、《錢，beh借á是m̄借？》

黃春生牧師m̄-nā慷慨捐出文章，mā感動伊所牧ê會眾，同齊來關心網路福音事工。因為長老教會主要語言是台語，所以阮請台語信望愛ê總編林俊育長老去報告。(真tsē義工雖然會講台語，m̄-koh無能力全程用台語報告kah祈禱，á我ê台語是爛到爆。)

林俊育長老對我講，伊去了tshuah一tiô。因為重新長老教會竟然設定hit工主日是「信望愛基金會主日」。阮竟然有幸ná長老會年度排定「環境主日」、「婦女事工紀念主日」、「主日學奉獻主日」、「文字傳道事工紀念主日」、「國內外宣道奉獻主日」同等重要。In對信望愛所下力ê網路福音事工，kā伊hiah-ni̍h大ê肯定。

我上網瀏覽補聽hit工ê主日崇拜錄影，林俊育長老向會眾紹介信望愛ê緣起，「十guā年前ê tsit群少年學生m̄是為tio̍h做網站來做網站，卻是有做網站ê能力，願意hō͘上帝來用。」我沿路聽林長老報告，沿路回想tio̍h tsit十guā年來，上帝不斷差派koh-khah tsē ê人投入網路福音事工，槍林彈雨、砲火猛烈，tī屬靈戰場為主爭戰，搶救靈魂。

林長老ê報告真好。突然有一個koh-khah深刻ê體會，he就是mā可能咱lóng有軟弱ê時tsūn，m̄-koh上帝hō͘咱互相支援。(2012.05.27)